ၸဝ်ႈၼႃႈတီႈပလိၵ်ႈထႆး တိၺွပ်း ၵူၼ်းၸၢဝ်းၶိူဝ်းတႆး  ဢၼ်ပႅတ်ႉလႅၼ် / ယွၵ်ႇၵိၼ် ငိုၼ်းၶမ်း ပီႈၼွင်ႉႁႅင်းၵၢၼ်တႆး ၸိူဝ်းႁဵတ်းၵၢၼ်ႁႃၵိၼ်လဵင်ႉတွင်ႉ ၼႂ်းၵဵင်းမႆႇ ။


ဝၼ်းတီႈ 13/06/2016 ယၢမ်း 09:00 မူင်း ၵၢင်ၼႂ် ပႃႈၼၢင်းသူၺ်ႇ ဢႃယု 48 ပီ ပဵၼ်ၵူၼ်းၸႃႇတိ ဝၢၼ်ႈၼႃးလေႃး ၸႄႈဝဵင်းမိူင်းပၼ်ႇ ယွၵ်ႇလႅၼ် / ပႅတ်ႉၵိၼ် ပီႈၼွင်ႉႁႅင်းၵၢၼ်တႆးၶိုၼ်း ၸဝ်ႈၼႃႈတီႈပလိၵ်ႈထႆး လႆႈၶဝ်ႈတိၺွပ်းတူဝ် တီႈၵၢတ်ႇလူင် / ၵၢတ်ႇၶျဵင်းလွႆး ဝဵင်းၵဵင်းမႆႇ ၸိုင်ႈထႆး ။

ၶႅပ်းႁၢင်ႈလႄႈ ၶေႃႈမုၼ်း ၸၢႆးဝၢၼ်ႈၼွၵ်ႈ

ၸဝ်ႈၼႃႈတီႈပလိၵ်ႈထႆး တိၺွပ်းၵူတ်ႇထတ်း ၸႅတ်ႈထၢမ် တီႈႁူင်းပလိၵ်ႈၸၢင်ႉၽိူၵ်ႇ ဝဵင်းၵဵင်းမႆႇ ဝႃႈ လႆႈႁဵတ်းတႄႉ လႅၼ်ၵိၼ် / ယွၵ်ႇၵိၼ်တႄႉ ယွမ်းႁပ်ႉတၢင်းၽိတ်း တင်းမူတ်း ဢၼ်လႆႈ ႁဵတ်းမႃး တင်းမူတ်း ဝႃႈၼႆ ။
ၵဵဝ်ႇၵပ်းလူၺ်ႈ ပႃႈၼၢင်းသူၺ်ႇ ပႅတ်ႉၵိၼ် / ယွၵ်ႇၵိၼ် ငိုၼ်းပီႈႁႅင်းၵၢၼ်တႆး ၸိူဝ်းမႃးႁဵတ်းၵၢၼ် ႁႃၵိၼ်လဵင်ႉတွင်ႉ ၼႂ်းၵဵင်းမႆႇၼႆႉၵူၺ်း တင်းမူတ်း မီးၵႂႃႇ 25 ၵေႃႉ / 25 ပွၵ်ႈယဝ်ႉ ။


မၼ်းၼၢင်းလၢတ်ႈဝႃႈ “ ၵဝ်ၶႃႈတေတူၺ်း ဢွၼ်တၢင်းၵွၼ်ႇ ဝႃႈၵေႃႉလႂ်သႂ်ႇၶမ်း ဢမ်ႇသႂ်ႇၶမ်း ၊ ပေႃးၵေႃႉသႂ်ႇၶမ်းမႃး ၵႂႃႇလၢတ်ႈတေႃႇပိူၼ်ႈ ႁႂ်ႈပိူၼ်ႈၸႂ်ဢူၼ်ႈၸႂ်ဢွၼ်ႇသေ ႁႂ်ႈပိူၼ်ႈႁၵ်ႉႁဝ်း ႁႂ်ႈပိူၼ်ႈၶႂ်ႈပၼ်ႁဝ်း ႁဵတ်းၼၼ်ၵူၺ်း ” ဝႃႈၼႆ ။


