ပႃႇတီႇႁူဝ်သိူဝ်(ႁိုဝ်) ငဝ်ႈငုၼ်းတီႇမူဝ်ႇၶရေႇၸီႇ ၸိူဝ်ႉၶိူဝ်းတႆး (SNLD) ၸႄႈဝဵင်းၵဵင်းတုင် တုၵ်း ယွၼ်းၶွမ်ႊမသျိၼ်ႊပၢင်လိူၵ်ႈတင်ႈ ၸႄႈမိူင်းတႆး ႁႂ်ႈမူၼ်ႉမႄးပၼ် သဵၼ်ႈသၢႆမၢႆ- ၽူႈတွတ်ႈၶႅပ်း ၸိူဝ်းၽိတ်းပိူင်ႈဝႆႉ ဝႃႈၼႆ။

Photo; Woon Tip

ဝၼ်းတီႈ 20/03/2017 ယၢမ်းၵၢင်ဝၼ်း 10:00-12:00 မူင်း ယူႇတီႈၾၢႆႇၶွမ်ႊမသျိၼ်ႊ ပၢင်လိူၵ်ႈ တင်ႈၸႄႈမိူင်းတႆး လူင်းပိုၼ်ႉတီႈႁူပ်ႉထူပ်း ပႃႇတီႇၵၢၼ်မိူင်းလႄႈ ၽူႈႁၢပ်ႇၵၢၼ်လူင်ပွင်ၸိုင်ႈၵူႈ ႁွင်ႈၵၢၼ် တီႈလုမ်းၾၢႆႇၽွင်းငမ်း(ဢုပ်ႇပိူင်ႇ)ၵူႈလွင်ႈလွင်ႈ ၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇ ၶူင်း။ ယူႇတီႈၸုမ်းပႃႇတီႇႁူဝ်သိူဝ် တုၵ်းယွၼ်း ၶွမ်ႊမသျိၼ်ႊပၢင်လိူၵ်ႈတင်ႈ 4 ၶေႃႈ ႁႂ်ႈမူၼ်ႉမႄး  ၸိုဝ်ႈၽူႈတေတွတ်ႈၶႅပ်းၵၢင်ၸႂ် ဢၼ်ၽိတ်း ဝႃႈၼႆ။


ၼၢင်းမူၼ်းတုၺ်ႈ ၽူႈပွင်ၵၢၼ်ငဝ်ႈငုၼ်းပႃႇတီႇႁူဝ်သိူဝ် လၢတ်ႈဝႃႈ “ ယူႇတီႈပႃႇတီႇ ႁူဝ်သိူဝ်ႁဝ်းၶႃႈ တုၵ်းယွၼ်းတၢင်ႇထိုင် ၵႂႃႇတီႈပၢင်ၵုမ်ၼၼ်ႉ မီး 4 ၶေႃႈ မိူၼ်ၼင်ႇတေႃႈလဵဝ် သဵၼ်ႈသၢႆမၢႆၸိုဝ်ႈၵူၼ်း ဢၼ်တိုၵ်ႉၽိတ်းယူႇၼၼ်ႉ ႁဝ်းၶႃႈၵႂႃႇတူၺ်း တႃႇဢိူင်ႇမိူင်းၶွၼ်ၼၼ်ႉ ၸိုဝ်ႈဢၼ်လဵဝ် မီးဝႆႉႁႃႈ ၵေႃႉ လွင်ႈၼႆႉႁႂ်ႈၶိုၼ်းမူၼ်ႉမႄးပၼ်ၶိုၼ်း။ ယဝ်ႉၵေႃႈ ႁဝ်းတုၵ်းယွၼ်းပႃး ႁူင်းတွတ်ႈၶႅပ်းၵၢင်ၸႂ် တီႈၼမ်ႉၶႂၢၵ်ႉၼၼ်ႉ မၼ်းၵႆၵူၼ်းမိူင်းၼႃႇပူၼ်ႉတီႈ တွၼ်ႈတႃႇၵူၼ်းမိူင်းတေၵႂႃႇ တွတ်ႈၶႅပ်း ၵၢင်ၸႂ်ၼၼ်ႉ သင်ပႆတၢင်းၵႂႃႇၸိုင် တေလႆႈပႆၵႂႃႇ 3 ၸူဝ်ႈမူင်း ယွၼ်ႉၼၼ် တုၵ်းယွၼ်း ႁႂ်ႈၶၢႆႉႁူင်းတွတ်ႈၶႅပ်းၵၢင်ၸႂ်ၸမ်ၵူၼ်းမိူင်း ႁႂ်ႈၵႂႃႇတွတ်ႈငၢႆႈလူမ်ၸႂ်  ” ဝႃႈၼႆ။


