တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် တင်းသိုၵ်းမၢၼ်ႈတပ်ႉသူၺ်ႇၺွင်ႇ ၼႂ်းဢိူင်ႇလၢႆႈသၢၵ်ႇ ၸႄႈဝဵင်းႁူဝ်ပူင်း ႁိုင်သွင်ၸူဝ်ႈမိူင်းပၢႆ၊ ယွၼ်ႉၾၢႆႇသိုၵ်းမၢၼ်ႈဢမ်ႇၸႅင်ႈလၢတ်ႈ ဢွၼ်တၢင်းသေ ပူၼ်ႉၶဝ်ႈတူင်ႉၼိုင် ၼႂ်းၼႃႈတီႈ RCSS/SSA ၵုမ်းၵမ် ။

တပ်ႉသိုၵ်းၸိုင်ႈတႆး (RCSS/SSA) တူင်ႉၼိုင်ၵၢၼ်သိုၵ်း ၼႂ်းၸိုင်ႈတႆး

ဝၼ်းတီႈ 16/12/2016 မိူဝ်ႈၼႆႉတင်ႈတႄႇယၢမ်း 08:00 မူင်း၊ ၵိူတ်ႇပဵၼ်ပၢင်တိုၵ်းဝူင်ႈၵၢင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) တင်းတပ်ႉသိုၵ်းလူင်ပွင်ၸိုင်ႈ တပ်ႉမတေႃႇမၢၼ်ႈ တပ်ႉၶလယ 94 ဢၼ်ပၵ်းတီႈဝဵင်းသူၺ်ႇၺွင်ႇ၊ ပႃႈတႂ်ႈတိူင်းသိုၵ်းဝၼ်းဢွၵ်ႇ (ယပၶ) တူၼ်ႈတီး၊ တီႈၼႂ်းဢိူင်ႇလၢႆႈသၢၵ်ႇ ၸႄႈဝဵင်းႁူဝ်ပူင်း ၸိုင်ႈတႆးပွတ်းၸၢၼ်း- ၼႆယဝ်ႉ ။


ၵဵဝ်ႇၵပ်းလွင်ႈလႆႈပဵၼ်ပၢင်တိုၵ်းၼႆႉ ယွၼ်ႉၾၢႆႇတပ်ႉသိုၵ်းမၢၼ်ႈဢမ်ႇပွင်ႇ ဢမ်ႇၸႅင်ႈလၢတ်ႈ ၸဝ်ႈၼႃႈတီႈ လုမ်းၵပ်းသၢၼ် RCSS/SSA ဢိၵ်ႇၽူႈၵဵဝ်ႇၶွင်ႈသေ ပူၼ်ႉပႅၼ်ၶဝ်ႈတူင်ႉၼိုင် ၼႂ်းပိုၼ်ႉတီႈၼႃႈလိၼ် ဢၼ် RCSS/SSA တူင်ႉၼိုင်ၵုမ်းၵမ်ဝႆႉလႄႈ သွင်ၾၢႆႇလႆႈၽႃႇၺႃးပိုတ်းယိုဝ်း ပဵၼ်ပၢင်တိုၵ်းၵၼ် ၶၢဝ်းတၢင်း 2 ၸူဝ်ႈမူင်းပၢႆ၊ ပဵၼ်ပၢင်တိုၵ်းၵၼ်ႁၢဝ်ႈႁႅင်းသေ ထိုင်မႃးယၢမ်း 10:30 မူင်းၼၼ်ႉ ၾၢႆႇသိုၵ်းမၢၼ်ႈထွႆထွၼ်ဢွၵ်ႇ ပၢင်တိုၵ်းၵႂႃႇ- ၼႆယဝ်ႉ ။


ပၢင်တိုၵ်းပွၵ်ႈၼႆႉ တၢင်းၾၢႆႇ RCSS/SSA ဢမ်ႇမီးလွင်ႈဝၢတ်ႇၸဵပ်းလူႉသုမ်းသင်။ လွင်ႈလူႉသုမ်း ၾၢႆႇသိုၵ်းမၢၼ်ႈၼၼ်ႉ တၢင်း RCSS/SSA တိုၵ်ႉၵူတ်ႇထတ်းယူႇ- ၶၢဝ်ႇတႆးလွတ်ႈလႅဝ်း ဢွၵ်ႇၵႂႃႇၼင်ႇၼႆ ။


ဢိူင်ႇလၢႆႈသၢၵ်ႇ ၸႄႈဝဵင်းႁူဝ်ပူင်းၼႆႉ မီးၾၢႆႇၸဵင်ႇႁွင်ႇဝၼ်းတူၵ်း ဝဵင်းႁူဝ်ပူင်း ၸႄႈတွၼ်ႈတူၼ်ႈတီး ၸိုင်ႈတႆးပွတ်းၸၢၼ်း ။


ပူၼ်ႉမႃးမိူဝ်ႈၽွင်းႁူဝ်လိူၼ်ဢွၵ်ႊထူဝ်ႊၿိူဝ်ႊၵေႃႈ RCSS/SSA  တင်းသိုၵ်းလူင်ပွင်ၸိုင်ႈမၢၼ်ႈ ပဵၼ်ပၢင်တိုၵ်းၵၼ်ထႅင်ႈႁၢဝ်ႈႁႅင်း ပွတ်းဝၢၼ်ႈပၢင်ပွႆး ၼႂ်းဢိူင်ႇတူင်ႇလၢဝ်း ၸႄႈဝဵင်းမိူင်းၵိုင် ၸိုင်ႈတႆးပွတ်းၸၢၼ်း။ မိူဝ်ႈၼၼ်ႉၵေႃႈ ယွၼ်ႉၾၢႆႇသိုၵ်းမၢၼ်ႈ ၶဝ်ႈၵႂႃႇတီႈဢၼ်မီးႁူင်းတိုတ်းယႃႈမဝ်းၵမ် ပၼ်ၵူၼ်းမိူင်း ဢၼ်တၢင်း RCSS/SSA ပိုတ်ႇပၼ် ပိူဝ်ႈတႃႇမူၼ်ႉမႄးတူဝ်ၸႂ်ပၼ်ၵူၼ်းမိူင်း- ၶၢဝ်ႇတႆးလွတ်ႈလႅဝ်း လၢတ်ႈၵႂႃႇၼင်ႇၼႆ ။


ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး (RCSS/SSA) ၼႆႉ ပဵၼ်ၸုမ်းဢၼ်လူင်းလၢႆးမိုဝ်း ၵေႃႇသၢင်ႈလွင်ႈငမ်းယဵၼ် ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ဢိၵ်ႇ လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ။ ပၢၼ်လူင်ပွင်ၸိုင်ႈ NLD ၶိုၼ်ႈမႃးၼႆႉၵေႃႈ ၶဝ်ႈႁူမ်ႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင် ဢၼ်ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်ၼမ်းၼႃႈၸတ်းႁဵတ်းယဝ်ႉတူဝ်ႈၵႂႃႇ ၽွင်းႁူဝ်လိူၼ်သႅပ်ႊထႅမ်ႊၿိူဝ်ႊပူၼ်ႉမႃး ။