ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး သၢၼ်ၶတ်းလွင်ႈၽူႈၼမ်းၼႂ်း ၵူႈလွင်ႈလွင်ႈ ဢိူင်ႇၼမ်ႉမ ၸႄႈဝဵင်းသီႇပေႃႉ ၺႃးယိုဝ်းတၢႆလူၺ်ႈဢမ်ႇလႆႈႁူႉလွင်ႈတၢင်း- တိုၵ်းသူၼ်းထိုင် ၸဝ်ႈၼႃႈ တီႈပလိၵ်ႈၽူႈမီးပုၼ်ႈၽွၼ်း ႁႂ်ႈၵူတ်ႇထတ်း ဢဝ်လိူင်ႈပၼ် ႁႂ်ႈလႆႈလွင်ႈၽဵင်ႇပဵင်း။

ဝၼ်းတီႈ 06/03/2017 ယၢမ်းၵၢင်ၼႂ် ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး (SHRF) ဢွၵ်ႇ လိၵ်ႈၽိုၼ် တၢမ်းငဝ်းလၢႆး လွင်ႈလုင်းၸၢႆးၸၢမ်ႇၽေႇ ဢႃယု 57 ပီ ၽူႈၼမ်းၼႂ်းၵူႈလွင်ႈ လွင်ႈၾၢႆႇပူၵ်းပွင်ဝၢၼ်ႈ ဢိူင်ႇ ဢိူင်ႇၼမ်ႉမ ၸႄႈဝဵင်းသီႇပေႃႉ ၺႃးၵူၼ်း/ ၸုမ်းဢမ်ႇႁူႉၸၵ်း ယိုဝ်းတၢႆထင်တီႈ မိူဝ်ႈဝၼ်း တီႈ 26/02/2017 တီႈႁိမ်းတိၼ် လွႆႁႆႈမၼ်း ဢၼ်မီးၾၢႆႇႁွင်ႇ ဝၢၼ်ႈၼႃးၵုၼ် ထုင်ႉၼမ်ႉမ ၸႄႈ ဝဵင်းသီႇပေႃႉ ၸိုင်ႈတႆး ပွတ်းႁွင်ႇၼၼ်ႉ ႁဵတ်းႁႂ်ႈၵူၼ်းၼႂ်းပိုၼ်ႉတီႈ တိုၼ်ႇသၢၼ်ႈ ၵူဝ်ႁႄ-မႆႈၸႂ်လွင်ႈ ႁူမ်ႇလူမ်ႈ ဝႃႈၼႆ။


ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၼႂ်းၸိုင်ႈတႆး လၢတ်ႈဝႃႈ “ လိူင်ႈဢၼ် ႁဝ်းၶႃႈ ဢွၵ်ႇၽိုၼ်တၢမ်းငဝ်းလၢႆးၼႆႉ ယွၼ်ႈပိူဝ်ႈဝႃႈ ငဝ်းလၢႆးၼႂ်းပိုၼ်ႉတီႈ မၼ်းဢမ်ႇ သုၵ်းဢမ်ႇ လိပ်း  ႁဵတ်းႁႂ်ႈၵူၼ်းမိူင်းႁဝ်းၶႃႈ လႆႈၵူဝ်လႆႈႁႄ၊ ထႅင်ႈပိူင်ၼိုင်ႈၵေႃႈ လူင်ပွင်ၸိုင်ႈၵူၼ်းမိူင်း ဢၼ်ထုၵ်ႇလိူၵ်ႈၶိုၼ်ႈမႃးၼၼ်ႉ ႁႂ်ႈၶဝ်ႈၸွႆႈသေ ဢဝ်ပုၼ်ႈၽွၼ်းပၼ်ၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈ။ တေႃႈလဵဝ် ဝၢၼ်ႈမိူင်းႁဝ်းၶႃႈၼႆႉ ဢမ်ႇမီးပၵ်းပိူင်လႄႈ လွင်ႈႁူမ်ႇလူမ်ႈ။ ယွၼ်ႉၼၼ် ႁႂ်ႈလူင်ပွင်ၸိုင်ႈ သႂ်ႇၸႂ် ဢဝ်ပုၼ်ႈၽွၼ်းတူၺ်းၸွႆႈပၼ်ၽွင်ႈ” ဝႃႈၼႆ။


