ၸုမ်းတူင်ႉၼိုင်တူင်ႇဝူင်းတႆး လၢႆလၢႆၸုမ်းႁူမ်ႈႁွမ်းၵၼ်သေ ၵႂႃႇၸွႆႈၵမ်ႉထႅမ်ပၼ် ပီႈၼွင်ႉၵူၼ်း ပၢႆႈၽေး ၸိူဝ်းႁွတ်ႈၽႅဝ်ယူႇသဝ်း တၢင်းပွတ်းဝၢၼ်ႈလွႆလမ် ၸႄႈဝဵင်းမိူင်းတူၼ် တႃႇလင်ၶႃးႁိူၼ်း 30 လင်ပၢႆ။

ဝၼ်းတီႈ 02/03/2017 ယၢမ်းဝၢႆးဝၼ်း ၸုမ်းတူင်ႉၼိုင်တူင်ႇဝူင်းတႆး တၢင်းလမ်းပုၼ်း၊ ၵုင်းထဵပ်ႈ (မိူင်းၵွၵ်ႇ)လႄႈ ၵဵင်းမႆႇ ဢိၵ်ႇထႅင်ႈလၢႆလၢႆတီႈ ၼႂ်းၸိုင်ႈထႆး ႁူမ်ႈႁွမ်းၵၼ်သေ ၵႂႃႇၸွႆႈၵမ်ႉထႅမ် ပူၵ်းပွင် ၼႂ်းမူႇဝၢၼ်ႈၵူၼ်းပၢႆႈၽေး ဝၢၼ်ႈလွႆလမ် ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈ တႆး ပွတ်းဢွၵ်ႇၶူင်း။ ၼင်ႇႁိုဝ် ပီႈၼွင်းပၢႆႈၽေးပေႃးတေယူႇလူမ်ၸႂ် ၵတ်းယဵၼ်လႄႈ မီးၶွင်ၸႂ်ႉ တိုဝ်း၊ ၶွင်ၵိၼ်ယိမ်ႉ ၸဵမ်ၸိူဝ်းၼႆႉ ဝႃႈၼႆ။


ၸၢႆးတူၼ်ႉ ၽူႈဢွၼ်ႁူဝ် ၵႂႃႇၸွႆႈထႅမ်ၵူၼ်းပၢႆႈၽေး တၢင်းပွတ်းဝၢၼ်ႈလွႆလမ် လၢတ်ႈဝႃႈ “ ဢၼ် ႁဝ်းၶႃႈ လႆႈၵႂႃႇၸွႆႈၵမ်ႉထႅမ်ပၼ်ပီႈၼွင်ႉၵူၼ်းပၢႆႈၽေး တၢင်းပွတ်းဝၢၼ်ႈလွႆလမ်ၼႆႉ ယူႇတီႈပီႈ ၼွင်ႉတႆးႁဝ်း ၽူႈမီးၼမ်ႉၸႂ်ၸေႇတၼႃႇ ၸိူဝ်းမႃးႁဵတ်းၵၢၼ်ၼႂ်းမိူင်းထႆး လၢႆလၢႆတီႈ ၸွႆႈၵမ်ႉ ထႅမ်မႃး မိူၼ်ၼင်ႇ ပီႈၼွင်ႉတႆး ၸိူဝ်းယူႇ တၢင်းပွတ်းလမ်းပုၼ်း၊ ၵဵင်းမႆႇ၊ မိူင်းၵွၵ်ႇ လႄႈ ထႅင်ႈလၢႆလၢႆတီႈ ၸဵမ်ၸိူဝ်းၼႆႉသေ ႁဝ်းၶႃႈ ၸင်ႇလႆႈၵဵပ်းႁွမ်ၶူဝ်းၶွင်သေ ဢဝ်ၵႂႃႇၸွႆႈပၼ် ပီႈၼွင်ႉၵူၼ်းပၢႆႈၽေး၊ တေႃႈလဵဝ် ဢၼ်ႁဝ်းလႆႈၵႂႃႇၸွႆႈထႅမ်ပၼ် ပႃးပွၵ်ႈၼႆႉ မီး 4 ပွၵ်ႈယဝ်ႉ” ဝႃႈၼႆ။


