ဝၼ်းတီႈ 07/06/2016 ယၢမ်း 09:15-10:16 မူင်း ၾႆးၾႃႉသျွတ်ႊမႆႈ ႁိူၼ်းသွင်လင်ၵၼ် ယူႇသဝ်း တီႈပွၵ်ႉႁွင်ႇ ၸႄႈဝဵင်းမူႇၸႄႈ ၸိုင်ႈတႆး ပွတ်းႁွင်ႇ မႆႈပႃးပူၵ်ႉငိုၼ်း ၵႃႈၶၼ် 50 သႅၼ်ၵျၢပ်ႈပၢႆ ဝႃႈၼႆ ။

ၸၢႆးႁိၼ်လဵၵ်း ၵူၼ်းၼႂ်းပိုၼ်ႉတီႈ ၵႂႃႇၸွႆႈၶႄၾႆး လၢတ်ႈဝႃႈ “ ႁိူၼ်းဢၼ်ထုၵ်ႇၾႆးမႆႈၼႆႉ မၼ်းပဵၼ်ႁိူၼ်းၸၢဝ်းၶိူဝ်းၶႄႇတင်းမၢၼ်ႈ မႃးၶၢတ်ႈယူႇသဝ်း ပိုတ်ႇႁၢၼ်ႇ / လၢၼ်ႉသေ ၶၢႆၵုၼ်ႇ ၊ ၾႆးမႆႈႁၢဝ်ႈႁႅင်း ဢမ်ႇတၼ်းလႆႈဢဝ် ၶူဝ်းၶွင် ငိုၼ်းၶမ်းသေၵျၢပ်ႈ ထုၵ်ႇၾႆးမႆႈပႃးၵႂႃႇ တင်းမူတ်း 50 သႅၼ်ၵျၢပ်ႈ ၊ ၶမ်းတႄႉ ယွၼ်ႉဝႃႈ ၶဝ်ဝႆႉၼႂ်းထူင်ၶဝ်ႈသၢၼ်သေ ဢမ်ႇတၼ်းမႆႈပႃး ၸဝ်ႈၶွင်မၼ်း တၼ်းလႆႈၶိုၼ်းယူႇ ” ဝႃႈၼႆ ။


ၾႆးမႆႈႁၢဝ်ႇႁႅင်းလႄႈဢမ်ႇတၼ်းလႆႈၶူဝ်းၶွင်သင် မႆႈပႃးၵႂႃႇၸွမ်းတင်းမူတ်း ဝႃႈၼႆ ။


ၵူၼ်းၼႂ်းပိုၼ်ႉတီႈ ဢၼ်လႆႈႁၼ်တႂ်ႈၼႃႈတႂ်ႈတႃတႄႉ လၢတ်ႈဝႃႈ “ ႁိူၼ်းသွင်လင် ဢၼ်ထုၵ်ႇၾႆးမႆႈၼႆႉ ယွၼ်ႉဝႃႈ မၼ်းတိတ်းၸပ်ႉၵၼ်ဝႆႉ သင်ဝႃႈမႆႈလင်ၼိုင်ႈၵေႃႈ လၢမ်းမႆႈပႃး ထႅင်ႈလင်ၼိုင်ႈ ၊ ၵူၼ်းၼႂ်းပွၵ်ႉလႄႈ ရူတ်ႉၶႄၾႆး ၸွႆႈၵၼ်တင်းၼမ်သေ ၶႄၾႆးမွတ်ႇ ၊ လႆႈႁူႉတႄႉ ၸဝ်ႈၶွင်ႁိူၼ်းဢၼ် ပၼ်ပိူၼ်ႈၶၢတ်ႇ ယူႇသဝ်းတႄႉ ပဵၼ်ၼၢင်းယူင်ႇ (ၼၢင်းမေႇ) ” ဝႃႈၼႆ ။


ႁိူၼ်းသွင်လင်ၼႆႉ ယွၼ်ႉပဵၼ်ႁိူၼ်းၶၢတ်ႈၼႆႉလႄႈ လွင်ႈၶူဝ်းၶွင်ၼႂ်းႁိူၼ်းယေးတႄႉ ဢမ်ႇပေႃႈလႆႈလုသုမ်းၼမ်  ဝႃႈၼႆ ။


ပူၼ်ႉမႃး ပီ 1989 ၼၼ်ႉ ၼႂ်းၸႄႈဝဵင်းမူႇၸႄႈ လႆႈထုၵ်ႇၾႆးမႆႈၵႂႃႇမွၵ်ႈၶိုင်ႈဝဵင်း ၊ ယွၼ်ႉၼၼ် ၵူၼ်းမိူင်းမူႇၸႄႈ လႆႈတူဝ်ထူပ်းဝႆႉ မိူဝ်ႈၽွင်းၼၼ်ႉလႄႈ ရူတ်ႉၵႃး ၊ ထေႃႈလႃႇၵျီႇ ၼႂ်းဢိူင်ႇ ၊ ၼႂ်းပွၵ်ႉ တိုၼ်းႁၢင်ႈႁႅၼ်းဝႆႉ သင်ဝႃႈၾႆးမႆႈတီႈလႂ် ႁႂ်ႈလႆႈၵႂႃႇၸွႆႈၶိုတ်းတၢၼ်းၶၢဝ်းယၢမ်း ၼႆယဝ်ႉ ။