ႁူဝ်ပဝ်ႈပႃႇတီႇႁူဝ်သိူဝ် SNLD တင်းလုၵ်ႈၸုမ်း ႁွတ်ႈၽႅဝ်ဝဵင်းၵဵင်းတုင် ႁူပ်ႉထူပ်းပေႃႈမႄႈၵူၼ်းမိူင်း။ သူၼ်းတုမ်လွင်ႈၵၢၼ်လိူၵ်ႈတင်ႈ ဢၼ်တေၸတ်းႁဵတ်း ဝၼ်းတီႈ 1 လိူၼ်ဢေႊပရိူဝ်ႊၼႃႈၼႆႉ။ ပႃႇတီႇႁူဝ်သိူဝ်မုင်ႈမွင်းၶႅပ်းၵၢင်ၸႂ် ပီႈၼွင်ႉၵူၼ်းမိူင်းယူႇ- ၼၢင်းၶမ်းဢေး ၽူႈတႅၼ်းသၽႃးၵူၼ်းမိူင်း ၸႄႈဝဵင်းၼမ်ႉတူႈ လၢတ်ႈ။

မိူဝ်ႈဝၼ်းတီႈ 27/03/2017 ၶၢဝ်းယၢမ်းဝၢႆးဝၼ်း၊ ႁူဝ်ပဝ်ႈၸဝ်ႈၶုၼ်ထုၼ်းဢူး တင်းလုၵ်ႈၸုမ်း ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး (SNLD) ႁွတ်ႈၽႅဝ်မိူင်းၵဵင်းတုင်သေ ႁူပ်ႉထူပ်းၵူၼ်းမိူင်းတီႈၵဵင်းတုင် ၸိုင်ႈတႆးပွတ်းဢွၵ်ႇ။ ပၢင်ႁူပ်ႉထူပ်းၵူၼ်းမိူင်း ၸတ်းႁဵတ်းတီႈႁူင်းႁေႃ (သမူဝ်းသွၼ်)တႆးလိုဝ်ႉ ၼႂ်းဝဵင်းၵဵင်းတုင်၊ မီးၵူၼ်းမိူင်းၶဝ်ႈႁူမ်ႈထွမ်ႇငိၼ်းႁိမ်းႁဵင်။ တူဝ်တႅၼ်းပႃႇတီႇႁူဝ်သိူဝ် ၼႂ်းၸိုင်ႈတႆးပွတ်းဢွၵ်ႇ မိူၼ်ၼင်ႇၸႄႈဝဵင်း တႃႈၶီႈလဵၵ်း၊ မိူင်းယွင်း၊ မိူင်းၽျၢၵ်ႈ၊ မိူင်းယၢင်း၊ ၵဵင်းတုင်၊ မိူင်းပဵင်း၊ ပုင်ႇပႃႇၶႅမ်ၸိူဝ်းၼႆႉၵေႃႈ ၶိုၼ်ႈႁွတ်ႈၶဝ်ႈႁူမ်ႈ- ၼႆယဝ်ႉ။


တီႈပၢင်ႁူပ်ႉထူပ်းၵူၼ်းမိူင်းၼႆႉ ၽူႈယႂ်ႇၵူၼ်းလူင်ၸိူဝ်းမွၵ်ႇလၢတ်ႈၶေႃႈၵႂၢမ်း မီးႁူဝ်ပဝ်ႈၸဝ်ႈၶုၼ်ထုၼ်းဢူး၊ ၼၢင်းၶမ်းဢေး၊ လုင်းၸၢႆးလူင် ၼေႃႇၽူႈတႅၼ်း ဢၼ်တေၶဝ်ႈၶႅင်ႇလိူၵ်ႈတင်ႈ တီႈၵဵင်းတုင်။


ၸဝ်ႈၶုၼ်ထုၼ်းဢူး တေႃႉတႆႇၶႆႈၼႄ လွင်ႈၶိူဝ်းၸဝ်ႈၾႃႉမိူင်းသီႇပေႃႉ တင်းၶိူဝ်းၸဝ်ႈၾႃႉမိူင်းၵဵင်းတုင် ၵဵဝ်ႇၶွင်ႈၵၼ်မႃးၸိူင်ႉႁိုဝ်၊ လွင်ႈပီႈၼွင်ႉမိူင်းသီႇပေႃႉတင်းမိူင်းၵဵင်းတုင် ပဵၼ်ပီႈပဵၼ်ၼွင်ႉၵၼ်။ ၼၢင်းၶမ်းဢေး တိုၵ်းသူၼ်းမွၵ်ႇလၢတ်ႈလွင်ႈပၢင်လိူၵ်ႈတင်ႈ၊ လွင်ႈတႃႇၵပ်းသၢၼ်ၼႃႈၵၢၼ်ဢၼ်တေႁူမ်ႈၵၼ်ႁဵတ်းသၢင်ႈ ၵႂႃႇတၢင်းၼႃႈ ၼင်ႇႁိုဝ်ၶိူဝ်းတႆးပေႃးမီးလွင်ႈပူၵ်းပွင်ၶိုၼ်ႈယႂ်ႇၵႂႃႇ ၸိူဝ်းၼႆႉ။


