ၽူႈတႅၼ်းသၽႃး ၸိူဝ်ႉၸၢတ်ႈ ၸႄႈတွၼ်ႈလႃႈသဵဝ်ႈ ပႃႇတီႇႁူဝ်သိူဝ် တၢင်ႇလၢတ်ႈ လွင်ႈပၼ်ႁႃ ယႃႈမဝ်းၵမ် ၼႂ်းပၢင်ၵုမ် သၽႃးၸိူဝ်ႉၸၢတ်ႈ ပွၵ်ႈၵမ်းသွင် ။ ႁူဝ်ပဝ်ႈသၽႃး ႁပ်ႉပၼ်ႁႃၼႆႉသေ တေၵႄႈလိတ်ႈၵႂႃႇ ။


ဝၼ်းတီႈ 25/07/2016 ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ ပႃႇတီႇႁူဝ်သိူဝ် (ႁိုဝ်) ငဝ်ႈငုၼ်းၻီႊမူဝ်ႊၶရေႊသီႊ ၸိူဝ်ႉၶိူဝ်းတႆး SNLD လၢတ်ႈ လွင်ႈယႃႈမဝ်းၵမ် ဢၼ်ပဵၼ် ပၼ်ႁႃယူႇ ၼႂ်းမိူင်း / ပိုၼ်ႉတီႈ ။ ႁူဝ်ပဝ်ႈ သၽႃးၸိူဝ်ႉၸၢတ်ႈ ႁပ်ႉဢဝ်လွင်ႈၼႆႉသေ မၵ်းမၼ်ႈၵႂႃႇ ၽူႈတႅၼ်း သၽႃး ၸိူဝ်ႉၸၢတ်ႈ ၼႂ်းသၽႃး ႁၼ်လီ ၵမ်ႉထႅမ် ဢမ်ႇမီး လွင်ႈသၢၼ်ၶတ်း ၊ ၵဵဝ်ႇၵပ်းလွင်ႈၼႆႉသၽႃး တေသိုပ်ႇဢုပ်ႇၵုမ်ႁႃတၢင်း ၵႄႈလိတ်ႈပၼ်ႁႃယႃႈမဝ်းၵမ်ၵႂႃႇ ။


ၸၢႆးဝၼ်းလႅင်းၶမ်း ၽူႈတႅၼ်းသၽႃး ၸိူဝ်ႉၸၢတ်ႈ ပႃႇတီႇႁူဝ်သိူဝ် လၢတ်ႈဝႃႈ “ ယႃႈမဝ်းၵမ်ၼႆႉ မၼ်းလိူင်ႇၽႄႈၼမ်။ တီႈၶၢႆမၼ်းၵေႃႈၼမ် ႁႂ်ႈလႆႈယူႇတီႈလူင်ပွင်ၸိုင်ႈသေ တိၺွပ်းပၼ် ၊ လိူဝ်ၼၼ်ႉ တီႈဢၼ်သူႇၵိၼ်သမ်းမၼ်း တီႈၸွၵ်ႉၸဵင်ႇ ၼိုင်ႈၸႄႈဝဵင်းလႂ် မၼ်းတိုၼ်းမီး ယူႇၼိုင်ႈတီႈယဝ်ႉ ၊  မိူၼ်ၼင်ႇ ၼႂ်းပႃႇႁဵဝ်ႈၸိူဝ်းၼၼ်ႉ ၼႂ်းၸွၵ်ႉၼႂ်းၸဵင်ႇၸိူဝ်းၼၼ်ႉ ၵူၼ်းသူႇသမ်းယႃႈမဝ်းၵမ်မီးၼမ် ၊ ပဵၼ်ၸုမ်း ယႂ်ႇၸိူဝ်းၼၼ်ႉ ၶႂ်ႈႁႂ်ႈလူင်ပွင်ၸိုင်ႈၶဝ်ႈထိုင်သေ ၽဵဝ်ႈလၢင်ႉပၼ် ။ ၶႂ်ႈႁႂ်ႈလူင်ပွင်ၸိုင်ႈ ပၼ်တၢင်းႁူႉ ၵဵဝ်ႇၵပ်း လူၺ်ႈယႃႈမဝ်းၵမ် မၼ်းဢမ်ႇလီ ၸိူင်ႉႁိုဝ် ယႃႇပေပၼ်ပၢင်သွၼ် ၼႂ်းဝဵင်းဢၼ်လဵဝ်ၵူၺ်း ႁႂ်ႈလႆႈပၼ်ပႃးဝၢၼ်ႈၼွၵ်ႈၼႃးပၢင် ၵႂၢင်ႈၵႂၢင်ႈၶႂၢင်ၶႂၢင် ။ ထႅင်ႈလွင်ႈၼိုင်ႈသမ်ႉ  ၵူၼ်းၸိူဝ်းဢၼ်တိတ်းၸပ်းယႃႈၸိူဝ်းၼၼ်ႉ ၸိူဝ်းဢၼ်တိတ်းၸပ်းယဝ်ႉ ၼႅင်ၸႂ် ၶႂ်ႈတိုတ်းၶိုၼ်းၸိုင် ႁႂ်ႈလူင်ပွင်ၸိုင်ႈ လူင်းတိုၼ်းသေ ႁဵတ်းပၼ် ႁူင်းတိုတ်းယႃႈ - ၸဵမ်ၸိူဝ်းၼႆႉ” ဝႃႈၼႆ ။


