ၸုမ်းဢုပ်ႇဢူဝ်းလွင်ႈငမ်းယဵၼ် လူင်ပွင်ၸိုင်ႈမႂ်ႇ မီးၽႅၼ်တေၵႂႃႇႁူပ်ႉထူပ်း ဢုပ်ႇဢူဝ်းၸုမ်းပၢင်သၢင်း လႄႈၸုမ်းမိူင်းလႃး ၊ ၶႂ်ႈသပ်းလႅင်းၼႄ ၵဵဝ်ႇၵပ်းလွင်ႈပၢင်ၵုမ်လူင် ပီႁူဝ်ပၢၵ်ႇ 21 ဢၼ်ယိူင်းဢၢၼ်း ပိူဝ်ႈတႃႇသၢင်ႈလွင်ႈငမ်းယဵၼ်လႄႈ ၵိုတ်းပၢင်တိုၵ်းၼႂ်းမိူင်း ။

ဝဵင်းပၢင်သၢင်း ၼႃႈလိၼ်ၽွင်းငမ်းတူဝ်ၵဝ်ႇဝႃႉ

သိုဝ်ႇၶၢဝ်ႇမၢၼ်ႈႁၢႆးငၢၼ်းဝႃႈ ၸုမ်းဢုပ်ႇဢူဝ်းလွင်ႈငမ်းယဵၼ်ၸုမ်းမႂ်ႇ ၶွင်လူင်ပွင်ၸိုင်ႈမၢၼ်ႈ ဢၼ်ၻွၵ်ႊတိူဝ်ႊ တိၼ်ႇမဵဝ်းဝိၼ်း ဢွၼ်ႁူဝ်ၼမ်းၼႃႈ မီးၽႅၼ်တေၵႂႃႇႁူပ်ႉထူပ်း ဢုပ်ႇဢူဝ်းၵိူဝ်းၵုမ်ၵၼ်တင်း တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) လႄႈ တပ်ႉသိုၵ်းဢူၺ်းလီ ၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ (NDAA) မိူင်းလႃး ၊ ဢၼ်ပဵၼ်ၸုမ်းပႆႇလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း NCA ၸွမ်းလူင်ပွင်ၸိုင်ႈၵဝ်ႇ ။ မိူဝ်ႈလဵဝ်ၼႆႉ တိုၵ်ႉယူႇၼႂ်းၶၵ်ႉတွၼ်ႈၼတ်ႉ / ၶိၼ်း တတ်းမၵ်းဝၼ်းဢုပ်ႇဢူဝ်းၵၼ်လႄႈ ဢွင်ႈတီႈ တေဢုပ်ႇဢူဝ်းၵၼ်ယူႇ ၊ လၢမ်းၶၢတ်ႈဝႃႈ ပၢင်ဢုပ်ႇဢူဝ်းတေပဵၼ်ၼႂ်းဢမ်ႇႁိုင်ဝႆးဝႆးၼႆႉ - ၼႆယဝ်ႉ ။


ပိူဝ်ႈတႃႇတေႁူပ်ႉထူပ်းဢုပ်ႇဢူဝ်းၵၼ်ပွၵ်ႈၼႆႉ ပဵၼ်တၢင်းၶတ်းၸႂ်လူင်ပွင်ၸိုင်ႈမႂ်ႇ မိူင်းမၢၼ်ႈ ဢၼ်ပႃႊတီႊ NLD ဢွၼ်ႁူဝ်ၼမ်းၼႃႈ ၊ ၶႂ်ႈသပ်းလႅင်းၼႄၸၢဝ်းၶိူဝ်းၵဵဝ်ႇၵပ်းလွင်ႈ ပၢင်ၵုမ်လူင် ပၢင်လူင် ပီႁူဝ်ပၢၵ်ႇ 21 ဢၼ်လူင်ပွင်ၸိုင်ႈ တေၸတ်းႁဵတ်းၼႂ်းလိူၼ်ၵျူႊလၢႆႊၼႆႉ ။ ယိူင်းဢၢၼ်းပိူဝ်ႈတႃႇ သၢင်ႈလွင်ႈၶိုၼ်းလီၵၼ်ၼႂ်း ၸိူဝ်ႉၸၢတ်ႈလႄႈ ၵိုတ်းယိုတ်းပႅတ်ႈပၢင်တိုၵ်းၵၢင်မိူင်း ဢၼ်ပဵၼ်မႃးပီယၢဝ်းၶၢဝ်းႁိုင်ၼၼ်ႉ - ၼႆယဝ်ႉ ။


မီးႁၢႆးငၢၼ်းဝႃႈ ၼွၵ်ႈသေၸုမ်းဝႃႉ လႄႈၸုမ်းမိူင်းလႃးယဝ်ႉ ၸုမ်းဢုပ်ႇၵုမ်လွင်ႈငမ်းယဵၼ်ၸုမ်းမႂ်ႇၼႆႉ ယင်းၶတ်းၸႂ်ပိူဝ်ႈတႃႇဢုပ်ႇဢူဝ်းၵၼ်တင်း ၸုမ်းယိပ်းၵွင်ႈၵၢင်ႇ 3 ၸုမ်း တပ်ႉသိုၵ်းတဢၢင်း (TNLA) ၊ တပ်ႉသိုၵ်းၵူဝ်းၵၢင်ႉ (MNDAA) လႄႈ တပ်ႉသိုၵ်းရၶႅင်ႇ (AA) ၸိူဝ်းပဵၼ်ၸုမ်းတိုၵ်ႉတေႃႇသူႈတိုၵ်းတေႃး တပ်ႉသိုၵ်းမၢၼ်ႈယူႇ ။ 3 ၸုမ်းၼႆႉ တုၵ်းယွၼ်းဝႆႉႁႂ်ႈလႆႈႁူပ်ႉထူပ်းၵၼ်တင်း ၸုမ်းဢုပ်ႇဢူဝ်း လွင်ႈငမ်းယဵၼ်မၢၼ်ႈ တီႈဝဵင်းပၢင်သၢင်း ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ - ၼႆယဝ်ႉ ။