ပီႈၼွင်ႉႁႅင်းၵၢၼ်တႆး ၸိူဝ်းဢၼ်ထုၵ်ႇၺႃးယွၵ်ႇ / လႅၼ်ၵိၼ်တႄႉ မၢင်ၵေႃႉ ထုၵ်ႇၺႃးယွၵ်ႇ ၶမ်း ၼိုင်ႈဝၢတ်ႇ သွင်ဝၢတ်ႇ ၵေႃႈမီး ၸိူဝ်းထုၵ်ႇၺႃးယွၵ်ႇလႅၼ်ၵိၼ်ငိုၼ်းၵေႃႈမီး ။ မၢင်ၵေႃႉထတ်းသၢင် လၢတ်ႈဝႃႈ သင်ဝႃႈၼႂ်းတူဝ် ပႃႈၶဝ် ဢမ်ႇမီး ယႃႈယႃ သေမဵဝ်းမဵဝ်းၼႆႉ တေႁဵတ်းႁိုဝ် ဢဝ်လႆႈ လၢတ်ႈလႆႈ ၶမ်းလႄႈငိုၼ်း ငၢႆႈငၢႆႈၼင်ႇၼႆႉ ။


ၼၢင်းၶိၼ်ႇ ၵူၼ်းၸႃႇတိ ဝဵင်းလၢႆးၶႃႈ လၢတ်ႈဝႃႈ “ ပေႃးမၼ်းလုပ်ႈႁဝ်းယူႇတိၵ်းတိၵ်း မၼ်းမိူၼ်ႁဝ်းၶႂ်ႈလပ်းသေ မီးသင်ၵေႃႈ ၶႂ်ႈဢဝ်ပၼ်မၼ်းမူတ်းဢေႃႈ ။ ၶႃႈတႄႉ လႆႈသုမ်းၶမ်း ပၼ်မၼ်း ၼိုင်ႈဝၢတ်ႇ တေတူၵ်းငိုၼ်းထႆး 2 မိုၼ်ႇဝၢတ်ႇ ယွၼ်ႉၼၼ်လႄႈ ပူၼ်ႉမႃးသွင်သၢမ်ဝၼ်းၼႆႉ ၶႃႈၸင်ႇလႆႈၵႂႃႇတင်ႇလၢတ်ႈတီႈႁူင်းပလိၵ်ႈထႆးယဝ်ႉ-ဝႃႈၼႆ ။


သိုပ်ႇလၢတ်ႈထႅင်ႈဝႃႈ လွင်ႈပဵၼ်ၸိူဝ်းၼႆႉ ၶႃႈၵေႃႈထၢင်ႇဝႃႈ ၶႃႈထုၵ်ႇၺႃးၵေႃႉလဵဝ်ၵူၺ်း ဝူၼ်ႉၼင်ႇၼႆႉ တီႈတႄႉမႃး ၵူၼ်းၸိူဝ်းထုၵ်ႇလႅၼ် ၵွၼ်ႇၼႃႈၶႃႈ တေၺႃးၼၼ်ႉၵေႃႈ မီးထႅင်ႈတၢင်းၼမ် မၢင်ၵေႃႉ လႆႈထုၵ်ႇယွၵ်ႇၵႂႃႇ ၶမ်းသွင်ဝၢတ်ႇၵေႃႈမီး  ယွၵ်ႇလႅၼ် ဢဝ်ငိုၼ်းပိူၼ်ႈၵႂႃႇၵေႃႈမီး ” ဝႃႈၼႆ ။


