သင်ၶၸဝ်ႈ ၵူၼ်းမိူင်းလႄႈ ၽူႈတႅၼ်းၸႄႈမိူင်း ၵျွၵ်ႉမႄး ၸတ်းႁဵတ်းပၢင်ၵုမ် ဢုပ်ႇဢူဝ်း တႃႇပိုတ်ႇၶိုၼ်း ႁူင်းႁဵၼ်းၸၼ်ႉသုင် (ၵိင်ႇၽႄ) ၼႂ်းဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ။

ဝၼ်းတီႈ 24/07/2016 ယၢမ်း 11:00 မူင်းပၢႆ သင်ၶၸဝ်ႈ ၊ ၶူးသွၼ်ၼႂ်းႁူင်းႁဵၼ်း ၊ ပေႃႈမႄႈၵူၼ်းမိူင်းလႄႈ ၽူႈတႅၼ်းၸႄႈမိူင်း ၵျွၵ်ႉမႄး ႁူမ်ႈၵၼ်ၸတ်းႁဵတ်းပၢင်ၵုမ် တီႈဝတ်ႉ / ၵျွင်းၼိူဝ် ဝၢၼ်ႈတေႃႉသၢင်ႇ ဢိူင်ႇတေႃႉသၢင်ႇ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ဢုပ်ႇၵုမ် တူၵ်းလူင်းလႆႈၸႂ်ၵၼ် တႃႇပိုတ်ႇသွၼ်ႁဵၼ်းၶိုၼ်း ၼႂ်းႁူင်းႁဵၼ်းလူင်ပွင်ၸိုင်ႈ ဢိူင်ႇတေႃႉသၢင်ႇ ၼႂ်းဝၼ်းတီႈ 01/08/2016 ၵႂႃႇ ၼႆယဝ်ႉ ။


ၸၢႆးပႃႉထုၼ်း ၽူႈတႅၼ်းသၽႃး ၸႄႈမိူင်း ၵျွၵ်ႉမႄး ၶဵတ်ႇလိူၵ်ႈတၢင်ႈမၢႆ 2 လၢတ်ႈဝႃႈ “ တေႃႈလဵဝ် ႁဝ်းၶႃႈၶဝ် တူၵ်းလူင်းလႆႈၸႂ်ၵၼ် ဝႃႈတေဢၢၼ်းပိုတ်ႇ ၼႂ်းဝၼ်းတီႈ 01/08/2016 ။ ၸၼ်ႉလိၵ်ႈ ဢၼ်တေပိုတ်ႇသွၼ်သမ်ႉ တေပိုတ်ႇၸၼ်ႉငဝ်ႈ ထိုင် ၸၼ်ႉၸဵတ်း ဢွၼ်တၢင်း ၊ ပေႃးထိုင်မႃး 08/08/2016 သမ်ႉ တေသိုပ်ႇပိုတ်ႇထႅင်ႈ ၸၼ်ႉပႅတ်ႇ ၊ ၸၼ်ႉၵဝ်ႈလႄႈ ၸၼ်ႉသိပ်း ထႅင်ႈ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ လုၵ်ႈႁဵၼ်းၸိူဝ်းတေမႃးၶိုၼ်ႈႁူင်းႁဵၼ်း ၸၼ်ႉသုင် ၵိင်ႇၽႄ ဢိူင်ႇတေႃႇသၢင်ႇ ၼႆႉ တင်းမူတ်း မီး 56 ဝၢၼ်ႈ ၊  56 ဝၢၼ်ႈၼႆႉ ပဵၼ်ႁူင်းႁဵၼ်းၸၼ်ႉဢွၼ်ႇ (မူလ) ၵူၺ်းလႄႈ တၵ်းလႆႈမႃးသိုပ်ႇၶိုၼ်ႈႁဵၼ်းထႅင်ႈတီႈ ႁူင်းႁဵၼ်းၸၼ်ႉသုင် (ၵိင်ႇၽႄ) ဢိူင်ႇတေႃႉသၢင်ႇၼႆႉ” ဝႃႈၼႆ ။


ၸၢႆးထုၼ်းဢွင်ႇ ၽူႈတႅၼ်းသၽႃးၵူၼ်းမိူင်း ၸႄႈဝဵင်းၵျွၵ်ႉမႄး လၢတ်ႈဝႃႈ “ ယၢမ်းလဵဝ် တီႈၵျွၵ်ႉ မႄးၼႆႉ ၶၢဝ်ႇငၢဝ်းယဵၼ်ဝႆႉ ။


ၵူၺ်းၵႃႈၵူၼ်းပၢႆႈၽေးယင်းတိုၵ်ႉမီးယူႇမွၵ်ႈ 200 ပၢႆ ၊ ၸဵမ်လုၵ်ႈႁဵၼ်း ၵူၼ်းဝၢၼ်ႈၵူၼ်းသူၼ် ၼႂ်းဢိူင်ႇတေႃႉသၢင်ႇ ပႆႇၸၢင်ႈပွၵ်ႈႁိူၼ်း ယွၼ်ႉဝႃႈ ၼႂ်းဢိူင်ႇတေႃႉသၢင်ႇၼႆႉ ပႆႇမီးလွင်ႈႁူမ်ႇလူမ်ႈလီ ” ဝႃႈၼႆ ။


ယၢမ်းလဵဝ်ၼႆႉ ၵူၼ်းပၢႆႈၽေးသိုၵ်း မီးဝႆႉတီႈ ဝတ်ႉဢွင်ႇသူႉပၢၼ်ႇ မီး 138 ၵေႃႉ ၊ ဝတ်ႉႁူဝ်မိူင်း 60 ပၢႆလႄႈ တီႈႁူင်းယႃသိူဝ်ႁႃႈတူဝ် မီး 55 ၵေႃႉ ။