ၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) တင်း ၸုမ်း “ ၶမ်းၵူႇ”  လွင်ႈႁဵၼ်းတႃႇၵႅမ်တူဝ်ႁုၼ်ႈယႂ်ႇ (Kham Ku Central) ႁူမ်ႈၵၼ် ၸတ်းႁဵတ်း ပၢင်သွၼ် ပၼ်ပိုၼ်ႉႁူႉပၢႆးႁၼ် ၾိုၵ်းလိူမ်ႉ ၽိူမ်ႉၼမ်ႉၵတ်ႉ ပၼ်ၵူၼ်းၼုမ်ႇ ၼႂ်းၸႄႈဝဵင်းသႅၼ်ဝီ တင်းမူတ်း ၵူၼ်းၼုမ်ႇၶဝ်ႈႁူမ်ႈ 40 ပၢႆ ။

Photo: Tai Youth Nework/ Ying Lao Tai/ Kham Ku Central

ဝၼ်းတီႈ 26-28/06/2016 ယၢမ်း 09:00-16:00 မူင်း ၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး( TYN) တင်း ၸုမ်းၶမ်းၵူႇ (Kham Ku Central) ႁူမ်ႈၵၼ် ၸတ်းႁဵတ်းပၢင်သွၼ် တႃႇ 3 ဝၼ်း  တႃႇပူင်သွၼ် ၽိူမ်ႉၼမ်ႉၵတ်ႉ ယုၵ်ႇမုၼ်း ၼမ်ႉၵတ်ႉ ၵူၼ်းၼုမ်ႇလႄႈ  ႁႂ်ႈၵူၼ်းၼုမ်ႇၼင်ႇၵၼ်ၽွမ်ႉႁူမ်ႈၵၼ် ၊ ပူၵ်းပွင်ပၼ်ၵူၼ်းၼုမ်ႇ ႁႂ်ႈၶိုၼ်ႈယႂ်ႇမႂ်ႇသုင်မေႃႁၵ်ႉႁွမ် ၸွႆႈထႅမ်ၵၢၼ်ၸိူဝ်ႉၸၢတ်ႈ/ၸိူဝ်ႉၶိူဝ်း ၸဵမ်ၸိူဝ်းၼႆႉ ။ ၸတ်းႁဵတ်းပၢင်သွၼ်တီႈ ႁူင်းႁေႃသႅၼ်မူဝ်ၶၢဝ် ၊ ၸႄႈဝဵင်းသႅၼ်ဝီ ၸိုင်ႈတႆး ပွတ်းႁွင်ႇ ။


ၼၢင်းသႅင်လၢဝ် ႁူဝ်ၼႃႈၸုမ်းၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) လၢတ်ႈဝႃႈ “ ယိူင်းဢၢၼ်းဢၼ်ႁဝ်းၶႃႈၶဝ် ၸတ်းႁဵတ်း ပၢင်ယုၵ်ႉမုၼ်း ၼမ်ႉၵတ်ႉၵူၼ်းၼုမ်ႇၼႆႉ ႁႂ်ႈၵူၼ်းၼုမ်ႇ တႆးႁဝ်း မီးတၢင်းႁူႉၼမ် တၢင်းႁၼ်ၵႂၢင်ႈ ၊ ႁႂ်ႈၵူၼ်းၼုမ်ႇတႆး ၼင်ႇၵၼ် ႁႂ်ႈမေႃႁူမ်ႈသၢင်ႈၵၢၼ် ၽွမ်ႉ ႁူမ်ႈၵၼ် ၊ ႁႂ်ႈမေႃပူၵ်းပွင်ပၼ်ၼမ်ႉၵတ်ႉၵူၼ်းၼုမ်ႇႁဝ်းၶိုၼ်း ႁႂ်ႈၶိုၼ်ႈယႂ်ႇမႂ်ႇသုင် မေႃႁၵ်ႉႁွမ် ၸွႆႈထႅမ်ၸိူဝ်ႉ ၶိူဝ်းႁဝ်းၶိုၼ်း ”  ဝႃႈၼႆ ။


သိုပ်ႇလၢတ်ႈထႅင်ႈဝႃႈ တီႈသႅၼ်ဝီတႄႉ တႄႇဢဝ် ဝၼ်းတီႈ 05/08/2015 ထိုင် မိူဝ်ႈလဵဝ် မီး 6 ပၢင်ယဝ်ႉ၊ ၼႂ်း 6 ပၢင်ၼႆႉ ပဵၼ်ၶႃႈႁဝ်း ၸတ်းဢဝ်” ဝႃႈၼႆ။
တီႈပၢင်ယုၵ်ႉမုၼ်းၼမ်ႉၵတ်ႉ ၵူၼ်းၼုမ်ႇတႆးၼၼ်ႉ ၽူႈပူင်သွၼ်ပၼ် ပဵၼ်ၶူးၸၢႆးသႅင်မိူင်း ၽူႈၸတ်းၵၢၼ်ႁွင်ႈႁဵၼ်း “ၶမ်းၵူႇ” (Kham Ku Central)၊ ၵူၼ်းၼုမ်ႇၸိူဝ်းမႃးၶဝ်ႈႁူမ်ႈ လဵပ်ႈႁဵၼ်းသမ်ႉ ပဵၼ်ၵူၼ်းၼုမ်ႇတႆး ၼႂ်းၸႄႈဝဵင်းသႅၼ်ဝီ ၼႆယဝ်ႉ။