ၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၼႂ်းၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ  ႁူမ်ႈၵၼ်ၸတ်းပၢင်ၵႅဝ်ႈ တိူင်ႇၵၢဝ်ႇ ႁႂ်ႈၵေးၼမ်ႉတူႈ လွင်ႈလႆယိုၼ်းယၢဝ်းၵႂႃႇၶၢဝ်းၼႃႈသေ ႁူမ်ႈၵၼ်သၢၼ်ၶတ်း ၵၢၼ်ၵေႃႇသၢင်ႈ ၾၢႆ ၼိူဝ်မႄႈၼမ်ႉတူႈ။

ဝၼ်းတီႈ 21/3/2017 ၵေႃႁူမ်ႈသၢင်ႈၸဝ်ႈႁႆႈၸဝ်ႈၼႃး ဢွၼ်ႁူဝ်ႁႅင်းၵူၼ်း 100ပၢႆ ၸၢတ်းႁဵတ်းပၢင်ၵႅဝ်ႈ ႁိမ်းၾင်ႇၼမ်ႉတူႈ တီႈတႃႈတႄႈ သေ တိူင်ႇၵၢဝ်ႇႁႂ်ႈမႄႈၼမ်ႉတူႈ လႆႈလွတ်ႈလႅဝ်းထၢင်ႇႁၢင်ႈ ယူႇၵိုၵ်း ၽႅၼ်ႇလိၼ်ၽိုၼ်ၼႆႉၵႂႃႇၶၢဝ်းယၢဝ်း၊ ပိူင်လူင်တႄႉ သၢၼ်မိုဝ်းသေ ၼႄၾၢင်ႁၢင်ႈ ႁႂ်ႈၵိုတ်းယိုတ်း ၵၢၼ်ၵေႃႇသၢင်ႈၾၢႆ ၼိူဝ်မႄႈၼမ်ႉတူႈ။


ၽူႈၶဝ်ႈၵေႃပွင်ပဵၼ်ပၢင်ပွႆး တိူင်ႇၵၢဝ်ႇႁႂ်ႈၵေးၼမ်ႉတူႈ လႄႈ ၵူၼ်းယူႇႁိမ်းႁွမ်းလွတ်ႈၽေးၶဵၼ် ၸၢႆးထမ်းဢၢႆး လၢတ်ႈဝႃႈ - ယိူင်းဢၢၼ်းႁဝ်းၶႃႈတႄႉ တႃႇသၢၼ်ၶတ်း ၵၢၼ်သၢင်ႈၾၢႆ ၼိူဝ်ၵေးၼမ်ႉတူႈ သေ ႁႂ်ႈၵူၼ်းဝၢၼ်ႈၵူၼ်းသူၼ် ၸိူဝ်းယူႇႁိမ်းႁွမ်း ႁၼ်ဢဵၼ်ႁႅင်းသေ ၶဝ်ႈပႃးတူင်ႉၼိုင် ႁဵတ်းသုၼ်ႇလႆႈ ၵူၼ်းဝၢၼ်ႈၵူၼ်းမိူင်း” - ဝႃႈၼႆ။


ပၢင်ယွၼ်းသူး တိူင်ႇၵၢဝ်ႇႁႂ်ႈမႄႈၼမ်ႉတူႈ လွတ်ႈၽေး ထၢင်ႇႁၢင်ႈလႆလွတ်ႈလႅဝ်းၼၼ်ႉ ၸတ်းႁဵတ်း ၵၢင်ၼႂ်ၵဝ်ႈမူင်း တေႃႇထိုင်ၵၢင်ဝၼ်းတဵင်ႈ။ ပၢင်ယွၼ်းသူးၵမ်းၼႆႉ ပဵၼ် ပွၵ်ႈၵမ်းထူၼ်ႈ(3)။ မီးၽူႈယႂ်ႇ ၵူၼ်းလူင် ပႃႇတီႇသိူဝ်ၽိူၵ်ႇ လုင်းပၢၼ်းသႃႇ၊ ပႃႇတီႇႁူဝ်သိူဝ် SNLD လုင်းသူၺ်ႇတူဝ်း၊ ၽူႈယႂ်ႇၵူၼ်း လူင် ၵၢင်ႉၵႄႇ ၸိူဝ်းယူႇၸွမ်းသၢပ်ႇၼမ်ႉတူႈ မႃးၶဝ်ႈႁူမ်ႈ ။


