ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈတႆး ဢၼ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်ၶပ်းၶိုင်ယူႇၼၼ်ႉ ဢၢၼ်းတေၸတ်းႁဵတ်းတီႈတူၼ်ႈတီး။ ၵူၺ်းၵႃႈ ၾၢႆႇတပ်ႉသိုၵ်းမၢၼ်ႈ ၸႂ်ႉၵႂႃႇႁဵတ်းတီႈမိူင်းတေႃႉ မိူင်းထႃး မိူင်းပၼ်ႇ ၼႂ်းၼႃႈလိၼ် ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး ၵုမ်းၵမ် ဝႃႈၼႆဝႆႉ။ ၵဵဝ်ႇၵပ်းလွင်ႈၼႆႉ ပႃႇတီႇသိူဝ်ၽိူၵ်ႇ ဢၼ်တူၵ်းၵမ်းတေလႆႈႁပ်ႉပဵၼ် ႁူဝ်ပဝ်ႈ CSSU ၼၼ်ႉႁၼ်ထိုင်ၸိူင်ႉႁိုဝ်။ ၼၢင်းသႅင်ၽူးတွင်ႈထၢမ် ၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇဝႆႉၼင်ႇၼႆ။

ထၢမ်-ပၢင်ၵုမ်ၵၢၼ်မိူင်းၸၼ်ႉၸိူဝ်ႉၸၢတ်ႈတႆး ဢၼ်ၺႃးႁၢမ်ႈႁဵတ်းတီႈတူၼ်ႈတီးလႄႈပၢင်လူင်ၼႆႉ ႁၼ်ထိုင်ၸိူင်ႉႁိုဝ်ၶႃႈ?။


တွပ်ႇ-ပၢင်ၵုမ်လူင်ၸၼ်ႉၸိူဝ်ႉၸၢတ်ႈတႆးၼႆႉ တီႈတႄႉတေလႆႈႁဵတ်းတီႈဝဵင်းတူၼ်ႈတီး၊ ၵွပ်ႈဝႃႈတူၼ်ႈတီးၼႆႉ ပဵၼ်ဝဵင်းလူင်ၸိုင်ႈတႆး။ ဢၼ်ၸႂ်ႉၵႂႃႇႁဵတ်းတီႈမိူင်းတေႃႉမိူင်းထႃးဢၼ်ဝႃႈၼၼ်ႉ မၼ်းၵႆၼႃႇၼႃႇ။ လွင်ႈယူႇလွင်ႈသဝ်းလွင်ႈၵႂႃႇၵႂႃႇမႃးမႃးမၼ်းၵေႃႈယၢပ်ႇတႄႉတႄႉ။ လွင်ႈၵိၼ်လွင်ႈယႅမ်ႉလွင်ႈတီႈလိုဝ်ႈ တေယၢပ်ႇၽိုတ်ႇမူတ်း။ ဢၼ်လီသေပိူၼ်ႈတႄႉႁဵတ်းတီႈတူၼ်ႈတီးၼၼ်ႉယဝ်ႉ။


ထၢမ်-ယွၼ်ႉသင်ၶႃႈ?။


တွပ်ႇ-ပေႃးႁဝ်းမႃးတူၺ်းယၢင်း ၶဝ်ႁဵတ်းပၢင်ၵုမ်ၸိူဝ်ႉၸၢတ်ႈယၢင်းတီႈၽႃဢၢင်ႇ။ ၽႃဢၢင်ႇၼႆႉ ပဵၼ်ဝဵင်းလူင်မိူင်းယၢင်း။ ၶဝ်လႆႈႁဵတ်းလွတ်ႈလွတ်ႈလႅဝ်းလႅဝ်း။ ပေႃးတူၺ်းတႆးႁဝ်းၼႆ  RCSS ၵေႃႈ လူင်းလၢႆးမိုဝ်းၵိုတ်းတိုၵ်း NCA ယဝ်ႉ။ မိူၼ်ၼင်ႇယၢင်းၶဝ်လႆႈႁဵတ်းတီႈၽႃဢၢင်ႇၼၼ်ႉ ယူႇတီႈမူႇၸုမ်း ယိပ်းၵွင်ႈၵၢင်ႇ  RCSS ၼႆႉလူင်းလၢႆးမိုဝ်းယဝ်ႉလႄႈ ၶဝ်ၶႂ်ႈႁဵတ်းတီႈတူၼ်ႈတီးၵေႃႈတၵ်းလႆႈပၼ်ႁဵတ်း၊  မၼ်းၸင်ႇတေၽဵင်ႇပဵင်းၵၼ်ယဝ်ႉ။ ပေႃးဢမ်ႇပၼ်ႁဵတ်းတီႈဝဵင်းတူၼ်ႈတီးၼႆ ဢမ်ႇၸႂ်ႈလၢႆးမၼ်းယဝ်ႉ။


