ၽူႈၼမ်းၸုမ်းဝႃႉလႄႈ ၸုမ်းမိူင်းလႃး တေၵႂႃႇႁူပ်ႉ ၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ်ၸိုင်ႈမိူင်း



ၽူႈၼမ်းၸိၵ်းၸွမ်ၸုမ်းဝႃႉ ၼႃႈလိၼ်ၶိုၵ်ႉတွၼ်းမၢႆ 2 တင်း ၽူႈၼမ်းၸုမ်းမိူင်းလႃး ၼႃႈလိၼ်ၶိုၵ်ႉတွၼ်းမၢႆ 4 ဢွၵ်ႇၶၢဝ်းတၢင်း ၵႂႃႇၼေႇပျီႇတေႃႇ၊ ပိူဝ်ႈတႃႇၵႂႃႇႁူပ်ႉထူပ်း ၼၢင်းဢွင်ႇသၢၼ်း ၽူႈၵိူဝ်းၵုမ်ၸိုင်ႈမိူင်း သၢင်ႈလွင်ႈၸမ်ၸႂ်ၵၼ် ။

ၽူႈၼမ်းၸုမ်းဝႃႉပၢင်သၢင်း ပဝ်းယဵဝ်ႇသျႅင်၊ ၽူႈၵိူဝ်းၵုမ်ၸိုင်ႈမိူင်း ၼၢင်းဢွင်ႇသၢၼ်းၸုၵျီႇ လႄႈ ၽူႈၼမ်းၸုမ်းမိူင်းလႃး ၸဝ်ႈၸၢႆးလိုၼ်း
ပိူဝ်ႈတႃႇၵႂႃႇႁူပ်ႉထူပ်း ၼၢင်းဢွင်ႇသၢၼ်းၸုၵျီႇ ၽူႈၵိူဝ်းၵုမ်ၸိုင်ႈမိူင်း ၼႆသေ ဝၼ်းတီႈ 28/07/2016 ပွတ်းၼႂ်မိူဝ်ႈၼႆႉ ႁူဝ်ပဝ်ႈလူင်ပဝ်းယဵဝ်ႇသျႅင် ၽူႈၼမ်းတပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) တင်းမေးၼၢင်း ဢိၵ်ႇ လုၵ်ႈၼွင်ႉပွင်ႈပၢႆ တူဝ်တႅၼ်းၼႂ်းတပ်ႉသိုၵ်းဝႃႉ၊ ၽူႈၼမ်းတပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊ ၸိုင်ႈတႆးပွတ်းဢွၵ်ႇ (NDAA-ESS) ႁူဝ်ပဝ်ႈလူင် ၸဝ်ႈၸၢႆးလိုၼ်း တင်းမေးၼၢင်း ဢိၵ်ႇလုၵ်ႈၼွင်ႉပွင်ႈပၢႆ ၼႂ်းတပ်ႉသိုၵ်း ႁူမ်ႈၵၼ်လုၵ်ႉတီႈဝဵင်းမိူင်းလႃး ဢွၵ်ႇၶၢဝ်းတၢင်းၵႂႃႇတီႈ ၶူင်ႇႁိူဝ်းဝိၼ်ၵဵင်းတုင်၊ သိုပ်ႇၵႂႃႇၼေႇပျီႇတေႃႇ ပိူဝ်ႈတႃႇၵႂႃႇႁူပ်ႉထူပ်းၵၼ်- ၼႆယဝ်ႉ ။


