မူႇၸုမ်းႁူင်းႁဵၼ်းၸၼ်ႉၸွမ် ပုတ်ႉထၸဝ်ႈ (Buddha College) ၸိုင်ႈမိူင်းၶႄႇ 8 ႁူင်းႁဵၼ်း ၊ ဢၼ်လုမ်း ပုတ်ႉထသႃသႃၼ ၸိုင်ႈမိူင်းၶႄႇ ၶွတ်ႇၽွတ်ႈၶိုၼ်ႈမႃး ႁူမ်ႈၵၼ်ၵႂႃႇလဵပ်ႈႁဵၼ်း သၢင်ႈလွင်ႈမိုတ်ႈၵိုဝ်း တင်းၸၼ်ႉၸွမ်မိူင်းၵျပၼ်ႊ လၢႆလၢႆၸၼ်ႉၸွမ် ။

မိူဝ်ႈဝၼ်းတီႈ 5-11/06/2016 ၸဝ်ႈၶူးလူင် Dr. ၸဝ်ႈတိုၼ်းတႆး ဢွၼ်ႁူဝ်ၼမ်းၼႃႈမူႇၸုမ်းသေ ဢွၼ်ဢဝ် ၽူႈတၢင်တူဝ်လုၵ်ႈႁဵၼ်းၸၼ်ႉၸွမ် ပုတ်ႉထၸဝ်ႈ 8 ႁူင်းႁဵၼ်း ၊ ဢၼ်မီးသင်ၶၸဝ်ႈ 27 တူၼ် (ပႃးၸဵမ်ၸဝ်ႈ သင်ၶတႆး ၸဝ်ႈရႃႁုလႃ ၵွၼ်းၶမ်း လႄႈ ၸဝ်ႈပၼ်တိတ) ၼၼ်ႉ လုၵ်ႉတီႈဝဵင်းလူင်သၢင်ႇၶၢႆး ၸိုင်ႈမိူင်းၶႄႇသေ ၶီႇႁိူဝ်းဝိၼ်ၵႂႃႇ လဵပ်ႈႁဵၼ်း သၢင်ႈလွင်ႈမိုတ်ႈၵိုဝ်းၵၼ် တင်းၸၼ်ႉၸွမ်မိူင်းၵျပၼ်ႊ တင်းမူတ်း 6 ၸၼ်ႉၸွမ် - ၼႆယဝ်ႉ ။


လုၵ်ႈႁဵၼ်းၸၼ်ႉၸွမ် ပုတ်ႉထၸဝ်ႈ 8 ႁူင်းႁဵၼ်း ဢၼ်ၸဝ်ႈတိုၼ်းတႆး ဢွၼ်ႁူဝ်ၼမ်းၼႃႈၵႂႃႇၼၼ်ႉ 1.ႁူင်းႁဵၼ်းၽေႃးထိ မိူင်းမၢဝ်း ။ 2. ႁူင်းႁဵၼ်းၸၼ်ႉၸွမ် Fotuo Buddha College ။ 3. ႁူင်းႁဵၼ်းၸၼ်ႉၸွမ် Minlan Buddha College ။ 4. ႁူင်းႁဵၼ်းၸၼ်ႉၸွမ် Hangzhou Buddha College ။ 5.ႁူင်းႁဵၼ်းၸၼ်ႉၸွမ် Fujian Buddha College ။ 6. ႁူင်းႁဵၼ်းၸၼ်ႉၸွမ် Sichuan Buddha College ။ 7. ႁူင်းႁဵၼ်းၸၼ်ႉၸွမ် Emeishan Buddha College ။ 8. ႁူင်းႁဵၼ်းၸၼ်ႉၸွမ် China Buddha College ၸိူဝ်းၼႆႉ ။


ၸၼ်ႉၸွမ်ၸိုင်ႈမိူင်းၵျပၼ်ႊ 6 ၸၼ်ႉၸွမ် ဢၼ်လႆႈၵႂႃႇလဵပ်ႈႁဵၼ်း သၢင်ႈလွင်ႈမိုတ်ႈၵိုဝ်းၵၼ်ၼႆႉ ပဵၼ်ၸၼ်ႉၸွမ်ဢၼ်မီးၼႂ်းဝဵင်းလူင် တူဝ်ႊၵျူဝ်ႊလႄႈ ဝဵင်းလူင်ၵျူဝ်ႊတူဝ်ႊ ။ ၾၢႆႇၸၼ်ႉၸွမ်ပုတ်ႉထၸဝ်ႈ ၸိုင်ႈမိူင်းၶႄႇ လႆႈႁပ်ႉၵၢၼ်ႁပ်ႉတွၼ်ႈယၢင်ႇလီ ၊ ၾၢႆႇၸၼ်ႉၸွမ်ၸိုင်ႈမိူင်းၵျပၼ်ႊ ၸိူဝ်းမႃးႁပ်ႉတွၼ်ႈၼၼ်ႉ ပဵၼ်ၽူႈၵွၼ်းႁူင်းႁဵၼ်းလႄႈ ပႃႇမွၵ်းၶလူင်ၶဝ်ၵူႈႁူင်းႁဵၼ်း - ၼႆယဝ်ႉ ။


