ဢိင်ၼိူဝ်ၽူႈတႅၼ်းသၽႃး ပႃႇတီႇသၢင်ႇသီႈတၢင်ႇယိုၼ်ႈသေ ပၢင်ၵုမ်သၽႃးၸႄႈမိူင်းတႆး ဢဝ်ၵၢင်ၸႂ် ၽူႈၶိုၼ်ႈႁွတ်ႈၶဝ်ႈႁူမ်ႈပၢင်ၵုမ်သၽႃးတင်းသဵင်ႈ ပိူဝ်ႈတႃႇဢုပ်ႇဢူဝ်းမၵ်းမၼ်ႈ ၸုမ်းဢူၺ်းလီၸၢဝ်းၶိူဝ်းပွတ်းႁွင်ႇ ပဵၼ်ၸုမ်းၵေႃႇၵၢၼ်ႁၢႆႉ။ ၾၢႆႇႁၼ်လီသဵင်ၼမ်ပေႉၵႂႃႇလႄႈ လႆႈဢုပ်ႇဢူဝ်းမၵ်းမၼ်ႈၵႂႃႇ ။

ၵဵဝ်ႇၵပ်းလွင်ႈၼႆႉ မိူဝ်ႈဝၼ်းတီႈ 05/12/2016 သၽႃးၸႄႈမိူင်းတႆး ႁွင်ႉပၢင်ၵုမ်ၶိုၵ်ႉၶၵ်ႉ။ ထိုင်မႃးဝၼ်းတီႈ 06/12/2016 ဢၼ်ပဵၼ်ၽွင်းတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈမၢႆ 2 ဝဵင်းလႃႈသဵဝ်ႈ၊ ပႃႇတီႇသၢင်ႇသီႈ ဢူးဢွင်ႇတူႇ လႆႈတၢင်ႇလၢတ်ႈၼႂ်းပၢင်ၵုမ်သၽႃးဝႃႈ- လီၽွမ်ႉၵၼ်မၵ်းမၼ်ႈ ၸိုဝ်ႈၸုမ်းဢူၺ်းလီၸၢဝ်းၶိူဝ်း ပွတ်းႁွင်ႇ ဝႃႈပဵၼ်ၸုမ်းၵေႃႇၵၢၼ်ႁၢႆႉ။ လွင်ႈၼႆႉၼႂ်းပၢင်ၵုမ်သၽႃး ဢုပ်ႇၵုမ်ၵၼ်တင်းႁိုင်၊ ထဵင်ၵၼ်တင်းႁိုင်။ ၵူၺ်းၵႃႈ ၽိူဝ်ႇမႃးတွတ်ႈၶႅပ်းၵၢ င်ၸႂ်ၵေႃႈ ၵူၼ်းၸိူဝ်းဢၼ်သၢၼ်ၶတ်း ဢမ်ႇထုၵ်ႇလီႁွင်ႉဝႃႈ ၸုမ်းၵေႃႇၵၢၼ်ႁၢႆႉၼၼ်ႉမီး 45 ၶႅပ်း။ ဢၼ်ၵမ်ႉထႅမ်မီး 63 ၶႅပ်း၊ ဢၼ်ဢမ်ႇဢွၵ်ႇသဵင်သမ်ႉမီး 7 ၶႅပ်းၵၢင်ၸႂ်။ ၵွပ်ႈၼၼ်ၾၢႆႇၵမ်ႉထႅမ်လႆႈ 63 ၶႅပ်းသေပေႉၵႂႃႇ- ၼႆယဝ်ႉ ။


