သင်ၶၸဝ်ႈလႄႈၽူႈမီးပုၼ်ႈၽွၼ်းဢိၵ်ႇၵူၼ်းမိူင်း 13 ဢိူင်ႇ 4 ၸႄႈဝဵင်း ႁူမ်ႈၵၼ်ၸတ်းပၢင်ၵုမ်ႁႃ လၢႆးတၢင်းၵႄႈလိတ်ႈပၼ်ႁႃယႃႈမဝ်းၵမ် ႁၼ်တၢင်းဢွၵ်ႇတူၵ်းလူင်းၵၼ် 3 ၶေႃႈ ။


ဝၼ်းတီႈ 25/06/2016 သင်ၶၸဝ်ႈ ၊ ၽူႈမီးပုၼ်ႈၽွၼ်းလႄႈၵူၼ်းမိူင်းၼႂ်းပိုၼ်ႉတီႈ ႁူမ်ႈၵၼ်ၸတ်းႁဵတ်း ပၢင်ၵုမ်လူင်တႃႇႁႃလၢႆးတၢင်းၵႄႈလိတ်ႈပၼ်ႁႃယႃႈမဝ်းၵမ် ၸတ်းႁဵတ်းတီႈ ဝတ်ႉသၢမ်သၼ် ဢိူင်ႇပၢင်ႁူႈ သၼ်လွႆသၼဵၼ်း ၸႄႈဝဵင်းပၢင်လူင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။ သင်ၶၸဝ်ႈ ၊ ၸဝ်ႈၼႃႈ တီႈၽူႈမီးပုၼ်ႈၽွၼ်း ၊ ၽူႈၵွၼ်းပွၵ်ႉဢိူင်ႇလႄႈပေႃႈမႄႈပီႈၼွင်ႉၵူၼ်းမိူင်း365 ၼႂ်း 13 ဢိူင်ႇ 4 ၸႄႈဝဵင်း မိူၼ်ၼင်ႇ ပၢင်လူင် ၊ လၢႆးၶႃႈ၊မိူင်းၵိုင်လႄႈဝဵင်းႁူဝ်ပူင်း ။
ပၢင်ၵုမ်ၼႆႉဢုပ်ႇဢူဝ်းတူၵ်းလူင်းလႆႈၸႂ်ၵၼ် 3 ၶေႃႈ - 1. ၾၢႆႇၵူၼ်းမိူင်းဢိူင်ႇလႂ်ဝၢၼ်ႈၼၼ်ႉတေလႆႈၵုမ်း ၵၼ်ၵူတ်ႇထတ်းပိုၼ်ႉတီႈၽႂ်မၼ်းၵႂႃႇ ၼင်ႇႁိုဝ်တေဢမ်ႇမီးၵူၼ်းသူႇသမ်းၵႃႉၶၢႆယႃႈမဝ်းၵမ် ။

