ပေႃႈမႄႈပီႈၼွင်ႉ ၶႃႈႁၢပ်ႇၵၢၼ်ၶုၼ်ၾၢႆႇလိူမ်ႈလႆႇ ဢိၵ်ႇ ၶႃႈႁၢပ်ႇၵၢၼ်ၶုၼ် ၼႂ်းႁွင်ႈၵၢၼ်ၾၢႆႇလိူမ်ႈလႆႇ ၸိူဝ်းဢမ်ႇႁၢၼ်ႉၸႂ်ၼိူဝ် ႁွင်ႈၵၢၼ်ၾၢႆႇလိူမ်ႈလႆႇၸႄႈမိူင်း ၊ ယွၼ်ႉဢမ်ႇဢဝ်ပုၼ်ႈၽွၼ်း ၵႄႈလိတ်ႈပၼ်- ပၼ်ႁႃသင် ဢၼ်လႆႈမီးလွင်ႈလူႉသုမ်း ၊ ၵူၼ်းႁၢႆလၢႆၵႂႃႇ ၊ ၸတ်းပၢင်သပ်းၸႅင်ႈၶၢဝ်ႇ တီႈဝဵင်းလူင်တူၼ်ႈတီး ။

မိူဝ်ႈဝၼ်းတီႈ 11/06/2016 မီးၵၢၼ်ၸတ်းပၢင်သပ်းၸႅင်ႈၶၢဝ်ႇၵူၼ်းမိူင်း ၵဵဝ်ႇၵပ်းလွင်ႈဢမ်ႇႁၢၼ်ႉၸႂ်ၼိူဝ် ႁွင်ႈၵၢၼ်ၾၢႆႇလိူမ်ႈလႆႇၸႄႈမိူင်း၊ တီႈဝတ်ႉ (ၵျွင်း) ဢွင်ႇမျေႇပုင်ႇၸၢၼ်ႇ ၊ ပွၵ်ႉၸဵင်ႇပၢၼ်း ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း ။ ပၢင်သပ်းၸႅင်ႈၶၢဝ်ႇၼႆႉ ပဵၼ်ၸိူဝ်ႉၶိူဝ်းပေႃႈမႄႈလုၵ်ႈလၢင်း ၶႃႈႁၢပ်ႇၵၢၼ်ၶုၼ် ၾၢႆႇလိူမ်ႈလႆႇၸႄႈမိူင်းၶဝ် ၸိူဝ်းၺႃးလွင်ႈတုမ်ႉတိူဝ်ႉလူႉသုမ်းၼၼ်ႉ ႁူမ်ႈၵၼ်ၸတ်းႁဵတ်း ၊ ယွၼ်ႉဢမ်ႇႁၢၼ်ႉၸႂ် ဢၼ်ႁွင်ႈၵၢၼ်ၾၢႆႇလိူမ်ႈလႆႇၸႄႈမိူင်း ဢမ်ႇဢဝ်ပုၼ်ႈၽွၼ်း ၵႄႈလိတ်ႈပၼ်ႁႃပၼ်သင်။ မီးၵူၼ်းၶဝ်ႈႁူမ်ႈထွမ်ႇငိၼ်း ၊ မီးၽူႈသိုဝ်ႇၶၢဝ်ႇၶဝ်ႈႁူမ်ႈဢဝ်ၶၢဝ်ႇ တင်းမူတ်းမီးႁိမ်း 100 ၵေႃႉ ။


တီႈပၢင်သပ်းၸႅင်ႈၶၢဝ်ႇၼၼ်ႉ မီးလွင်ႈဢုပ်ႇၵုမ်သပ်းၸႅင်ႈၼႄ လွင်ႈဢမ်ႇႁၢၼ်ႉၸႂ် ၵဵဝ်ႇၵပ်းလွင်ႈ ၶႃႈႁၢပ်ႇၵၢၼ်ၶုၼ် 2 ၵေႃႉ ၊ လုၵ်ႉတၢင်းသီႇပေႃႉ မႃးႁပ်ႉငိုၼ်းလိူၼ်တီႈမိူင်းၼွင်သေ ပွၵ်ႈမိူဝ်းၶိုၼ်း ႁၢႆလၢႆတူဝ်ပႅတ်ႈၸွမ်းတၢင်း မိူဝ်ႈပီၵၢႆ ။ လွင်ႈၼႆႉ ႁွင်ႈၵၢၼ်ၾၢႆႇလိူမ်ႈလႆႇ ဢမ်ႇဢဝ်ပုၼ်ႈၽွၼ်းၵႄႈလိတ်ႈ ပၼ်ႁႃပၼ်သင် ။


