ၼႂ်းၸိုင်ႈတႆးပွတ်းၸၢၼ်း ၸႄႈဝဵင်းမိူင်းသူႈ တႃႇ 3 ဢိူင်ႇၼၼ်ႉ ပႃႇတီႇၼူၵ်ႉယုင်းႁၼ်ထိုင်ဝႃႈ မီးၸုမ်းယိပ်းၵွင်ႈၵၢင်ႇယူႇသဝ်းဝႆႉ၊ ဢမ်ႇမီးလွင်ႈႁူမ်ႇလူမ်ႈတႃႇႁဵတ်းသၢင်ႈပၢင်လိူၵ်ႈတင်ႈၼႆသေ ႁဵတ်းလိၵ်ႈယိုၼ်ႈထိုင်ၶွမ်ႊမသျိၼ်ႊၵၢၼ်လိူၵ်ႈတင်ႈ ႁႂ်ႈပူတ်းယႃႉၵၢၼ်လိူၵ်ႈတင်ႈသွမ်ႈ။ လွင်ႈၼႆႉ ၸၢင်ႈႁဵတ်းႁႂ်ႈၵူၼ်းမိူင်း ၼႂ်းၸႄႈဝဵင်းမိူင်းသူႈ တႃႇ 3 ဢိူင်ႇ၊ ႁူဝ်ၵူၼ်းသီႇႁဵင်ပၢႆ ၸိူဝ်းမီးသုၼ်ႇလႆႈ တွတ်ႈၶႅပ်းၵၢင်ၸႂ် လုတ်ႈႁၢမ်းတိုဝ်ႉတၢင်းတွတ်ႈၶႅပ်းၵၢင်ၸႂ်။

ၼႂ်းၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်းၼႆႉ တင်းမူတ်းမီး 17 ဢိူင်ႇ၊ ၼႂ်းၼၼ်ႉ တႃႇ 3 ဢိူင်ႇ မိူၼ်ၼင်ႇဝၢၼ်ႈလွႆမေႃႇမႄႈ၊ ၵုၼ်ၵျွင်း တင်းမူတ်း 37 ဝၢၼ်ႈၸိူဝ်းၼႆႉ ပဵၼ်ၼႃႈလိၼ်ၵုမ်းၵမ်ၶွင် SSPP/SSA ၼႆသေ ပႃႇတီႇၼူၵ်ႉယုင်း NLD ၶဝ်ႁၼ်ထိုင်ဝႃႈ တႃႇတေပွင်သၢင်ႈၸတ်းႁဵတ်းပၢင်လိူၵ်ႈတင်ႈသွမ်ႈ လႆႈထၢင်ႇႁၢင်ႈလွတ်ႈလႅဝ်းၼၼ်ႉ တေဢမ်ႇမီးၼႆသေ ၽူႈမီးပုၼ်ႈၽွၼ်းၼႂ်း NLD ၵေႃႉၼိုင်ႈ ယိုၼ်ႈလိၵ်ႈထိုင်ၶွမ်ႊမသျိၼ်ႊၵၢၼ်လိူၵ်ႈတင်ႈ မိူဝ်ႈဝၼ်းတီႈ 21/03/2017 ႁႂ်ႈပူတ်းယႃႉ (ယုၵ်ႉလိူၵ်ႈ) ပႅတ်ႈၵၢၼ်လိူၵ်ႈတင်ႈသွမ်ႈ- ၼႆယဝ်ႉ။


