ၵွင်တိုၼ်းၸွႆႈၸိူဝ်ႉၸၢတ်ႈ ၼႂ်းၵဵင်းမႆႇ၊ ႁႃႁွမ်ၵဵပ်းၶူဝ်းၶွင် ၶိူင်ႈၵိၼ်တၢင်းယႅမ်ႉ ၶိူင်ႈၸႂ်ႉၶူဝ်းသွႆ တီႈပီႈၼွင်ႉတႆး ၼႂ်းမိူင်းထႆးလၢႆလၢႆၸႄႈဝဵင်း ဢဝ်ၵႂႃႇၸွႆႈထႅမ်ၵူၼ်းပၢႆႈၽေးသိုၵ်း၊ ႁူင်းႁဵၼ်းၸိူဝ်ႉၸၢတ်ႈ ၼိူဝ်လွႆတႆးလႅင်း ဢိၵ်ႇ ၵူၼ်းၸိူဝ်းတုၵ်ႉယၢၵ်ႈၶၢၼ်ၸႂ် ၸွမ်းလႅၼ်လိၼ် ။

ၵဵဝ်ႇၵပ်းလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 02/12/2016 ၶၢဝ်းယၢမ်းဝၢႆးဝၼ်း ၵွင်တိုၼ်းၸွႆႈၸိူဝ်ႉၸၢတ်ႈ ဢၼ်ပၵ်း မူႇၸုမ်းဝႆႉၼႂ်းၵဵင်းမႆႇ မိူင်းၸိုင်ႈထႆး၊ လႆႈၸတ်းပၢင်ႁႅၼ်းတၢၼ်း ယၢတ်ႇၼမ်ႉၶႂမ်ႈတဝ်ႈ ၶူဝ်းၶွင်ၶိူင်ႈၵိၼ်ယႅမ်ႉ ၶိူင်ႈၸႂ်ႉသွႆ ၸိူဝ်းၵဵပ်းလႆႈတီႈပီႈၼွင်ႉတႆး ဢိၵ်ႇပီႈၼွင်ႉၽူႈမီးၼမ်ႉၸႂ်ၸေႇတၼႃႇ ၼႂ်းမိူင်းထႆး ၼႂ်းၸႄႈတွၼ်ႈၵဵင်းမႆႇ လမ်းပုၼ်း လၢႆလၢႆၸႄႈဝဵင်း၊ တီႈဝတ်ႉၻွၼ်းၸၼ် (ၻွၼ်းၵျၼ်ႇ) ဢိူင်ႇတႃႈသႃလႃး ၸႄႈဝဵင်းမိူင်း ၵဵင်းမႆႇ ။


ၶူဝ်းၶွင်တင်းမူတ်းၼႆႉ လႆႈတေႃႉသူင်ႇၵႂႃႇပွတ်းလႅၼ်လိၼ်သေ ထိုင်မႃးမိူဝ်ႈဝၼ်းတီႈ 07/12/2016 ၼႆႉ လႆႈၵႂႃႇၸႅၵ်ႇပၼ်ပီႈၼွင်ႉပွတ်းလႅၼ်လိၼ် တီႈလွႆတႆးလႅင်းၵႂႃႇယဝ်ႉလီငၢမ်း။ ၵွင်တိုၼ်းၸွႆႈၸိူဝ်ႉၸၢတ်ႈ ၼႆႉယွၼ်းႁပ်ႉတၢၼ်း (လူႇၶၢမ်ႇ)ၶူဝ်းၶွင် ၶဝ်ႈၼမ်ႉတၢင်းၵိၼ်၊ ၸိူဝ်းပဵၼ်ၶူဝ်းၶွင်ႁႅင်ႈၶွင်ႁွင်၊ ၶွင်ၸႂ်ႉသွႆ မႃးတီႈပီႈၼွင်ႉတႆးလႄႈ ၽူႈႁၵ်ႉၸၢတ်ႈၸိူဝ်းမီး ၼမ်ႉၸႂ်ၸေႇတၼႃႇၶဝ် ။


