တႆးယၢၼ်မိူင်း ႁွတ်ႈမိူင်းထႆး ၺႃးလူတ်ႉၽႃႇ တၢႆထင်တီႈ ၵိုၵ်းၵၼ် 2 ၵေႃႉ တီႈၸႄႈဝဵင်းလမ်းပုၼ်း  ၼၼ်ႉ တေႃႈလဵဝ် တူဝ်တၢႆ ၸၢႆးထေး လႆႈၼမ်းမႃးဝႆႉတီႈ ဝတ်ႉပႃႇပဝ်ႈ ဝဵင်းၵဵင်းမႆႇ ယွၼ်ႉဢမ်ႇ မီးပီႈၼွင်ႉလုမ်းလႃးၶၢပ်ႈတူဝ် ဝႃႈၼႆ ။

Photo by ၸၢႆးလိူၼ်ၶမ်း

ဝၼ်းတီႈ 14/12/2016 ယၢမ်းဝၢႆးဝၼ်း 15:00 မူင်း ၸုမ်းၶႅၵ်ႇလီပၢင်ၸႃႉတႆး ၵဵင်းမႆႇ လႆႈဢွၼ် ၵၼ် ၵႂႃႇဢဝ်ၶၢပ်ႈတူဝ်တၢႆ၊ ၸၢႆးထေး ဢႃယု 18 ပီ တီႈႁူင်းယႃ လမ်းပုၼ်း ၼမ်းမႃးဝႆႉတီႈ ဝတ်ႉပႃႇပဝ်ႈ ဝဵင်းၵဵင်းမႆႇ ၸိုင်ႈထႆး ဝႃႈၼႆ ။


ၸၢႆးလိူၼ်ၶမ်း ၽူႈတူင်ႉၼိုင်တူင်ႇဝူင်းတႆး ၵဵင်းမႆႇ လၢတ်ႈဝႃႈ “ ၸၢႆးထေးၼႆႉ ဢႃယု တိုၵ်ႉလႆႈ 18 ပီၵူၺ်း၊ ပေႃႈမႄႈတႄႉဢမ်ႇမီးယဝ်ႉ၊ မီးပီႈၼၢင်းၵူၺ်း။ ယွၼ်ႉမီးလွင်ႈယၢပ်ႇလႄႈ ယူႇတီႈၸုမ်း ႁဝ်းၶႃႈ ၸင်ႇလႆႈ ဢွၼ်ၵၼ် ၵႂႃႇဢဝ်ၶၢပ်ႈတူဝ်တၢႆ ၸၢႆးထေး တီႈႁူင်းယႃလမ်းပုၼ်းသေ ဢဝ်မႃး ဝႆႉတီႈဝတ်ႉပႃႇပဝ်ႈ။ ၵူၺ်းၵႃႈ တူဝ်တၢႆ ၸၢႆးၵျီး ဢူၺ်းၵေႃႉမၼ်းၼၼ်ႉတႄႉ ယွၼ်ႉဝႃႈ မီးပီႈၼွင်ႉ ယူႇလႄႈ ပီႈၼွင်ႉမၼ်းၸၢႆး တၢင်းၸႄႈဝဵင်းၵဵင်းလၢဝ် လႆႈဢွၼ်ၵၼ်မႃးဢဝ် တူဝ်တၢႆမၼ်းၸၢႆးၵႂႃႇ ဝႆႉတၢင်းၵဵင်းလၢဝ်ယဝ်ႉ၊ ၵူၼ်းႁေႃႈလူတ်ႉၽႃႇၶဝ်သွင်ၵေႃႉၼၼ်ႉတႄႉ လႆႈၸွႆႈငိုၼ်းမႃး တႃႇ ၸတ်းႁဵတ်းပၢင်ၸႃပၼၶဝ်သွင်ၵေႃႉ ၸၢႆးထေး 20,000 ဝၢတ်ႇ၊ ၸၢႆးၵျီး 25,000 ဝၢတ်ႇ” ဝႃႈၼႆ ။


ၶၢပ်ႈတူဝ်တၢႆ ၸၢႆးထေးသမ်ႉ ပူၼ်ႉၼႂ်းဝၼ်းသုၵ်း ယၢမ်းဝၢႆးဝၼ်း 13:00 မူင်းၼႆႉတီႈပႃႇႁဵဝ်ႈ သၼ်တီႇထမ်း ဝဵင်းၵဵင်းမႆႇ။ ၶၢပ်ႈတူဝ်တၢႆ ၸၢႆးၵျီး ဢၼ်ဝႆႉတီႈၵဵင်းလၢဝ်သမ်ႉ တေပူၼ်ႉၼႂ်း ဝၼ်းသဝ်တေထိုင်ၼႆႉ ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸၢႆးလိူၼ်ၶမ်း သိုပ်ႇလၢတ်ႈထႅင်ႈဝႃႈ ႁဝ်းၶႃႈ ၸတ်းႁဵတ်းပၢင်ၸႃပၼၶႃသွင်ၵေႃႉ ယဝ်ႉၵွၼ်ႇ ၸင်ႇတေၸွႆႈထႅမ်တႃႇလမ်းလိူင်ႈဢမူႉၵႂႃႇထႅင်ႈ ဝႃႈၼႆ။
ၵူၼ်းႁေႃႈလူတ်ႉၵႃး ဢၼ်မႃးၽႃႇ ပီႈၼွင်ႉတႆး ႁႅင်းၵၢၼ်သွင်ၵေႃႉၼႆႉ ပဵၼ်ၵူၼ်းလမ်းပုၼ်း ဢႃယု 60 ပီ ၸိုဝ်ႈႁွင်ႉဝႃႈ လုင်းသူမ်သုၵ်ႇ ဝႃႈၼႆ ။


ပူၼ်ႉမႃး ဝၼ်းတီႈ 11/12/2016 ယၢမ်းၵၢင်ၶမ်ႈ 8 မူင်းပၢႆ ၸၢႆးထေးတင်းၸၢႆးၵျီး ထုၵ်ႇလူတ်ႉၵႃးၽႃႇ /တမ်သႂ်ႇတၢႆထင်တီႈ တီႈႁိမ်းဝတ်ႉဢူႇမူင်း သွႆး 8 ၼိူဝ်သဵၼ်ႈတၢင်းလူင် လမ်းပုၼ်း-ၵဵင်းမႆႇ၊ ၽွင်းၶႃ သွင်ၵေႃႉ တိုၵ်ႉၸၢႆႇၵၢတ်ႇပွၵ်ႈမႃး ဝႃႈၼႆ ။


ၸၢႆးထေးၼႆႉ ဢႃယု လႆႈ 18 ပီ ပဵၼ်ၵူၼ်းၸႃတိ ၸႄႈဝဵင်းမိူင်းယေႃ ၸႄႈတွၼ်ႈလႃႈသဵဝ်ႈ ၸိုင်ႈတႆး ပွတ်းႁွင်ႇ၊ ၸၢႆးၵျီးသမ်ႉ ဢႃယု လႆႈ 19 ပီ ပဵၼ်ၵူၼ်းၸႃတိ ၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈ တႆး ပွတ်းၸၢၼ်း၊ ၶဝ်သွင်ၵေႃႉ တိုၵ်ႉမႃးႁဵတ်းၵၢၼ်ၵေႃႇသၢင်ႈ တီႈမိူင်းထႆးလႆႈ လၢႆ လိူၼ်ၵူၺ်း ဝႃႈၼႆ ။