ဝၼ်းတီႈ15-16/12/2016 ၸုမ်းသိုဝ်ႇၶၢဝ်ႇထႆးလႄႈ သိုဝ်ႇၶၢဝ်ႇၸၢဝ်းၶိူဝ်းမိူင်းႁူမ်ႈတုမ်ဢိၵ်ႇ ၸုမ်းဢၼ်တူင်ႉၼိုင် တူင်ႇဝူင်းၵူၼ်းၸတ်းပၢင်ႁူပ်ႉထူပ်းဢုပ်ႇဢူဝ်းၵၼ် ပိူဝ်ႈတႃႇႁႃၼႅဝ်း တၢင်းႁူမ်ႈမိုဝ်းႁဵတ်း သၢင်ႈၼႃႈ ၵၢၼ်ၵၼ်ၵႂႃႇမိူဝ်းၼႃႈ ။

ၼႂ်းပၢင်ၼႆႉမီးၽူႈယႂ်ႇၵူၼ်းလူင်မိူၼ်ၼင်ႇ ၶူးပူင်သွၼ်လူင် ၾၢႆႇၶူၼ်ႉၶႂႃႉလွင်ႈၸၢဝ်းၶိူဝ်း ၸၼ်ႉၸွမ် ၵဵင်းမႆႇ ၊ ၶူးဢူးၻေႇ ၽူႈၼမ်းၼႂ်း UNFC ၊ ၸုမ်းသိုဝ်ႇၶၢဝ်ႇထႆး ၶျွင်ႉ3၊ သိုဝ်ႇၶၢဝ်ႇသၢႆးၶွပ်ႇ၊ သိုဝ်ႇၶၢဝ်ႇBNI၊ သိုဝ်ႇၶၢဝ်ႇတႆး၊ သိုဝ်ႇၶၢဝ်ႇၶၢင်၊ ၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး၊ ၸုမ်းၼၢင်းယိင်းၶၢင် ဢိၵ်ႇၵူၼ်း ၼုမ်ႇၼႂ်းတူင်ႇဝူင်းၵူၼ်း၊ ၸုမ်းတူင်ႉၼိုင်လွင်ႈမႄႈၼမ်ႉၸိူဝ်းၼႆႉ ၶဝ်ႈႁူမ်ႈ 40 ပၢႆၸတ်းႁဵတ်းတီႈ Belle Villa Resort ၵဵင်းမႆႇ ၸိုင်ႈထႆး ။


ၼၢင်းၸၢမ်တွင်း ၽူႈၵပ်းသၢၼ်တႃႇပွင်ပဵၼ်ပၢင်ႁူပ်ႉထူပ်းလၢတ်ႈဝႃႈ- “ယိူင်းဢၢၼ်းတႄႉ ၼင်ႇႁိုဝ်လုမ်ႈၾႃႉလႄႈမိူင်းႁိမ်းႁွမ်းပေႃးတေႁူႉ ငဝ်းလၢႆးဢၼ်ပဵၼ်ယူႇၼႂ်းပိုၼ်ႉဝၢၼ်ႈ မိူင်းႁဝ်း ၼၼ်ႉသေလႆႈၸတ်းမႃး ထႅင်ႈလွင်ႈၼိုင်ႈၵေႃႈၼင်ႇႁိုဝ်သိုဝ်ႇ ၸုမ်းတူင်ႉၼိုင်တူင်ႇဝူင်းထႆးလႄႈ သိုဝ်ႇၸၢဝ်းၶိူဝ်ၸုမ်းတူင်ႉၼိုင်တူင်ႇဝူင်းၸၢဝ်းၶိူဝ်း ပေႃးတေမီးလွင်ႈၸမ်ၸႂ်ၵၼ်ႁဵတ်းၵၢၼ်ႁူမ်ႈ ၵၼ်ၵႂႃႇၼၼ်ႉ” ဝႃႈၼႆ ။


ၼႂ်းပၢင်ၼႆႉဢုပ်ႇဢူဝ်းလႅၵ်ႈလၢႆငဝ်းလၢႆးဢၼ်ပဵၼ်ယူႇၼႂ်းပိုၼ်ႉတီႈၽႂ်မၼ်း၊ တၢင်းယၢပ်ႇၽိုတ်ႇ ၵၢၼ်ဢဝ်ၶၢဝ်ႇ၊ လွင်ႈသုၼ်ႇလႆႈသုၼ်ႇပဵၼ်ၵူၼ်းယၢမ်းလဵဝ်၊ လိူဝ်ၼၼ်ႉမီးၽူႈမီးပိုၼ်ႉ ႁူႉပၢႆးႁၼ်မႃး မွၵ်ႇ လၢတ်ႈလွင်ႈ ငဝ်းလၢႆးၸၢဝ်းၶိူဝ်းယၢမ်းလဵဝ်၊ ငဝ်းလၢႆးဝၢၼ်ႈမိူင်းယၢမ်းလဵဝ်၊ လွင်ႈၵၢၼ်ထၢႆႇၶႅပ်း ႁၢင်ႈ၊ဝီႊၻီႊဢူဝ်ႊ၊ လၢႆးတတ်းတေႃႇ၊လၢႆးတႅမ်ႈၶၢဝ်ႇႁႂ်ႈလီသူၼ်ၸႂ်ၸိူဝ်းၼႆႉ ။


ၸၢႆးမိူင်း ၽူႈၶဝ်ႈၵေႃဢွၼ်ႁူဝ်ၸုမ်းၶၢဝ်ႇ BNI လၢတ်ႈဝႃႈ- “ မိူင်းႁူမ်ႈတုမ်မၢၼ်ႈလႄႈမိူင်းထႆးၼႆႉ လႅၼ်လိၼ်တိတ်းဢိူမ်ႈၵၼ် ယိုတ်ႈယၢဝ်း ပၼ်ႁႃလႅၼ်လိၼ်ၵေႃႈၼမ် ပေႃးၶႄႇယဝ်ႉဢၼ်မႃး လူင်းတိုၼ်းၼႂ်းမိူင်းမၢၼ်ႈ ပဵၼ်ထႆး ၵွပ်ႈၼၼ်ယွၼ်ႉၶူင်းၵၢၼ်ၵေႃႇသၢင်ႈၾၢႆ ၶုတ်းမိူင်းႁႄသေ ၵူၼ်းၼႂ်းပိုၼ်ႉတီႈလႆႈၺႃးၸၢၵ်ႇ ၼင်ႇႁိုဝ်ၵူၼ်းမိူင်းထႆး ပေႃးတေႁူႉႁၼ်ၸွမ်း၊ တႃႇႁႂ်ႈသိုဝ်ႇၶၢဝ် ႇထႆးၸွႆႈသူၼ်းၸွႆႈဢီးၼၼ်ႉပဵၼ်ပိူင်လူင်” - ဝႃႈၼႆ ။


တီႈပၢင်ၵုမ်ၼႆႉ လၢႆၸုမ်းဢၼ်ၶဝ်ႈႁူမ်ႈလႆႈၸႂ်ႁၼ်လီဝႃႈ တေၵွင်ႉသၢၼ်ၵပ်းသိုပ်ႇၵၼ်ၵႂႃႇ  မိူဝ်းၼႃႈမႃးၵေႃႈ မီးယိူင်းဢၢၼ်းတေၸတ်းႁဵတ်းၵႂႃႇထႅင်ႈယူႇ - ဝႃႈၼႆ ။