ထၢမ်-ပေႃး  CSSU ႁဵတ်းပၢင်ၵုမ်ၵမ်းတေမႃးၼႆႉ ပေႃးဝႃႈပုတ်ႈလၢႆႈႁူဝ်ပဝ်ႈ၊ တေပၼ်ပႃႇတီႇသိူဝ်ၽိူၵ်ႇႁဵတ်းႁူဝ်ပဝ်ႈၼႆ ၸွင်ႇတေႁပ်ႉၶႃႈ?။


တွပ်ႇ-ယူႇတီႈတူဝ်လုင်းတႄႉၶႂ်ႈႁပ်ႉပဵၼ်ႁူဝ်ပဝ်ႈယူႇ။ ၵူၺ်းၵႃႈပႃႇတီႇသိူဝ်ၽိူၵ်ႇၼႆႉ မၼ်းဢမ်ႇၸႂ်ႈၵေႃႉလဵဝ်ႁဵတ်းၵၢၼ်ၵူၺ်း။ ႁဝ်းတေလႆႈႁွင်ႉပၢင်ၵုမ်ၽူႈပွင်ၵၢၼ်ငဝ်ႈငုၼ်းယဝ်ႉသေ ႁဝ်းတေလႆႈတႅပ်းတတ်းၵၼ်ၼႂ်းပၢင်ၵုမ်၊ ဢုပ်ႇၵၼ်လူင်ႉလူင်ႉလႅင်းလႅင်းသေၸင်ႇတေတႅပ်းတတ်း။


ထၢမ်-ပၢင်ၵုမ်ငဝ်ႈငုၼ်းပႃႇတီႇသိူဝ်ၽိူၵ်ႇ သမ်ႉတေႁဵတ်းမိူဝ်ႈလႂ်ၶႃႈ?။


တွပ်ႇ-လႅပ်ႈတေပဵၼ်ၼႂ်းလိူၼ်ဢေႊပရိူဝ်ႊ (April) ။


ထၢမ်-ပေႃးပၢင်ၵုမ်ငဝ်ႈငုၼ်းသိူဝ်ၽိူၵ်ႇၼႆ တေတႅပ်းတတ်းတႃႇႁဵတ်းႁူဝ်ပဝ်ႈ  CSSU ယဝ်ႉၶႃႈႁႃႉ?။


တွပ်ႇ- CSSU ၵေႃႈ ၶဝ်ဢွၵ်ႇလိၵ်ႈမႃးယဝ်ႉလူး ပၢင်ၵုမ်ၶဝ်ယင်းပႆႇပႃႈပဵၼ်ႁဵတ်းၼႆ။ ၸၢႆးၺုၼ်ႉလုၼ်ႇ သူင်ႇလိၵ်ႈမႃးတီႈႁဝ်းယူႇ လွင်ႈဝႃႈပႆႇပဵၼ်ႁဵတ်းၼႂ်းလိူၼ်မၢတ်ႊၶျ်ၼႆႉၼႆၼၼ်ႉ၊ ပွင်ႇဝႃႈတႃႇတေ ဢုပ်ႇၵုမ်ၵၼ်သေပၼ်သိူဝ်ၽိူၵ်ႇၼႆႉ ၶဝ်ပႆႇပဵၼ်လႆႈ။