ဢိင်ၼိူဝ်လွင်ႈၼႆႉသေ ထိုင်မႃးဝၼ်းတီႈ 07/12/2016 မိူဝ်ႈဝႃးၼႆႉ ပၢင်ၵုမ်သၽႃးလႆႈဢုပ်ႇၵုမ်ၵၼ် ၵဵဝ်ႇၵပ်းလွင်ႈ တႅပ်းတတ်းမၵ်းမၼ်ႈၸိုဝ်ႈ ၸုမ်းဢူၺ်းလီၸၢဝ်းၶိူဝ်းပွတ်းႁွင်ႇၶဝ် ဝႃႈပဵၼ်ၸုမ်းၵေႃႇၵၢၼ်ႁၢႆႉ- ၼႆယဝ်ႉ ။


ၵဵဝ်ႇၵပ်းလွင်ႈၼႆႉ ၼၢင်းၸၢၼ်းၸၢၼ်းဢေး ၽွင်းတႅၼ်းသၽႃးၸႄႈမိူင်း ၸႄႈဝဵင်းသီႇပေႃႉ၊ ပႃႇတီႇႁူဝ်သိူဝ် (SNLD) လၢတ်ႈဝႃႈ- လွင်ႈဢုပ်ႇၵုမ်ၵၼ်လႄႈလွင်ႈၵဵပ်းၵၢင်ၸႂ်ၵၼ်ၼႆႉ ၶဝ်ၸတ်းႁဵတ်းၵႂႃႇၵမ်းၼိုင်ႈယဝ်ႉ တီႈသၽႃးႁူမ်ႈတုမ်။ တီႈၼၼ်ႈၼၼ်ႉၵေႃႈ ၽူႈမႃးၶဝ်ႈႁူမ်ႈၶဝ်ဢုပ်ႇဢူဝ်းၵၼ်ဝႃႈ ဢမ်ႇထုၵ်ႇလီမၵ်းမၼ်ႈပၼ်ၸိုဝ်ႈ ၸၢဝ်းၶိူဝ်း ဝႃႈပဵၼ်ၵူၼ်းၵေႃႇၵၢၼ်ႁၢႆႉ။ ဢမ်ႇထုၵ်ႇလီဢုပ်ႇၵၼ်ၼႆသေ မီးၵူၼ်းသၢၼ်ၶတ်းတင်းၼမ်။ ႁဵတ်းၼၼ်သေ ၾၢႆႇပႃႇတီႇသၢင်ႇသီႈလႄႈၾၢႆႇတပ်ႉသိုၵ်းၶဝ်ၵေႃႈ သုမ်းၵၢၼ်ႉၵႂႃႇပႅတ်ႈ၊ ၶဝ်ၵေႃႈဢမ်ႇၸၢင်ႈ ဢုပ်ႇဢူဝ်းၵၼ်ထႅင်ႈ။ ၵွပ်ႈၼႆလႄႈ ႁူဝ်ၶေႃႈဢုပ်ႇၵုမ်ၵၼ်ၼႆႉ ၸင်ႇလႆႈၽႅဝ်မႃးတီႈသၽႃးမိူင်းတႆးသေ မႃးဢုပ်ႇဢူဝ်းၵၼ်။ တီႈသၽႃးမိူင်းတႆးၼႆႉသမ်ႉ ၵွပ်ႈပိူဝ်ႈၵူၼ်းၶဝ်ၼမ်လႄႈ ၶဝ်ၵေႃႈလႆႈၶႅပ်းၵၢင်ၸႂ် 63 ၶႅပ်းသေလႆႈပေႉၵႂႃႇ။ ၵူၺ်းၵႃႈ ၼႂ်းပၢင်ၵုမ်သၽႃးမိူဝ်ႈဝႃးၼႆႉ ၽွင်းတႅၼ်းသၽႃးတင်းမူတ်းမီး 135 ၵေႃႉၼၼ်ႉ ၵူၼ်းၸိူဝ်းၸိူင်ႉၵၢတ်ႈ ဢမ်ႇမႃးၶဝ်ႈႁူမ်ႈပၢင်ၵုမ်မီး 20 ၵေႃႉပၢႆ-ဝႃႈၼႆ ။


