ၾၢႆႇပၢႆးပၺ်ၺႃ ငဝ်ႈငုၼ်းမုၵ်ႉၸုမ်းလူင်သင်ၶၸိုင်ႈတႆး ၸတ်းႁဵတ်းပၢင်ၵုမ် ဝၢင်းၽႅၼ် ႁၢင်ႈႁႅၼ်း တႃႇလႅၵ်ႈလၢႆႈလၢႆး ပူင်သွၼ်လိၵ်ႈ ပရိယတ်ႉတိသတ်ႉထမ်ႇမပႃႇလၵႅၼ်ႇၸဝ်ႈၸိုင်ႈတႆး  ႁႂ်ႈလႆႈပဵၼ် ပိူင်သွၼ် လၵ်းသုတ်ႇဢၼ်လဵဝ်ၵၼ် ၼႂ်းမိူင်းတႆး တင်းမူတ်း သင်ၶၸဝ်ႈ ၶဝ်ႈႁူမ်ႈ 30 ပၢႆ ။

ဝၼ်းတီႈ 02-04/06/2016 ယၢမ်း 08:30-16:00 မူင်း ပၢႆးပၺ်ၺႃ ငဝ်ႈငုၼ်း မုၵ်ႉၸုမ်းလူင်သင်ၶ ၸိုင်ႈတႆး ၸတ်းႁဵတ်းပၢင်ၵုမ် တီႈၸၼ်ႉၸွမ်ပုတ်ႉထ ဝဵင်းတူၼ်ႈတီး ၸိုင်ႈတႆး ပွတ်းၸၢၼ်း  ႁၢင်ႈႁႅၼ်း တႃႇမူၼ်းမႄးပိူင်သွၼ်/ပိူင်ႁဵၼ်း ႁႂ်ႈလႆႈပဵၼ်လၵ်းသုတ်ႇလဵဝ်ၵၼ် (ပိူင်လဵဝ်ၵၼ်) ၼႂ်းမိူင်းတႆး ၸိူဝ်းပိုတ်ႇဝႆႉတိူၵ်ႈသွၼ်လိၵ်ႈ ပရိယတ်ႉတိသတ်ႉထမ်ႇမပႃႇလၵႅၼ်ႇၸဝ်ႈၸိုင်ႈတႆး ၼႆယဝ်ႉ ။


ၸဝ်ႈတူၼ်ၶူးလူင် တွၵ်ႊတိူဝ်ႊ ၶမ်းမၢႆ ထမ်မသႃမိ ႁူဝ်ပဝ်ႈၸုမ်းပၢႆးပၺ်ၺႃ ငဝ်ႈငုၼ်းမုၵ်ႉၸုမ်းလူင် သင်ၶ ၸိုင်ႈတႆး သပ်းလႅင်းလၢတ်ႈၼႄ ဝႃႈ “  လွင်ႈဢၼ်လႆႈၸတ်းႁဵတ်းပၢင်ၵုမ်ၼႆႉ မီးဝႆႉယူႇ သွင်လွင်ႈ 1. ၵွပ်ႈပိူဝ်ႈဝႃႈ ၸၼ်ႉၸွမ်ပုတ်ႉထ မိူင်းတႆး လႆႈပဵၼ်ၸဝ်ႈတႃႇၼ( Sponsor) ႁဵတ်းပၢင်ၵုမ်လွင်ႈလၵ်းသုတ်ႇ၊ 2. တွၼ်ႈတႃႇႁႂ်ႈငဝ်ႈငုၼ်းမုၵ်ႉၸုမ်းလူင် သင်ၶၸိုင်ႈတႆး ၵႅၼ်ႇၶႅင်မႃးထႅင်ႈ မိူၼ်ၼင်ႇ ငဝ်ႈငုၼ်းမုၵ်ႉၸုမ်းလူင် ၸိုင်ႈတႆးလႄႈ ၵေႃၽႄၵူႈၸႄႈဝဵင်းၼႆႉႁႂ်ႈလႆႈမိုတ်ႈၵိုဝ်းၸမ်ၵၼ်မႃးထႅင်ႈလိူဝ်ၵဝ်ႇ” ဝႃႈၼႆ ။


