ၸုမ်းတူင်ႇဝူင်းတႆး ဢွၵ်ႇလိၵ်ႈၽိုၼ်တၢမ်းငဝ်းလၢႆး ၵဵဝ်ႇလူၺ်ႈ တပ်ႉသိုၵ်းမၢၼ်ႈ ပိုတ်ႇၼႃႈသိုၵ်း တေႃႇ တပ်ႉသိုၵ်းၸိုင်ႈတႆး SSPP/SSA  ဢဝ်ၵူၼ်းမိူင်းႁဵတ်းႁူဝ်ႉၶႄတူဝ် ၼႂ်းၸႄႈဝဵင်းၵျွၵ်ႉမႄး ။

ဝၼ်းတီႈ 01/06/2016 ၸုမ်းၵဝ်ႉငဝ်ႈသုၼ်ႇလႆႈၵူၼ်း ၼႂ်းၸိုင်ႈတႆး ဢွၵ်ႇလိၵ်ႈၽိုၼ်တၢမ်းငဝ်းလၢႆး မၢႆလိၵ်ႈ 03/2016 ၵဵဝ်ႇၵပ်း တပ်ႉသိုၵ်းလူင်ပွင်ၸိုင်ႈမၢၼ်ႈ ႁႅၼ်းသိုၵ်းလေႃႇတိုၵ်းတပ်ႉသိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA တီႈႁိမ်းႁွမ်း ဢွင်ႈတီႈ တေသၢင်ႈၾၢႆယႄးယႂႃႇ တွၼ်ႈၼိူဝ် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ ပေႃႉထုပ်ႉ ၶႃႈႁႅမ် ဢဝ်ၵူၼ်းမိူင်းႁဵတ်းႁူဝ်ႉၶႄတူဝ်ၶဝ် ၼႆယဝ်ႉ ။


ၸၢႆးႁေႃသႅင် ၽူႈၶၢၼ်ပၢၵ်ႇ ၸုမ်းၵဝ်ႉငဝ်ႈသုၼ်ႇလႆႈၵူၼ်း ၼႂ်းၸိုင်ႈတႆး လၢတ်ႈဝႃႈ “ ယိူင်းဢၢၼ်းဢၼ်လႆႈဢွၵ်ႇၼႆႉတႄႉ ႁဝ်းၶႃႈသၢၼ်ၶတ်းလွင်ႈပူၼ်ႉပႅၼ် သုၼ်ႇလႆႈၵူၼ်း မိူင်းတႆးႁဝ်းၶႃႈ ႁၢဝ်ႉႁႅင်းသေ ၶႂ်ႈႁႂ်ႈတူင်ႇဝူင်းလုမ်ႈၾႃႉၶဝ် ဝႆၢႇတူၺ်းတၢင်းၽိတ်းႁၢႆႉၸႃႉလူင် သိုၵ်းမၢၼ်ႈဢၼ်ပူၼ်ႉပႅၼ် သုၼ်ႇလႆႈသုၼ်ႇပဵၼ်ၵူၼ်းမိူင်းႁဝ်း မိူၼ်ၼင်ႇ ၶႃႈႁႅမ်တၢႆၵူၼ်းမိူင်း ၊ ဢဝ်ၶိူင်ႈမိၼ် သိုၵ်းၶဝ် ပွႆႇမၢၵ်ႇလူင်းၸူးၵူၼ်းမိူင်း ၊ တဵၵ်းဢဝ်ၵူၼ်းမိူင်းႁဵတ်းႁူဝ်ႉၶႄတူဝ်ၶဝ် ၊ တဵၵ်းႁၢပ်ႇၶျေႃး၊ သမ်ႉပေႃး ထိုင်ၶၵ်ႉပူၼ်ႉပႅၼ်ပိူင်သိုၵ်း (War Crime)။ ႁဝ်းၶႃႈတုၵ်းယွၼ်းႁႂ်ႈပၼ်တၢမ်ႇၵူၼ်း ၵေႃႉဢၼ်ႁဵတ်းၽိတ်း ယႃႇႁႂ်ႈမၼ်းယဝ်ႉလၢႆပႅတ်ႈ ” ဝႃႈၼႆ ။