ၽူႈတႅၼ်းသၽႃး မိူင်းၶၢင် ၊ ရၶႅင်ႇ ၊ မိူင်းတႆးလႄႈ မိူင်းမၢၼ်ႈၶဝ် ၶဝ်ႈဢုပ်ႇၵုမ် ႁၼ်လီၵမ်ႉထႅမ်ၸွမ်း ။ ယႃႈမဝ်းၵမ်ၼႆႉ ၽႄႈၸွတ်ႇၼႂ်းမိူင်းတႆးသေဢမ်ႇၵႃး ၼႂ်းမိူင်းမၢၼ်ႈ ၊ မိူင်းၸၢဝ်းၶိူဝ်းလႄႈ မိူင်းႁိမ်းႁွမ်း ၸိူဝ်းၼႆႉၵေႃႈဢမ်ႇၵိုတ်း ။ ၼွၵ်ႈလိူဝ်ၼၼ်ႉ ပဵၼ်လွင်ႈၶဵင်ႇတႃႉတွၼ်ႈတႃႇလုမ်ႈၾႃႉ ဢၼ်ၼိုင်ႈ ။ ၵဵဝ်ႇၵပ်းလွင်ႈၼႆႉ ႁႂ်ႈလူင်ပွင်ၸိုင်ႈမိူင်းမၢၼ်ႈ ဢဝ်လိူင်ႈဢဝ်လၢဝ်း ၸတ်းၵၢၼ်ပၼ်ႁႂ်ႈထိုင်တီႈ - တိုၵ်းသူၼ်းၵႂႃႇ ၼင်ႇၼႆ ။


ၵၢၼ်ၽုၵ်ႇယႃႈ / သူၼ်ယႃႈ ပီ 2015-2016 ၼႆႉ ဢမ်ႇပေႃးပဵၼ်ၵၢၼ် ၶၼ်ယႃႈလမ်ၵေႃႈလူင်း ၊ ၵူၼ်းသိုဝ်ႉဢမ်ႇပေႃးမီး ။ ၵူၺ်းၵႃႈ ၾၢႆႇသိုဝ်ႉၶၢႆသူႇၵိၼ်ယႃႈမႃႉသမ်ႉ ၼမ်လိူဝ်မႃး လုၵ်ႉဢဝ်တီႈၶၼ်ယႃႈမႃႉ 1 မဵတ်ႉ ၼပ်ႉႁဵင် လူင်းပဵၼ် 1 ႁဵင် 3-4 မဵတ်ႉ ။ ႁႃသိုဝ်ႉၵေႃႈငၢႆႈမႃး လိူဝ်ၵူႈပီ ။ ၵူၼ်းသူႇၵိၼ်ၵေႃႈၼမ်လိူဝ်မႃးလႄႈ ပေႃႈမႄႈၵူၼ်းမိူင်း ဢွၼ်ၵၼ်မႆႈၸႂ် ။