ဝၼ်းတီႈ 24/08/2016 ၶၢဝ်းယၢမ်း 13:00-16:30 ၸၼ်ႉၸွမ် သီရီႊၼၶရိၼ်ႊထရႃႊဝိရူတ်ႊလႄႈသိုဝ်ႇ ၶၢဝ်ႇထႆးမတိၶျူၼ်ႊႁူမ်ႈၵၼ်ၸတ်းႁဵတ်းပၢင်ဢုပ်ႇၶႆႈလွင်ႈတႆးဢၼ်မီးၸိုဝ်ႈဝႃႈ “ ႁဵတ်းသင်တႆး ၸိုင်သဝ်ႈဝဝ်းမွင်” ။

ပၢင်ဢုပ်ႇၶႆႈၼႆႉၸတ်းႁဵတ်းတီႈႁွင်ႈပၢင်ၵုမ်ၸၼ်ႉၸၼ်ႉၸွမ်သီရီႊၼၶရိၼ်ႊထရႃႊဝိရူတ်ႊဝဵင်းလူင်မိူင်းၵွၵ်ႇၸိုင်ႈထႆး၊မီးၽူႈလူင်ႉလႅၼ်ႇ၊မေႃသွၼ်၊လုၵ်ႈႁဵၼ်းလႄႈၽူႈသူၼ်ၸႂ်လဵပ်ႈႁဵၼ်းလွင်ႈတႆးၶဝ်ႈႁူမ်ႈ200 ၵေႃႉပၢႆ ။


ၽူႈႁူမ်ႈဢုပ်ႇၶႆႈမီးၽူႈၶူၼ်ႉၶႂႃႉလွင်ႈပိုၼ်းမေႃသွၼ်သူမ်ႊလိတ်ႊလိုဝ်ႊသႆး၊Dr. လလိတႃႁၢၼ်ဝူင်းမေႃသွၼ် ၸၼ်ႉၸွမ်ၵသဵတ်ႇသၢတ်ႇ၊မေႃသွၼ် ဢၵ်ႇၶရၽူင်းၶမ်ႊၶုၼ်ၸၼ်ႉၸွမ်ထမ်မသၢတ်ႇလႄႈၼၢင်းၸၢမ်တွင်း ။


မေႃသွၼ်သူမ်ႊလိတ်ႊလိုဝ်းသႆႊလၢတ်ႈလွင်ႈႁဵတ်းသင်လႄႈပပ်ႉပိုၼ်းၸိူင်း “ၾႃႉလမ်သုမ်ႇမိူင်း” လမ်ႇလွင်ႈ တႃႇတေလဵပ်ႈႁဵၼ်းပိုၼ်းတႆးလႄႈမိူင်းမၢၼ်ႈ။ Dr. လလိတႃႁၢၼ်ဝူင်းတႄႉလၢတ်ႈလွင်ႈ ပဵၼ်မႃးမိူင်း ႁူမ်ႈတုမ်မၢၼ်ႈလႄႈမိူင်းၸၢဝ်းၶိူဝ်းၼႂ်းမိူင်းမၢၼ်ႈ ။


ၼၢင်းၸၢမ်တွင်းသမ်ႉလၢတ်ႈၼႄလွင်ႈငဝ်းလၢႆးၵၢၼ်မိူင်းၵၢၼ်သိုၵ်းၼႂ်းမိူင်းမၢၼ်ႈ လႄႈလွင်ႈပူၼ်ႉပႅၼ် သုၼ်ႇလႆႈသုၼ်ႇပဵၼ် ႁူမ်ႈပႃးလွင်ႈပိုၼ်းၸဝ်ႈၵျႃႇသႅင် ၸဵမ်ၸိူဝ်းၼႆႉ ။


ၼၢင်းၸၢမ်တွင်းလၢတ်ႈဝႃႈ - “ၼႂ်းမိူင်းၸိုင်ႈတႆးၼႆႉထိုင်ဝႃႈတေမီးၵၢၼ်လူင်းလၢႆးမိုဝ်းၵိုတ်းတိုၵ်း NCA ယဝ်ႉသေတႃႉလွင်ႈပၢင်တိုၵ်းသိုၵ်းသိူဝ်ၵေႃႈယင်းတို်ၵ်ႉမီးယူႇပေႃးမီးပၢင်တိုၵ်းၵေႃႈၵူၼ်းမိူင်းလႆႈၶၢမ်ႇၸၢၵ်ႇမၼ်းထူပ်းတၢင်းယၢပ်ႇၽိုပ်ႇ၊လႆႈပၢႆႈယၢၼ်ႁိူၼ်းယေးတီႈယူႇ၊ၵၢၼ်ပူၼ်ႉပႅၼ်သုၼ်ႇလႆႈၵူၼ်းၸိူဝ်းၼႆႉၵေႃႈယင်းတိုၵ်ႉမီးယူႇ ” ဝႃႈၼႆ ။