ၼၢင်းလိူၼ် ၵေႃႉထုၵ်ႇၺႃး ပႃႈၼၢင်းသူၺ်ႇ ယွၵ်ႇလႅၼ်ၵိၼ် လၢတ်ႈဝႃႈ “ ပူၼ်ႉမႃး သၢမ်ပီပၢႆၼႆႉၶႃႈ လႆႈထုၵ်ႇပႃႈၵေႃႉၼႆႉယွၵ်ႇလႅၼ်ငိုၼ်းၶႃႈၵႂႃႇ 3 ၽၢၼ်းပၢႆ ၶႃႈ မိူဝ်ႈတေဢဝ်ငိုၼ်းၶႃႈၵႂႃႇၼၼ်ႉ မၼ်းလၢတ်ႈၼႄၶႃႈဝႃႈ ရူတ်ႉၶိူင်ႈမၼ်း  ၸဝ်ႈၼႃႈတီႈပလိၵ်ႈ တိၺွပ်းဝႆႉ တေမိူဝ်းဢဝ် ရူတ်ႉမၼ်းၶိုၼ်းၼႆသေ ႁႂ်ႈၶႃႈမိူဝ်းသူင်ႇ ၶႃႈၵေႃႈ မိူဝ်းသူင်ႇဢဝ်ရူတ်ႉၶိူင်ႈ လုၵ်ႉတီႈၸဵင်ႇၵၢတ်ႇမိူင်းမႂ်ႇၼႆႉသေ ၵႂႃႇသူင်ႇတီႈၽၵ်းတူ တႃႈၽေး ႁဵတ်းၼၼ်သေ ဢုပ်ႇၵၼ်ၵႂႃႇၸွမ်းတၢင်း ၽိူဝ်ႇထိုင်တီႈၽၵ်းတူတႃႈၽေး ၶႃႈလႆႈၸူၵ်းပၼ်ငိုၼ်းမၼ်းၼၢင်း 3 ၽၢၼ်းပၢႆပၢႆ ။ ၶႃႈထၢင်ႇတႄႉ ၼႂ်းတူဝ်ပႃႈၶဝ်တေမီးယႃႈယႃ သင်သေမဵဝ်းမဵဝ်းၼၼ်ႉယဝ်ႉ ႁဵတ်းသင်ႁဝ်းသမ်ႉပၼ်ငိုၼ်းလႆႈငၢႆႈငၢႆႈ ” ဝႃႈၼႆ ။


ၶႂ်ႈၾၢင်ႉထိုင် ပီႈၼွင်ႉႁႅင်းၵၢၼ်တႆး ၼႂ်းၵဵင်းမႆႇၶႃႈ ၵူၼ်းႁဵတ်းလႅၼ်ၵိၼ်ပိူၼ်ႈၸိူဝ်းၼႆႉ ၼႂ်းၵဵင်းမႆႇၼႆႉ မၼ်းမီးၼမ်ၼႃႈ သမ်ႉထႅင်ႈလွင်ႈၼိုင်ႈၵေႃႈ ပီႈၼွင်ႉတႆးႁဝ်း သူင်သိုဝ်ႉၶမ်း ႁွႆႈၶမ်းၵၼ်ၼမ် တေႃႇသိုပ်ႇၵႂႃႇၼႃႈ ႁႂ်ႈဢွၼ်ၵၼ် ၾၢင်ႉသတိၵၼ်ၵူႈၵေႃႉသေၵမ်း ၼၢင်းလိူၼ်ၵေႃႉၺႃးလႅၼ် ၾၢင်ႉတိူၼ်းပီႈၼွင်ႉတႆး တင်းသဵင်ႈၼင်ႇၼႆ ။


ၵဵဝ်ႇၵပ်းလူၺ်း လွင်ႈၼႆႉသေ ပီႈၼွင်ႉႁႅင်းၵၢၼ်တႆး ၸိူဝ်းဢၼ် မၼ်းၼၢင်းယွၵ်ႇလႅၼ်ၵိၼ်ၸိူဝ်းၼႆႉ ဢွၼ်ၵၼ်တင်ႇလၢတ်ႈတီႈႁူင်းပလိၵ်ႈထႆး ၼႂ်းၵဵင်းမႆႇ လၢႆလၢႆတီႈ ဝႆႉလႄႈ ပၵ်းပိူင်လူင်ပွင်ၸိုင်ႈထႆးမီးၸိူင်ႉႁိုဝ် ၸဝ်ႈၼႃႈတီႈပလိၵ်ႈထႆးၶဝ် တေၶိုၼ်ႈလုမ်းတြႃးၵူတ်ႇထတ်း ပၼ်တူတ်ႈတမ် ၵႂႃႇဝႃႈၼႆ ။