"ပီႈၼွင်ႉၵူၼ်းဝၢၼ်ႈၵူၼ်းမိူင်းႁဝ်းၶႃႈ မီးပၼ်ႁႃသင်ၵေႃႈၶႅၼ်းတေႃႈ ၵပ်းသိုပ်ႇတိတ်းတေႃႇႁဝ်းၶႃႈမႃး တီႈလုမ်းပႃႇတီႇႁူဝ်သိူဝ်။ ႁဝ်းၶႃႈမုင်ႈမွင်းၶႅပ်းၵၢင်ၸႂ်ပီႈၼွင်ႉၵူၼ်းမိူင်းယူႇ၊ ႁႂ်ႈပေႃးလိူၵ်ႈလႆႈၽွင်းတႅၼ်းလီၼႆႉ မီးတီႈသူၸဝ်ႈ။ သူၸဝ်ႈတေလိူၵ်ႈၶႅၵ်ႇႁႃႉၸဝ်ႈႁိူၼ်း ဢၼ်ဝႃႈၼၼ်ႉၵေႃႈ မီးတီႈပီႈၼွင်ႉၵူၼ်းဝၢၼ်ႈၵူၼ်းမိူင်းႁဝ်း။ ပႃႇတီႇႁူဝ်သိူဝ်ၼႆႉ မီးယိူင်းဢၢၼ်းတႃႇမႄးၶဵၼ်ႇတႅမ်ႈ ပိူင်ငဝ်ႈပိုင်းမိူင်း (လၵ်းမိူင်း) တႃႇမိူင်းတႆးႁဝ်းလႆႈၸႂ်ႉႁင်းၶေႃ။ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ ၼင်ႇႁိုဝ်တေၽၢႆးႁိူဝ်းၵႂႃႇထိုင်တီႈတႃႈႁိူဝ်းလႆႈၼၼ်ႉ မီးတီႈပီႈၼွင်ႉၵူၼ်းမိူင်းႁဝ်း"- ၼၢင်းၶမ်းဢေး ၽူႈတႅၼ်းသၽႃးၵူၼ်းမိူင်း ၸႄႈဝဵင်းၼမ်ႉတူႈ လၢတ်ႈ။


ပႃႇတီႇၵၢၼ်မိူင်း ၼႂ်းၸႄႈဝဵင်းၵဵင်းတုင် ဢၼ်တေၶဝ်ႈၶႅင်ႇၵၼ် တင်းမူတ်းမီး 6 ပႃႇတီႇ ပႃႇတီႇႁူဝ်သိူဝ်၊ ပႃႇတီႇသိူဝ်ၽိူၵ်ႇ၊ ပႃႇတီႇဢႃးၶႃႇ၊ ပႃႇတီႇလႃးႁူႇ၊ ပႃႇတီႇၼူၵ်ႉယုင်းလႄႈ ပႃႇတီႇသၢင်ႇသီႈၸိူဝ်းၼႆႉ။


ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်းတၢင်းၼႃႈ ၼႂ်းဝၼ်းတီႈ 01/04/2017 ၼႆႉ ႁူင်းတွတ်ႈၶႅပ်းၵၢင်ၸႂ် ၼႂ်းၸႄႈဝဵင်းၵဵင်းတုင် တင်းမူတ်းမီး 57 ႁူင်း။ လိူဝ်ၼၼ်ႉ ပွၵ်ႉ/ ဢိူင်ႇဢၼ်မီးသုၼ်ႇတွတ်ႈၶႅပ်းၵၢင်ၸႂ် တႃႇၶဵတ်ႇလိူၵ်ႈတင်ႈမၢႆ(2)  မီးမိူၼ်ၼင်ႇ ဢိူင်ႇယၢင်းလေႃး၊ ဢိူင်ႇလွႆလူင်၊ ဢိူင်ႇၵၢတ်ႇထၢႆႈ၊ ဢိူင်ႇဝတ်ႉသၢဝ်း၊ ဢိူင်ႇပဵင်းတၢဝ်ႉ၊ ဢိူင်ႇပၢင်မတ်း၊ ဢိူင်ႇမိူင်းပၼ်ႇမိူင်းသဵမ်၊ ဢိူင်ႇမိူင်းဢိၼ်း၊ ဢိူင်ႇမိူင်းပၵ်ႉ၊ ဢိူင်ႇမိူင်းၶွၼ်၊ ဢိူင်ႇမူးၸႄႈ၊ ဢိူင်ႇၼွင်တဝ်း၊ ဢိူင်ႇၼမ်ႉၶၢၵ်ႉ၊ ဢိူင်ႇပၢင်ၵဵဝ် တင်းမူတ်း မီး 14 ဢိူင်ႇ။ ၼႂ်းဝဵင်းမီးတီႈပွၵ်ႉ 1 တင်းပွၵ်ႉ 5 -ၼႆယဝ်ႉ။