ၾႆးမႆႈႁိူၼ်း တီႈဝၢၼ်ႈၼွင်ၶမ်းလူင် ဝဵင်းၵဵင်းတုင် လင်ၼိုင်ႈ ၸဝ်ႈႁိူၼ်း ဢႃယု 70 ပၢႆ ဢမ်ႇတၼ်း လွတ်ႈ လူႉတၢႆၵိုၵ်းႁိူၼ်း ဝႃႈၼႆ။

ဝၼ်းတီႈ 04/03/2017 ယၢမ်းၵၢင်ၶမ်ႈ 19:00 မူင်းပၢႆ ၾႆးမႆႈႁိူၼ်းပႃႈၼၢင်းဢွၼ်ႇ ဢႃယု 70 ပီပၢႆ ဝၢၼ်ႈၼွင်ၶမ်းလူင်  ပွၵ်ႉ 3 ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။ ယွၼ်ႉသင်လႄႈ မႆႈၼႆၽႂ် ဢမ်ႇပႆႇႁူႉ လႆႈတႅတ်ႈတေႃးသေတႃႉ ၵူၼ်းယူႇႁိမ်းၵိၼ်ၸမ်တႄႉ လၢတ်ႈဝႃႈ လႅပ်ႈပဵၼ်ၾႆးၶဵင်ႇၽြႃး ဝႃႈၼႆ။


ၸၢႆးဢွင်ႇထုၼ်း ၵူၼ်းယူႇႁိမ်းၵိၼ်ၸမ် လၢတ်ႈဝႃႈ “ ၽွင်းၾႆးမႆႈၼၼ်ႉ ၸဝ်ႈႁိူၼ်းတိုၵ်ႉ ၼင်ႈဝႆႈၽြႃးယူႇ၊ လႅပ်ႈတေပဵၼ်ၾႆးၽြႃး။ ၵူၺ်းၵႃႈ ၵူၼ်းႁိမ်းႁွမ်းၵမ်ႈၽွင်ႈ ႁၼ်ၸဝ်ႈႁိူၼ်း လႅၼ်ႈဢွၵ်ႇႁိူၼ်းမႃး ယွၼ်းတၢင်းၸွႆႈထႅမ်သေ ယူႇၵမ်းၼိုင်ႈ လႅၼ်ႈၶဝ်ႈၵႂႃႇၼႂ်းႁိူၼ်းၶိုၼ်း လႅပ်ႈတေၵႂႃႇဢဝ်ၶူဝ်းငိုၼ်းၶမ်း ဢမ်ႇၸၢင်ႈဢွၵ်ႇမႃးၶိုၼ်းသေတၢႆၼႂ်းၾႆးပႅတ်ႈ” ဝႃႈၼႆ။


သိုပ်ႇလၢတ်ႈထႅင်ႈဝႃႈ ႁိူၼ်းဢၼ်ၾႆးမႆႈၼၼ်ႉ တင်ႈယူႇၼႂ်းသွႆး/ၵိဝ်ႇတၢင်းၵႅပ်ႈသေ လူတ်ႉၵႃး ၶႄၾႆးၸဝ်ႈၼႃႈတီႈၶဝ် ၶဝ်ႈထိုင်ယၢပ်ႇ-ၽိူဝ်ႇထိုင်လႆႈတီႈႁိူၼ်းၵေႃႈ ၾႆး ပေႃးလုၵ်ႉမႆႈ ႁၢဝ်ႈႁႅင်း ၼႃႇယဝ်ႉ ဝႃႈၼႆ။


ယူႇတီႈပီႈၼွင်ႉၵူၼ်းဝၢၼ်ႈၸိူဝ်းယူႇႁိမ်းႁွမ်းၼၼ်ႉလႄႈ ၸဝ်ႈၼႃႈတီႈၾၢႆႇၶႄၾႆး ႁူမ်ႈၵၼ်သေ လႆႈၸွႆႈၶႄၾႆးမွတ်ႇၵႂႃႇ မိူဝ်ႈယၢမ်းၵၢင်ၶမ်ႈ 20:00 မူင်းပၢႆ။ တင်းႁိူၼ်း တင်းၵူၼ်းပဵၼ်ၽဝ်ႇမူတ်း ဢမ်ႇလိူဝ်သင်၊ ၵူၺ်းၵႃႈ ႁိူၼ်းႁိမ်းႁွမ်းတႄႉ ၾႆးဢမ်ႇလၢမ်းမႆႈထႅင်ႈ။ ဢၼ်မၢတ်ႇၸဵပ်း ယွၼ်ႉ ၾႆးၵေႃႈ ဢမ်ႇမီးၼင်ႇၵဝ်ႇ- ဝႃႈၼႆ။


ထိုင်ၶၢဝ်းမႆႈမႃးယဝ်ႉလႄႈ ၵူႈဝၢၼ်ႈၵူႈဢိူင်ႇ ၵူႈပွၵ်ႉယွမ်ႇ တူင်ႉတိုၼ်ႇႁၢင်ႈႁႅၼ်းမႆႉၶႄၾႆး၊ လူတ်ႉၵႃး ၶႄၾႆးသေ ၸဝ်ႈၼႃႈတီႈၾၢႆႇၵွၼ်းဝၢၼ်ႈဢိူင်ႇလႄႈ ထဝ်ႈဝၢၼ်ႈထဝ်ႈၼႃးၶဝ် တိုၵ်း သူၼ်းႁႂ်ႈၾၢင်ႉ ၵၢၼ်ၸႂ်ႉတိုဝ်းၾႆးယူႇ - ဝႃႈၼႆ။