ၽူမီးၸၼ်ႉၵေႃႉၼိုင်ႈ ဢၼ်ၵႂႃႇၸွမ်းၼႂ်းၶၢဝ်းတၢင်းၼၼ်ႉ လၢတ်ႈဝႃႈ- မိူဝ်ႈၼႆႉၵၢင်ၼႂ် 6 မူင်း ၶီႇၵႃးရူတ်ႉတူႈ သေဢွၵ်ႇမႃး၊ မႃးၶိုၼ်ႈႁိူဝ်းဝိၼ်တီႈၵဵင်းတုင် (ႁိူဝ်းဝိၼ်ၶိုၵ်ႉတွၼ်း ဢၼ်ႁၢင်ႈႁႅၼ်းဝႆႉ)သေ ဢွၵ်ႇၵႂႃႇ ၼေႇပျီႇတေႃႇ၊ တေၵႂႃႇႁူပ်ႉထူပ်းၼၢင်းဢွင်ႇသၢၼ်းၸုၵျီႇ။ ပိူင်လူင်တႄႉ ပိူဝ်ႈတႃႇမိုတ်ႈၵိုဝ်းၸမ်ၸႂ်ၵၼ်ၵူၺ်း၊ ၼွၵ်ႈသေၼၼ်ႉ တေဢုပ်ႇဢူဝ်းၵၼ် ပဵၼ်လွင်ႈငမ်းယဵၼ်လႄႈ လွင်ႈၵၢၼ်မိူင်းဢိတ်းဢွတ်း- ဝႃႈၼႆ ။


ၶၢဝ်းတၢင်းပွၵ်ႈၼႆႉ ပဵၼ်ၶၢဝ်းတၢင်းဢၼ်ၽူႈၼမ်းၸိၵ်းၸွမ် တပ်ႉသိုၵ်း 2 ၸုမ်း ၼႂ်းၸိုင်ႈတႆးပွတ်းဢွၵ်ႇ လႄႈ ၼၢင်းဢွင်ႇသၢၼ်းၸုၵျီႇၶဝ် ႁူပ်ႉထူပ်းၵၼ် ပွၵ်ႈၵမ်းဢွၼ်တၢင်းသုတ်း ၼႂ်းပၢၼ်လူင်ပွင်ၸိုင်ႈ ၻီႊမူဝ်ႊၶရေႊၸီႊ ယၢမ်းလဵဝ်- ဝႃႈၼႆ ။


ၼၢင်းဢွင်ႇသၢၼ်းၸုၵျီႇ ဢၼ်ပဵၼ်ၽူႈၵိူဝ်းၵုမ်ၸိုင်ႈမိူင်းၼႆႉ တေၸတ်းႁဵတ်း ပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင်၊ မီးယိူင်းဢၢၼ်း ပိူဝ်ႈတႃႇႁႂ်ႈၸုမ်းယိပ်းၵွင်ႈၵၢင်ႇ ၵူႈမူႇၵူႈၸုမ်းလႆႈၶဝ်ႈႁူမ်ႈ၊ ယိူင်းဢၢၼ်းပိူဝ်ႈတႃႇ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ ၵူႈမူႇၵူႈၸုမ်းမႃးလူင်းလၢႆးမိုဝ်း ၵိုတ်းတိုၵ်းတူဝ်ႈမိူင်းသေ ၶဝ်ႈမႃးဢုပ်ႇဢူဝ်း ၵၢၼ်မိူင်း ပိူဝ်ႈတႃႇလႆႈသုၼ်ႇလႆႈၽဵင်ႇပဵင်း။ ယိူင်းဢၢၼ်းၸိူင်ႉၼႆသေ မၼ်းၼၢင်းၵေႃႈလႆႈႁူပ်ႉထူပ်း ၸုမ်းၸၢဝ်းၶိူဝ်း ၸိူဝ်းယိပ်းၵွင်ႈၵၢင်ႇသိုပ်ႇတၢမ်လၢမ်းမႃး ဢမ်ႇၵိုတ်းဢမ်ႇၶၢတ်ႇ ။