ပူၼ်ႉမႃး မိူဝ်ႈဝၼ်းတီႈ 26/02/2017 ၼၼ်ႉ လုင်းၸၢႆးၸၢမ်ႇၽေႇ ဢႃယု 57 ပီ ပဵၼ်ၵူၼ်း  ဝၢၼ်ႈၼႃးၵုၼ် ထုင်ႉၼမ်ႉမ ၸႄႈဝဵင်းသီႇပေႃႉ ပဵၼ်ၽူႈၼမ်း ၼႂ်းၵူႈလွင်ႈလွင်ႈ ၸုမ်း 4 ဢိူင်ႇၼမ်ႉမ ထုၵ်ႇၸုမ်း/ ၵူၼ်းဢမ်ႇႁူႉၸၵ်း ဢဝ်ၵွင်ႈယိုဝ်းသႂ်ႇ လုင်းၸၢႆးၸၢမ်ႇၽေႇ 4 လုၵ်ႈ။ ၼႂ်းမၢၵ်ႇ ၵွင်ႈသီႇလုၵ်ႈၼၼ်ႉ တိူဝ်ႉတီႈၵွၵ်းႁူဝ်၊ တီႈႁူဝ်ၸႂ်၊ တီႈမိုဝ်းၾၢႆႇသၢႆႉလႄႈ ၸွမ်းၶႅၼ် သေ လုင်းၸၢႆးၸၢမ်ႇၽေႇတၢႆ ထင်တီႈၵမ်းလဵဝ်။ ၵဵဝ်ႇၵပ်းလွင်ႈၼႆႉ ပဵၼ်ၼမ်ႉမိုဝ်းၸုမ်းလႂ်/ ၵေႃႉလႂ် ဢမ်ႇလႆႈႁူႉၸွမ်း။


ၸၢႆးၵျေႃႇ  ၵူၼ်းၼမ်ႉမ လၢတ်ႈဝႃႈ မီးပၼ်ႁႃသင်၊ မီးလွင်ႈသင်ၵေႃႈ ထုၵ်ႇမႃးဢုပ်ႇၵုမ်ၵႄႈ လိတ်ႈလူၺ်ႈလၢႆးလီ။ ဢၼ်ဢဝ်ၵွင်ႈၵၢင်ႇသေ ၵႄႈလိတ်ႈလူၺ်ႈလၢႆးႁုၵ်းႁၢႆႉတႄႉ ဢမ်ႇ ပၼ်ႁႅင်း ပဵၼ်ဢၼ်လႆႈမႆႈၸႂ်တႃႇႁူမ်ႇလူမ်ႈ ၸဝ်ႈၵဝ်ႇလႄႈ တေၸၢင်ႈပဵၼ်ဢၼ်လွၵ်ႇၸႂ်ၵူၼ်းဝၢၼ်ႈ ႁဵတ်းႁႂ်ႈဢမ်ႇႁတ်းႁၢပ်ႇႁၢမ်ၵၢၼ်ဝၢၼ်ႈသူၼ်ဢိူင်ႇ။ ၶႂ်ႈႁႂ်ႈပလိၵ်ႈၸဝ်ႈၼႃႈတီႈၶဝ်သႂ်ႇၸႂ် ၵူတ်ႇထတ်း ပၼ်ႁႂ်ႈလႆႈလွင်ႈၽဵင်ႇပဵင်း- ဝႃႈၼႆ။


