ပီႈၼွင်ႉတႆးႁွတ်ႈမိူင်းထႆး ႁိမ်းၸမ် 500 ၵေႃႉဢွၼ်ၵၼ် ၵႂႃႇၵႃရဝၼပ်ႉယမ် ၶၢပ်ႈတူဝ်ၸဝ်ႈမုၼ် ယႂ်ႇႁေႃၶမ်းထႆး ၼႂ်းဝၢင်းႁေႃၶမ်းလူင် မိူင်းၵွၵ်ႇၸိုင်ႈထႆး ။

Photo By - Seng Sai

ဝၼ်းတီႈ09/12/2016 ပီႈၼွင်ႉတႆးႁွတ်ႈမိူင်းထႆး ဢၼ်သဝ်းထင်ယူႇလၢႆတီႈမိူၼ်ၼင်ႇ မိူင်းၵွၵ်ႇ ၊ၵဵင်းမႆႇ၊ ရယွင်းလႄႈ ႁိမ်းႁွမ်းမိူင်းၵွၵ်ႇႁူမ်ႈတင်းမူတ်း 24 ၸုမ်း ႁႅင်းၵူၼ်း ႁိမ်း500 ၵေႃႉပၢႆ ၵႂႃႇၵႃ ရဝၼပ်ႉယမ်ၶၢပ်ႈတူဝ် ၸဝ်ႈမုၼ်ယႂ်ႇႁေႃၶမ်း တီႈဝၢင်းႁေႃၶမ်း (သၼၢမ်လူင်) မိူင်းၵွၵ်ႇ ၸိုင်ႈထႆး ။


ၸၢႆးသၢႆၶူင်း တီႈၵိူဝ်းၵုမ် မူလၼိထိၽရႃႉထမ်းသႅင် ၵေႃႉဢွၼ်ႁူဝ်ၵႂႃႇၼၼ်ႉလၢတ်ႈဝႃႈ- “ဝၼ်းမိူဝ်ႈ ၼႆႉ လႆႈႁၼ်ပီႈၼွင်ႉတႆးႁဝ်းၶႃႈ ၽွမ်ႉႁူမ်ႈၵၼ်တႄႉတႄႉ ႁဝ်းၶႃႈဢွၼ်ၵၼ်ၼုင်ႈၶူဝ်းတႆးသီလမ် သေမႃးၼႆႉ ၸဝ်ႈၼႃႈတီႈၵေႃႈ ႁူမ်ၸူမ်းႁပ်ႉတွၼ်ႈတႄႉတႄႉ ႁဝ်းလႆႈၶဝ်ႈၼႂ်းဝၢင်း ႁေႃဢွၼ်တၢင်း ပိူၼ်ႈၵွၼ်ႇ ၵွပ်ႈၼၼ်လႄႈၵၢၼ်တီႈႁဝ်းၶႃႈၽွမ်ႉသဵင်ပဵင်းပၢၵ်ႇၵၼ် ဢဝ်ၵၼ်ဝႃႈပႃးၵၼ်ပဵၼ် ၼႆႉမၼ်းလမ်ႇလွင်ႈလႄႈ မီးဢူၽုင်းတႄႉ လိူဝ်ၼၼ်ႉႁဝ်းၶႃႈယင်း ၸႃႇၵႃႉလဵင်ႉလူတၢင်းၵိၼ် တႆးပႃး” ဝႃႈၼႆ ။


မိူဝ်ႈပီ 2512 ၼၼ်ႉ ၸဝ်ႈမုၼ်ယႂ်ႇၶုၼ်ႁေႃၶမ်းလႄႈ ၸဝ်ႈၼၢင်းႁေႃၶမ်း ယင်းႁွတ်ႈထိုင်ဢႅဝ်ႇ ယဵမ်ႈသူႇၸႂ်း ပီႈၼွင်ႉတႆး တီႈဝၢၼ်ႈမႂ်ႇမွၵ်ႇၸၢမ် ဢိူင်ႇတႃႈတွၼ်း ၸႄႈဝဵင်းမႄႈဢၢႆး လႄႈဝဵင်းမိူင်းႁႅင် ၸႄႈတွၼ်ႈၵဵင်းမႆႇ ။


မၼ်းၸဝ်ႈ ၸွႆႈထႅမ်ယုၵ်ႉမုၼ်းပၼ် ဢွင်ႈတီႈႁဵတ်းၵၢၼ်ယူႇသဝ်း တေႃႇပေႃးၶိုၼ်ႈယႂ်ႇမႂ်ႇသုင် မီးၼမ်ႉ မီးၾႆးၶဝ်ႈထိုင်ၼႂ်းမူႇဝၢၼ်ႈ။ သၢင်ႈပၼ်ႁူင်းႁဵၼ်း ပိူဝ်ႈလုၵ်ႈလၢၼ်တႆးလႄႈ ၵူၼ်းၸိူဝ်း ယူႇသဝ်းၸွမ်းႁူၺ်ႈၸွမ်းလွႆ ။


ၸၢႆးသၢႆၶူင်း သိုပ်ႇလၢတ်ႈထႅင်ႈဝႃႈ - “ဢၼ်ၸဝ်ႈသူႇၸႂ်း ပီႈၼွင်ႉတႆးတီႈဝၢၼ်ႈမႂ်ႇမွၵ်ႇၸၢမ် သေၸွႆႈ ထႅမ်ယုၵ်ႉမုၼ်း ပၼ်ဢွင်ႈတီႈယူႇသဝ်း ပူၵ်းတင်ႈႁူင်းႁဵၼ်း ႁႂ်ႈလုၵ်ႈလၢၼ်ႁဝ်း ပေႃးလႆႈၶိုၼ်ႈႁဵၼ်း ထိုင်ဝၼ်းမိူဝ်ႈၼႆႉၼႆႉ ၵုင်ႇမုၼ် ႁႃတီႈသုတ်းသဵင်ႈဢမ်ႇလႆႈ ၵွပ်ႈၼၼ်လႄႈ ၸဝ်ႈႁေႃၶမ်း တူၼ်ႈတီႈ 9 ၼႆႉမီးၵုင်ႇမုၼ် ၼိူဝ်ႁဝ်းၶႃႈပီႈၼွင်ႉတႆးတႄႉတႄႉၶႃႈ ”- ဝႃႈၼႆ ။


ၸဝ်ႈမုၼ်ယႂ်ႇၶုၼ်ႁေႃၶမ်း ၽူးမိၽူလ်း ဢၻုလ်းယၻဵတ်ႇ ၼွၼ်းၽႄးသဵင်ႈမုၼ်ၵႂႃႇ မိူဝ်ႈဝၼ်း တီႈ 13/10/2016 ၶၢဝ်းယၢမ်း 15:52 မူင်း၊ တီႈႁူင်းယႃလူင်သီရိရၢတ်ႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး။ ၽွင်းဢႃယုၸဝ်ႈလႆႈ 89 ပီ၊ ဢႃယုၽိသိၵ်ႈၶိုၼ်ႈႁၢင်ႈၸၢမ်ႇ ႁေႃ ၽွင်းငမ်းဝၢၼ်ႈမိူင်း လႆႈ 70 ပီ ။