“ၶူဝ်းၶွင်ၸႂ်ႉသွႆ ၶွင်ၵိၼ်ယႅမ်ႉတင်းလၢႆၸိူဝ်းၼႆႉ ဝၢႆးလူႇတၢၼ်းယၢတ်ႇၼမ်ႉယဝ်ႉ တေဢဝ်ၵႂႃႇၸွႆႈထႅမ် ၵူၼ်းပၢႆႈၽေး၊ ၵူၼ်းၸိူဝ်းယူႇၼႂ်းထိူၼ်ႇၵႆၵၢတ်ႇၵႆသႃး၊ ၵူၼ်းတူၵ်းၵိၼ်းၶၢၼ်ၸႂ် ၸိူဝ်းယူႇဝႆႉပွတ်းလႅၼ်လိၼ်။ ႁူင်းႁဵၼ်းၸိူဝ်ႉၸၢတ်ႈ ၼိူဝ်လွႆတႆးလႅင်း ဢၼ်မီးလုၵ်ႈဢွၼ်ႇၽၢၼ်ပေႃႈမႄႈတင်းၼမ် ၶိုၼ်ႈႁဵၼ်းဝႆႉလႄႈ ပႃးၸဵမ်တီႈႁူင်းယႃၸိူဝ်းၼႆႉ။ ပီႈၼွင်ႉႁဝ်းၶဝ် ၽူႈလႂ်ၽႂ်တၼ်းၵေႃႈ ၶႅၼ်းတေႃႈမႃးၶဝ်ႈႁူမ်ႈ လူႇတၢၼ်းယၢတ်ႇၼမ်ႉၸွမ်းႁဝ်းၶႃႈသေၵမ်း”- ၸၢႆးၽူင်း ၽူႈဢွၼ်ႁူဝ်ၵေႃႇတင်ႈ ၵွင်တိုၼ်းၸွႆႈ ၸိူဝ်ႉၸၢတ်ႈ ယၢမ်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


“ယူႇတီႈသုၼ်ႇတူဝ်ၵူၼ်းမိူင်းၵေႃႉၼိုင်ႈသေ ပေႃးဝႃႈမီးတိုဝ်ႉတၢင်းၵေႃႈ ၶႂ်ႈႁႂ်ႈၵမ်ႉၸွႆႈထႅမ်တႃႇၸိူဝ်ႉၸၢတ်ႈ၊ မီးသူပ်းမီးပၢၵ်ႇၵေႃႈဢမ်ႇလၢတ်ႈလၢႆလၢႆ၊ ႁႂ်ႈလႆႈၸွႆႈၵၼ်ၵူႈၵေႃႉၵူႈၾၢႆႇ ၵူႈမူႇၵူႈၸုမ်း”- ၸၢႆးၽူင်းသိုပ်ႇလၢတ်ႈ ။


ၵွင်တိုၼ်းၸွႆႈၸၢတ်ႈၼႆႉ တင်ႈတႄႇဢဝ်ႁူဝ်ပီ 2016 ၼႆႉမႃး ပေႃးထိုင်မႃးဝၼ်းတီႈ 2 ၵူႈလိူၼ် လႆႈၼမ်းဢဝ် ၶူဝ်းၶွင် ၶဝ်ႈၼမ်ႉတၢင်းၵိၼ် ၶိူင်ႈၸႂ်ႉၶူဝ်းသွႆၵူႈလွင်ႈလွင်ႈ ၸိူဝ်းႁႃႁပ်ႉတၢၼ်းလႆႈတီႈပီႈၼွင်ႉၽူႈႁၵ်ႉၸၢတ်ႈ ႁွမ်းတၢၼ်းပၼ်ၼၼ်ႉ လူႇတၢၼ်း ယၢတ်ႇၼမ်ႉၶႂမ်ႈတဝ်ႈ တီႈသင်ၶၸဝ်ႈဝတ်ႉၻွၼ်းၸၼ် (ၻွၼ်းၵျၼ်ႇ)ယဝ်ႉ တေႃႉသူင်ႇတၢင်ႇလူတ်ႉၵႃးၵႂႃႇ ၸွႆႈထႅမ်ပီႈၼွင်ႉၸွမ်းလႅၼ်လိၼ်၊ ပွၵ်ႈၼႆႉပဵၼ်ပွၵ်ႈၵမ်းထူၼ်ႈ 11 ယဝ်ႉ- လႆႈႁူႉၼင်ႇၼႆ ။


