ၽိုၼ်တၢမ်းငဝ်းလၢႆး ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး မၢႆ 03/2017 ဝၼ်းတီႈ 27/03/2017 လၢတ်ႈဝႃႈ ၵူၼ်းဝၢၼ်ႈဢမ်ႇမီးတၢင်းၽိတ်းသင်သွင်ၵေႃႉ ၺႃးတပ်ႉပႂ်ႉလႅၼ်လိၼ်မၢၼ်ႈတီႉၺွပ်း ၼႂ်းမိူင်းယွင်း ၸိုင်ႈတႆးပွတ်းဢွၵ်ႇ မိူဝ်ႈ ဝၼ်းတီႈ 12-18/03/2017။

မိူဝ်ႈဝၼ်းတီႈ 12/03/2017 ၶၢဝ်းယၢမ်း 8 မူင်းႁူဝ်ၶမ်ႈ ၸုမ်းတပ်ႉပႂ်ႉလႅၼ်လိၼ်မၢၼ်ႈ မၢႆ 1008 ၶဝ်ႈမိူဝ်းၼႂ်းႁိူၼ်း လုင်းၼၢၼ်ဢုၼ်ႇ ဢႃယု 54 ၼႂ်းဝၢၼ်ႈထိၼ် ဢိူင်ႇဝၢၼ်ႈတပ်ႉ ၸႄႈဝဵင်းမိူင်းယွင်း။ ၶဝ်ယႃႉၽၵ်းတူ ႁိူၼ်းလုင်းၼၢၼ်ဢုၼ်ႇ သေၶဝ်ႈမိူဝ်းသွၵ်ႈတဝ်ႁႃၼႂ်းႁိူၼ်း၊ ၵူၺ်းၵႃႈဢမ်ႇၺႃးလုင်းၼၢၼ်ဢုၼ်ႇ။


ၸုမ်းၼၼ်ႉသိုပ်ႇသွၵ်ႈႁႃလုင်းၼၢၼ်ဢုၼ်ႇ သေၵႂႃႇထူပ်းႁၼ်မၼ်းၼႂ်းဝတ်ႉဝၢၼ်ႈပၢၼ် ဢၼ်ႁၢင်ႇယၢၼ်ဝၢၼ်ႈ ထိၼ် 2 လၵ်း ယူႇၼႃႈတၢင်းၸၢၼ်း ၽွင်းၵၢင်ၼႂ် 1 မူင်း ၼႂ်းဝၼ်းတီႈ 13/03/2017။ ၸုမ်းတပ်ႉပႂ်ႉ လႅၼ်လိၼ်မၢၼ်ႈၼၼ်ႉ ဢဝ်လုင်းၼၢၼ်ဢုၼ်ႇ ၵႂႃႇတီႈတပ်ႉမၢၼ်ႈ 335 ဢၼ်ပၵ်းဝႆႉတီႈ ၼႂ်းဝဵင်းမိူင်းယွင်း။ တီႈၼၼ်ႈ ၶဝ်ထတ်းထၢမ်လုင်းၼၢၼ်ဢုၼ်ႇ လႄႈၸီႉၼႄးဝႃႈ လုင်းၼၢၼ်ဢုၼ်ႇၵဵပ်းၶွၼ်ႇၸွႆႈသိုၵ်းတႆး။ ဝၢႆးၼၼ်ႉသိုၵ်းမၢၼ်ႈဢဝ်လုင်းၼၢၼ်ဢုၼ်ႇ ၵုမ်းၶင်ဝႆႉ ၼႂ်းႁွင်ႈတႃႇၶၢဝ်းတၢင်းသၢမ်ဝၼ်းသေ တဵၵ်းၸႂ်ႉမၼ်း ၵႂႃႇဢွၵ်ႇတၢင်းၸွမ်းၶဝ်လႄႈၸႂ်ႉပႃးၵွင်ႈၵႂႃႇၸွမ်း။