လုင်ႈၸၢႆးၸၢမ်ႇၽေႇၼႆႉ တႄႇၼႃႈႁိူၼ်းၵိုၵ်းတင်း ၼၢင်းသႅင်ဢူး မီးလုၵ်ႈလၢင်း ႁူမ်ႈၵၼ်တင်းမူတ်း 5 ၵေႃႉ ဝႃႈၼႆ။တၢင်းပွတ်းတွၼ်ႈၼၼ်ႉ မီးၸုမ်းသိုၵ်းယိပ်းၵွင်ႈၵၢင်ႇ မိူၼ် တပ်ႉသိုၵ်းမၢၼ်ႈ မိူင်းယႆ မၢႆတပ်ႉ 325 ႁူမ်ႈပႃး ၸုမ်းသိုၵ်း ပီႇတုၸိတ်ႉ မၢၼ်ႈပၢင်ႇ တူင်ႉၼိုင်ၵႂႃႇမႃးဝႆႉ။


ၶွမ်ႊပၼီႊဢၼ် ၶုတ်းထၢၼ်ႇ တီႈၼမ်ႉမၼႆႉ ပဵၼ်ၶွမ်ႊပၼီႊငူၺ်ႇယီႇပလႄး ၶုတ်းထၢၼ်ႇတီႈၼမ်ႉမ တင်ႈတႄႇ ပီ 2004 မႃးထိုင်ယၢမ်းလဵဝ်။ တင်ႇတႄႇ ပီ 2016 မႃး ၵူၼ်းဝၢၼ်ႈဢိူင်ႇၼမ်ႉမ လုၵ်ႉ သၢၼ်ၶတ်း လွင်ႈၶုတ်းထၢၼ်ႇၼႂ်းဢိူင်ႇၼမ်ႉမသေ တုၵ်းယွၼ်းႁႂ်ႈၵိုတ်း ၵၢၼ်ၶုတ်းထၢၼ်ႇ ႁိၼ် တင်းမူတ်း။ ၵူၺ်းၵႃႈ ၼႂ်းလိူၼ်မေႊ 2016 ၼၼ်ႉ သိုၵ်းမၢၼ်ႈပိုတ်ႇၼႃႈသိုၵ်းယႂ်ႇလူင် ၸႂ်ႉပႃးၶိူင်ႈ မိၼ်တိုၵ်း ပိုတ်းယိုဝ်းပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်း ၸိုင်ႈတႆး SSPP/SSA ပိူဝ်ႈတႃႇဢဝ် ႁူမ်ႇ လူမ်ႈပၼ် လွင်ႈၶုတ်းထၢၼ်ႇၼၼ်ႉယဝ်ႉ။ ၽွင်းၼၼ်ႉ မီးၵူၼ်းမိူင်းလႆႈၺႃးၶႃႈတၢႆ တီႉၺွပ်း၊ ပေႃႉ ထုပ်ႉ ၸဵမ်ၸိူဝ်းၼႆႉ ဝႃႈၼႆ။


တေႃႈလဵဝ် ယူႇတီႈၸုမ်းၵဝ်ႉငဝ်ႈသုၼ်ႇလႆႈၵူၼ်း ၼႂ်းၸိုင်ႈတႆး သၢၼ်ၶတ်း လွင်ႈၶႃႈတၢႆၵူၼ်း ၼႂ်း ပိုၼ်ႉတီႈလႄႈ သၢၼ်ၶတ်းလွင်ႈတိုၵ်ႉမီးၵၢၼ်ၶုတ်းထၢၼ်ႇၼႂ်းဢိူင်ႇၼမ်ႉမ လႄႈ ဢဝ်သိုၵ်း မႃးဢဝ် ႁူမ်ႇလူမ်ႈထၢင်ထၢၼ်ႇ ဢၼ်ၸၢင်ႈႁဵတ်းႁႂ်ႈသိုပ်ႇပဵၼ်ပၼ်ႁႃယုင်ႈယၢင်ႈၵႂႃႇၶၢဝ်းယၢဝ်းထႅင်ႈ ဝႃႈၼႆ။