ၵဵဝ်ႇၵပ်းလွင်ႈၼႆႉ ၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈတွၼ်ႈလွႆလႅမ် ဢူးတၢၼ်းတိၼ်ႇ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ၸႂ်ႈယဝ်ႉ၊ NLD ယိုၼ်ႈလိၵ်ႈမႃး။ ၵွပ်ႈၼၼ်မိူဝ်ႈၽုၵ်ႈၼႆႉ ႁဝ်းၶႃႈတေၵႂႃႇႁဵတ်း ပၢင်ၵုမ်ၵၼ်တီႈမိူင်းသူႈ၊ တေႁွင်ႉမွၵ်ႇလၢႆၾၢႆႇမႃးၶဝ်ႈႁူမ်ႈ မိူၼ်ၼင်ႇပႃႇတီႇၵၢၼ်မိူင်း၊ ၶွမ်ႊမသျိၼ်ႊၵၢၼ်လိူၵ်ႈတင်ႈ၊ ၽူႈမီးပုၼ်ႈၽွၼ်းၼႂ်းၸႄႈဝဵင်း၊ ၸုမ်းတူင်ႇဝူင်းၵူၼ်းၸိူဝ်းၼႆႉ တေႁွင်ႉမွၵ်ႇမႃးတင်းမူတ်းသေ ႁဵတ်းပၢင်ၵုမ်ၵၼ်- ဝႃႈၼႆ။


ၽူႈၶၢၼ်ပၢၵ်ႇပႃႇတီႇႁူဝ်သိူဝ် ၸၢႆးလဵၵ်ႉၵေႃႈလၢတ်ႈဝႃႈ- မိူဝ်ႈဝူင်ႈပူၼ်ႉမႃးၼႆႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈ မိူင်းတႆး မႃးႁူပ်ႉထူပ်းပႃႇတီႇၵၢၼ်မိူင်းၼႂ်းပိုၼ်ႉတီႈသေ လႆႈၸႂ်တူၵ်းလူင်းၵၼ်ဝႃႈ ပေႃးႁဵတ်းပၢင်လိူၵ်ႈတင်ႈသွမ်ႈ မႃးၼႆ ဢၼ်ဢမ်ႇၸႂ်ႈသိုၵ်း၊ ဢမ်ႇၸႂ်ႈပလိၵ်ႈ၊ ၸိူဝ်းပဵၼ်တူဝ်တႅၼ်းပႃႇတီႇ၊ ၶွမ်ႊမသျိၼ်ႊၵၢၼ်လိူၵ်ႈတင်ႈ လႄႈၵူၼ်းမိူင်းၸိူဝ်းၼႆႉႁူမ်ႈၵၼ်သေ တေဢဝ်ၶႅပ်းၵၢင်ၸႂ် ၵႂႃႇၸတ်းႁဵတ်းပၢင်လိူၵ်ႈတင်ႈ၊ သိုၵ်းတင်းၵူၼ်းမိူင်းဢမ်ႇၵဵဝ်ႇၵၼ်ၼႆ ပေႃးလႆႈၸႂ်ၵၼ်ယဝ်ႉ၊ ယူႇလၢႆလၢႆသေမႃးသၢၼ်ၶတ်း မႃးတုၵ်းယွၼ်းႁႂ်ႈပူတ်းယႃႉပႅတ်ႈပၢင်လိူၵ်ႈတင်ႈ၊ ဢမ်ႇႁႂ်ႈၸတ်းႁဵတ်းပၢင်လိူၵ်ႈတင်ႈသွမ်ႈ ၼႂ်းသၢမ်ဢိူင်ႇၸိူင်ႉၼႆတႄႉ ဢမ်ႇတူၵ်းထုၵ်ႇ၊ ၵဝ်ၶႃႈႁၼ်ထိုင်ဝႃႈ ဢမ်ႇၶဝ်ႈတၢင်းၵၢၼ်- ဝႃႈၼႆ။


