သင်ၶၸဝ်ႈဝဵင်းၵျွၵ်ႉမႄး ႁူမ်ႈၵၼ် တႅမ်ႈလိၵ်ႈတုၵ်းယွၼ်း တီႈၽူႈပွင်ၵၢၼ်ႁဵတ်းပၢႆႉ ႁႂ်ႈလႅၵ်ႈလၢႆႈပၼ်ၸိုဝ်ႈ ဝဵင်းၵျွၵ်ႉမႄး ပဵၼ်ဝဵင်းၵျွၵ်းမႄး ၼႆသင်ၶၸဝ်ႈတူၼ်ၼိုင်ႈလၢတ်ႈ ။

ဝၼ်းတီႈ 08/12/2016 သင်ၶၸဝ်ႈဝဵင်းၵျွၵ်ႉမႄး ဢုပ်ႇဢူဝ်းတူၵ်းလူင်းလႆႈၸႂ်ၵၼ်ဝႃႈ တေပိၼ်ႇလႅၵ်ႈၸိုဝ်ႈ ပၢႆႉၶဝ်ႈဝဵင်းၼႆသေ တႅမ်ႈလိၵ်ႈတၢင်ႇထိုင် တီႈလုမ်းပႃႇတီႇႁူဝ်သိူဝ် SNLD ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။


ၼႂ်းၽိုၼ်လိၵ်ႈၼၼ်ႉမီးဝႆႉဝႃႈ ပိုၼ်းဢၼ်လမ်ႇလွင်ႈ မိူဝ်းၼႃႈယႃႇႁႂ်ႈလုၵ်ႈဢွၼ်ႇ ၼေႃႇတႅၼ်းၶိူဝ်း ႁဝ်းပေႃး တေတႅမ်ႈၽိတ်းၼၼ်ႉ တီႈဢၼ်တႅမ်ႈဝႆႉ ပၢႆႉၶဝ်ႈဝဵင်းဝႃႈ ၵျွၵ်ႉမႄး ၼၼ်ႉႁႂ်ႈပိၼ်ႇတႅမ်ႈပဵၼ် ၵျွၵ်းမႄး  ၸႂ်ႉၸိုဝ်ႈဝဵင်းဢၼ်မီးပိုၼ်းမႃးၼၼ်ႉၵႂႃႇ - ဝႃႈၼႆ ။


ၸဝ်ႈသေႃး သင်ၶၸဝ်ႈဝဵင်းၵျွၵ်ႉမႄး လၢတ်ႈဝႃႈ- “လွင်ႈၼႆႉ သင်ၶၸဝ်ႈႁဝ်းဢုပ်ႇၵၼ်မႃးႁိုင်ယဝ်ႉ ဝႃႈတေ ၶႂ်ႈပိၼ်ႇလႅၵ်ႈၸိုဝ်ႈပၢႆႉၶဝ်ႈဝဵင်း ယွၼ်ႉဝႃႈ ၵျွၵ်ႉမႄးၼႆႉ မၼ်းဢမ်ႇမီးတီႈပွင်ႇ ၶႂ်ႈပိၼ်ႇပဵၼ်ၵျွၵ်းမႄး ယွၼ်ႉဝႃႈမၼ်းမီးပိုၼ်းမၼ်းမႃး လွင်ႈဝႃႈၶုၼ်သၢမ်လေႃးမႄးၶိုၼ်းၶိူင်ႇဝူဝ်းၼၼ်ႉသေ ၸင်ႇမီးၸိုဝ်ႈမႃးဝႃႈ ၵျွၵ်းမႄးၼႆ” ။