ၸဝ်ႈတူၼ်ၶူး ၵိတ်းတိသႃႇလ ၽူႈမၢႆပၢႆးပၺ်ၺႃ ငဝ်ႈငုၼ်းမုၵ်ႉၸုမ်းလူင်သင်ၶ ၸိုင်ႈတႆး လၢတ်ႈဝႃႈ “ ႁူင်းႁဵၼ်းပရိယတ်ႉတိသတ်ႉထမ်ႇမပႃႇလၵႅၼ်ႇၸဝ်ႈ ၸိုင်ႈတႆးႁဝ်းၶႃႈၼႆႉ တင်းမူတ်း ၼႂ်းမိူင်းတႆးႁဝ်း မီး 30 တီႈပၢႆ။ တေႃႈလဵဝ်ၵၢၼ်ႁဵၼ်းႁဝ်းသမ်ႉ ယၢပ်ႇသေ ၼၢၼ်းထိုင်တီႈ ၸဝ်ႈၶူးမီးတၢင်းယိူင်းဢၢၼ်းဝႃႈ ႁႂ်ႈမၼ်းငၢႆႈ ႁႂ်ႈႁူႉၽႂ်း ႁႂ်ႈမၼ်းမီးၼမ်ႉၵတ်ႉ ႁႂ်ႈႁူႉတႄႉတႄႉဝႃႈဝႃႈ။  ပေႃးဝႃႈယဝ်ႉၸၼ်ႉလိၵ်ႈ ၼႂ်းပရိယတိသတ်ႉထမ်ႇမပႃႇလၵႅၼ်ႇၸဝ်ႈၸိုင်ႈတႆးသေ  ၶႂ်ႈမႃးၶိုၼ်ႈၸၼ်ႉၸွမ်ပုတ်ႉထ မိူင်းတႆးၵေႃႈႁႂ်ႈလႆႈ ဢမ်ႇၼၼ် ၵႂႃႇသိုပ်ႇၶိုၼ်ႈ တင်ႇမိူင်းၵေႃႈႁႂ်ႈလႆႈ ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ပိူင်လူင်မၼ်းတႄႉ တေလႆႈမူၼ်ႉမႄး တီႈငဝ်ႈမၼ်း ၸၼ်ႉလဵၵ်ႉဢွၼ် တၢင်းၵွၼ်ႇ တေဢဝ်လၵ်းသုတ်ႇ ဢၼ်လႆႈဢုပ်ႇဢူဝ်းၵၼ်ဝႆႉၼႆႉ တေတမ်းဝၢင်းသေပူင်သွၼ်ၵႂႃႇ ၼႂ်းမိူင်းတႆး ဢၼ်ပိုတ်ႇတိူၵ်ႈသွၼ်လိၵ်ႈ 31 ၸႄႈဝဵင်းႁႂ်ႈမိူၼ်ၵၼ် ၵူႈတီႈ” ဝႃႈၼႆ ။


ၵဵဝ်ႇၵပ်းပၢင်ၵုမ်ဢၼ်လႆႈၸတ်းႁဵတ်းမႃးၼႆႉ လႆႈၸႂ်တူၵ်းလူင်း ဝႃႈတေပူင်သွၼ် လၵ်းသုတ်ႇလဵဝ်ၵၼ် ၼႂ်းတိူၵ်ႈသွၼ်လိၵ်ႈ ပရိယတိသတ်ႉထမ်ႇမပႃႇလၵႅၼ်ႇၸဝ်ႈ ၸိုင်ႈတႆး  မိူၼ်ၼင်ႇ ဝိၼယ၊ သုတ်ႈတၢၼ်ႇ၊ ဢၽိထမ်ႇမႃႇ၊ ပႃလိ၊ လိၵ်ႈလၢႆးတႆး၊ လိၵ်ႈမၢၼ်ႈ၊ လိၵ်းဢင်းၵိတ်း၊ ပၢႆးၼပ်ႉ၊ ပိုၼ်း၊ လၢႆးပွင်ၵၢၼ်သႃႇသၼႃႇလႄႈ ပၢႆးသၢႆသၽႃႇဝ ၸဵမ်ၸိူဝ်းၼႆႉမီး။ ၽႃသႃ ၸၼ်ႉလိၵ်ႈ တင်းမူတ်း တေတမ်းဝႆႉ 9 ၸၼ်ႉ။ သင်ယဝ်ႉ 9 ၸၼ်ႉ ၼႆႉၵႂႃႇၸိုင် သိုပ်ႇတေႃႇၶိုၼ်ႈထႅင်ႈ ၸၼ်ႉၸွမ် ပုတ်ႉထ မိူင်းတႆး တီႈတူၼ်ႈတီး ဢမ်ႇၼၼ် ဢွၵ်ႇၵႂႃႇၶိုၼ်ႈၸၼ်ႉၸွမ် ၼွၵ်ႈမိူင်းၵေႃႈလႆႈ ဝႃႈၼႆ ။


ပၢင်ၵုမ်တႃႇမူၼ်ႉမႄးပိူင်သွၼ်ႁဵၼ်း ႁူင်းႁဵၼ်းပရိယတ်ႉတိသတ်ႉထမ်ႇမပႃႇလၵႅၼ်ႇၸဝ်ႈ ၸိုင်ႈတႆးၼႆႉ ၸတ်းႁဵတ်းယဝ်ႉၵႂႃႇ ပွၵ်ႈႁႅၵ်ႈ မိူဝ်ႈလိူၼ်ပူၼ်ႉ တီႈဝဵင်းပၢင်လူင် ၸိုင်ႈတႆး ပွတ်းၸၢၼ်း ။