ပႃႇတီႇသိူဝ်ၽိူၵ်ႇ ၸႄႈဝဵင်းၵဵင်းတုင် လူင်းပိုၼ်ႉတီႈသူၼ်းတုမ် ပီႈၼွင်ႉၵူၼ်းမိူင်း သပ်းလႅင်းလၢတ်ႈ ၼႄ လွင်ႈၾႅတ်ႊတရႄႊ၊ လွင်ႈၶွတ်ႇၽွတ်ႈၸဝ်ႈႁႆႈၸဝ်ႈၼႃးလႄႈ လွင်ႈပၢင်လိူၵ်ႈတင်ႈ ၸဵမ်ၸိူဝ်း ၼႆႉ။

တႄႇဢဝ် ဝၼ်းတီႈ 01-06/03/2017 ယၢမ်းၵၢင်ၼႂ် ပႃႇတီႇ တီႇမူဝ်ႇၶရႅၵ်ႉတိတ်ႉ ပႃႇတီႇၸၢဝ်း ၶိူဝ်းတႆး (ႁိုဝ်) ပႃႇတီႇသိူဝ်ၽိူၵ်ႇ(SNDP) ၸႄႈဝဵင်းၵဵင်းတုင် တႄႇလူင်းသူၼ်းတုမ် ပေႃႈမႄႈ ပီႈၼွင်ႉ ၵူၼ်းမိူင်း တႃႇပၢင်လိူၵ်ႈတင်ႈသွမ်ႈ ၼႂ်းႁူဝ်လိူၼ်မေႊ ပီ 2017 တီႈဢိူင်ႇမိူင်းပၵ်ႉ၊ မိူင်းၶွၼ်၊ ယၢင်း လေႃးလႄႈ လွႆလူင် ၼႂ်ႈၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။


ၸၢႆးသိူဝ်ႁၢၼ် ၾၢႆႇယိပ်းသဵၼ်ႈမၢႆၵေႃပွင်ၵၢၼ်ငဝ်ႈငုၼ်း ပႃႇတီႇသိူဝ်ၽိူၵ်ႇလၢတ်ႈဝႃႈ “ လွင်ႈႁူပ်ႉ ထူပ်းၵူၼ်းမိူင်းၼႆႉ ဢၼ်လမ်ႇလွင်ႈမၼ်းတႄႉ ၵူၼ်းမိူင်းႁဝ်း လူဝ်ႇလႆႈႁူႉၵၢၼ်မိူင်း၊ ဢၼ်ႁဝ်းၶႃႈ ဢွၼ်ၵၼ်ဝႃႈ ၾႅတ်ႊၻရႄႊ ယူႇၼၼ်ႉ မၼ်းပွင်ႇသင်၊ မၼ်းပဵၼ်ႁိုဝ် ၵူၼ်းမိူင်းႁဝ်း ယင်းပႆႇႁူႉပွင်ႇ၊ ၾႅတ်ႊၻရႄႊဢၼ်ဝႃႈၼၼ်ႉ မၼ်းပဵၼ်ႁိုဝ်တႄႉ ၸင်ႇလႆႈသပ်းလႅင်းလၢတ်ႈၼႄပၼ်” ဝႃႈၼႆ။