ၶူဝ်းၶွင်ၸိူဝ်းၵႂႃႇၸွႆႈထႅမ်ၸိူဝ်းၼႆႉ ယူႇတီႈ ၵွင်တိုၼ်းၸွႆႈၸိူဝ်ႉၸၢတ်ႈသေ ႁူမ်ႈၵၼ်ၵႂႃႇႁႃယွၼ်းႁပ်ႉတၢၼ်း (လူႇၶၢမ်ႇ) သပ်းလႅင်းတိုၼ်းသူၼ်းပီႈၼွင်ႉတႆး ၸိူဝ်းႁွတ်ႈၼႂ်းၵဵင်းမႆႇ မိူင်းထႆးၸိူဝ်းၼႆႉ လၢႆတီႈလၢႆတၢင်း မိူၼ်ၼင်ႇၼႂ်းၸႄႈဝဵင်းႁၢင်ၻူင်း၊ ၸႄႈဝဵင်းမႄႈရိမ်း၊ ၸၢင်ႉၶဵၼ်ႉ၊ ၸႄႈဝဵင်းသၼ်သၢႆး လႄႈ ၼႂ်းၸႄႈတွၼ်ႈ လမ်းပုၼ်း ၸိူဝ်းၼႆႉ၊ ဢမ်ႇဝႃႈသုၼ်ႇတူဝ်/ မုၵ်ႉၸုမ်း။ ၶူဝ်းၶွင်ၵမ်ႈၼမ်ႁပ်ႉဢဝ် မိူၼ်ၼင်ႇၶဝ်ႈသၢၼ်၊ ၼမ်ႉမၼ်း၊ ၵိူဝ်၊ ထူဝ်ႇၼဝ်ႈ၊ မၢၵ်ႇၽိတ်ႉ၊ ၽွင်ဝၢၼ်၊ ႁူဝ်မီႇၽိူၵ်ႇ မီႇလႅင်၊ ပႃဢႅပ်ႇ၊ ၶဝ်ႈသွႆးဢေႃႇတေႃႇ (မႃးမႃႉ)၊ ၶဝ်ႈသဵၼ်ႈၶဝ်ႈသွႆးႁႅင်ႈ၊ ပႃးၸဵမ်ၼမ်ႉၼူမ်းဢႅပ်ႇ ၼမ်ႉသူမ်ႈၼမ်ႉဝၢၼ်ၸိူဝ်းၼႆႉ လၢႆၸိူဝ်ႉလၢႆလွင်ႈ။ ပေႃးလႆႈငိုၼ်းတွင်းၵေႃႈ ၶိုၼ်းဢဝ်မႃးသိုဝ်ႉ ပဵၼ်ၶူဝ်းၶွင်- ၼႆယဝ်ႉ ။


ၽူႈဢွၼ်ႁူဝ်ၵေႃႇတင်ႈ ၵွင်တိုၼ်းၸွႆႈၸၢတ်ႈ လၢတ်ႈၼႄတၢင်းယိူင်းဢၢင်းဝႃႈ- 1.ပိူဝ်ႈတႃႇၸွႆႈထႅမ် ၵူၼ်းယူႇ ၼႂ်းထိူၼ်ႇၼႂ်းၶိူဝ်း ၸိူဝ်းၵႆၵၢတ်ႇၵႆဝဵင်း ၶၢၼ်ၸႂ်လွင်ႈၵိၼ်လွင်ႉယႅမ်ႉ။ 2.ပိူဝ်ႈတႃႇႁႂ်ႈမီး သဵၼ်ႈမၢႆငိုၼ်းၵၢင်သေ ႁႂ်ႈမီးငိုၼ်းၸွႆႈထႅမ်ၵူၼ်းထူပ်းၽေး ၼႂ်းမိူင်းတႆး။ 3.ပိူဝ်ႈတႃႇ ႁႂ်ႈပေႃးပိုတ်ႇလႆႈႁူင်းႁဵၼ်း သွၼ်လိၵ်ႈလၢႆးၶၢဝ်းမႆႈ တီႈဝတ်ႉၻွၼ်းၵျၼ်ႇ ၼႂ်းၵဵင်းမႆႇၸိုင်ႈထႆး ၸိူဝ်းၼႆႉ-ဝႃႈၼႆ ။