ယၢမ်းလဵဝ် ၼႂ်းၸိုင်ႈတႆးပွတ်းႁွင်ႇၼႆႉ တပ်ႉသိုၵ်းလူင်ပွင်ၸိုင်ႈ တပ်ႉမတေႃႇလႄႈ ၸုမ်းဢူၺ်းလီၸၢဝ်းၶိူဝ်း ပွတ်းႁွင်ႇ (ၸုမ်းၶၢင် KIA ၊ ၸုမ်းတဢၢင်း TNLA ၊ ၸုမ်းၵူဝ်းၵၢင်ႉ MNDAA ၊ ၸုမ်းရၶႅင်ႇ AA) ၶဝ် လႆႈပဵၼ်ပၢင်တိုၵ်းၵၼ်သေ ၾၢႆႇပႃႇတီႇသၢင်ႇသီႈ ၸင်ႇၶႂ်ႈဢဝ်လွင်ႈၼႆႉ ပဵၼ်ႁူဝ်ၶေႃႈဢုပ်ႇဢူဝ်းၵၼ် တႃႇတေတႅပ်းတတ်းမၵ်းမၼ်ႈၸိုဝ်ႈ ၸုမ်းဢူၺ်းလီၸၢဝ်းၶိူဝ်းပွတ်းႁွင်ႇဝႃႈ ပဵၼ်ၸုမ်းၵေႃႇၵၢၼ်ႁၢႆႉ။ လွင်ႈၼႆႉ လႆႈတၢင်ႇလၢတ်ႈၼႂ်းသၽႃး မိူဝ်ႈဝၼ်းတီႈ 06/12/2016 ။


ၼၢင်းၸၢၼ်းၸၢၼ်းဢေး လၢတ်ႈထႅင်ႈဝႃႈ- ပဵၼ်ႁိုဝ်ၵေႃႈယဝ်ႉ ဢၼ်မၵ်းမၼ်ႈပၼ်ၸိုဝ်ႈၸၢဝ်းၶိူဝ်းၸိူဝ်းၼႆႉဝႃႈ ၸုမ်းၵေႃႇၵၢၼ်ႁၢႆႉၼႆၼႆႉ မၼ်းဢမ်ႇလႆႈလွင်ႈငမ်းယဵၼ်မႃး။ လိူဝ်သေဢမ်ႇလႆႈလွင်ႈငမ်းယဵၼ်ယဝ်ႉ ယင်းၸၢင်ႈ တေသုၵ်ႉယုင်ႈမႃးလိူဝ်ၵဝ်ႇထႅင်ႈ။ ၽိူဝ်ႇတေမၵ်းမၼ်ႈၸိုဝ်ႈၵၼ်ဝႃႈ ပဵၼ်ၸုမ်းၵေႃႇၵၢၼ်ႁၢႆႉၸိူင်ႉၼႆၼႆႉ ထုၵ်ႇလီႁႃလၢႆးတၢင်းဢၼ်လီသုတ်းသေ မႃးႁူပ်ႉထူပ်းဢုပ်ႇဢူဝ်းၵၼ် ၵႄႈလိတ်ႈၵၼ်ၼႆႉ ၸင်ႇတေၸၢင်ႈလႆႈ လွင်ႈငမ်းယဵၼ်ဝႆးဝႆး- ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸဝ်ႈၶုၼ်ထုၼ်းဢူး ၵေႃႉပဵၼ်ၽူႈၼမ်းၾၢႆႇၸၢဝ်းၶိူဝ်းလႄႈ ပဵၼ်ပႃး ႁူဝ်ပဝ်ႈပႃႇတီႇႁူဝ်သိူဝ် လၢတ်ႈဝႃႈ- ဢၼ်ပဵၼ်ပၼ်ႁႃယူႇၼႂ်းၸိုင်ႈတႆးပွတ်းႁွင်ႇၼႆႉ မၼ်းပဵၼ်ပၼ်ႁႃဢၼ်ဢုပ်ႇဢူဝ်းၵၼ်သေ ၵႄႈလိတ်ႈလႆႈ။ သင်ၸိူဝ်ႉဝႃႈ ဢမ်ႇၵႄႈလိတ်ႈသေ မႃးဢုပ်ႇဢူဝ်းၵၼ်ယဝ်ႉ မၵ်းမၼ်ႈဝႃႈ ၶဝ်ၼႆႉပဵၼ်ၸုမ်းၵူၼ်းႁၢႆႉပေႃးၼႆၸိုင် မၼ်းၸၢင်ႈႁဵတ်းႁႂ်ႈငဝ်းလၢႆးသုၵ်ႉယုင်ႈမႃးလိူဝ်ၵဝ်ႇ။ တီႈတႄႉမၼ်း ဢၼ်ၶဝ်ပဵၼ်ပၢင်တိုၵ်းၵၼ်ယူႇၼႆႉ ယွၼ်ႉပိူဝ်ႈမၢင်ၸုမ်းသမ်ႉတိုၵ်ႉၵိုတ်းယိုဝ်းသေ ႁဵတ်းသၢင်ႈလွင်ႈငမ်းယဵၼ်ယူႇ၊ မၢင်ၸုမ်းသမ်ႉ တိုၵ်ႉထုၵ်ႇတိုၵ်းယိုဝ်းယူႇ၊ လွင်ႈၼႆႉမၼ်းႁဵတ်းႁႂ်ႈ ၸုမ်းၸိူဝ်းဢၼ်ပႆႇၵိုတ်းယိုဝ်း ဢမ်ႇမီးတိုဝ်ႉတၢင်းၶဝ်ႈမႃးဢုပ်ႇဢူဝ်းလွင်ႈငမ်းယဵၼ် ။


လွင်ႈငမ်းယဵၼ်ၼႆႉ ပိူင်လူင်မၼ်း ႁႂ်ႈၵူႈပႃႈၵူႈၾၢႆႇလႆႈၶဝ်ႈပႃးမႃးၸွမ်းၼႆႉ လမ်ႇလွင်ႈသုတ်း။ ယွၼ်ႉပိူဝ်ႈ ဢမ်ႇႁဵတ်းႁႂ်ႈၵူႈပႃႈၵူႈၾၢႆႇလႆႈၶဝ်ႈပႃးမႃးၸွမ်းလႄႈ ၸင်ႇမီးပၼ်ႁႃပၢင်တိုၵ်းၵၼ်မႃး ၸိူင်ႉၼင်ႇဢၼ်ပဵၼ်ယူႇ ၼႂ်းၸိုင်ႈတႆး ပွတ်းႁွင်ႇယၢမ်းလဵဝ်ၼႆႉ။ ၵွပ်ႈၼႆ ဢမ်ႇၵွမ်ႉၵႃႈၼႂ်းၸိုင်ႈတႆးပွတ်းႁွင်ႇၵူၺ်း၊ ၼႂ်းမိူင်းႁူမ်ႈတုမ်မၢၼ်ႈ ပတ်းပိုၼ်ႉၵေႃႈ ဢၼ်သိုၵ်းမၢၼ်ႈတပ်ႉမတေႃႇ ဢဝ်ဢဵၼ်ႁႅင်းသိုၵ်းသေ ၵႄႈလိတ်ႈပၼ်ႁႃယူႇၸိူဝ်းၼႆႉ မၼ်းဢမ်ႇၸႂ်ႈလၢႆးတၢင်းတႃႇတေလႆႈလွင်ႈငမ်းယဵၼ်၊ မၼ်းပဵၼ်ၾၢႆႇပေႉပုၼ်ႈၵၢၼ်သိုၵ်းၵူၺ်းလႄႈ မၼ်းတေႁဵတ်းႁႂ်ႈမီးပၼ်ႁႃသုၵ်ႉသၵ်ႉယုင်ႈယၢင်ႈၸိူင်ႉၼႆ ယူႇတႃႇသေႇ- ဝႃႈၼႆ ။


