ႁူဝ်လိူၼ်ၵျူၼ်ႊၼႆႉ ပီႈၼွင်ႉၵူၼ်းပၢႆႈၽေးသိုၵ်း တင်းပွတ်းဢိူင်ႇၼမ်ႉမ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ ၵူၼ်းပၢႆႈၽေး ဢွၼ်ၵၼ်ပွၵ်ႈၶိုၼ်းႁိူၼ်းယေး ၽႂ်မၼ်း ၵမ်ႈၽွင်ႈ ။

ၼၢင်းၶမ်းပႅင်း ၸုမ်းၵေႃၵပ်းသၢၼ် ၵူၼ်းၼုမ်ႇတႆး (TYN) လၢတ်ႈဝႃႈ “ တေႃႈလဵဝ် လႆႈႁၼ်ၵူၼ်းပၢႆႈၽေးသိုၵ်း ပွၵ်ႈႁိူၼ်းယေးၽႂ်မၼ်း ၵမ်းၽွင်ႈ ၊ တေပဵၼ် ဝၢၼ်ႈသၢႆးလႅင် ၊ ဝၢၼ်ႈသၢႆးၶၢဝ်လႄႈ ဝၢၼ်ႈၼႃးၽႅမ်း ဢွၼ်ၵၼ်ပွၵ်ႈမိူဝ်းၶိုၼ်းၵမ်းဢိတ်း ၵမ်းဢွတ်း ၊ ၸိူဝ်းပွၵ်ႈမိူဝ်းၸွမ်းၵၼ်တင်းမူတ်းတႄႉ ဢမ်ႇၸႂ်ႈ ၸိူဝ်းပွၵ်ႈၵေႃႈပွၵ်ႈ ၸိူဝ်းတိုၵ်ႉယူႇဝႆႉၵေႃႈ မီး ” ဝႃႈၼႆ ။


တေႃႈလဵဝ် ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉယူႇတႄႉ ယင်းတိုၵ်ႉလူဝ်ႇတၢင်းၸွႆႈထႅမ် တင်းၼမ်ယူႇ မိူၼ် ၶဝ်ႈၼမ်ႉတင်းၵိၼ် ၊ ၶူဝ်းၼုင်ႈတင်းဝႂ် ၊ ၶွင်ၸႂ်ႉၶွင်သွႆ ၸဵမ်ၸိူဝ်းၼႆႉ လူဝ်ႇထႅင်ႈယူႇ ၊ သင်ဝႃႈ မီးၸုမ်းလႂ် ၊ ၵေႃႉလႂ် ၊ သုၼ်ႇတူဝ်လႂ် မီးၼမ်ႉၸႂ် ၵမ်ႉၸွႆႈၼႆၸိုင် တေႃႈလဵဝ် တိုၼ်းႁပ်ႉတၢင်းလူႇ တီႈပီႈၼွင်ႉႁဝ်းၶဝ် ၵႂႃႇၸွႆႈထႅမ်ယူႇ ဝႃႈၼႆ ။


ၵူၼ်းပၢႆႈၽေးသိုၵ်း ဝၢၼ်ႈၶူဝ်ၼမ်ႉၾႃႉ လၢတ်ႈဝႃႈ “ တေႃႈလဵဝ် ဝၢၼ်ႈႁဝ်းၶဝ် မိူၼ် ဝၢၼ်ႈၶူဝ်ၼမ်ႉၾႃႉ ၊ ဝၢၼ်ႈၼႃးတေႃလႄႈဝၢၼ်ႈတင်ႈႁႆး သၢမ်ဝၢၼ်ႈၼႆႉ သုမ်းၼမ်လိူဝ်ပိူၼ်ႈတင်းမူတ်းယဝ်ႉ ၊ ၶူဝ်းၶွင်ႁိူၼ်းယေး ဢမ်ႇတၼ်းလႆႈသင်သေၸိူဝ်ႉသေပိူင်  လႆႈဢဝ်တူဝ်လွတ်ႈမႃးၵူၺ်း။ ၶူဝ်းၶွင် မိူၼ်ႁိူၼ်းယေး ၶဝ်ႈပိူၵ်ႇ ၶဝ်ႈသၢၼ်လႄႈၸၢၵ်ႈထႆၼႃး ၊ ၸၢၵ်ႈတမ်ၶဝ်ႈ ၵူႈမဵဝ်းမဵဝ်း ၶဝ်ဢဝ်ရူတ်ႉၵႃးၶဝ်သေ မႃးတင်ႇဢဝ်ၵႂႃႇ ဝႆႉတီႈဝၢၼ်ႈၼမ်ႉပွင်ႈ ၊ ထႅင်ႈပိူင်ၼိုင်ႈၵေႃႈ  ပေႃးႁဝ်းမိူဝ်း ၶိုၼ်းႁိူၼ်းၼႆ တေမိူဝ်းႁဵတ်းၵိၼ်ၵၢၼ်သင်ယဝ်ႉ ၶူဝ်းႁေႃ ၶူဝ်းႁိူၼ်း ၸၢၵ်ႈ ၸဵမ်ၸိူဝ်းၼႆႉ ဢဝ်ၵႂႃႇမူတ်း တေဝႃႈၶၢႆဝူဝ်း/ ၵႂၢႆးၼႆၵေႃႈ ဢမ်ႇမီးယဝ်ႉ ” ဝႃႈၼႆ ။


သဵၼ်ႈသၢႆမၢႆၵူၼ်းပၢႆႈၽေးသိုၵ်းၸိူဝ်းမႃးယူႇသဝ်း ၼႂ်းၸႄႈဝဵင်းသီႇပေႃႉၼႆႉ မိူၼ် ဝတ်ႉၽူဝ်းတေႃႇ 270 ၵေႃႉ ၊ ဝတ်ႉ / ၵျွင်းၶမ်း 175 ၵေႃႉ ၊ ဝတ်ႉဝဵင်းၵဝ်ႇ 290 ၵေႃႉ ၊ ဝတ်ႉၶၼ်ႇတီႇယႃမ 94 ၵေႃႉ ၊ ဝတ်ႉၸႄႈဢႅၼ်ႇ 290 ၵေႃႉ တင်းမူတ်းႁူမ်ႈၵၼ် 1108 ၵေႃႉ ၊ မၢင်ၸိူဝ်း ၸိူဝ်းၵႂႃႇယူႇသဝ်းႁိူၼ်း ပီႈႁိူၼ်းၼွင်ႉၼႂ်းဝဵင်းသီႇပေႃႉၵေႃႈ ယင်းမီးထႅင်ႈယူႇ ၼႆယဝ်ႉ ။


တင်ႈတႄႇႁူဝ်လိူၼ်မေႊမႃး တပ်ႉလူင်ပွင်ၸိုင်ႈမၢၼ်ႈ (တပ်ႉမတေႃႇ) ႁႅၼ်းသိုၵ်းလေႃႇတိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA  ၼႂ်းၸႄႈဝဵင်းၵျွၵ်ႉမႄး ၊ ၸႄႈဝဵင်းသီႇပေႃႉသေ  ၼပ်ႉႁဵင် လႆႈပၢႆႈယၢၼ်ႁိူၼ်းယေး တီႈယူႇ ။