ၼွၵ်ႈလိူဝ်ၼၼ်ႉ မိူၼ်ၼင်ႇ ပေႃးတေၵႂႃႇဢဝ်ၽိုၼ်လိၵ်ႈ(ပုံစံ 3) မိူၼ်ၸိူင်ႉၼင်ႇ ၵူၼ်းမိူင်း ၸိူဝ်းပႆႇယၢမ်ႈတွတ်ႈၶႅပ်းၵၢင်ၸႂ်မႃးၼၼ်ႉ ယူႇတီႈႁဝ်းၶႃႈသမ်ႉ တေလႆႈၽိူမ်ႉထႅမ်ပၼ် ၼႂ်းၽိုၼ် လိၵ်ႈၶဝ်လႄႈ ႁဝ်းၶႃႈ တေလႆႈၵႂႃႇဢဝ် လၢႆးမိုဝ်းတီႈၽူႈၵွၼ်းဢိူင်ႇ/ပွၵ်ႉ လွင်ႈၼၼ်ႉၵေႃႈ သမ်ႉ ယၢပ်ႇ ယူႇတီႈႁဝ်းၶႃႈ လႆႈတၢင်ႇထိုင် ႁႂ်ႈၵႂႃႇဢဝ်တီႈလုမ်းၽူႈၵွၼ်းၸႄႈဝဵင်း။ ထႅင်ႈဢၼ်ၼိုင်ႈသမ်ႉ ၶႂ်ႈယွၼ်းတူၺ်း ၸိုဝ်ႈသဵၼ်ႈသၢႆမၢႆ ၵူၼ်းမိူင်းၶိုၼ်း ၸိူဝ်းဢၼ်လႆႈတွတ်ႈၶႅပ်း ၵၢင်ၸႂ် မိူဝ်ႈပီ 2015 ၸဵမ်ၸိူဝ်းၼႆႉ ဝႃႈၼႆ။


ၵဵဝ်ႇၵပ်းလွင်ႈၼႆႉသေ ယူႇတီႈၾၢႆႇၶွမ်ႊမသျိၼ်ႊၸႄႈမိူင်းတႆး တွပ်ႇလၢတ်ႈပၼ်ၶိုၼ်းဝႃႈ ၸိုဝ်ႈသဵင်ၵူၼ်းဢၼ်တေတွတ်ႈၶႅပ်းၵၢင်ၸႂ် ၸိုဝ်ႈၼိုင်ႈၵေႃႉ ပဵၼ်ၵႂႃႇႁႃႈၵေႃႉၼၼ်ႉ တေၶိုၼ်းမႄးလူပ်း/မွတ်ႇပၼ်ၶိုၼ်း။ ယဝ်ႉၵေႃႈ သဵၼ်ႈသၢႆမၢႆၸိုဝ်ႈၵူၼ်းမိူင်းဢၼ်တွတ်ႈၶႅပ်းၵၢင်ၸႂ် မိူဝ်ႈပီ 2015 ၼၼ်ႉၵေႃႈ ဢမ်ႇလူဝ်ႇၶူၼ်ႉၶိုၼ်းယဝ်ႉ၊ ၵဵဝ်ႇၵပ်းႁူင်းတွတ်ႈၶႅပ်းၵၢင်ၸႂ် တီႈၼမ်ႉ ၶႂၢၵ်ႉၼၼ်ႉၵေႃႈ တေလႆႈတၢင်ႇဝႆႉတီႈၶွမ်ႊမသျိၼ်ႊၶဝ် ၸဵမ်မိူဝ်ႈပီ 2015 ၵွၼ်ႇ၊  လွင်ႈၽိုၼ် လိၵ်ႈ(ပုံစံ 3)  ၼၼ်ႉ တေဝႆႉတီႈ ၽူႈၵွၼ်းဢိူင်ႇ/ပွၵ်ႉၵူၺ်း ဝႃႈၼႆ။


ပႃႇတီႇၵၢၼ်မိူင်း ၸိူဝ်းတေၶဝ်ႈၶႅင်ႇပၢင်လိူၵ်ႈတင်ႈသွမ်ႈ ၼႂ်းၸႄႈဝဵင်းၵဵင်းတုင် တင်းမူတ်းမီး 6 ပႃႇတီႇ မိူၼ်ၼင်ႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇဢႃးၶႃႇ၊ ပႃႇတီႇလႃးႁူႇ၊ ပႃႇတီႇၼူၵ်ႉယုင်း လႄႈ ပႃႇတီႇသၢင်ႇသီႈ ၸဵမ်ၸိူဝ်းၼႆႉ။