ၼင်ႇႁိုဝ်ၵူၼ်းၼုမ်ႇတေမီးၼမ်ႉၵတ်ႉလႄႈ တၢင်းႁတ်းႁၢၼ်ႁႂ်ႈပဵၼ်ၼေႃႇတႅၼ်းၶိူဝ်း ပဵၼ်ၽူးၵွၼ်းပွၵ်ႉဢိူင်ႇ ၵႂႃႇလႆႈၼၼ်ႉၼႆသေ ၸုမ်းၵူၼ်းၼုမ်ႇတႆး TYO လႄႈၸုမ်းၵေႃတႆး ၸင်ႇၸတ်းႁဵတ်းပၢင်ၾိုၵ်းၽွၼ်ႉၼမ်ႉ ၵတ်ႉၵူၼ်းၼုမ်ႇဝႃႈၼႆ ။

Photo by - TYO

ဝၼ်းတီႈ 21-23/08/2016 ၶၢဝ်းတၢင်း 3 ဝၼ်း ၸုမ်းၵူၼ်းၼုမ်ႇတႆးလႄႈ ၸုမ်းၵေႃတႆး ႁူမ်ႈၵၼ်ၸတ်းႁဵတ်း ပၢင်ၾိုၵ်းၽွၼ်ႉပိုၼ်ႉႁူႉလႄႈ ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇပွၵ်ႈၵမ်းၼိုင်ႈ။ ပူင်သွၼ်ပၼ် ၶၢဝ်းယၢမ်းၵၢင်ၼႂ် 08:00-11:00 မူင်း ဝၢႆးဝၼ်း 01:00-05:00 မူင်း ၽူႈၶိုၼ်ႈလဵပ်ႈႁဵၼ်းမီး 130 ၵေႃႉ ။ ၸတ်းႁဵတ်းတီႈဝၢၼ်ႈ ၶႃးလႅင် ဢိူင်ႇ19 ဝၢၼ်ႈ ၵိင်ႇၸႄႈ ဝဵင်းမၢၼ်ႈႁဵဝ်း ၸႄႈဝဵင်းမူႇၸႄႈ ၸိုင်ႈတႆးပွတ်းႁွင်ႇ ။


ပၢင်ၾိုၵ်းၽွၼ်ႉၼႆႉ မီးၶူးပူင်သွၼ်မိူၼ်ၼင်ႇ ၸၢႆးသႅင်မိူင်း မူႇၸႄႈ၊ ၸၢႆးသိူဝ်ႁၢၼ် ပၢင်ႇဢူ၊ ၸၢႆးဢွင်ႇလႅင်း ၶိူဝ်း၊ ၸၢႆးၵွၼ်းလႅင်း၊ ၼၢင်းၶႅမ်ဝၼ်း သႅၼ်ဝီ ၸိူဝ်းၼႆႉ။ ပူင်သွၼ်ပၼ်မိူၼ်ၼင်ႇ- ပုၼ်ႈၽွၼ်းၵူၼ်းမိူင်း တေလႆႈႁဵတ်းၸိူင်ႉႁိုဝ်၊ ၵၢၼ်ပဵၼ်ၵူၼ်းမိူင်းလီဢၼ်ဝႃႈၼၼ်ႉတေလႆႈပဵၼ်ၸိူင်ႉႁိုဝ်၊ တီႊမူဝ်ႊၶရေႊသီႊ၊ လၢႆးၸတ်းႁဵတ်းပၢင်ၵုမ်၊ ၵၢၼ်ၽွင်းငမ်းလီ သုၼ်ႇလႆႈသုၼ်ႇပဵၼ်ၵူၼ်းလႄႈ တူင်ႇဝူင်းၾိင်ႈၵူၼ်းလီ ၸိူဝ်းၼႆႉ ။


ႁူဝ်ပဝ်ႈၵူၼ်းၼုမ်ႇတႆး TYO ၸၢႆးထုၼ်းလႃႉ လၢတ်ႈဝႃႈ “ၼင်ႇႁိုဝ်ၵူၼ်းၼုမ်ႇတႆးၵူႈတီႈတီႈပေႃးတေၵပ်း သိုပ်ႇၵပ်းသၢၼ်ၸုင်မိုဝ်းႁၵ်ႉႁွမ်ၵၼ်လႄႈ ႁဵတ်းႁႂ်ႈတူင်ႇဝူင်းၵူၼ်းၶိုၼ်ႈယႂ်ႇ၊ ႁႂ်ႈၵူၼ်းၼုမ်ႇတႆးႁဝ်းမီးၼမ်ႉ ၵတ်ႉႁတ်းႁၢၼ်ၼႆႁဝ်းၶႃႈၸင်ႇႁူမ်ႈၵၼ်သေၸတ်းႁဵတ်း” ဝႃႈၼႆ ။


