ၶႃႈႁၢပ်ႇၵၢၼ်ၶုၼ်ၶဝ် ၸိူဝ်းဢၼ်ႁၢပ်ႇၵၢၼ်ဝႆႉယူႇတီႈၼႂ်းလုမ်းသၽႃးၼၼ်ႉ တေမၵ်းမၼ်ႈႁႂ်ႈပဵၼ် ၶႃႈႁၢပ်ႇၵၢၼ်ၶုၼ် ၼႂ်းလုမ်းသၽႃးႁင်းၶေႃၶေႃ၊ ႁူဝ်ပဝ်ႈသၽႃးမိူင်းတႆး လုင်းလူင်သႅင် လၢတ်ႈတီႈၼႂ်း ပၢင်ၵုမ်သၽႃးဝၼ်းႁႅၵ်ႈ ဝၼ်းတီႈ 20/03/2017 ၼင်ႇၼႆ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈသၽႃးၸိူဝ်ႉၸၢတ်ႈ ဢူးမၢၼ်းဝိၼ်းၶၢႆႇတၢၼ်း ၵေႃႈၸီႉသင်ႇဝႆႉဝႃႈ- ပိူဝ်ႈတႃႇ ၶႃႈႁၢပ်ႇၵၢၼ်ၶုၼ် ၸိူဝ်းႁၢပ်ႇၵၢၼ်ယူႇၼႂ်းသၽႃးမိူင်းတႆးၼႆႉ ၼင်ႇႁိုဝ်တေပဵၼ်မႃး ၽူႈႁၢပ်ႇၵၢၼ်ၶုၼ်ၼႂ်းလုမ်းသၽႃးမိူင်းတႆးၵႂႃႇႁင်းၶေႃၼၼ်ႉ တေလႆႈႁၢင်ႈႁႅၼ်းဝႆႉ- ဝႃႈၼႆၼင်ႇၵဝ်ႇ။


ၸၢႆးမူၼ်းလိူၼ် ၽွင်းတႅၼ်းမိူင်းၼၢႆး လၢတ်ႈဝႃႈ- "ဢူးမၢၼ်းဝိၼ်းၶၢႆႇတၢၼ်းၼႆႉ မႃးမိူင်းတႆးမိူဝ်ႈ လိူၼ်ၾႅပ်ႊၿိဝ်ႊရီႊ (2017)၊ မိူဝ်ႈၽွင်းၼၼ်ႉ မၼ်းလၢတ်ႈတီႈႁူဝ်ပဝ်ႈသၽႃးမိူင်းတႆးဝႃႈ တေၸၢင်ႈမီး ၵၢၼ်လႅၵ်ႈလၢႆႈၶၢႆႉပုတ်ႈ ၽူႈႁၢပ်ႇၵၢၼ်ၶဝ် ၼႂ်းၸူဝ်ႈပီၼႆႉပႆႇသဵင်ႈ။ မၼ်းၶႂ်ႈဝႃႈ တေလုၵ်ႉတီႈၶႃႈႁၢပ်ႇၵၢၼ်ၶုၼ် ဢၼ်လုၵ်ႉတီႈလုမ်းၾၢႆႇၽွင်းငမ်းမႃးၼၼ်ႉသေ လႅၵ်ႈလၢႆႈမႃးပဵၼ်ၶႃႈႁၢပ်ႇၵၢၼ်ၶုၼ်ၼႂ်းသၽႃးႁိုဝ်၊ ဢမ်ႇၼၼ်ၵေႃႈ တေႁႃၵူၼ်းမႂ်ႇမႃးသေမွပ်ႈပၼ်ၵၢၼ်မႂ်ႇမႂ်ႇ တႃႇႁႂ်ႈပဵၼ်ၶႃႈႁၢပ်ႇၵၢၼ်ၶုၼ်ၼႂ်းလုမ်းသၽႃး ၼၼ်ႉႁိုဝ်"- ဝႃႈၼႆ။


ၽူႈႁၢပ်ႇၵၢၼ်ၶုၼ် ၼႂ်းလုမ်းသၽႃးမိူင်းတႆးမိူဝ်ႈလဵဝ်ၼႆႉ မွၵ်ႈသိပ်းၵေႃႉ ပဵၼ်ၵူၼ်းဢၼ်လုၵ်ႉတီႈၾၢႆႇၽွင်းငမ်း မၵ်းမၼ်ႈပၼ်မႃး၊ လွင်ႈၼႆႉ မၵ်းမၼ်ႈႁဵတ်းမႃး ၸဵမ်မိူဝ်ႈပၢၼ်လူင်ပွင်ၸိုင်ႈပၢၼ်ဢွၼ်တၢင်း။


ပၢင်ၵုမ်သၽႃးမိူင်းတႆးပွၵ်ႈၼႆႉ ပဵၼ်ပၢင်ၵုမ်ပၵတိ(ပုင်ႇမၢၼ်ႇ) ပွၵ်ႈၵမ်း 5 ၊ ၸတ်းႁဵတ်းတင်ႈတႄႇဝၼ်းတီႈ 20-23/03/2017 ။ ဝၼ်းပိုတ်ႇပၢင်ၵုမ်ဝၼ်းႁႅၵ်ႈ ဝၼ်းတီႈ 20 (မိူဝ်ႈဝႃး) ၽွင်းတႅၼ်းၸႄႈမိူင်းလၢင်းၶိူဝ်း ၸၢႆးဢွင်ႇမဵဝ်းၵျေႃႇ တၢင်ႇလၢတ်ႈလွင်ႈ တႃႇသိူဝ်ႇသဵၼ်ႈတၢင်းယၢင်ၸိူဝ်းၼႆႉ။ ၽွင်းတႅၼ်းၸႄႈမိူင်းၵျွၵ်ႉမႄး ၸၢႆးထုၼ်းၺၢၼ်ႇ တၢင်ႇလၢတ်ႈလွင်ႈငိုၼ်းၿတ်ႊၵျႅတ်ႊ (Budget) တႃႇဝဵင်းလႂ်ဝဵင်းၼၼ်ႉ ႁႂ်ႈၸႅၵ်ႇပၼ်မီးလွင်ႈၽဵင်ႇပဵင်း၊ ၵွပ်ႈၼၼ် မိူဝ်ႈၼႆႉ လႆႈႁူႉဝႃႈပၢင်ၵုမ်သၽႃးမိူင်းတႆး ဢုပ်ႇဢူဝ်းပႃးလွင်ႈငိုၼ်းၿတ်ႊၵျႅတ်ႊၼႆႉ- ၼႆယဝ်ႉ။