ထၢမ်-ယူႇတီႈႁူဝ်ပဝ်ႈသေ လွင်ႈၶၢႆႉလိူၼ်ႈပၢင်ၵုမ်ၼႆႉႁၼ်ထိုင်ၸိူင်ႉႁိုဝ်ၶႃႈ?။


တွပ်ႇ-ဢမ်ႇမီးပၼ်ႁႃသင်၊ ဢမ်ႇလူဝ်ႇႁိပ်ႈၼႅတ်ႈၵေႃႈလႆႈပၢင်ၵုမ်ၼၼ်ႉ၊ ၵၢၼ်ဢၼ်ဝႃႈၼႆႉဢမ်ႇမီးပိူင်တၢႆလူး။


ထၢမ်-ပၢင်လိူၵ်ႈတင်ႈသွမ်ႈၵေႃႈ ၸမ်မႃးယဝ်ႉလႄႈ ပႃႇတီႇသိူဝ်ၽိူၵ်ႇ လူင်းသူၼ်းတုမ်တႃႇပၢင်လိူၵ်ႈတင်ႈသွမ်ႈၼႆႉ မီးၸိူင်ႉႁိုဝ်ၽွင်ႈၶႃႈ?။


တွပ်ႇ-ပႃႇတီႇသိူဝ်ၽိူၵ်ႇလူင်းသူၼ်းတုမ်ၼႆႉ ငဝ်းလၢႆးၶႅမ်ႉလႅပ်ႈယူႇ။ ၼိုင်ႈတီႈတီႈၼႆႉမီးၵူၼ်းဝၢၼ်ႈၵူၼ်းမိူင်း 400-500 ၵေႃႉမႃးၶဝ်ႈႁူမ်ႈထွမ်ႇၸွမ်း။


ထၢမ်-ငဝ်းလၢႆးမီးၸိူင်ႉႁိုဝ်?။


တွပ်ႇ-ႁဝ်းထၢင်ႇဝႃႈႁဝ်းတေပေႉၵူၺ်းၼႃ၊ ပေႃးဢမ်ႇမီးလွင်ႈတဵၵ်းတဵင်သင်။


ထၢမ်-ငဝ်းလၢႆးသူၼ်းတုမ်ၼႆႉထိုင်လႂ်ယဝ်ႉၶႃႈ၊ ၵႂႃႇတီႈလႂ်လၢႆလၢႆၶႃႈ?။


တွပ်ႇ-ၸမ်တေယဝ်ႉယဝ်ႉ၊ ပေႃးလိူၼ်မၢတ်ႊၶျ်ၼႆႉသဵင်ႈၵေႃႈ ယဝ်ႉတူဝ်ႈလီငၢမ်းယဝ်ႉ။ ၵႂႃႇတူင်ႇဝဵင်းမိူင်းသူႈ တူင်ႇဝဵင်းၵေးသီးတင်းသဵင်ႈယဝ်ႉ။


ထၢမ်-ၵူၼ်းမိူင်းပၼ်ႁႅင်းၸိူင်ႉႁိုဝ်ၽွင်ႈၶႃႈ?။


တွပ်ႇ-ပၼ်ႁႅင်းသိူဝ်ၽိူၵ်ႇဢိူဝ်ႈ၊ ၶဝ်ၵေႃႈမုင်ႈမွင်းသိူဝ်ၽိူၵ်ႇ တႄႉတႄႉ။


ပႃႇတီႇသိူဝ်ၽိူၵ်ႇ SNDP ၼႆႉ မိူဝ်ႈပၢင်လိူၵ်ႈတင်ႈ 2015 ၼၼ်ႉၵေႃႈ ၶဝ်ႈၶႅင်ႇၵၢၼ်လိူၵ်ႈတင်ႈ၊ လႆႈတီႈၼင်ႈ ၽွင်းတႅၼ်းသၽႃးၸႄႈမိူင်း 1 တီႈ။