ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ 8 ၸုမ်း ဢၼ်လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) ႁူပ်ႉထူပ်းဢုပ်ၵုမ်ၵၼ် ၼႂ်းၵဵင်းမႆႇ ၊ ႁၢင်ႈႁႅၼ်းပိူဝ်ႈတႃႇၶဝ်ႈႁူမ်ႈ ပၢင်ၵုမ်လူင်ပီႁူဝ်ပၢၵ်ႇ 21 ဢၼ် ၼၢင်းဢွင်ႇသၢၼ်းၸုၵျီႇ တေဢွၼ်ႁူဝ်ၸတ်းႁဵတ်း ။

ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ 8 ၸုမ်း ဢၼ်လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း ႁူပ်ႉထူပ်းဢပ်ၵုမ်ၵၼ် ၼႂ်းၵဵင်းမႆႇ

ဝၼ်းတီႈ 24-25/06/2016 ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ 8 ၸုမ်း ဢၼ်လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA) ႁူပ်ႉထူပ်းဢုပ်ၵုမ်ၵၼ် တီႈႁူင်းႁႅမ်းႁေႃႊလီႊၻေႊဢိၼ်ႊ ၼႂ်းၵဵင်းမႆႇ မိူင်းထႆး ။ ဢုပ်ႇဢူဝ်းၵိူဝ်းၵုမ်ၵၼ် လွင်ႈႁၢင်ႈႁႅၼ်းပိူဝ်ႈတႃႇၶဝ်ႈႁူမ်ႈ ပၢင်ၵုမ်လူင်ပီႁူဝ်ပၢၵ်ႇ 21 ႁိုဝ် ပၢင်ၵုမ်လူင်ပၢင်လူင် (ပွၵ်ႈ 2) ၊ လွင်ႈတႃႇႁူပ်ႉထူပ်းၸွမ်ၸိုင်ႈ ၊ လွင်ႈတႃႇႁူပ်ႉထူပ်းၽူႈၵိူဝ်းၵုမ်ဝၢၼ်ႈမိူင်း ၼၢင်းဢွင်ႇသၢၼ်းၸုၵျီႇ ၊ တႃႇႁူမ်ႈမိုဝ်းၵၼ်တမ်းဝၢင်းၽႅၼ်ၵၢၼ်ၵႂႃႇၶၢဝ်းယၢဝ်း ၸိူဝ်းၼႆႉ ။ ၽူႈႁပ်ႉပုၼ်ႈၽွၼ်းၵႅဝ်ပၢင် ႁူဝ်ပဝ်ႈၸုမ်း တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ပူးၸိၼ်ႇၵျူင်း လၢတ်ႈတီႈပၢင်ၵုမ်ၵႂႃႇၼင်ႇၼႆ ။


“ ဢၼ်ႁဝ်းၶႃႈယိပ်းၶိူင်ႈၵွင်ႈၵၢင်ႇသေ ဢုပ်ႇဢူဝ်းၵၢၼ်မိူင်းယူႇ ၊ တုၵ်းယွၼ်းသုၼ်ႇလႆႈႁဝ်းၶႃႈၼႆႉ မၼ်းမီးလွင်ႈၶဵင်ႇတႃႉဝႆႉယူႇ ။ ၵွပ်ႈၼၼ် ၸုမ်းယိပ်းၵွင်ႈၵၢင်ႇတင်းလၢႆၼႆႉ ထုၵ်ႇလႆႈၽွမ်ႉၵၼ် ၊ ထုၵ်ႇလႆႈႁူမ်ႈမိုဝ်းၵွင်ႉသၢၼ်တင်းပႃႊတီႊၵၢၼ်မိူင်းၶဝ်သေ ႁဵတ်းသၢင်ႈၵၢၼ်ငၢၼ်းၵႂႃႇ ၊ လွင်ႈငမ်းယဵၼ် တင်း လွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈ ၸိူဝ်းၼႆႉလမ်ႇလွင်ႈတႄႉတႄႉ - ၽူႈၼင်ႈၸိုင်ႈပၢင်ဢုပ်ႇၵုမ် ၸွမ်သိုၵ်းလူင်မူႇတူးသေးၽူဝ်း ၵၢဝ်ႇလၢတ်ႈၵႂၢမ်းပိုတ်ႇပၢင်ၵုမ်ၵႂႃႇၼင်ႇၼႆ ။


ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ 8 ၸုမ်း ဢၼ်လူင်းလၢႆးမိုဝ်းၵိုတ်းယိုဝ်း တူဝ်ႈမိူင်း (NCA)ဝႆႉသေ ႁူပ်ႉထူပ်းဢုပ်ၵုမ်ၵၼ်ၼႆႉ ပဵၼ်ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၊ ၸုမ်းပူတ်းပွႆႇၸိူဝ်ႉၸၢတ်ႈပဢူဝ်း (PNLO) ၊ တႅဝ်းႁူမ်ႈၸိူဝ်ႉၸၢတ်ႈၶျၢင်း (CNF) ၊ တႅဝ်းႁူမ်ႈၻီႊမူဝ်ႊၶရႅတ်ႊတိၵ်ႊ လုၵ်ႈႁဵၼ်းမိူင်းမၢၼ်ႈပတ်းပိုၼ်ႉ (ABSDF) ၊ ႁူမ်ႈတုမ်ၸိူဝ်ႉၸၢတ်ႈယၢင်းၽိူၵ်ႇ (KNU) ၊ တပ်ႉသိုၵ်းယၢင်းၵမ်ႉထႅမ်ၻီႊမူဝ်ႊၶရေႊၸီႊ (DKBA) ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈယၢင်း-ၶွင်ႊသီႊငမ်းယဵၼ် (KNLA-PC) ၊ ပႃႊတီႊပူတ်းပွႆႇၸိူဝ်ႉၸၢတ်ႈရၶႅင်ႇ (ALP) ၸိူဝ်းၼႆႉ ။