မိူဝ်ႈပူၼ်ႉမႃးဢမ်ႇႁိုင်ၼႆႉၵေႃႈ ၶွင်ႇသီႇႁူမ်ႈတုမ်ၵူႈၸၢဝ်းၶိူဝ်း (UNFC) ၸွမ်သိုၵ်းလူင်ဢႅၼ်ႇပၢၼ်းလႃႉ ဢွၼ်ႁူဝ်သေၵႂႃႇႁူပ်ႉထူပ်း ဢွင်ႇသၢၼ်းၸုၵျီႇ၊ ဢုပ်ႇၵုမ်ႁၢင်ႈႁႅၼ်း ပိူဝ်ႈတႃႇဢုပ်ႇဢူဝ်းၵၢၼ်မိူင်း။ မိူဝ်ႈၼၼ်ႉ ၾၢႆႇဢႅၼ်ႇပၢၼ်းလႃႉ လႆႈတွင်ႈထၢမ် ၼၢင်းဢွင်ႇသၢၼ်းၸုၵျီႇဝႃႈ တီႈပၢင်ၵုမ်လူင်ပီႁူဝ်ပၢၵ်ႇ 21 ပၢင်လူင်ၼႆႉ ၸုမ်းၸၢဝ်းၶိူဝ်းၸိူဝ်းပႆႇလႆႈ လူင်းလၢႆးမိုဝ်းၵေႃႈ တေႁႂ်ႈမႃးၶဝ်ႈပၢင်ၵုမ်ယူႇႁိုဝ်၊ ၼၢင်းဢွင်ႇသၢၼ်းၸုၵျီႇ ၶိုၼ်းတွပ်ႇဝႃႈ- တွၼ်ႈတႃႇႁဝ်းၶႃႈၶႂ်ႈပဵၼ်တႄႉ ဢမ်ႇလႆႈလူင်းလၢႆးမိုဝ်းၵေႃႈ ၶဝ်ႈႁူမ်ႈပၢင်ၵုမ်လႆႈယူႇ။ ၵူၺ်းၵႃႈ ၸုမ်းၸိူဝ်းပႆႇလႆႈလူင်းလၢႆးမိုဝ်းၼၼ်ႉ ပဵၼ်ၽူႈၶဝ်ႈႁူမ်ႈထမ်းမၻႃး၊ တေဢမ်ႇမီးသုၼ်ႇလႆႈၽဵင်ႇပဵင်း။ ပေႃးဝႃႈဢမ်ႇလႆႈလူင်းလၢႆးမိုဝ်းသေ မႃးၶဝ်ႈႁူမ်ႈပၢင်ၵုမ်၊ သမ်ႉမီးသုၼ်ႇလႆႈ ၽဵင်ႇပဵင်းယူႇတႄႉ ၽႂ်ၸုမ်းလႂ်ၵေႃႈ တေဢမ်ႇၶႂ်ႈမႃးလူင်းလၢႆးမိုဝ်းၵၼ်။ ဢၼ်လီသုတ်းတႄႉ လူင်းလၢႆးမိုဝ်းၵိုတ်းတိုၵ်းတူဝ်ႈမိူင်းသေ ၸင်ႇၵွႆႈမႃးဢုပ်ႇဢူဝ်းၵၢၼ်မိူင်းၼၼ်ႉ လီသုတ်းယဝ်ႉ- ၼၢင်းဢွင်ႇသၢၼ်းၸုၵျီႇ တွပ်ႇၶိုၼ်းၽူႈၼမ်းၶဝ် ၼင်ႇၼႆ ။


ၸုမ်းဝႃႉ (UWSA) တင်းၸုမ်းမိူင်းလႃး (NDAA-ESS) ၼႆႉ လႆႈၵိုတ်းသိုၵ်း ၵၼ်တင်းၸုမ်းသိုၵ်းမၢၼ်ႈ ပူၼ်ႉမႃးမိူဝ်ႈပီ 1989 ၵမ်းၼိုင်ႈ။ ထိုင်မႃးပီ 2011 ၵေႃႈ မႃးၵိုတ်းတိုၵ်းတင်း လူင်ပွင်ၸိုင်ႈတဵင်းၸဵင်ႇထႅင်ႈသေ လူင်းလၢႆးမိုဝ်းလွင်ႈငမ်းယဵၼ်ဝႆႉ။ ၵွပ်ႈၼၼ် ဢမ်ႇတၢပ်ႈလူင်းလၢႆးမိုဝ်းၵိုတ်းတိုၵ်း တူဝ်ႈမိူင်းၵေႃႈ ၶဝ်ႈမႃးၼႂ်းပၢင်ၵုမ်ၵၢၼ်မိူင်းၵေႃႈလႆႈယူႇ ယုမ်ႇယမ်ဝႆႉၼင်ႇၼႆ ။




 
© 2012 All Rights Reserved | Asean Celebrity | Fonts @ AtFonts | Free Templates