ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတၢင်ႉယၢၼ်း ပူင်သွၼ်ပၼ်လိၵ်ႈတႆး ၊ ၵႂၢမ်းတႆး တီႈၽူႈ ႁၢပ်ႇၵၢၼ်လူင်ပွင်ၸိုင်ႈ ၼႂ်းၸႄႈဝဵင်းတၢင်ႉယၢၼ်း တႃႇၶၢဝ်းတၢင်း 40 ဝၼ်း။

တင်ႈဢဝ်ဝၼ်းတီႈ03/03/2017မႃးၼႆႉ ဢိင်ၼိူဝ် ၸဝ်ႈၼႃႈတီႈၾၢႆႇလူင်ပွင်ၸိုင်ႈ ယိုၼ်ႈယွၼ်း တၢင်းႁူမ်ႈမိုဝ်း တီႈၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းတၢင်ႉယၢၼ်း  ႁႂ်ႈၸွႆႈပူင်သွၼ်ပၼ် လိၵ်ႈတႆး၊ ၵႂၢမ်းတႆး တီႈၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈၼႆသေ ၵေႃလိၵ်ႈလၢႆးတႆးပူင်သွၼ်ပၼ် တႃႇၶၢဝ်းတၢင်း 40 ဝၼ်း။


ပၢင်သွၼ်လိၵ်ႈတႆး၊ၵႂၢမ်းတႆးၼႆႉ ပူင်သွၼ်ပၼ်ဝၼ်းၸၼ်ထိုင်ဝၼ်းသဝ်း ၶၢဝ်းယၢမ်းဝၢႆးဝၼ်း 3မူင်းတေႃႇထိုင်5မူင်း။


ၸတ်းႁဵတ်း2တီႈ တီႈလုမ်းၵွၼ်းၵူႈလွင်ႈလွင်ႈလႄႈ ႁူင်းႁဵၼ်းၸၼ်ႉၵၢင် ပွၵ်ႉ 2 ဝဵင်းတၢင်ႉယၢၼ်း ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။ ၶူးပူင်သွၼ်မီး 9 ၵေႃႉ လူင်ပွင်ၸိုင်ႈၵမ်ႉထႅမ်ပၼ် 1ၵေႃႉလႂ် 100,000 (ၼိုင်ႈသႅၼ်)ၵျၢတ်ႉ တေႃႇလိူၼ်။


ယိူင်းဢၢၼ်းဢၼ်လႆႈၸတ်းႁဵတ်းတႄႉ ၼင်ႇႁိုဝ်ၶႃႈႁၢပ်ႇၵၢၼ်ၶုၼ်လႄႈ ၵူၼ်းဝၢၼ်ႈၵူၼ်းမိူင်း ပေႃးတေၵပ်းသိုပ်ႇၵပ်းသၢၼ်ၵၼ်လႆႈလီ၊ ပွင်ႇၸႂ်ၵၼ်ငၢႆႈ - ဝႃႈၼႆ။


ၸၢႆးလၢဝ်ဝၼ်း ၽူႈပွင်ၵၢၼ်ၵေႃလိၵ်ႈလၢႆး လၢတ်ႈဝႃႈ - “ပၢင်သွၼ်လိၵ်ႈတႆး ၵႂၢမ်းတႆးၼႆႉ လႆႈႁၼ် ၸဝ်ႈၼႃႈတီႈၶႃႈႁၢပ်ႇၵၢၼ်ၶုၼ် ၼႂ်းဢိူင်ႇ ၼႂ်းဝၢၼ်ႈဢွၼ်ၵၼ်မႃးႁဵၼ်းဢဝ် ယွၼ်ႉဝႃႈၼႂ်းဝၢၼ်ႈ ႁဝ်းၶႃႈၼႆႉ ပဵၼ်ဝၢၼ်ႈတႆး ၵူၼ်းႁူႉပွင်ႇၵႂၢမ်းတႆးၵေႃႈၼမ်။ ၶႃႈႁၼ်ထိုင်ဝႃႈ ပေႃးၶႃႈႁၢပ်ႇၵၢၼ်ၶုၼ် လူင်ပွင်ၸိုင်ႈ မေႃလိၵ်ႈတႆး ၵႂၢမ်းတႆး ဢဝ်လိၵ်ႈတႆးပဵၼ်ၵၢင်သေ ၸႂ်ႉတိုဝ်းတေႃႇၵၼ်ၼႆတႄႉ တေလႆႈဝႃႈမီးၽွၼ်းလီ တွၼ်ႈတႃႇၵူၼ်းမိူင်းတႄႉတႄႉ ” ဝႃႈၼႆ။


ၸိူင်ႉၼၼ်ၼင်ႇၵဝ်ႇ တႄႇဝၼ်းတီႈ16/03/2017 ၼႆႉၵေႃႈ ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး ဝဵင်းတၢင်ႉယၢၼ်းသေ တေပူင်သွၼ်လိၵ်ႈလၢႆးတႆး ပၼ်လုၵ်ႈဢွၼ်ႇဢႃယု15 ၶိုၼ်ႈၼိူဝ် ၽွင်းဢိုတ်း ႁူင်းႁဵၼ်းလူင်ပွင်ၸိုင်ႈ ။