ထိုင်မႃးဝၼ်းတီႈ 16/03/2017 ၶၢဝ်းယၢမ်း 11 မူင်းၵၢင်ၶိုၼ်း ၸုမ်းတပ်ႉပႂ်ႉလႅၼ်လိၼ်ၶဝ်ၵႂႃႇၺွပ်း ၸၢႆးၼွႆႉသၢင်ႇသႅင် ဢႃယု 48 ပီ၊ ၵူၼ်းဝၢၼ်ႈႁူဝ်ယၢင်း ဢၼ်ယူႇတၢင်းတူၵ်းဝၢၼ်ႈပၢၼ် တီႈႁိူၼ်းမၼ်း။  ၶဝ်ဢဝ်တူဝ်မၼ်းၸၢႆးၵႂႃႇၸူး တပ်ႉမၢၼ်ႈ 335 ၼႂ်းမိူင်းယွင်း၊ ၵူၺ်းၵႃႈ ၸိူဝ်ႉၶိူဝ်းပီႈၼွင်ႉ ပႃးၸဵမ်ၽူႈယႂ်ႇၵူၼ်းလူင်ဝၢၼ်ႈ ၸွမ်းၵႂႃႇၶႆႈတီႈ တပ်ႉမၢၼ်ႈၶဝ်သေ ႁပ်ႉႁွင်းဝႃႈမၼ်းၸၢႆးပဵၼ်ၵူၼ်း ဝၢၼ်ႈ ထမ်းမတႃး (ယူဝ်းယူဝ်း)ၵူၺ်း၊ ဢမ်ႇၵဵဝ်ႇၶွင်ႈ ၵၼ်တင်းသိုၵ်းတႆး ၼႆသေသိုၵ်းမၢၼ်ႈၶဝ်ၶိုၼ်းပွႆႇပၼ် မိူဝ်ႈဝၼ်းတီႈ 17/03/2017 ၶၢဝ်းယၢမ်း 4 ဝၢႆးဝၼ်း။


မိူဝ်ႈတပ်ႉပႂ်ႉလႅၼ်လိၼ်မၢၼ်ႈၶဝ် ၵႂႃႇၺွပ်းၸၢႆးၼွႆႉသၢင်ႇသႅင် ၼၼ်ႉ ၶဝ်ဢဝ်ပႃးလုင်းၼၢၼ်ဢုၼ်ႇၵႂႃႇၸွမ်းၶဝ်။ ထိုင်မႃးဝၼ်းတီႈ 18/03/2017 ၼၼ်ႉ ၸုမ်းတပ်ႉပႂ်ႉလႅၼ်လိၼ်ၶဝ် ဢမ်ႇႁၼ်လၵ်းထၢၼ် (သၢၵ်ႈသေႇ) လွင်ႈဝႃႈ လုင်းၼၢၼ်ဢုၼ်ႇ ၵဵဝ်ႇၶွင်ႈၸွမ်းသိုၵ်းတႆး ၼႆၼၼ်ႉသေ ၶိုၼ်းပွႆႇလုင်းၼၢၼ်ဢုၼ်ႇပွၵ်ႈႁိူၼ်းၶိုၼ်း။ ၽိူဝ်ႇထိုင်ႁိူၼ်းယဝ်ႉ လႆႈႁူႉဝႃႈ ငိုၼ်းလႄႈၶူဝ်းၶွင်ဢၼ်မီးၵႃႈၶၼ် 20 လၢၼ်ႉၵျၢပ်ႈ ၺႃးသွၵ်ႈတဝ် ဢဝ်ၵႂႃႇ။


မိူဝ်ႈသွင်ပီပူၼ်ႉမႃးၼၼ်ႉၵေႃႈ လုၵ်ႈၸၢႆးလုင်းၼၢၼ်ဢုၼ်ႇ ၸၢႆးသၢမ်တိပ်ႉ ထုၵ်ႇသိုၵ်းမၢၼ်ႈ ၶမရ 573 ယိုဝ်းတၢႆတီႈႁိူၼ်းၶဝ် တေႃႇၼႃႈတေႃႇတႃ ပေႃႈမႄႈ-ၼႆယဝ်ႉ။


[သင်ၽူႈလႂ်သူၼ်ၸႂ် ၶႂ်ႈႁူႉလွင်ႈႁူဝ်ယွႆႈတႅတ်ႈတေႃးၸိုင် ၶႅၼ်းတေႃႈၵပ်းသိုပ်ႇတွင်ႈထၢမ် ၸၢႆးႁေႃသႅင် +66: (0) 62- 941-9600 (ဢင်းၵိတ်း၊ တႆး) ယိင်းလွၼ်ႉလႅင်း +66: (0) 63-838-9029 (ဢင်းၵိတ်း၊ မၢၼ်ႈ)]