ဝၼ်းတီႈ 08/06/2016 ယၢမ်း ဝၢႆးဝၼ်း ရူတ်ႉၵႃး သင်ၶၸဝ်ႈ ပိၼ်ႈတူၵ်းတၢင်း တီႈၼိူဝ်သဵၼ်ႈတၢင်း သီႇပေႃး ၼမ်ႉတူႈ ၸိုင်ႈတႆး ပွတ်းႁွင်ႇ ယွၼ်ႉၾူၼ်တူၵ်းႁၢဝ်ႉႁႅင်း သဵၼ်ႈတၢင်းမိုၼ်ႈ ၶပ်းရူတ်ႉဝႆး ဢမ်ႇၵုမ်းလႆႈႁႅင်းရူတ်ႉၵႃးလႄႈ ၸင်ႇလႆႈပလၢတ်ႈပိၼ်ႇတူၵ်းတၢင်းၵႂႃႇ ၼႂ်းႁူၺ်ႈလိုၵ်ႉ ။

သတ်ႉထႃးၶဝ်ၸဝ်ႈယူႇ ဝဵင်းလႃႈသဵဝ်ႈ ၵႂႃႇသူႇၸႂ်းတီႈႁူင်းယႃၼၼ်ႉ လၢတ်ႈဝႃႈ “ ၼႂ်းရူတ်ႉသင်ၶၸဝ်ႈ တင်းမူတ်းမီး 5 တူၼ် ၊ သုတ်းမုၼ်(လွၼ်ႇ)ၵႂႃႇထၢင်ႇတီႈ 4 တူၼ်၊ ထႅင်ႈတူၼ်ႈၼိုင်ႈသမ်ႉ မၢတ်ႇၸဵပ်းႁၢဝ်ႉႁႅင်းသေ တေႃႇထိုင်ယၢမ်းလဵဝ် ပႆႇႁူႉတူဝ် မီးယူႇတီႈႁူင်းယႃလႃႈသဵဝ်ႈ ” ဝႃႈၼႆ ။


ၼႂ်းရူတ်ႉၵႃးၼႆႉ မႃးၸွမ်းၵၼ် 5 ၸဝ်ႈ တေလုၵ်ႉၸႄႈဝဵင်းသီႇပေႃႉသေ တေၵႂႃႇၶဝ်ႈႁူမ်ႈပၢင် တဵတ်ႈထမ်း(လွတ်ႈ)ပထၢၼ်းတီႈၸႄႈဝဵင်းၼမ်ႉတူႈ၊ ၵူၼ်းၶပ်ႉရူတ်ႉၵႃးသမ်ႉ ပဵၼ်ၸဝ်ႈတူၼ်ၶူး ၵေႃးသႃႇလ ဢႃယု 58 ပီ ၼႃးၵိဝ်ႇ၊ တႃႈတေႈ ၼႆယဝ်ႉ။