ထႅင်ႈလွင်ႈၼိုင်ႈ သပ်းၸႅင်ႈၶၢဝ်ႇၵဵဝ်ႇၵပ်းလွင်ႈ ၶႃႈႁၢပ်ႇၵၢၼ်ၶုၼ်ၾၢႆႇလိူမ်ႈလႆႇၵေႃႉၼိုင်ႈ (ၼၢင်းယိင်း) ပဵၼ်ၾၢႆႇဢိၼ်ႊၵျိၼ်ႊၼီႊယိူဝ်ႊ ၊ ႁၢပ်ႇၵၢၼ်မႃး ၼႂ်းႁွင်ႈၵၢၼ်ၾၢႆႇလိူမ်ႈလႆႇလႆႈ 20 ပီယဝ်ႉ ၊  ၵူၺ်းၵႃႈ ဢမ်ႇမီးတၢင်းၽိတ်းသင်သေ ထုၵ်ႇပူတ်းၵၢၼ်ပႅတ်ႈ ။ ၵေႃႉပဵၼ်ၽူဝ်မၼ်းၼၢင်းၵေႃႈ ထုၵ်ႇၵၢဝ်ႇႁႃတၢင်းၽိတ်း   (ၸွႆးတြႃး) ၵဵဝ်ႇၵပ်းလွင်ႈ ဢီႊလဵၵ်ႊထရူဝ်ႊၼိၵ်ႊ ၊ မၢႆမီႈမတ်ႉတႃ 66 ၊ ၼႆႉၵေႃႈဢမ်ႇမီးတၢင်းၽိတ်းသင်- ၼႆယဝ်ႉ ။


ထႅင်ႈလွင်ႈၼိုင်ႈ လႆႈႁဵတ်းပၢင်သပ်းၸႅင်ႈၶၢဝ်ႇၵႂႃႇ ၵဵဝ်ႇၵပ်းလွင်ႈ ႁွင်ႈၵၢၼ်ၾၢႆႇလိူမ်ႈလႆႇ ဝဵင်းတူၼ်ႈတီး ၵိၼ်ငိုၼ်း ၊ မီးလွင်ႈဢမ်ႇသိုဝ်ႈသႂ် Corruption ၼႂ်းႁွင်ႈၵၢၼ်ၾၢႆႇလိူမ်ႈလႆႇ ၸိူဝ်းၼႆႉ ။


ၵဵဝ်ႇၵပ်းလွင်ႈလူႉသုမ်း ထႅင်ႈလွင်ႈၼိုင်ႈၼၼ်ႉ မိူဝ်ႈပီၵၢႆ၊ ၽူႈၵွၼ်းႁွင်ႈၵၢၼ်ၾၢႆႇလိူမ်ႈလႆႇ ၸႄႈဝဵင်းသီႇပေႃႉ ဢူးဢွင်ႇၼၢႆႇဝိၼ်း တင်း ၽူႈမၢႆမၼ်း ၵူဝ်ႇၼၢႆႇလိၼ်း 2 ၵေႃႉ ၊ ၶဝ်လုၵ်ႉတီႈသီႇပေႃႉသေ မႃးႁပ်ႉငိုၼ်းလိူၼ် တီႈမိူင်းၼွင်၊ ၽိူဝ်ႇပွၵ်ႈမိူဝ်းၵႂႃႇၶိုၼ်း မိူဝ်းႁၢႆတူဝ်ပႅတ်ႈၸွမ်းတၢင်း၊ တေႃႇထိုင်မိူဝ်ႈလဵဝ်ၵေႃႈ ဢမ်ႇႁၼ်တူဝ်ၶိုၼ်း၊ ၵႂႃႇမီးတီႈလႂ်ၵေႃႈဢမ်ႇႁူႉ။ ၾၢႆႇလိူမ်ႈလႆႇၶဝ်ၵေႃႈ ဢမ်ႇဢဝ်ပုၼ်ႈၽွၼ်းၵႄႈလိတ်ႈပၼ်ႁႃပၼ်သင် ။