ၸၢႆးသၢႆလႅင်း ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇတႆး TYO ဢိူင်ႇ19 ဝၢၼ်ႈလၢတ်ႈဝႃႈ - “ပေႃးဢမ်ႇမီးပၺ်ၺႃၸိုင် တေပဵၼ်ၵူၼ်းၶီႈၵူဝ်၊ၶီႈယၢၼ်ႈ၊ ဢမ်ႇႁတ်းလၢတ်ႈႁတ်းၸႃ ၊ ၵူၼ်းၼုမ်ႇတႆးလၢႆလၢႆတီႈၵေႃႈ ယင်းတိုၵ်ႉႁၢမ်းႁႅၵ်း ပၺ်ၺႃတၢင်းမေႃၼမ်ယူႇ ၵွပ်ႈၼၼ်ၶႂ်ႈတုၵ်းယွၼ်းထိုင် ၽူႈမီးၼမ်ႉၵတ်ႉတႆး လူင်းပူင်သွၼ်ၽိူမ်ႉထႅမ်ၼမ်ႉ ၵတ်ႉၵူႈတီႈၵူႈတၢင်းသေၵမ်း ၼင်ႇႁိုဝ်ၵူၼ်းမိူင်းတႆးပေႃးတေမီးတၢင်းႁူႉ၊ ႁတ်းႁၢၼ်၊ႁတ်းလၢတ်ႈႁတ်းၸႃ၊ ႁတ်းတွပ်ႇထဵင်လွင်ႈဢၼ်ဢမ်ႇၸို်ဝ်ႈဢမ်ႇၸႂ်ႈ ။ လိူဝ်ၼၼ်ႉၶႂ်ႈတုၵ်းယွၼ်းထိုင်ၵူႈမူႇၸုမ်း၊ၵူႈပႃႇတီႇ၊ ၵူႈတပ်ႉသိုၵ်း ႁႂ်ႈပဵၼ်ၼမ်ႉၼိုင်ႈၸႂ်လဵဝ်ၵၼ်၊ၽွမ်ၵၼ်၊ၸွႆႈထႅမ်သၢၼ်မိုဝ်းၵၼ်ၵႂႃႇသေၵမ်း။ယဝ်ႉၵေႃႈ ယိၼ်းၸူမ်းထိုင်ပီႈၼွင်ႉၵူၼ်းဝၢၼ်ႈၶႃးလႅင်တႄႉတႄႉဢၼ်လႆႈၸွႆႈထႅမ်ၶဝ်ႈၼမ်ႉတၢင်းၵိၼ်လဵင်ႉလူၼႂ်းပၢင်ၾိုၵ်းၽွၼ်ႉတေႃႇပေႃးယဝ်ႉ ” ဝႃႈၼ ။


မိူဝ်ႈဝၼ်းထီႉ 13 - 15/08/2016  ၸုမ်းၵူၼ်းၼုမ်ႇတႆး TYO ဢိၵ်ႇတင်း ၸုမ်းၵေႃတႆး ၸတ်းႁဵတ်းပၢင်သွၼ် ပိုၼ်ႉႁူႉလႄႈ ၽိူမ်ႉထႅမ်ၼမ်ႉၵတ်ႉၵူၼ်းၼုမ်ႇ ပွၵ်ႈၵမ်း 1 တီႈမိူင်းယူႉ ၸႄႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ ။ ဢုပ်ႇၶႆႈပူင်သွၼ်ပၼ်လွင်ႈပုၼ်ႈၽွၼ်း ၵူၼ်းမိူင်း ၊ ၵၢၼ်ပဵၼ်ၵူၼ်းမိူင်းလီ ၊ ပိူင်ပိုၼ်ႉငဝ်ႈတီႊမူဝ်ႊၶရေႊသီႊ ၊ လၢႆးႁဵတ်းပၢင်ၵုမ် ၊ ၵၢၼ် ၽွင်းငမ်းလီ ၊ သုၼ်ႇလႆႈသုၼ်ႇပဵၼ်ၵူၼ်း လႄႈ တူင်ႇဝူင်းၵူၼ်းၾိင်ႈလီ ၸိူဝ်းၼႆႉ မီးၽူႈၶိုတ်ႈႁွတ်ႈပၢင်သွၼ် ႁူမ်ႈ 75 ၵေႃႉ ။