ဢၼ်ၵႂႃႇမိူင်းၵျပၼ်ႊပွၵ်ႈၵမ်းၼႆႉ ပိူင်လူင်မၼ်း ၵႂႃႇၵၢႆႇၶူဝ် သၢင်ႈလွင်ႈမိုတ်ႈၵိုဝ်းၵၼ်တင်း ၽူႈယႂ်ႇၵူၼ်းလူင်ၼႂ်းႁူင်းႁဵၼ်းၶဝ် ၵူႈၸၼ်ႉၸွမ် ။ ဢုပ်ႇဢူဝ်းၵိူဝ်းၵုမ် လဵပ်ႈႁဵၼ်းပႃး လွင်ႈပိူင်သွၼ်ၵၢၼ်ႁဵၼ်း (လၵ်းသုတ်ႇ Curriculum) ၶွင်ႁူင်းႁဵၼ်း ၊ လွၵ်းလၢႆးၶွတ်ႇၽွတ်ႈပိူင်ႁူင်းတူၺ်းလိၵ်ႈ ၊ လွင်ႈႁွင်ႈႁဵၼ်းလႄႈ လၢႆးတမ်းဝၢင်းၵၢၼ် ၵူႈလွင်ႈလွင်ႈ - ၼႆယဝ်ႉ ။


“ ဢၼ်ၵႂႃႇလဵပ်ႈႁဵၼ်းသေ လႆႈႁူႉမႃးၽွင်ႈၼႆႉ ၸၼ်ႉၸွမ်တီႈမိူင်းၵျပၼ်ႊတင်းၼမ်ၼႆႉ ဢမ်ႇၵွမ်ႉၵူၺ်း ၽိုၵ်းသွၼ် ၶူၼ်ႉၶႂႃႉ လိၵ်ႈလေႃးၵီႇလၢႆလၢႆၵူၺ်း ၊ ၾၢႆႇထမ်းမၼႆႉၵေႃႈဝႆႉပိူင်ယႂ်ႇသေ ဢဝ်သႂ်ႇၼႂ်း ပိူင်သွၼ်ႁဵၼ်း ၼႂ်းႁူင်းႁဵၼ်းတင်းၼမ် ။ ၵူၼ်းမိူင်းၵျပၼ်ႊၼႆႉ ၶဝ်ဝႆႉပုတ်ႉထၽႃႇသႃႇ ပဵၼ်ပိူင်ယႂ်ႇၵူၺ်းဢမ်ႇၵႃး ၵၢၼ်ႁဵၼ်း ၊ ပၢႆးယူႇလီ ၊ ၾိင်ႈငႄႈႁိတ်ႈႁွႆး၊ လွင်ႈသႅၼ်ႈသႂ်၊ လွင်ႈၶတ်းၸႂ် ၊ လွင်ႈၸွႆႈထႅမ်ဝၢၼ်ႈမိူင်းၸိူဝ်ႉၶိူဝ်းၸဝ်ႈၵဝ်ႇ ၸိူဝ်းၼႆႉ ၶဝ်ဝႆႉပဵၼ်ၵၢၼ်လမ်ႇလွင်ႈတႄႉတႄႉ - ၵႅမ်ႁူဝ်ပဝ်ႈၸိုင်ႈမိူင်းၶႄႇ Dr. ၸဝ်ႈၶူးတိုၼ်းတႆး မွၵ်ႇလၢတ်ႈၼႄတီႈ ၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၸဝ်ႈတိုၼ်းတႆးၼႆႉ ပဵၼ်ၸဝ်ႈၵွၼ်းဝတ်ႉလူင်ႁေႃၶမ်း မိူင်းမၢဝ်း ။ မၼ်းၸဝ်ႈၼႆႉ ပဵၼ်ၸဝ်ႈဢၼ်ႁၵ်ႉႁွမ် ၸိူဝ်ႉၶိူဝ်း ၊ ၽႃသႃ ၊ သႃသၼႃသေ တူင်ႉၼိုင်ၵၢၼ်ၾိင်ႈငႄႈလိၵ်ႈလၢႆးတႆး မႃးၶၢဝ်းတၢင်းႁိုင် ။ ဢွၼ်ႁူဝ်ပူၵ်းတင်ႈ ပိုတ်ႇႁူင်းႁဵၼ်းၽေႃးထိ လႄႈ ဝတ်ႉလူင်ႁေႃၶမ်း ၸဝ်ႈသိူဝ်ၶၢၼ်ႇၾႃႉ ၸိူဝ်းၼႆႉ ။


ဢိင်ၼိူဝ် မၼ်းၸဝ်ႈလႆႈထုၵ်ႇလိူၵ်ႈ / တႅင်ႇတင်ႈၶိုၼ်ႈပဵၼ်ၵႅမ်ႁူဝ်ပဝ်ႈ ငဝ်ႈငုၼ်းလူင် လုမ်းပုတ်ႉထသႃသၼႃ (ၵိူင်းထေရဝႃတ) ၸိုင်ႈမိူင်းၶႄႇ မိူဝ်ႈပၢင်ၵုမ်လူင်ဝၼ်းတီႈ 18-21/04/2015 သေ ပီႈၼွင်ႉတႆး ဢၼ်မီးၼႂ်း ၸိုင်ႈမိူင်းၶႄႇ လႄႈ မိူင်းတႆး ဢွၼ်ၵၼ်ၼပ်ႉယမ် ဢဝ်ၵုၼ်းမုၼ် ယွင်ႈယေႃးတႄႉတႄႉ ၊ ၵွပ်ႈဝႃႈ မၼ်းၸဝ်ႈၼႆႉ သၢင်ႈပၼ်ၸိုဝ်ႈသဵင် သရေႇၼႃႈတႃတႆးတႄႉတႄႉဝႃႈဝႃႈ ။ ၶတ်းၸႂ်ႁၢပ်ႇၵၢၼ်ပုတ်ႉထသႃသၼႃ ၊ ၵၢၼ်ၸိူဝ်ႉၸၢတ်ႈတူဝ်ၵဝ်ႇမႃး ဢမ်ႇၵိုတ်းဢမ်ႇလိုဝ်ႈ ။