ႁၢင်လိူၼ်ၵျႃႊလၢႆႊၼႆႉ ၾူၼ်တူၵ်းႁႅင်းလႄႈ ၼမ်ႉမၢဝ်းလူၼ်ႉၾင်ႇ ၶဝ်ႈထူမ်ႈသူၼ် ၊ ႁႆႈ ၊ ၼႃး ၊ ႁိူၼ်းၵူၼ်းမိူင်းထုင်ႉမၢဝ်း လူႉသုမ်းမွၵ်ႈ 5 ပၢၵ်ႇဢေႊၵႃႊ ၼပ်ႉပဵၼ်ငိုၼ်းႁိမ်းမွၵ်ႈ 5,000 (ႁႃႈႁဵင်သႅၼ်ၵျၢတ်ႉ) ။

ဝၼ်းတီႈ 25/07/2016 ၾူၼ်တူၵ်းႁၢဝ်ႈႁႅင်း ႁဵတ်းႁႂ်ႈၼမ်ႉမၢဝ်းလူၼ်ႉၾင်ႇ ၶဝ်ႈထူမ်ႈသူၼ်ႁႆႈ ၊ ၼႃး ၊ ႁိူၼ်းယေး ၵူၼ်းဝၢၼ်ႈ ထုင်ႉလွႆႁူဝ်သိူဝ် ၊ ထုင်ႉမၢဝ်းမိူၼ်ၼင်ႇ ဝၢၼ်ႈႁူဝ်ႁိၼ် ၊ ဝၢၼ်ႈသွၼ်း ၊ ၵုၼ်ႁႆး ၊ ၶႄးၶုၼ် ၊ ၼွင်ၶမ်း ၊ မၢၼ်ႈၵုၼ် ၸိူဝ်းၼႆႉ ။ ၼမ်ႉထူမ်ႈၼႃးၵူၼ်းဝၢၼ်ႈမွၵ်ႈ 5 ပၢၵ်ႇဢေႊၵႃႊ မီးၵႃႈၶၼ်မွၵ်ႈ 5,000 သႅၼ် ၵျၢတ်ႉ ။


ၸဝ်ႈၼႃးၵေႃႉၼိုင်ႈလၢတ်ႈဝႃႈ - “ ႁဝ်းၶႃႈတႄႉလႆႈပိုင်ႈဢိင် ၶဝ်ႈၼႂ်းၼႃးဢၼ်ႁဝ်းၽုၵ်ႇသွမ်ႈဝႆႉ ၼၼ်ႉလႄႈၼမ်ႉသမ်ႉမႃးထူမ်ႈပႅတ်ႈၸိူင်ႉၼႆတႄႉ တေယၢပ်ႇၽိုတ်ႇတွၼ်ႈတႃႇမိူဝ်းၼႃႈတႄႉဢေႃႈ ” ဝႃႈၼႆ ။


ၸၢႆးလၢဝ် ၵူၼ်းၼမ်ႉၶမ်း လၢတ်ႈဝႃႈ - “ယၢမ်းလဵဝ်ၾိင်ႈၾႃႉလႅၵ်ႈလၢႆႈလိူဝ်ႁႅင်း ပေႃးမႆႈၵေႃႈ မႆႈပူၼ်ႉတီႈ၊ ၶၢဝ်းၾူၼ်ၵေႃႈၾူၼ်တူၵ်းႁႅင်းလႄႈ ၵူၼ်းဝၢၼ်ႈၵူၼ်းမိူင်းထုၵ်ႇလီၾၢင်ႉသတိၼမ်ၼမ် ။ လိူဝ်ၼၼ်ႉၵေႃႈ ထုၵ်ႇလႆႈၾၢင်ႉပႃးလွင်ႈၾႆးၾႃႉသျွတ်ႉ ” ဝႃႈၼႆ ။


ၶၢဝ်ႇပႆႇယိုၼ်ယၼ်လႆႈတႄႉဝႃႈ - ယွၼ်ႉပိူဝ်ႈၾင်ႇၾၢႆႇမိူင်းၶႄႇ ပိုတ်ႇၾၢႆလႄႈ ၼမ်ႉၸင်ႇလူၼ်ႉ ၾင်ႇထူမ်ႈထုင်ႉမၢဝ်း - ဝႃႈၼႆ ။