ၵဵဝ်ႇၵပ်းလွင်ႈၼႆႉ ၵေႃႉပဵၼ်ပီႈဢၢႆႈၵူဝ်ႇၼၢႆႇလိၼ်း (ၵေႃႉပဵၼ်ၽူႈမၢႆ) လၢတ်ႈဝႃႈ- ႁဝ်းၶႃႈလႆႈတၢင်ႇလိၵ်ႈ ထိုင်ၾၢႆႇလိူမ်ႈလႆႇၸႄႈမိူင်း လၢႆလၢႆပွၵ်ႈ၊ ၾၢႆႇလိူမ်ႈလႆႇၶဝ်ၵေႃႈ လႆႈတွပ်ႇလိၵ်ႈမႃးၶိုၼ်းလၢႆလၢႆပွၵ်ႈ၊ ၵူၺ်းၵႃႈ လိၵ်ႈၶဝ်ဢၼ်ၶဝ်တွပ်ႇမႃးတီႈႁဝ်းၶႃႈၼႆႉ ဢမ်ႇမိူၼ်ၵၼ်သေပွၵ်ႈ။ မၢင်ပွၵ်ႈလၢတ်ႈဝႃႈ ပီႈဢၢႆႈႁဝ်းၶႃႈ သွင်ၵေႃႉၼႆႉ လႅပ်ႈတၢႆၵႂႃႇယဝ်ႉ၊ မၢင်ပွၵ်ႈၵေႃႈဝႃႈ ပႃးၵႂႃႇၸွမ်းၵူၼ်းၵႃႉဝူဝ်းယဝ်ႉ၊ ၵူၼ်းၵႃႉဝူဝ်းၶဝ်တီႉ ၵႂႃႇယဝ်ႉ။ မၢင်ပွၵ်ႈၵေႃႈဝႃႈ ယူဝ်ၶေးပႃးၵႂႃႇၸွမ်း ဢၼ်ပိူၼ်ႈၵႂၢတ်ႇလၢင်ႉၵူၼ်းလၵ်ႉလွမ်တႅပ်းမႆႉသေ တၢႆၵႂႃႇၸွမ်းၼႂ်းၼၼ်ႉယဝ်ႉႁိုဝ် ၼႆၵေႃႈယၢမ်ႈဝႃႈမႃး။ မၢင်ပွၵ်ႈၵေႃႈ ထုၵ်ႇတီႉၺွပ်းၵႂႃႇၸွမ်းသိုၵ်းၵူၼ်းထိူၼ်ႇ ယဝ်ႉႁိုဝ်၊ ဢမ်ႇၼၼ်ၵေႃႈ ၵူၼ်းထိူၼ်ႇယိုဝ်းတၢႆယဝ်ႉႁိုဝ် လၢတ်ႈမႃးၸိူင်ႉၼႆ။ ၵွပ်ႈၼၼ်လႄႈ ၶေႃႈၵႂၢမ်းၾၢႆႇၶဝ်တွပ်ႇမႃးၼႆႉ ဢမ်ႇမိူၼ်ၵၼ်သေပွၵ်ႈ။ ဢၼ်မိူၼ်ၵၼ်တႄႉႁွင်ႈၵၢၼ်ၾၢႆႇလိူမ်ႈလႆႇၼႆႉ ယူႇတီႈတူဝ်ၶဝ်ၵႅတ်ႇၶႄတူဝ်ၶဝ်။ လိၵ်ႈၶဝ်ၼႆႉ ၵႅတ်ႇၶႄတႃႇတူဝ်ၶဝ်ၶိုၼ်းၵူၺ်း၊ ဢမ်ႇမီးၶေႃႈတႅပ်းတတ်း ဢၼ်ဢဝ်ပုၼ်ႈၽွၼ်းပၼ်သင်တႅတ်ႈတႅတ်ႈတေႃးတေႃး။ လိုၼ်းသုတ်းၼႆႉ မီးလိၵ်ႈၽိုၼ်ၼိုင်ႈသူင်ႇမႃးဝႃႈ ႁႂ်ႈၶဝ်လိုဝ်ႈၵၢၼ် တီႈႁွင်ႈၵၢၼ်ၾၢႆႇလိူမ်ႈလႆႇယဝ်ႉ၊ ပူတ်းၶဝ်ဢွၵ်ႇၵၢၼ်ပႅတ်ႈ- ပီႈဢၢႆႈၵူဝ်ႇၼၢႆႇလိၼ်း လၢတ်ႈၼႄတီႈ ပၢင်သပ်းၸႅင်ႈၶၢဝ်ႇၼင်ႇၼႆ။