ယိင်းလၢဝ်ၶမ်း လၢတ်ႈဝႃႈ - “ၵၢၼ်ႁဵတ်းၾၢႆၼႆႉ တေဢမ်ႇပၼ်ၽွၼ်းလီ တႃႇၵူၼ်းဝၢၼ်ႈၵူၼ်းသူၼ်၊ တေႁဵတ်းႁႂ်ႈၵူၼ်းဝၢၼ်ႈ  ထူပ်းၽေးၼမ် သေဢမ်ႇၵႃး ႁၼ်ထိုင်ဝႃႈတေမီးၽွၼ်းၸႃႉၼမ်လိူဝ် ၽွၼ်းလီ လႄႈ ႁဝ်းၶႃႈတိုၼ်းဢမ်ႇၽွမ်ႉ တႃႇႁဵတ်းၾၢႆတီႈၼႆႈသေ ဢွၼ်ၵၼ်ယုၵ်ႉပၢႆႉၼႄၵၢင်ၸႂ် လွင်ႈႁဝ်းၶႃႈ ဢမ်ႇႁပ်ႉ ဢမ်ႇႁၼ်လီၸွမ်း လွင်ႈႁဵတ်းၾၢႆတဵင်ႁႅတ်ႉၼမ်ႉတူႈ” - ဝႃႈၼႆ။


ၼိူဝ်ၵေးၼမ်ႉတူႈၼႆႉ လူင်ပွင်ၸိုင်ႈ မွပ်ႈပၼ်ၶွမ်ႊပၼီႊ လၢႆလၢႆဢၼ်သေ ဝၢင်းၽႅၼ်ႁဵတ်းၾၢႆ လၢႆလၢႆတီႈ။ ဢၼ်တႄႇႁဵတ်းဝႆႉၵေႃႈမီး။ မိူၼ်ႇၾၢႆလီလု(တႃႈတႄႈ)၊ ၾၢႆတႃႈလူင်(အထက်ရဲရွာ)၊ ၾၢႆဢလႄႇယႄးယႂႃႇ (ၼႂ်းၸႄႈဝဵင်းၼွင်ၶဵဝ်)၊ ဢွၵ်ႉယႄးယႂႃႇ (ၼႂ်းတိူင်းတႃႈလိူဝ်ႇ) ၸဵမ်ၸိူဝ်းၼႆႉ။

လူင်ပွင်ၸိုင်ႈမၢၼ်ႈ ၼေႇပျီႇတေႃႇၼႆႉ ပိုၼ်ၽၢဝ်ႇၵိုတ်းယင်ႉၵၢၼ်ၵေႃႇသၢင်ႈၾၢႆ ၼမ်ႉၵဵဝ် (ၼမ်ႉၵဵဝ်ႇၶွႆႈ/မျိတ်ႉၸူင်ႇ) ယွၼ်ႉၵူၼ်းမိူင်းမၢၼ်ႈ မိူင်းၶၢင် သၢၼ်ၶတ်းသေ သမ်ႉတူၵ်းလူင်း တၢင်းမိူင်းၶႄႇမိူင်းထႆး ႁႂ်ႈၵေႃႇသၢင်ႈၾၢႆလူင် ၼႂ်းမိူင်းတႆ လၢႆလၢႆတီႈ။ မိူၼ်ၼင်ႇ ၼိူဝ်ၼမ်ႉၶူင်းၵေႃႈ မီးၶူင်းၵၢၼ်ၾၢႆလူင်မိူင်းတူၼ်၊ ၾၢႆၼွင်ၾႃႉ (တၢင်ႉယၢၼ်း)၊ ၾၢႆမၢၼ်ႈတူၼ်း၊ ၾၢႆၵုၼ်လူင် ၸဵမ်ၸိူဝ်းၼႆႉ။


ၽူႈယႂ်ႇၵူၼ်းလူင်တႆး မိူၼ်ၼင်ႇၸဝ်ႈၶုၼ်ထုၼ်းဢူး ႁူဝ်ပဝ်ႈလူင် ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ၵေႃႈ ပိုၼ်ၽၢဝ်ႇတႅၵ်ႇလႅင်းၸွမ်းၼင်ႇၵၢင်ၸႂ်ၵူၼ်းမိူင်း ဝႃႈတိုၼ်းဢမ်ႇယွမ်းႁပ်ႉၵၢၼ်သၢင်ႈၾၢႆ ၼိူဝ်မႄႈၼမ်ႉၼႂ်းမိူင်းတႆး။ ၸွမ်သိုၵ်းလူင်ယွတ်ႈသိုၵ်း ၵေႃႈတေႃႈၼင်ႇၼၼ် တူၵ်ႇလၢတ်ႈ မိူဝ်ႈဝၼ်းၸိူဝ်ႉၸၢတ်ႈၼၼ်ႉဝႃႈ ပေႃးဢမ်ႇပႃးၵၢင်ၸႂ်ၵူၼ်းမိူင်း တိုၼ်းဢမ်ႇပၼ်ၽႂ်ႁဵတ်းၾၢႆ ဝႃႈၼႆ။