ၵဵဝ်ႇလူၺ်ႈလွင်ႈၼႆႉ ၽူႈလူင်ႉလႅၼ်ႇပိုၼ်းတႆး ၶုၼ်ယုင်းၶဵဝ် လၢတ်ႈဝႃႈ “တေႁဵတ်းသင် တႅပ်းတတ်းသင်ၵေႃႈ ၵိုင်ႇလီၶူၼ်ႉၶႂႃႉလီလီ ၊ ၵဵဝ်ႇၵပ်းဝဵင်းၵျွၵ်ႉမႄးသေ မေႃလိၵ်ႈလုင်းၶုၼ်မႁႃႇတႅမ်ႈဝႆႉၵေႃႈမီးယူႇ ။ လုင်းၶုၼ် မႁႃႇတႄႉတႅမ်ႈဝႆႉၼႂ်းပပ်ႉ “ပိုၼ်းၶူးမေႃတႆးႁူၵ်းၸဝ်ႈ”ၼႃႈလိၵ်ႈ109ၼၼ်ႉဝႃႈ “ၵွင်းမၢၵ်ႇႁိၼ် လမ်ၼႆႉပဵၼ်ၵႂၢမ်း တႆးၸိုဝ်ႈသဵင်တႆးမိူဝ်ႈၵွၼ်ႇ ယၢမ်းလဵဝ်ပဵၼ်ၵျွၵ်ႉမႄး “ဝဵင်းၵျွၵ်ႉမႄးၼႆယဝ်ႉ ။


သင်ၶၸဝ်ႈလႄႈၵူၼ်းဝဵင်းၵျွၵ်ႉမႄး ၵမ်ႈၽွင်ႈတႄႉယုမ်ႇယမ်ဝႃႈ - ၶုၼ်သၢမ်လေႃးၵဵင်းတွင်းၼႆႉ ဢွၼ်တၢင်း ပႆႇထူပ်းၵၼ်တင်း ၼၢင်းဢူဝ်ႈပဵမ်ႇ မိူင်းၵိုင်ၼၼ်ႉမၼ်းၸဝ်ႈယၢမ်ႈပဵၼ်ၵူၼ်းၵႃႉဝူဝ်းတၢင်ႇ၊ ဢဝ်ဝူဝ်းတၢင်ႇ သေႁွတ်ႈ ၽႅဝ်ထိုင်ပွတ်းႁွင်ႇ ယဝ်ႉလႆႈၶၢမ်ႈမႄႈၼမ်ႉဢၼ်ၼိုင်ႈ ႁွင်ႉဝႃႈၼမ်ႉပႃတႅပ်း မိူဝ်ႈၽွင်းမၼ်းၸဝ်ႈ လႄႈလုၵ်ႈၼွင်ႉတပေးမၼ်း ၶၢမ်ႈၼမ်ႉၼၼ်ႉ ဢဝ်ၶိူင်ႇဝူဝ်းၶၢတ်ႇ ၵႂႃႇသေတူဝ်မၼ်း ၸဝ်ႈၵေႃႉၵျွၵ်း လူင်းသေမႄး ၶိူင်ႇဝူဝ်းမၼ်းလႄႈ ၸင်ႇမၵ်းမၼ်ႈ ဢွင်ႈတီႈၼၼ်ႉဝႃႈ “ၵျွၵ်းမႄး” ဝႃႈၼႆ ။


ၽူႈလူင်ႉလႅၼ်ႇပိုၼ်းတႆး တင်းလၢႆတႄႉတႅမ်ႈဝႃႈ ၸိူင်းႁၵ်ႉ - ၶုၼ်သၢမ်လေႃး ၼၢင်းဢူဝ်ႈပဵမ်ႇ(ဢူးပဵမ်ႇ) ၼႆႉဢမ်ႇၸႂ်ႈပိုၼ်း ပဵၼ်ဢပုမ်ႇတၢၼ်ႇတႃႇရီႇ - ၸိူင်းႁၵ်ႉဝူၼ်ႉသၢင်ႈလၢတ်ႈၸပ်း သူပ်းပၢၵ်ႇသေယုမ်ႇ ယမ်ၵၼ်မႃးၵူၺ်းဝႃႈၼႆ ။