2.  သင်ဝႃႈမီးၽႂ်ဢမ်ႇႁဵတ်းၸွမ်းၼင်ႇပၵ်းပိူင်ဢၼ်ၼႂ်းဢိူင်ႇဝၢၼ်ႈတမ်းဝၢင်းဝႆႉၼၼ်ႉၸိုင်တေဢဝ် သူင်ႇပၼ် ၾၢႆႇၽွင်းငမ်းၽူႈမီးဢမ်းၼၢတ်ႈၶဝ်သင်ယင်းဢမ်ႇမူၼ်ႉမႄးတူဝ်ၸိုင်တေလိုပ်ႈႁေႃးဢွၵ်ႇဝၢၼ်ႈ ။ 3. ၾၢႆႇသင်ၶၸဝ်ႈ တေပွၼ်းထမ်းသင်ႇသွၼ်ဢွၼ်ႁူဝ်ပၼ်တၢင်းႁူႉၽွၼ်းၸႃႉယႃႈမဝ်းၵမ်သေတိုၵ်းသူၼ်း ႁႂ်ႈတၵ်ႉၵႃႇၵႆ ယၢၼ်ယႃႈမဝ်းၵမ် ။
ၸဝ်ႈၶူးသီရိထမ်မ ၸဝ်ႈဢွၼ်ႁူဝ်တူင်ႉၼိုင်ၼၼ်ႉ လၢတ်ႈဝႃႈ – “ ယႃႈမဝ်းၵမ်ဢၼ် ဝႃႈၼႆႉမၼ်းႁဵတ်းႁၢႆႉ ၽဝၸၢတ်ႈ ပၢၼ်ၸဝ်ႈၵဝ်ႇ ၼႃႈႁိူၼ်းၸဝ်ႈၵဝ်ႇ ၊ ဝၢၼ်ႈမိူင်းၸဝ်ႈၵဝ်ႇယဝ်ႉ ၊ မၼ်းပဵၼ်မၢၵ်ႇၵွင်ႈလူင်ဢၼ်ၽူႈ ၶဵၼ်ႁဝ်း ယိုဝ်းႁဝ်းယူႇၵူႈဝၼ်းလူၺ်ႈတီႈႁဝ်းဢမ်ႇႁူႉတူဝ် ၽေးႁၢႆႉယႃႈမဝ်းၵမ် ၼႆႉၼမ်မႃးလိူဝ်ၵဝ်ႇ ၵူႈမိုဝ်ႉၵူႈဝ ၼ်း ။ ၵူၼ်းမိူင်းတႆးၵူၼ်းၼုမ်ႇႁဝ်းၵေႃႈဢွၼ်ၵၼ်တိတ်းၸပ်းယႃႈမဝ်းၵမ်ယၢမ်းလဵဝ်ၵႃႈၶၼ်ယႃႈမဝ်းၵေႃႈထုၵ်ႇ ၵွပ်ႈၼၼ်လႄႈဢၼ်ၸဝ်ႈၶဝ်ၵႂႃႇလႄႇပၼ်ပၢင်ပွၼ်ႈထမ်းတြႃးတိုၵ်းတေႃးယႃႈမဝ်းၵမ် ယိူင်းဢၢၼ်း ၼင်ႇႁိုဝ်ၵူၼ်းမိူင်းပေႃး တေႁူႉၽွၼ်းၸႃႉယႃႈမဝ်းၵမ်လႄႈၵႆယၢၼ်ယႃႈမဝ်းၵမ်ၼႆယဝ်ႉ” ။


မိူဝ်ႈဝၼ်းတီႈ 19 /06/2016 သင်ၶၸဝ်ႈ မိူၼ်ၼင်ႇ ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း ၊ ၸဝ်ႈၶူးၸေႃး တိၵႃႉ ဝတ်ႉၵုင်းတီး မိူင်းၵိုင် ၊ ၸဝ်ႈၶူးဢေႃးၸေႇယ ဝတ်ႉၵျွင်းၶမ်း ဝဵင်းလၢႆးၶႃႈ လႄႈၸုမ်းၵပ်းသၢၼ်လွင်ႈ ၼၢင်းယိင်းတႆး  ၼၢင်းသႅင်လူႇ လႄႈ ၼၢင်းၶမ်းယူင်ႇႁူမ်ႈၵႂႃႇပၼ်တၢင်းႁူႉလွင်ႈပၢႆးယူႇလီတီႈႁွင်ႈၵုမ်းၶင် ပၢင်သဝ်းတပ်ႉပလိၵ်ႈဝဵင်းႁူဝ်ပူင်း မီးၵူၼ်းတိတ်းၸပ်းယႃႈမဝ်းၵမ် တင်းမူတ်း 36 ၵေႃႉ ႁပ်ႉႁူႉထွမ်ႇ ဢဝ်ထမ်းလီၵႂၢမ်းၵႃႈ ။


ပၢင်ပွၼ်ႈထမ်းတိုၵ်းတေႃးယႃႈမဝ်းၵမ်ၼႆႉယူႇတီႈသင်ၶၸဝ်ႈလႄႈပီႈၼွင်ႉၵူၼ်းၼႂ်းပိုၼ်ႉတီႈႁူမ်ႈၵၼ်သေၸတ်းႁဵတ်းမႃးလၢႆတီႈလၢႆတၢင်းမိူၼ်ၼင်ႇ တၢင်ႉယၢၼ်း ၊ ထုင်ႉပူင်း ၊ သီႇသႅင်ႇ ၊ ပၢင်လူင် ၊ မိူင်းၼွင် ၊ လႃႈသဵဝ်ႈ ၊ ၼမ်ႉၸၢင် ၊ ၵူတ်ႉၶၢႆ ၊ လၢႆးၶႃႈ၊ မိူင်းၵိုင် ၊ လွႆလႅမ်ၸဵမ်ၸိူဝ်းၼႆႉ ။ လိူဝ်ၼၼ်ႉၸုမ်းၵပ်းသၢၼ် လွင်ႈၼၢင်းယိင်း တႆး (SWAN) ၵေႃႈ ၵႂႃႇပၼ်တၢင်းႁူႉလွင်ႈပၢႆးယူႇလီၸွမ်း ဝႃႈၼႆ ။