ၵဵဝ်ႇၵပ်းလွင်ႈပပ်ႉပိုၼ်းၸဝ်ႈၵျႃႇသႅင်လႄႈၸဝ်ႈၼၢင်းသုၸၼ်ႇတီႇၼႆႉသေႁဵတ်းႁႂ်ႈၵူၼ်းၼွၵ်ႈမိူင်းႁူႉၸၵ်းလွင်ႈတႆးၼမ်မႃးတႄႉတႄႉ သေလႆႈသၢင်ႈႁဵတ်းပဵၼ်ငဝ်းတူင်ႉလူင်မိူဝ်ႈပူၼ်ႉမႃးသွင်ပီ။ ၵူၺ်းၵႃႈ မိူင်းမၢၼ်ႈတင်း မိူင်းထႆးသမ်ႉဢမ်ႇပၼ်သၢႆငဝ်းတူင်ႉဢၼ်ၼႆႉ ။


ငဝ်းတူင်ႉဢၼ်ၼႆႉ ဢၢင်ႈဢိင်ဢဝ်လိူင်ႈ တႄႉဢၼ်ၸဝ်ႈၼၢင်းဢိင်ႇငႄႇ သျိူဝ်ႊၸဵၼ်ႊ Inge Sargent ( ၼၢင်းၶၢင်းႁူဝ်ၸဝ်ႈၾႃႉလူင်သီႇပေႃႉ ၸဝ်ႈၵျႃႇသႅင် ) လႆႈတႅမ်ႈပဵၼ်ပပ်ႉၵဵဝ်ႇလဵဝ်ႈလွင်ႈဝႃႈႁဵတ်းႁိုဝ်လႄႈ ဢိင်ႇငႄႇ သျိူဝ်ႊၸဵၼ်ႊ လႆႈမႃးပဵၼ် မႁႃႇတေႇဝီႇ သုၸၼ်ႇတီႇ လႄႈလွင်ႈဢၼ်ၸဝ်ႈၾႃႉလူင် ၸဝ်ႈၵျႃႇ သႅင်လႆႈၶၢမ်ႇသိုၵ်းမၢၼ်ႈၺွပ်းၵႂႃႇမိူဝ်ႈၸွမ်သိုၵ်းလူင်ၼႄႇဝိၼ်းယိုတ်းဢမ်းၼၢတ်ႈမိူဝ်ႈပီ 1962 သေႁၢႆတူဝ်ၵႂႃႇတေႃႇယၢမ်းလဵဝ် ။


ယွၼ်ႉငဝ်းလၢႆးဝၢၼ်ႈမိူင်းၽွင်းၼၼ်ႉႁုၵ်ႉႁၢႆႉႁႅင်းၼႃႇလႄႈၸဝ်ႈၼၢင်းသုၸၼ်ႇတီႇၸင်ႇတတ်းသိၼ်ၸႂ်ဢဝ်လုၵ်းယိင်းၸဝ်ႈတင်းသွင် လႆႈပၢႆႈယၢၼ်ဢွၵ်ႇ မိူင်းမၢၼ်ႈမိူဝ်ႈပီ1964 ၊ မိူဝ်ႈလဵဝ်ပၵ်းသဝ်းယူႇဝႆႉ တီႈမိူင်း ဢမေႊ ရီႊၶိူဝ်ႊ သေလႆႈတင်ႈၸုမ်း Burma Life Line သေၸွႆႈထႅမ်ၵူၼ်းမိူင်းႁူမ်ႈတုမ် ၸိူဝ်းၺႃးၽေးသိုၵ်း ဢၼ်ပၢႆႈ ယူႇၸွမ်းလႅၼ်လိၼ်တႆး-ထႆး။ သမ်ႉထႅင်ႈ ၼင်ႇႁိုဝ်ၵူၼ်းၼုမ်ႇတႆးပေႃး တေပဵၼ်ၽူႈဢွၼ် ႁူဝ်လီမႃးၼၼ်ႉ ယုၵ်ႉယွင်ႈ ပူၵ်းပွင်ၵူၼ်းၼုမ်ႇၵတ်ႉၶႅၼ်ႇ မွပ်ႈပၼ်ၸုမ်ႈ “ သုၸၼ်ႇတီႇ ” မႃးၵူႈပီ ႁၢၼ်ႉတေႃႇယၢမ်းလဵဝ် ။