ပၢင်လိူၵ်ႈတင်ႈသွမ်ႈပွၵ်ႈၵမ်းၼႆႉ တေၸတ်းႁဵတ်းၼႂ်းဝၼ်းတီႈ 01/04/2017 တေထိုင်ၼႆႉ။ ယူႇတီႈ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၵေႃႈ ယၢမ်ႈဢွၵ်ႇလိၵ်ႈပိုၼ်ၽၢဝ်ႇဝႆႉဝႃႈ ပႃႇတီႇလႂ်ဢမ်ႇဝႃႈ၊ ပေႃးပဵၼ်ပႃႇတီႇဢၼ်လူင်းသဵၼ်ႈၸိုဝ်ႈဝႆႉပဵၼ်တၢင်းၵၢၼ်ၼႆၸိုင် ပွင်ႇၶၢဝ်ႇၸႅင်ႈလၢတ်ႈတီႈ ပႃႇတီႇမႂ်ႇသုင်ၸိုင်ႈတႆးသေ ၶဝ်ႈလိူၵ်ႈတင်ႈလႆႈထၢင်ႇႁၢင်ႈလွတ်ႈလႅဝ်း၊ တေဢမ်ႇယႃႉဢမ်ႇၵဝ်းသင်- ၼႆယဝ်ႉ။


ဢူးတၢၼ်းတိၼ်ႇ ၵေႃႈလၢတ်ႈဝႃႈ- မိူၼ်ၼင်ႇမေႃႇမႄႈဢၼ်ဝႃႈၼႆႉ မၼ်းဢမ်ႇၵႆႈဝဵင်းၵႃႈႁိုဝ်၊ ယၢၼ်မွၵ်ႈၼိုင်ႈလၵ်းၵူၺ်း သမ်ႉမႃးမီးပၼ်ႁႃ၊ တီႈဢၼ်ၵႆၵႆယင်းဢမ်ႇမီးပၼ်ႁႃသင်။ ၵွပ်ႈၼႆ မိူဝ်ႈၽုၵ်ႈၼႆႉ ႁဝ်းၶႃႈတေႁဵတ်းပၢင်ၵုမ်ၵၼ်၊ လွင်ႈၼႆႉ ပေႃးမိူဝ်ႈၽုၵ်ႈမႃးတေတႅပ်းတတ်း ႁူႉလွင်ႈတၢင်းမၼ်းယူႇ- ဝႃႈၼႆ။


ပၢင်လိူၵ်ႈတင်ႈပတ်းပိုၼ်ႉ မိူဝ်ႈပီ 2015 ၼၼ်ႉၵေႃႈ ယွၼ်ႉပိူဝ်ႈပဵၼ်ပၢင်တိုၵ်းၵေႃႈလွင်ႈၼိုင်ႈ။ ထႅင်ႈၾၢႆႇၼိုင်ႈ ၾၢႆႇပႃႇတီႇသိူဝ်ၽိူၵ်ႇၵေႃႈ ယၢမ်ႈယိုၼ်ႈလိၵ်ႈတၢင်ႇထိုင်တီႈ ၶွမ်ႊမသျိၼ်ႊၵၢၼ်လိူၵ်ႈတင်ႈဝႃႈ တေဢမ်ႇမီးလွင်ႈၽဵင်ႇပဵင်းပဵၼ်ထမ်းၼႆသေ ၶွမ်ႊမသျိၼ်ႊၵၢၼ်လိူၵ်ႈတင်ႈၵေႃႈ ပူတ်းယႃႉပႅတ်ႈၵၢၼ်လိူၵ်ႈတင်ႈ၊ ၼႂ်းၸႄႈဝဵင်းၵေးသီး မိူင်းၼွင် မိူင်းသူႈ ပႃးၸဵမ်ၵိင်ႇၸႄႈဝဵင်းမိူင်းၸၢင် ၸႄႈဝဵင်းမိူင်းသူႈၸိူဝ်းၼႆႉ ဢမ်ႇပၼ်ၸတ်းပၢင်လိူၵ်ႈတင်ႈ၊ မိူဝ်ႈၼၼ်ႉ ႁဵတ်းႁႂ်ႈၵူၼ်းမိူင်းႁိမ်းသႅၼ် ႁၢမ်းသုၼ်ႇလႆႈလိူၵ်ႈတင်ႈ။