ပိူဝ်ႈတႃႇပီႈၼွင်ႉတီႈၵႆ ၼႂ်းမိူင်းၼွၵ်ႈမိူင်း ၶႂ်ႈႁွမ်းလူႇတၢၼ်းဝတ်ႉထုငိုၼ်းတွင်းမႃးၼၼ်ႉ ၵွင်တိုၼ်း ၸွႆႈၸိူဝ်ႉၸၢတ်ႈၼႆႉ တေပိုတ်ႇဝႆႉပၼ်သဵၼ်ႈမၢႆယေးငိုၼ်း ဢၼ်ၼိုင်ႈ။ သင်ဝႃႈ ၸဝ်ႈၽူႈၵူၼ်းလီၵေႃႉလႂ် ၶႂ်ႈဢူၼ်းငိုၼ်းႁွမ်းလူႇႁွမ်းတၢၼ်း လႄႈၶႂ်ႈႁူႉလွင်ႈႁူဝ်ယွႆႈတႅတ်ႈတေႃးၸိုင် ၵပ်းသိုပ်ႇတိတ်းတေႃႇတွင်ႈထၢမ် လႆႈတီႈ ၸၢႆးၽူင်း တီႈမၢႆၾူၼ်ႊ 084 376 8361 ။

ၵွင်တိုၼ်းၸွႆႉၸိူဝ်ႉၸၢတ်ႈၼႆႉ ၵူၼ်းၼုမ်ႇၽူႈႁၵ်ႉၸၢတ်ႈ ၸိူဝ်းႁွတ်ႈၽႅဝ်ၼႂ်းၸိုင်ႈထႆး လႆႈၸႂ်ၵၼ်ႁူမ်ႈ ၶွတ်ႇၽွတ်ႈၵေႃႇတင်ႈမႃး ၽွင်းႁူဝ်ပီ 2016 ၼႆႉ။ ဝၢႆးသေၶွတ်ႇၽွတ်ႈၶိုၼ်ႈမႃးယဝ်ႉ လႆႈႁႃၵဵပ်းၶူဝ်းၶွင် ၵိၼ်ၶွင်ၸႂ်ႉ ႁႅင်းငိုၼ်းတွင်းတီႈ ၽူႈႁၵ်ႉၸၢတ်ႈၶဝ်ၸွႆႈထႅမ်မႃး။ ပေႃးပဵၼ်ငိုၼ်းတွင်းၵေႃႈ ၶိုၼ်းဢဝ်သိုဝ်ႉ ပဵၼ်ၶူဝ်းၶွင်ၵိၼ်ယႅမ်ႉ။ မိူဝ်ႈလဵဝ် လုၵ်ႈၸုမ်းမီးဢမ်ႇယွမ်းမွၵ်ႈ 400-500 ၵေႃႉ၊ ၵမ်ႈၼမ် ပဵၼ်ၵူၼ်းၼုမ်ႇ ၸိူဝ်းယူႇၼႂ်းၸႄႈတွၼ်ႈၵဵင်းမႆႇ ၸႄႈဝဵင်းႁၢင်ၻူင်း၊ ၸႄႈဝဵင်းမႄႈရိမ်း၊ ၸႄႈဝဵင်းသၼ်သၢႆး၊ ၸၢင်ႉၶဵၼ်ႉ လႄႈ ၸႄႈတွၼ်ႈလမ်းပုၼ်း ။


ပူၼ်ႉမႃးဢမ်ႇႁိုင်ၼႆႉၵေႃႈ ၵွင်တိုၼ်းၸွႆႈၸၢတ်ႈၼႆႉ ယင်းႁဵတ်းသိူဝ်ႈ တွၵ်ႇၸုမ်ႈၸိုဝ်ႈမူႇၸုမ်းသေ တမ်းဝၢင်းၶၢႆ၊ ပိူဝ်ႈတႃႇပီႈၼွင်ႉၸိူဝ်းသူၼ်ၸႂ် သမ်ႉပေႃးလႆႈၼုင်ႈသိူဝ်ႈၶူဝ်း ဢၼ်မီးၸိုဝ်ႈ ၵွင်တိုၼ်းၸွႆႈၸၢတ်ႈလႄႈ ပိူဝ်ႈတႃႇမူႇၸုမ်းပေႃးလႆႈၼုင်ႈသိူဝ်ႈၶူဝ်း ဢၼ်ၵႃႈၶၼ်ထုၵ်ႇၼၼ်ႉ- ၼႆယဝ်ႉ ။