တေႃႇၶိၼ်ႇတၢၼ်ႇတႃႇဝိၼ်း ၵေႃႉပဵၼ်မေးၼၢင်းဢူးဢွင်ႇၼၢႆႇဝိၼ်း (ၽူႈၵွၼ်းႁွင်ႈၵၢၼ်ၾၢႆႇလိူမ်ႈလႆႇ ၸႄႈဝဵင်းသီႇပေႃႉ ဢၼ်ႁၢႆလၢႆၵႂႃႇ) ၵေႃႈလၢတ်ႈၼႄဝႃႈ- ႁဝ်းၶႃႈၵေႃႈလႆႈတၢင်ႇထိုင်တီႈ ႁွင်ႈၵၢၼ် ၾၢႆႇလိူမ်ႈလႆႇ လၢႆလၢႆပွၵ်ႈယဝ်ႉ၊ ၵူၺ်းၵႃႈ ၾၢႆႇႁွင်ႈၵၢၼ်ၵေႃႈဢမ်ႇဢဝ်ပုၼ်ႈၽွၼ်း ၵႄႈလိတ်ႈပၼ်ႁႃပၼ်သင်၊ ယူႇတီႈၾၢႆႇလုၵ်ႈလၢင်းၼၢင်းမေး ၵူၼ်းႁိူၼ်းၵူၼ်းယေးတႄႉၵေႃႈ လႆႈၵႂႃႇၸွမ်းၶႆႈထိုင်တီႈမိူင်းၼွင်လႄႈ လၢႆလၢႆတီႈ၊ ၵူၺ်းၵႃႈ ဢမ်ႇလႆႈငိၼ်းၶၢဝ်ႇသင်၊ ႁၢႆလၢႆဝႆႉယူႇ၊ မီးတၢင်းၽိတ်းသင်ၵေႃႈဢမ်ႇႁူႉ၊ တၢႆႁိုဝ်လိပ်းႁိုဝ်ၵေႃႈဢမ်ႇႁူႉ- ဝႃႈၼႆ။


ၾၢႆႇၼိုင်ႈတၢင်းၼိုင်ႈ တေႃႇမိၼ်ႉမိၼ်ႉမေႃႇ ၾၢႆႇဢိၼ်ႊၵျိၼ်ႊၼီႊယိူဝ်ႊ ၵေႃႉဢၼ်ႁၢပ်ႇၵၢၼ်တီႈ ႁွင်ႈၵၢၼ်ၾၢႆႇလိူမ်ႈလႆႇ တီႈဝဵင်းၵလေႃး၊ လႆႈတၢင်ႇလိၵ်ႈထိုင်တီႈႁွင်ႈၵၢၼ်ၾၢႆႇလိူမ်ႈလႆႇၸႄႈမိူင်း တီႈတူၼ်ႈတီးဝႃႈ- ၶႂ်ႈလုၵ်ႉတီႈၵလေႃးသေ ၶၢႆႉမႃးတီႈတူၼ်ႈတီး၊ ၵွပ်ႈပိူဝ်ႈဝႃႈ ၵူၼ်းႁိူၼ်းၵူၼ်းယေးမၼ်းၼၢင်း ယူႇတီႈတူၼ်ႈတီး။ တၢင်းႁွင်ႈၵၢၼ်ၾၢႆႇလိူမ်ႈလႆႇၸႄႈမိူင်း သမ်ႉဝႃႈ- ပေႃးၶႂ်ႈၶၢႆႉၵေႃႈတေလႆႈပၼ်တီႈလိၼ် တီႈၵလေႃးလွၵ်းၼိုင်ႈ၊ တီႈလိၼ်ၼႆႉ ႁႂ်ႈမီးပႃးဝႂ်တီႈလိၼ်ၵမ်းလဵဝ်၊ ႁႂ်ႈပၼ်တီႈၽူႈၵွၼ်းၾၢႆႇၸီႉသင်ႇ (ၸၢႆးထုၼ်းထုၼ်း)။ ၵူၺ်းၵႃႈ ၾၢႆႇတေႃႇမိၼ်ႉမိၼ်ႉမေႃႇ သမ်ႉဢမ်ႇမီးငိုၼ်းတႃႇသိုဝ်ႉတီႈလိၼ်ပၼ်လႆႈ။ ဝၢႆးမႃးမၼ်းၼၢင်း ထုၵ်ႇၶၢႆႉၼႃႈၵၢၼ်ၵႂႃႇလၢႆလၢႆၵူၺ်းဢမ်ႇၵႃး ယင်းထုၵ်ႇပူတ်းၸၼ်ႉထႅင်ႈ။ လိုၼ်းသုတ်း ထုၵ်ႇပူတ်းဢွၵ်ႇၵၢၼ်ပႅတ်ႈ- ၼႆယဝ်ႉ။


