ပႃႊတီႊႁူဝ်သိူဝ် SNLD ပဵၼ်ၵၢင်သေႁပ်ႉငိုၼ်းတၢင်းလူႇ၊ၶူဝ်းၶွင်ပီႈၼွင်ႉၼွၵ်ႈမိူင်းၼႂ်းမိူင်း လၢႆတီႈၸွႆႈထႅမ်မႃးၼၼ်ႉၵႂႃႇၸွႆႈထႅမ်ၵူၼ်းထူပ်းၽေးသိုၵ်း ဢၼ်ႁၢမ်းႁႅၵ်းတီႈယူႇၼႂ်းၸိုင်ႈတႆး ပွတ်းႁွင်ႇ ။

ဝၼ်းတီႈ 02/06/2016 ၶၢဝ်းယၢမ်းၵၢင်ဝၼ်း 1 မူင်း ၸုမ်းပွင်ၵၢၼ်ပႃႊတီႊႁူဝ်သိူဝ် SNLD လႄႈ လုင်းသူၺ်ႇၵျွင်း တၢင်တူဝ်ၸုမ်းၵူၼ်းၼုမ်ႇတႆး (TYO) ဢွၼ်ႁူဝ်ပေႃႈမႄႈပီႈၼွင်ႉ ၵူၼ်းမိူင်းၵႂႃႇ ၸွႆႈထႅမ်ၵူၼ်းထူပ်းၽေးသိုၵ်း တီႈဝၢၼ်ႈႁူဝ်ပၢင်ႇ ဢိူင်ႇမိူင်းဝီး ပဵၼ်ၶူဝ်းၼုင်ႈတၢင်းဝႆ ၊ ၶွင်ၵိၼ်ယႅမ်ႉ လႄႈတင်းငိုၼ်း 1,500,000 (သိပ်းႁႃသႅၼ်) ပျႃး ။


လုင်းၸၢႆးယီႈပူး ႁူဝ်ပဝ်ႈပႃႊတီႊႁူဝ်သိူဝ် ဝဵင်းၼမ်ႉၶမ်း လၢတ်ႈဝႃႈ - “ ၶွပ်ႈၸႂ်ထိုင်ပီႈၼွင်ႉ ၼွၵ်ႈမိူင်း၊ၼႂ်းမိူင်းၵူႈတီႈဢၼ်လႆႈၸွႆႈထႅမ်မႃးၶူဝ်းၼုင်ႈ ၊ ၶွင်ၵိၼ်လႄႈငိုၼ်းတွင်း ႁဝ်းၶႃႈ ပႃႊတီႊႁူဝ်သိူဝ်တႄႉၵေႃႈပဵၼ်ၵႅၼ်ၵၢင်မၼ်းသေ ႁပ်ႉတၢင်းလူႇလႄႈသူင်ႇမွပ်ႈပၼ်မိုဝ်း ၵူၼ်းထူပ်းၽေးၶဝ် ”။


ပႃႊတီႊႁူဝ်သိူဝ် SNLD လႄႈၸုမ်း TYO လႆႈဢဝ်ၶူဝ်းၵမ်ႉၸွႆႈပၼ်တီႈၸုမ်းပွင်ၵၢၼ်ၸွႆႈထႅမ် ၵူၼ်းထူပ်းၽေး ၸၢႆးသၢင်ႇဢၢႆႈ ႁူဝ်ပဝ်ႈဝၢၼ်ႈႁူဝ်ပၢင်ႇ ဢိူင်ႇမိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။


လုင်းၸၢႆးယီႈပူး သိုပ်ႇလၢတ်ႈထႅင်ႈဝႃႈ - “ ပေႃးႁဝ်းမႃးတူၺ်းဢၼ်ထူပ်းၽေးတုၵ်ႉၶယၢပ်ႇၽိုတ်ႇ ယူႇၼႆႉမၼ်းဢမ်ႇ ၸႂ်ႈတႆးၵူၺ်းမၼ်းပႃးၵူႈၸၢဝ်းၶိူဝ်းဢၼ်ယူႇၼႂ်းပိုၼ်ႉတီႈယဝ်ႉ ဢၼ်ႁဵတ်းႁႂ်ႈၵူၼ်း မိူင်းတုၵ်ႉၶၵိၼ်း ၸႂ်ယူႇၼႆႉၵေႃႈ မၼ်းပဵၼ်ၵွပ်ႈပၢင်တိုၵ်းယဝ်ႉႁဝ်းၸၢဝ်းၶိူဝ်းၼႆႉယူႇႁူမ်ႈႁွမ်း ၸွမ်းၵၼ်မႃးႁိုင်။ ဢၼ်ဢမ်ႇပွင်ႇၸႂ်ၵၼ်၊ ၽိတ်းမေႃးၵၼ်၊တိုၵ်းၵၼ် ၼႆႉမၼ်းၵိုင်ႇ လီသုတ်း သဵင်ႈၵႂႃႇယဝ်ႉ ” ဝႃႈၼႆ ။


ပူၼ်ႉမႃးမိူဝ်ႈဝၼ်းတီႈ  8/05/2016 ၼၼ်ႉၵေႃႈၸုမ်းပွင်ၵၢၼ်ပႃႊတီႊႁူဝ်သိူဝ် SNLD ၸႄႈဝဵင်း ၼမ်ႉၶမ်းႁၢပ်ႇငိုၼ်းလူႇ ။ ၶူဝ်းၼုင်ႈတၢင်းဝႆ ၊ၶဝ်ႈသၢၼ် ၊ ၼမ်ႉမၼ်း တႃႇၵႃး 6 လေႃႉ 5 လမ်းသေ ဝၼ်းတီႈ 16/05/2016 ၼၼ်ႉပႃးတင်းၶူဝ်းၶွင်ပီႈၼွင်ႉၵူၼ်းမိူင်း ၸုမ်းၶၢဝ်ႇဢဵၼ်ႁႅင်းတႆး မိူင်းၶွၼ် ၊ မိူင်းလႃး ၊ မိူင်းဝၼ်း ၊ ၸႄႈၽၢင် ၊ ဝၼ်းတဵင်ႈ ၊ မိူင်းမၢဝ်း ၊ ၼွင်တဝ်း ၊ ၸုမ်းမႄႈၼုမ်ႇပွၵ်ႉၵွင်းမူးလွႆ (ဝဵင်းမူၸႄႈ) ၵေႃလိၵ်ႈလၢႆးလႄႈၾိင်ႈ ငႄႈတႆး (ဝဵင်းတႃႈလိူဝ်ႇ) လႆႈႁူမ်ႈ ၵၼ်ၵႂႃႇယိုၼ်ႈဢၢပ်ႈပၼ် ၼႂ်းမိုဝ်း ၸုမ်းပွင်ၵၢၼ်ၸွႆႈထႅမ်ၵူၼ်းပၢႆႈၽေးတီႈဝၢၼ်ႈႁူဝ်ပၢင်ႇ ဢိူင်ႇမိူင်းဝီး ပဵၼ်ငိုၼ်းမၢၼ်ႈ 7,200,000 ပျႃး ငိုၼ်းၶႄႇ 22600 ယႅၼ်ႉ ။