ပိူဝ်ႈတႃႇၵေႃႇတင်ႈ ၸိုင်ႈမိူင်းႁူမ်ႈတုမ်ၾႅတ်ႊၻရႄႊလ် ၻီႊမူဝ်ႊၶရေႊၸီႊမိူဝ်းၼႃႈၼႆႉ တပ်ႉသိုၵ်း မိူင်းႁူမ်ႈတုမ်ၼႆႉ ထုၵ်ႇလီလႆႈယူႇတႂ်ႈ ၵၢၼ်ၽွင်းငမ်းၵူၼ်းမိူင်းၼႆ တီႈပၢင်ၵုမ်လူင်မၢႆႇၵျႃႇယၢၼ်ႇ လႆႈၸႂ်တႅပ်းတတ်းၵႂႃႇ ။

ပၢင်ၵုမ်လူင် ဢၼ်ဢုပ်ႇဢူဝ်းၵၼ် ၼႂ်းဝၼ်းတီႈ 28/07/2016 (မိူဝ်ႈဝႃး)ၼႆႉ ယူႇတီႈၶွင်ႊသီႊႁူမ်ႈတုမ် ၵူႈၸၢဝ်းၶိူဝ်း (UNFC) တင်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 8 ၸုမ်း ၸိူဝ်းလူင်းလၢႆးမိုဝ်း ၵၢၼ်ၵိုတ်းယိုဝ်း တူဝ်ႈမိူင်း (NCA)ၼႆႉ ၼႂ်းၶၵ်ႉၵၢၼ်ၵေႃႇတင်ႈမိူင်း ႁူမ်ႈတုမ်ၾႅတ်ႊၻရႄႊလ် ၸိုၼ်ႈၸၢင်ႇမိူဝ်းၼႃႈၼႆႉ ၵဵဝ်ႇၵပ်းၵၢၼ်ၵႅတ်ႇၶႄလႄႈ လွင်ႈႁူမ်ႇလူမ်ႈၸိူဝ်ႉၸၢတ်ႈ ဝၢၼ်ႈမိူင်း ၵႂႃႇတၢင်းၼႃႈၼၼ်ႉ လႆႈတၢင်ႇယိုၼ်ႈမႃး ၽိုၼ်လိၵ်ႈလၢႆးပႃး။ ၵွပ်ႈၼၼ် လႆႈဢုပ်ႇဢူဝ်းၵၼ် လွင်ႈၼႆႉသေ လႆႈၸႂ်ၵၼ်ဝႃႈ ပဵၼ်ၶေႃႈလႆႈၸႂ် ဢၼ်မိူၼ်ၵၼ်- ၼႆယဝ်ႉ ။


ၵဵဝ်ႇၵပ်းလွင်ႈႁူမ်ႇလူမ်ႈဝၢၼ်ႈမိူင်းလႄႈ ၵၢၼ်ၵႅတ်ႇၶႄၸိူဝ်ႉၸၢတ်ႈၼႆႉ ၼႂ်းပိူင်ငဝ်ႈပိုင်းမိူင်း (လၵ်းမိူင်း) ၸိုင်ႈမိူင်းႁူမ်ႈတုမ်ၼၼ်ႉ တႃႇတေၵႅတ်ႇၵင်ႈၸိူဝ်ႉၸၢတ်ႈ ၸဵမ်ၸိူဝ်းၼႆႉလႆႈၸႂ်ဝႆႉတင်းမူတ်း 10 ၶေႃႈ၊ ၼႂ်းသိပ်း ၶေႃႈၼၼ်ႉ တေသိုပ်ႇဢုပ်ႇဢူဝ်းၵၼ်ၵႂႃႇထႅင်ႈ ၶေႃႈလႂ်ၶေႃႈၼၼ်ႉ- ဢွၵ်ႇၶေႃႈပိုၼ်ၽၢဝ်ႇၵႂႃႇၼင်ႇၼႆ ။


ပၢင်ၵုမ်ၼႆႉ တမ်းဝၢင်းဝႆႉဢၢၼ်းၸတ်းႁဵတ်း 4 ဝၼ်းၵူၺ်းသေတႃႉ ယွၼ်ႉပိူဝ်ႈဢုပ်ႇဢူဝ်းၵၼ် ဢမ်ႇယဝ်ႉတူဝ်ႈလႄႈ တေသိုပ်ႇႁဵတ်းထႅင်ႈဝၼ်းၼိုင်ႈ၊ ႁူဝ်ပဝ်ႈၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၶုၼ်ႇမိၼ်ႉထုၼ်း လၢတ်ႈ ။


ဢၼ်ႁဝ်းၶႃႈဢုပ်ႇဢူဝ်းၵၼ်ၼႆႉ ဢမ်ႇမီးလွင်ႈပႅၵ်ႇပိူင်ႈသင်ၵၼ် ၼင်ႇၵဝ်ႇ၊ ၵူၺ်းၵႃႈ ဢၼ်ႁဝ်းၶႃႈ ဢုပ်ႇဢူဝ်းၵၼ် ၵဵဝ်ႇၵပ်းလွင်ႈၵၢၼ်ၵေႃႇတင်ႈ မိူင်းႁူမ်ႈတုမ်ၾႅတ်ႊၻရႄႊလ်ၼႆႉတႄႉ တၵ်းတေလႆႈဢဝ် ၻီႊမူဝ်ႊၶရေႊၸီႊ ပဵၼ်ငဝ်ႈငႃႇပိုၼ်ႉထၢၼ်မၼ်း။ ႁဝ်းၶႃႈဢုပ်ႇဢူဝ်းၵၼ်ႁူဝ်ယွႆႈယႅမ်းမၼ်းၼမ်လိူဝ်လႄႈ လႆႈဢဝ်ၶၢဝ်းယၢမ်းသေ ဢုပ်ႇဢူဝ်းၵၼ်- ၶုၼ်ႇမိၼ်ႉထုၼ်း သိုပ်ႇလၢတ်ႈ ။


ပၢင်ၵုမ်လူင် ၸုမ်းၸၢဝ်းၶိူဝ်းဢုပ်ႇဢူဝ်းၵၼ် တီႈမၢႆႇၵျႃႇယၢၼ်ႇ ၼႃႈလိၼ်တပ်ႉသိုၵ်းၶၢင်လွတ်ႈလႅဝ်း ၵုမ်းၵမ်ပွၵ်ႈၵမ်းၼႆႉ တႃႇတေၶဵၼ်ႇတႅမ်ႈပိူင်ငဝ်ႈပိုင်းမိူင်း (လၵ်းမိူင်း) ဢၼ်ဢမ်ႇပႃးလွင်ႈၽၢတ်ႇဢွၵ်ႇၼၼ်ႉ လႆႈၸႂ်ၵၼ်ဝႆႉတင်းမူတ်း 8 ၶေႃႈ- ၼႆယဝ်ႉ ။