သိုဝ်ႇၶၢဝ်ႇထႆးလၢႆလၢႆတီႈ ပိုၼ်ၽၢဝ်ႇဝႃႈ သိုၵ်းထႆးၵႅတ်ႇဝႅတ်ႉၵူၼ်းၵႃႉယႃႈ ႁိမ်းလႅၼ်လိၼ်ထႆး-တႆး ၸႄႈတွၼ်ႈၵဵင်းႁၢႆးသေ မီးလွင်ႈပိုတ်းယိုဝ်းၵၼ် ၾၢႆႇၵူၼ်းတေႃႉယႃႈတၢႆ2ၵေႃႉ လွတ်ႈ2ၵေႃႉ သိုၵ်းထႆး ယိုတ်းလႆႈယႃႈမႃႉသႅၼ်မဵတ်ႉ- ဝႃႈၼႆ။

Photo By - Mae Sai News

မိူဝ်ႈဝၼ်းတီႈ 25/03/2017 သိုဝ်ႇၶၢဝ်ႇ MaeSaiNews ပိုၼ်ၽၢဝ်ႇဝႃႈ - ၸဝ်ႈၼႃႈတီႈသိုၵ်းထႆး ႁူမ်ႈၵၼ်ၵႂႃႇဝႅတ်ႉႁွပ်ႈ ပႂ်ႉၵူတ်ႇထတ်းၵူၼ်းတေႃႉယႃႈမဝ်းၵမ် တီႈႁိမ်းႁွမ်းဝၢၼ်ႈၽႃမီ မူႇတီႈ 6 ဢိူင်ႇဝဵင်းၽၢင်းၶမ်း ၸႄႈဝဵင်းမႄႈသၢႆ ၸႄႈတွၼ်ႈ ၵဵင်းႁၢႆး ၸိုင်ႈထႆးပွတ်းႁွင်ႇ လႅၼ်လိၼ်တႆး ။


ၽွင်းၼၼ်ႉ မီးၽူႈၸၢႆး 4ၵေႃႉ ဢၼ်ထၢင်ႇထိူမ်ဝႃႈတေပဵၼ်ၵူၼ်းတေႃႉယႃႈၼႆသေ ၸဝ်ႈၼႃႈတီႈ ၼႄတူဝ် ယွၼ်းၵူတ်ႇထတ်း ၵူၺ်းၵႃႈ ၾၢႆႇ 4ၵေႃႉၼၼ်ႉ ဢမ်ႇပၼ်ၵူတ်ႇထတ်းသေဢမ်ႇၵႃး ယိုဝ်းသႂ်ႇသိုၵ်းထႆးဢွၼ်တၢင်းလႄႈ သွင်ၾၢႆႇလႆႈပိုတ်းယိုဝ်းၵၼ် တၢင်းႁိုင်မွၵ်ႈ10မိၼိတ်ႉ။


သိုဝ်ႇၶၢဝ်ႇထႆး Nationtv.tv တႄႉပိုၼ်ၽၢဝ်ႇဝႃႈ ၵူၼ်း4ၵေႃႉ လၵ်ႉတေႃႉယႃႈ ၶဝ်ႈမိူင်းထႆးၼၼ်ႉ ပဵၼ်ၵူၼ်းလုၵ်ႉတၢင်းမိူင်းႁူမ်ႈတုမ် (မၢၼ်ႈ)မႃး ။ ဝၢႆးသေပိုတ်းယိုဝ်းၵၼ်ယဝ်ႉ သိုၵ်းထႆးထတ်းႁၼ် တူဝ်တၢႆၵူၼ်းၵႃႉယႃႈ2ၵေႃႉ ယႃႈၼိုင်ႈသႅၼ်မဵတ်ႉ။ ၵူၼ်းၵႃႉယႃႈထႅင်ႈ2ၵေႃႉတႄႉ ပၢႆႈပူၼ်ႉၵႂႃႇလႄႈ ၾၢႆႇထႆးလႆႈ ၵပ်းသၢၼ်ၸဝ်ႈၼႃႈတီႈ ၸွမ်းလႅၼ်လိၼ်လၢႆၾၢႆႇသေ ၸွမ်းႁႃတူဝ်ယူႇ ဝႃႈၼႆ။