ၼွၵ်ႈလိူဝ်ၼၼ်ႉ မိူၼ်ၼင်ႇၼမ်ႉၵိၼ်/ၼမ်ႉၸႂ်ႉလႄႈ ၾႆးၾႃႉ ၸဵမ်ၸိူဝ်းၼႆႉ ႁဝ်းၶႃႈ လႆႈတေႃႇ ပၼ် လွတ်ႇၼမ်ႉ၊ သၢႆၾႆး တင်ႈတႄႇဢဝ် ဝၼ်းတီႈ 27/02/2017 တေႃႇထိုင် ဝၼ်းတီႈ 02/03 /2017 ၼမ်ႉလႄႈၾႆးၾႃႉ လႆႈႁွတ်ႈထိုင်တီႈမူႇဝၢၼ်ႈၵူၼ်းပၢႆႈၽေး ၵူႈလင်ႁိူၼ်းယဝ်ႉ၊ တီႈႁူဝ်ၼမ်ႉလႄႈ ႁိူၼ်းၵူၼ်းဝၢၼ်ႈပၢႆႈၽေးၼႆႉ တေယၢၼ်ၵႆၵၼ် မွၵ်ႈ 3 လၵ်း ဝႃႈၼႆ။


ၶူဝ်းၶွင်/ ၶွင်ၵိၼ်ယႅမ်ႉ ဢၼ်လႆႈၵႂႃႇၵမ်ႉထႅမ်ပၼ်တီႈၶႅမ်ႉပၢႆႈၽေး ဝၢၼ်ႈလွႆလမ် ၵမ်းပွၵ်ႈၼႆႉ မိူၼ်ၼင်ႇ ၽၵ်းယိူဝ်ႈၼၢင်းၶဵဝ်၊ ၶဝ်ႈမုၼ်း၊ ၶဝ်ႈသွႆး၊ ၼမ်ႉမၼ်း၊ ၶဝ်ႈသၢၼ်၊ ၼမ်ႉၼူမ်း ၸဵမ်ၸိူဝ်း ၼႆႉ။ ပႃးၸဵမ်သၢႆၾႆး၊ လွတ်ႇၼမ်ႉ ၶွင်ၵိၼ်ယႅမ်ႉလႄႈ ၶူဝ်းၼုင်ႈတၢင်းဝႆ တေတူၵ်းမႅၼ်ႈငိုၼ်း 140000 ဝၢတ်ႇ တူၵ်းမႅၼ်ႈငိုၼ်းမၢၼ်ႈ (55,00000) ပျႃး ဝႃႈၼႆ။


ၸၢႆးတူၼ်ႉ သိုပ်ႇလၢတ်ႈဝႃႈ တေႃႈလဵဝ်ၼႆႉ ဢၼ်ပီႈၼွင်ႉၵူၼ်းပၢႆႈၽေးလႄႈ တပ်ႉသိုၵ်းတႆး ၸိူဝ်း ဢၼ်တူၵ်းၼႃႈတီႈတၢင်းပွတ်းပုၼ်ႉၼၼ်ႉ ဢၼ်ၶဝ်လူဝ်ႇတၢင်းၸွႆႈထႅမ်လိူဝ်ပိူၼ်ႈပဵၼ် ယႃႈယႃ ၼမ်ႉလုၵ်ႈဢွၼ်ႇ၊ ယႃသမ်း၊ ၼမ်ႉၵိူဝ်၊ ဢီႈယႃ ၸဵမ်ၸိူဝ်းၼႆႉ ဝႃႈၼႆ။


ၼွၵ်ႈသေဝၢၼ်ႈလွႆလမ် ၵူၼ်းမိူင်းတႆးဢၼ်ပၢႆႈၽေး မႃးယူႇ ယင်းမီးတီႈ လွႆတႆးလႅင်း၊ လွႆၵေႃႇဝၼ်း၊ ၵုင်းၵျေႃႇ(ဝဵင်းႁႅင်/မိူင်းထႆး) ၸဵမ်ၸိူဝ်းၼႆႉ ဝႃႈၼႆ။