ၵဵဝ်ႇၵပ်းလူၺ်ႈ တပ်ႉသိုၵ်းမၢၼ်ႈ ပိုတ်ႇၼႃႈသိုၵ်း တေႃႇတပ်ႉသိုၵ်း ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး SSPP/SSA လၢႆလၢႆတီႈသေ ၵူၼ်းမိူင်း ၺႃးၸၢၵ်ႇၵိၼ်ယွၼ်ႉ မိူၼ် ပေႃႉထုပ်ႉ ၶႃႈႁႅမ်လႄႈ ဢဝ်ၵူၼ်းမိူင်းၵႅတ်ႇၶႄတူဝ် တပ်ႉသိုၵ်းမၢၼ်ႈ ၸဵမ်ၸိူဝ်းၼၼ်ႉ ။


ဝၼ်းတီႈ 14/06/2016 ၼၼ်ႉ သိုၵ်းမၢၼ်ႈ ၶမယ တပ်ႉ 504 တိၺွပ်းပေႃႉထုပ်ႉၵူၼ်းဝၢၼ်ႈလႄႈတဵၵ်းၸႂ်ႉႁၢပ်ႇၶျေႃး ပီႈၼွင်ႉၵူၼ်းဝၢၼ်ႈ ဝၢၼ်ႈဢႅၵ်းၵျီး ဢိူင်ႇႁၢႆးၵုၺ် လႄႈ  ဝၢၼ်ႈၼမ်ႉၽၢတ်ႇ ၸႄႈဝဵင်းၵျွၵ်ႉမႄး 5 ၵေႃႉ ၊ ၸၢႆးသိင်ႇ ဢႃယု 28 ပီ ၊ ၸၢႆးပၼ်ၸိတ်တ ဢႃယု 36 ပီ ၊ ၸၢႆးၼၼ်တိယ ဢႃယု 36 ပီ ၊ လုင်းမွင်ႇၵၢၼ်ႇ ဢႃယု 40 ပီလႄႈ ၸၢႆးသုၸေယ ဢႃယု 45 ပီ ၸဵမ်ၸိူဝ်းၼႆႉ ။


ၵူၼ်းမိူင်း ၸိူဝ်းဢၼ်ထုၵ်ႇၶႃႈႁႅမ်တၢႆသမ်ႉ ၸၢႆးဢၢႆႈၼွင်ႉ(ၶ) ဢႃၸိင်ၼ ဢႃယု 27 ပီ ပဵၼ်လုၵ်ႈၸၢႆး လုင်းပၼ် ပႃႈၺိင်ႇ ၊ ၸၢႆးဢၢႆႈမၢတ်ႈ ဢႃယု 30 ပီ လုၵ်ႈၸၢႆး လုင်းပၼ် ပႃႈၺိင်ႇ ၊ ၸၢႆးဢၢႆႈတိင်ႉ(ၶ) ၸၢႆးသု ဢႃယု 26 ပီ လုၵ်ႈၸၢႆး လုင်းၶူဝ်ႇ ပႃႈၼၢင်းဢိူၺ်ႈ ၶဝ်ၸိူဝ်းၼႆႉ ပဵၼ်ၵူၼ်းဝၢၼ်ႈၼွင်ၵႂၢင် ၸႄႈဝဵင်းၵျွၵ်ႉမႄး ၼႆယဝ်ႉ ။


မိူဝ်ႈဝၼ်းတီႈ 03/05/2016  သိုၵ်းမၢၼ်ႈသီႇတပ်ႉ ဢဵၼ်ႁႅင်းမွၵ်ႈ 500  လုၵ်ႉတီႈတပ်ႉ  325 ၊  502 ၊ 503 လႄႈ 114  ဢမ်ႇပၼ်ၾၢင်ႉသင်သေ  လေႃႇတိုၵ်းၼႃႈတီႈၽွင်းငမ်းပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး ၼႂ်းၸႄႈဝဵင်းၵျွၵ်းမႄး တၢင်းၸၢၼ်း ၵူၼ်းမိူင်းႁိမ်းၸမ်ႁဵင် ယင်းပႆႇၸၢင်ႈပွၵ်ႈယူႇၶိုၼ်းဝၢၼ်ႈၸဝ်ႈၵဝ်ႇသေ တိုၵ်ႉလႆႈသွၼ်ႉ ယူႇၸွမ်းဝတ်ႉ / ၵျွင်းလႄႈ ႁိူၼ်းပီႈပီႈၼွင်ႉၼွင်ႉ ။