သင်ၶလုၵ်ႈႁဵၼ်းၸၼ်ႉၸွမ်ၼမ်းၼႃႈပီႈၼွင်ႉတႆးၼွၵ်ႈမိူင်းၼႂ်းမိူင်း ႁူမ်ႈႁွမ်းငိုၼ်းတွင်းၶူဝ်း ၶွင်သေၵႂႃႇသူႇၸႂ်းၵမ်ႉၸွႆႈ၊ ၶဝ်ႈၼမ်ႉတၢင်းၵိၼ် ၊ ၶူဝ်းၼုင်ႈတၢင်းဝႆပီႈၼွင်ႉၸိူဝ်းၺႃးၽေး သိုၵ်းသိူဝ်လၢႆတီႈ ၼႂ်းၸိုင်ႈတႆးပွတ်းႁွင်ႇ ။

ဝၼ်းတီႈ 12-13/06/2016 သင်ၶၸဝ်ႈႁဵၼ်းလိၵ်ႈတီႈၸၼ်ႉၸွမ်မိူင်းၵွၵ်ႇလႄႈၽူႈမီးပုၼ်ႈၽွၼ်း  ဢဝ်ငိုၼ်း 182,060 လႅၵ်ႈလႆႈငိုၼ်းမၢၼ်ႈ 6,145,500 ၵႂႃႇၸွႆႈထႅမ်ၵူၼ်းပၢႆႈၽေးသိုၵ်း တီႈဝၢၼ်ႈဝူဝ်းလူင် ၊ ဝၢၼ်ႈတေႃႉသၢင်ႇ ၊ ဝဵင်းၵျွၵ်ႉမႄး လႄႈ တီႈဝတ်ႉ ဝဵင်းၵဝ်ႇ ၊ ဝတ်ႉၽူဝ်းတေႃႇ ဝဵင်းသီႇပေႃႉ ၸိုင်ႈတႆးပွတ်းႁွင်ႇ ။


ၸဝ်ႈၼုမ်ႇတႆး ၼၼ်တသႃမိ လၢတ်ႈဝႃႈ - “ ႁဝ်းပီႈၼွင်ႉၼင်ႇၵၼ်ယၢၼ်ၵႆၵၼ်တၢၼ်ႇလႂ်ၵေႃႈႁဝ်း လူဝ်ႇၸွႆႈထႅမ်ၵၼ်၊ပၼ်ႁႅင်းၵၼ်၊ၸွႆႈၵၼ်ၵႄႈလိတ်ႈပၼ်ႁႃၵႂႃႇ ဢၼ်ၸဝ်ႈၶဝ်လႆႈၵႂႃႇၸွႆႈတႄႉ တီႈဝတ်ႉဝဵင်းၵဝ်ႇ ၸွႆႈထႅမ်ငိုၼ်း 1,050, 000 ၵျၢပ်ႈ ။ ဝတ်ႉၽူဝ်းတေႃႇ 20 သႅၼ်ၵျၢပ်ႈ ဝၢၼ်ႈဝူဝ်း လူင် 10 သႅၼ် ၵျၢပ်ႈလႄႈ ဝၢၼ်ႈတေႃႉသၢင်ႇ 10 သႅၼ်ၵျၢပ်ႈ ” ဝႃႈၼႆ  ။


ႁိူၼ်းၵူၼ်းဝၢၼ်ႈဝူဝ်းလူင် ၼႂ်းၸေႈဝဵင်းၵျွၵ်ႉမႄးၺႃးၽဝ်ၺႃးယႃႉယွင်ၶဝ်ႈ ဝၢၼ်ႈပေႃးႁၢမ်း ၊ ၵူၼ်းဝၢၼ်ႈလႆႈသွၼ်ႈယူႇၸွမ်းဝတ်ႉၵျွင်းမုၼ်ၸဝ်ႈပၢင်ႇၵႅၼ်ႇမီးႁိမ်းၸမ် 1000  ။ ၼႂ်းၸိုင်ႈတႆးပွတ်းႁွင်ႇၸေႈဝဵင်းၼမ်ႉၶမ်း ဝၢၼ်ႈႁူဝ်ပၢင်ႇ ဢိူင်ႇမိူင်းဝုၺ်းၼၼ်ႉၵေႈၺႃးၽဝ် လႄႈၵူၼ်းဝၢၼ်ႈ ႁိမ်းၸမ် 1000 ႁၢမ်းႁႅၵ်းတီႈယူႇ မၢင်ၸိူဝ်းပွၵ်ႈႁိူၼ်းယဝ်ႉ သေတႃႉမၢင် ၸိူဝ်းယင်ႇ ပႆႇႁတ်းပွၵ်ႈႁိူၼ်း မႆၸႂ်တႃႇႁႃၵိၼ်လဵင်ႉတွင်ႉလႄႈလွင်ႈႁူမ်ႇလူမ်ႈ ။


ၸဝ်ႈၼုမ်ႇတႆး ၼၼ်တသႃမိ သိုပ်ႇလၢတ်ႈထႅင်ႈဝႃႈ - “ပီႈၼွင်ႉပၢႆႈၽေးသိုၵ်းႁဝ်းၶဝ်ၼႆႉတီႈယူႇၵေႃႈ လုလႅဝ် ၊ မၢင်ဝၢၼ်ႈပေႃးလႆႈၶိုၼ်းတႄႇမႂ်ႇ တိုၵ်ႉမီးတၢင်းယၢပ်ႇတင်းၼမ်လႄႈ တိုၵ်ႉလူဝ်ႇတၢင်းၸွႆႈ ထႅမ်တီႈ ပီႈၼွင်ႉႁဝ်းၶဝ်ထႅင်ႈတင်းၼမ်ယူႇ။ယိၼ်းၸူမ်းၶွပ်ႈၸႂ်ထိုင် ၸဝ်ႈတႃႇၼၵူႈၵေႃႉ ၸိူဝ်းၸွႆႈ ၶူဝ်းၶွင်ငိုၼ်းတွင်းမႃး ယိၼ်းၸူမ်းပႃးၸဝ်ႈၽူႈၸွမ်းသူင်ႇၼမ်းတၢင်းတင်းသဵင်ႈ ” ဝႃႈၼႆ ။


တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA တင်းၶွင်ႊသီႊဢဝ်ၶိုၼ်းၸိုင်ႈတႆး RCSS/ SSA လႆႈ ပဵၼ်ပၢင်တိုၵ်းၵၼ်ၶိုၼ်းႁၢဝ်ႈႁႅင်းမိူဝ်ႈႁူဝ်လိူၼ်မေႊ ၼၼ်ႉလႄႈသင် ၊ ပၢင်တိုၵ်း ယွၼ်ႉသိုၵ်း မၢၼ်ႈ ႁႅၼ်းသိုၵ်း လေႃႇတိုၵ်း တပ်ႉသိုၵ်းၸိုင်ႈတႆး SSPP/SSA  ၊ သိုၵ်းၶၢင် KIA လႄႈသိုၵ်းတဢၢင်း TNLA မိူဝ်ႈၵၢင်လိူၼ် မေႊ ၼႆႉလႄႈသင် ၊  ႁဵတ်းႁႂ်ႈၵူၼ်း မိူင်းၼပ်ႉ ႁူဝ်ႁဵင် လႆႈပၢႆႈယၢၼ်ႁိူၼ်းယေးတီႈယူႇ ။