မၼ်းၸၢႆးလၢတ်ႈထႅင်ႈဝႃႈ- ၼင်ႇႁိုဝ် တေၸၢင်ႈႁူမ်ႈၵၼ်ၵႄႈလိတ်ႈလႆႈပၼ်ႁႃၸဝ်ႈႁႆႈၸဝ်ႈၼႃးၼႆ သေ လႆႈၶွတ်ႇၽွတ်ႈၸုမ်းၸဝ်ႈႁႆႈၸဝ်ႈၼႃး ၼႂ်းမုၵ်ႉၸုမ်းသိူဝ်ၽိူၵ်ႇပႃးဝႃႈၼႆ။ ၵူၼ်းမိူင်းတႆး ႁဝ်းၵမ်ႈ ပႃႈၼမ်ပဵၼ်ၸဝ်ႈႁႆႈၸဝ်ႈၼႃး- တႃႇၽဝၸူဝ်ႈပၢၼ်ၵူၼ်းမိူင်းႁဝ်း တေၶိုၼ်ႈယႂ်ႇမႂ်ႇသုင်  ၼင်ႇႁိုဝ် ပေႃးတေလႆႈလွတ်ႈၽေး၊ မၼ်ႈၵႅၼ်ႇ၊ တိူဝ်းတွၼ်းၶိုၼ်ႈယႂ်ႇ ၼင်ႇႁိုဝ် လင်ႁိူၼ်းတေ ဢမ်ႇယွမ်းသေ ဢဵၼ်ႁႅင်းၵူၼ်းသမ်ႉတေၼမ်ၶိုၼ်ႈမႃးထႅင်ႈၼၼ်ႉ လႆႈသပ်းလႅင်း လၢတ်ႈၼႄ၊ ထႅင်ႈလွင်ႈၼိုင်ႈ ၵေႃႈ ၵဵဝ်ႇၵပ်းပၢင်လိူၵ်ႈတင်ႈသွမ်ႈ ဢၼ်တေထိုင်မႃးၼႆႉ ထုၵ်ႇႁၢင်ႈႁႅၼ်းၸိူင်ႉႁိုဝ်- ၸဵမ်ၸိူဝ်းၼႆႉ။


ၼႂ်းၸႄႈဝဵင်းၵဵင်းတုင်ၼႆႉ ပႃႇတီႇၵၢၼ်မိူင်းဢၼ်တေၶဝ်ႈၶေႉၶႅင်ႇလိူၵ်ႈတင်ႈသွမ်ႈ ၼႂ်းႁူဝ်လိူၼ်မေႊ ဝၼ်းတီႈ 01/04/2017 ၼႆႉမီး ပႃႇတီႇသိူဝ်ၽိူၵ်ႇ(SNDP)၊ ပႃႇတီႇႁူဝ်သိူဝ်(SNLD)၊ ပႃႇတီႇၼူၵ်ႉ ယုင်း(NLD)၊ ပႃႇတီႇ သၢင်ႇသီႈ(USDP)၊ ပႃႇတီႇဢၶႃႇ(ANDP)လႄႈ ပႃႇတီႇလႃးႁူႇ(LNDP) ၸဵမ်ၸိူဝ်းၼႆ။


ယူႇတီႈပႃႇတီႇသိူဝ်ၽိူၵ်ႇ ဢၼ်တေၶဝ်ႈလိူၵ်ႈတင်ႈ ၼေႃႇၽူႈတႅၼ်းသၽႃး ဢၼ်လုတ်ႈႁၢမ်း ပဝ်ႇဝႆႉ သမ်ႉ ၼႂ်းၸႄႈဝဵင်းၵေးသီး ၽူႈတႅၼ်းသၽႃးၵူၼ်းမိူင်း ပႃႇတီႇသိူဝ်ၽိူၵ်ႇ ၼၢင်းတိၼ်ႇဢူး၊ ၸႄႈမိူင်း မၢႆၼိုင်ႈ ပဵၼ်ၼၢင်းၼူၺ်းၼူၺ်း၊ မၢႆ2 သမ်ႉ ပဵၼ်ၼၢင်းမွၼ်းဢွင်ႇ။ တီႈဝဵင်းမိူင်းသူႈသမ်ႉ ၽူႈတေ ၶဝ်ႈၶႄႉၶႅင်ႇ သၽႃးၵူၼ်းမိူင်း ၼၢင်းၶမ်းယဵၼ်ႇဢွင်ႇ၊ ၸႄႈမိူင်းမၢႆၼိုင်ႈပဵၼ် ၸၢႆးပႃႉထုၼ်း၊ မၢႆသွင် ပဵၼ် ၼၢင်းၸၢမ်ဢူး၊ တီႈၵဵင်းတုင်ၽူႈတႅၼ်းသၽႃး ၶဵတ်ႇလိူၵ်ႈတင်ႈမၢႆသွင်သမ်ႉ ပဵၼ်ၻွၵ်ႊတိူဝ်ႊ ၸၢႆးယွတ်ႈႁွင် ၸဵမ်ၸိူဝ်းၼႆႉ။