တပ်ႉသိုၵ်းတဢၢင်း (TNLA) တင်း တပ်ႉသိုၵ်းၵူဝ်းၵၢင်ႉ (MNDAA) ဢၼ်ပဵၼ်ပၢင်တိုၵ်းၵၼ် တင်းသိုၵ်းမၢၼ်ႈ တပ်ႉမတေႃႇယူႇၼႆႉ လႆႈထုၵ်ႇၾၢႆႇလူင်ပွင်ၸိုင်ႈ ႁၢမ်ႈႁႄႉဝႆႉ ပႆႇပၼ်တိုဝ်ႉတၢင်းၶဝ်ႈမႃး လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) ပိူဝ်ႈတႃႇဢုပ်ႇဢူဝ်း လွင်ႈငမ်းယဵၼ်ၵၼ်။ မိူၼ်ၼင်ႇတပ်ႉသိုၵ်းရၶႅင်ႇ (AA) ၼႆၵေႃႈ ပဵၵ်ႉသမ်ႉဝႃႈ ၾၢႆႇၸုမ်းဢူၺ်းလီၸၢဝ်းၶိူဝ်းပွတ်းႁွင်ႇ ပိုၼ်ၽၢဝ်ႇဝႃႈ ၶဝ်ႈပႃးၼႂ်းပၢင်တိုၵ်းယူႇၼႆသေတႃႉ ၾၢႆႇတၢင်းလူင်ပွင်ၸိုင်ႈ ယင်းပႆႇပိုၼ်ၽၢဝ်ႇပဵၼ်တၢင်းၵၢၼ်ဝႃႈ ၼႂ်းၸုမ်းဢူၺ်းလီၸၢဝ်းၶိူဝ်းပွတ်းႁွင်ႇၼႆႉ ပႃးတင်းၸုမ်းရၶႅင်ႇ (AA) ။


ပူၼ်ႉမႃးမိူဝ်ႈႁူဝ်လိူၼ်ၻီႊသႅမ်ႊၿိူဝ်ႊၼႆႉၵေႃႈ ၾၢႆႇတၢင်းလူင်ပွင်ၸိုင်ႈမိူင်းၶႄႇၶဝ်ၶိုင်ပွင်ပၼ် ႁႂ်ႈၶွမ်ႊမသျိၼ်ႊ ၾၢႆႇလွင်ႈငမ်းယဵၼ်လူင်ပွင်ၸိုင်ႈမၢၼ်ႈ တင်းၸုမ်းၸၢဝ်းၶိူဝ်း ဢၼ်ပဵၼ်ပၼ်ႁႃယူႇ ၼႂ်းၸိုင်ႈတႆးပွတ်းႁွင်ႇၼႆႉ ႁႂ်ႈသွင်ပႃႈသွင်ၾၢႆႇလႆႈႁူပ်ႉဢုပ်ႇဢူဝ်းၵၼ် တီႈဝဵင်းၶုၼ်မိင် မိူင်းၶႄႇ။ ၵူၺ်းၵႃႈ ပၢင်ဢုပ်ႇဢူဝ်းၵၼ်ပွၵ်ႈၼႆႉ ၵွပ်ႈတၢင်းၾၢႆႇတပ်ႉသိုၵ်းၶၢင် (KIA) တေၶဝ်ႈႁူမ်ႈပႃးလႄႈ ၾၢႆႇလူင်ပွင်ၸိုင်ႈမၢၼ်ႈဢမ်ႇၽွမ်ႉသေ ပၢင်ဢုပ်ႇဢူဝ်းလႆႈလူႉလႅဝ်ၵႂႃႇ- ၼႆယဝ်ႉ ။