ၵဵဝ်ႇၵပ်းလွင်ႈၼႆႉ တၢင်းၸဝ်ႈၼႃႈတီႈတပ်ႉသိုၵ်းတဢၢင်း TNLA လၢတ်ႈဝႃႈ - ၸုမ်းတဢၢင်းၼႆႉ တူဝ်ႈတၼ်းတႃႇတေၵိုတ်းပၢင်တိုၵ်း ။ သင်ၸိူဝ်ႉဝႃႈလူင်ပွင်ၸိုင်ႈမႂ်ႇ မီးၵၢင်ၸႂ်ၶႂ်ႈသၢင်ႈလွင်ႈငမ်းယဵၼ်ၼႂ်းမိူင်း လႄႈ ဢုပ်ႇဢူဝ်းလွင်ႈၵိုတ်းတိုၵ်းၵေႃႈ တူဝ်ႈတၼ်းတႃႇတေပၼ်လွင်ႈႁူမ်ႈမိုဝ်း - ဝႃႈၼႆ ။


ၵပ်းၵၢႆႇလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 03/06/2016 ၸုမ်းဢုပ်ႇဢူဝ်းလွင်ႈငမ်းယဵၼ်ၸုမ်းမႂ်ႇ လႆႈဢုပ်ႇဢူဝ်းၵိူဝ်းၵုမ်ၵၼ်တင်း ၶွင်ႊသီႊႁူမ်ႈတုမ်ၵူႈၸၢဝ်းၶိူဝ်း (UNFC) ဢၼ်မီးပႃးၸုမ်းယိပ်းၵွင်ႈၵၢင်ႇ 9 ၸုမ်း တီႈၼႂ်းၵဵင်းမႆႇ ၸိုင်ႈထႆး ။


ၵဵဝ်ႇၵပ်းလွင်ႈၼႆႉ မီးႁၢႆးငၢၼ်းဝႃႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵမ်ႈၼမ်ၼႆႉ သူၼ်ၸႂ်ၶႂ်ႈၶဝ်ႈႁူမ်ႈပၢင်ၵုမ်လူင် ပၢင်လူင် ႁိုဝ် ပၢင်ၵုမ်လူင်ပီႁူဝ်ပၢၵ်ႇ 21 ဢၼ်တေယဵပ်ႇယၢင်ႈၸွမ်းႁွႆး ၶေႃႈမၼ်ႈၵႅၼ်ႇပၢင်လူင်မိူဝ်ႈပီ 1947 ။ ပၢင်ၵုမ်လူင်ပၢင်လူင် (ပွၵ်ႈၵမ်း 1) ပဵၼ်ၸွမ်သိုၵ်းဢွင်ႇသၢၼ်း ပေႃႈၶွင်ၼၢင်းဢွင်ႇသၢၼ်းၸုၵျီႇ တင်းၸဝ်ႈၾႃႉမိူင်းတႆး ၊ ၽူႈၼမ်းၶၢင် ၽူႈၼမ်းၶျၢင်း ဢုပ်ႇဢူဝ်းၵုမ်ၵၼ် ။


ၾၢႆႇၼိုင်ႈတၢင်းၼိုင်ႈ တၢင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၶဝ်ၵေႃႈ ဢွၼ်ၼႃႈတေၸတ်းႁဵတ်းပၢင်ၵုမ်လူင် ပီႁူဝ်ပၢၵ်ႇ 21 ၼႆႉ မီးၵၢၼ်ဢုပ်ႇဢူဝ်းၵိူဝ်းၵုမ်ၵၼ် ႁႃလွၵ်းၸုၵ်း ၶေႃႈလႆႈၸႂ်ဢၼ်ပဵၼ်သဵင်လဵဝ်ၵၼ် ပိူဝ်ႈတႃႇတၢင်ႇလၢတ်ႈဢုပ်ႇဢူဝ်း ၼႂ်းပၢင်ၵုမ်လူင် ပေႃးဝႃႈဢုပ်ႇဢူဝ်းၵၼ်တင်း လူင်ပွင်ၸိုင်ႈၼၼ်ႉယူႇ ။ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်းလၢႆၼႆႉ ဢွၼ်ၵၼ်မုင်ႈမွင်းဝႃႈ ၵၢၼ်သၢင်ႈလွင်ႈငမ်းယဵၼ်ၼႂ်းမိူင်းမၢၼ်ႈ ဢၼ်လူင်ပွင်ၸိုင်ႈမႂ်ႇ တေဢွၼ်ႁဵတ်းသၢင်ႈၼႆႉ တေလီလိူဝ်ဢၼ်လူင်ပွင်ၸိုင်ႈၵဝ်ႇ ဢွၼ်ႁဵတ်းသၢင်ႈမႃး ၼၼ်ႉယူႇ - ၼႆယဝ်ႉ ။