မၼ်းၼၢင်းလၢတ်ႈထႅင်ႈဝႃႈ- လိူဝ်သေၼၼ်ႉ ၽူဝ်မၼ်းၼၢင်း ဢူးၸေႃႇမဵဝ်းဝိၼ်းၼႆႉ ႁူႉလွင်ႈၽူႈၵွၼ်း ၾၢႆႇၸီႉသင်ႇ ႁွင်ႈၵၢၼ်ၾၢႆႇလိူမ်ႈလႆႇ ၸႄႈဝဵင်းမိူင်းတႆး ၸၢႆးထုၼ်းထုၼ်း။ မၼ်းၸၢႆး (ၸၢႆးထုၼ်းထုၼ်း) ၼႆႉ ၵိၼ်သူးၵိၼ်လၢပ်ႈ။ သဵၼ်ႈမၢႆဢၼ်မၼ်းၸၢႆးၵိၼ်သူးၵိၼ်လၢပ်ႈၼႆႉ တီႈဢူးၸေႃႇမဵဝ်းဝိၼ်းၼႆႉ မီးဝႆႉတဵမ်ထူၼ်ႈတီႈၼႂ်းၶွမ်ႊၽိဝ်ႊတိူဝ်ႊမၼ်း။ ၵွပ်ႈၼၼ်လႄႈ ၽူဝ်မၼ်းၼၢင်းၼႆႉ ထုၵ်ႇၾၢႆႇလိူမ်ႈလႆႇၶဝ် ၵၢဝ်ႇႁႃ(ၸွႆႈတြႃး)မၼ်းဝႆႉဝႃႈ မၼ်းႁဵတ်းၽိတ်း၊ မၼ်းယိပ်းၽိုၼ်မိူၼ်လိၵ်ႈလၢႆးၽိတ်း၊ ၽိတ်းမၢႆမီႈၾၢႆႇ ဢီႊလဵၵ်ႊထရူဝ်ႊၼိၵ်ႊလႄႈ ၾၢႆႇသိုဝ်ႇသၢၼ် မတ်ႉတႃ 66 ငေ ထုၵ်ႇၵၢဝ်ႇႁႃတၢင်းၽိတ်း(ၸွႆးတြႃး)ဝႆႉ- ဝႃႈၼႆ။


ၵဵဝ်ႇၵပ်းလွင်ႈၶႃႈႁၢပ်ႇၵၢၼ်ၶုၼ် ၾၢႆႇလိူမ်ႈလႆႇၶဝ် ထူပ်းလွင်ႈဢမ်ႇၽဵင်ႇပဵင်း ဢမ်ႇပဵၼ်ထမ်း/တြႃးၸိူဝ်းၼႆႉ မီးၵၢၼ်တၢင်ႇလိၵ်ႈထိုင်တီႈ လူင်ပွင်ၸိုင်ႈမိူင်းတႆး လႄႈ လုမ်းၸွမ်ၸိုင်ႈမိူင်းႁူမ်ႈတုမ်ဝႆႉယူႇ။ လိုၼ်းသုတ်း ၶိုၼ်းတၢင်ႇထႅင်ႈၵမ်းၼိုင်ႈ မိူဝ်ႈၼႂ်းလိူၼ်မေႊ၊ ၵူၺ်းၵႃႈ ပႆႇမီးလွင်ႈၸီႉသင်ႇသင်လူင်းမႃး၊ ပႆႇမီးလွင်ႈၶပ်းၶိုင်ပၼ်သင်သေၸိူဝ်ႉသေပိူင်။


ၵဵဝ်ႇၵပ်းလွင်ႈၼႆႉ မိူဝ်ႈဝၼ်းပၢင်သပ်းၸႅင်ႈၶၢဝ်ႇၼၼ်ႉ  ယူႇတီႈၸုမ်းၶၢဝ်ႇၽူႈတွႆႇႁွၵ်ႈ တင်းၽူႈသိုဝ်ႇၶၢဝ်ႇၶဝ် လၢႆလၢႆၵေႃႉ လႆႈၵႂႃႇၸူးတီႈ ၵေႃႉပဵၼ်ၽူႈၵွၼ်းၾၢႆႇၸီႉသင်ႇ ႁွင်ႈၵၢၼ်ၾၢႆႇလိူမ်ႈလႆႇၸႄႈမိူင်း ၸၢႆးထုၼ်းထုၼ်းသေ ဢွၼ်ၵၼ်ၵႂႃႇတွင်ႈထၢမ်ယူႇ၊ ၵူၺ်းၵႃႈ ဢမ်ႇလႆႈၶေႃႈတွပ်ႇဢၼ်တႅတ်ႈတေႃးသင်- ၼႆယဝ်ႉ။