လၢႆမူႇလၢႆၸုမ်း ထုင်ႉၼမ်ႉၶမ်း ၊ မူႇၸေႈ ႁူပ်ႉၵၼ် ဢုပ်ႇဢူဝ်းတႃႁႃလၢႆးတၢင်းၵႄႈလိတ်ႈ ၊ ၸွႆႈထႅမ် ၵူၼ်းမိူင်း ၸိူဝ်းၺႃးၸုမ်းယိပ်းၵွင်ႈၵၢင် ၸုမ်းၼိုင်ႈတိၵႂႃႇ ၊ ႁႃတၢင်းတႃႇႁႂ်ႈၸၢဝ်းတႆး တင်း ၸၢဝ်းလွႆတဢၢင်း ၸၢင်ႈႁူမ်ႈၵၼ် ၵႄႈလိတ်ႈပၼ်ႁႃ ဢၼ်ၵိူတ်ႇ ၶိုၼ်ႈၼႂ်းပိုၼ်ႉတီႈ ။

ဝၼ်းတီႈ 09/06/2016 ၸုမ်းၵူၼ်းၼုမ်ႇတႆး TYO၊ ပႃႊတီႊၵၢၼ်မိူင်း ၊ ၵေႃလိၵ်ႈလၢႆးလႄႈ ၾိင်ႈငႄႈ တႆး ၊ ၸုမ်းNGO’s ၊ သင်ၶၸဝ်ႈလႄႈၵူၼ်းမိူင်းၼမ်ႉၶမ်း ။  ႁူမ်ႈၵၼ်ၸတ်းႁဵတ်းပၢင်ဢုပ်ႇဢူဝ်းၵဵဝ်ႇ လူၺ်ႈၵူၼ်းမိူင်းၼမ်ႉၶမ်းၺႃးတိၵႂႃႇ ၼႂ်းၵႄႈဝဵင်းၼမ်ႉၶမ်း လႄႈ ၼမ်ႉၽၵ်းၵႃ ၊ လိူဝ်ၼၼ်ႉ ႁူမ်ႈၵၼ် တႅမ်ႈ လိၵ်ႈသူင်ႇထိုင်လုမ်းလူင်ပွင်ၸိုင်ႈမိူင်းတႆး ဝဵင်းတူၼ်ႈတီး ၊ ပႃႊတီႊၵၢၼ်မိူင်း ၊ ၵူႈတိူင်းသိုၵ်း ၊ ၵူႈတပ်ႉမ ၊ ၽူႈၵွၼ်းဢိူင်ႇ ၊ ဝၢၼ်ႈ ၊ ၸႄႈဝဵင်း ၊ ၸႄႈတွၼ်ႈမူႇၸႄႈ ၸဵမ်ၸိူဝ်းၼႆႉ ။


ၼႂ်းပၢင်ၼႆႉမီးသင်ၶၸဝ်ႈ ၊ ၸုမ်းၵူၼ်းၼုမ်ႇ ၊ ပႃႊတီႊၵၢၼ်မိူင်း ၊ ၸုမ်းႁဵတ်း ၵၢၼ်တူင်ႇဝူင်းၵူၼ်း ၊ ပေႃႈမႄႈၵူၼ်းမိူင်းၶဝ်ႈႁူမ်ႈတင်းမူတ်း 150ပၢႆ ။ ႁူပ်ႉဢုပ်ႇၵုမ်ၵၼ်တီႈ ဝၢၼ်ႈၼွင်တိူင်း ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။


ယိူင်းဢၢၼ်း တႃႇႁႂ်ႈၵူၼ်းဝၢၼ်ႈၵူၼ်းမိူင်း ၸိူဝ်းၺႃးတိၵႂႃႇၸိူဝ်းၼၼ်ႉ ပေႃးတေပူၼ်ႉလွတ်ႈ လႆႈပွၵ်ႈႁိူၼ်းၶိုၼ်းၼင်ႇလွတ်ႈၽေး ၊  လွင်ႈပူၼ်ႉပႅၼ်သုၼ်ႇလႆႈၼိူဝ် ၵူၼ်းဝၢၼ်ႈၵူၼ်းမိူင်း ၸိူဝ်းၼၼ်ႉ ႁႂ်ႈပေႃးသုတ်းသဵင်ႈယဝ်ႉတူဝ်ႈၵႂႃႇ ဝႃႈၼႆ ။


ၸၢႆးၵွၼ်းၶိူဝ်း ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇ TYO လၢတ်ႈဝႃႈ - “ ႁဝ်းၶႃႈတႄႉ ၶႂ်းတုၵ်းယွၼ်းႁႂ်ႈၵူႈ မူႇၸုမ်းၼႂ်းသၽႃးလႄႈသင် ၊ ၽူႈမီးပုၼ်ၶဝ်လႄသင် ႁႂ်ႈႁႃလၢႆးတၢင်းတႃႇၸွႆႈထႅမ်ပၼ်သေၵမ်း ။ ၵူၼ်းမိူင်းၼႆႉဢမ်ႇမီး တၢင်းၽိတ်းသင်သေ လႆႈတူၵ်းပဵၼ်ယိူဝ်ႇပၼ်ႁႃ ၊ လႆႈႁပ်ႉတင်းတုၵ်ႉပေႉ ၵိၼ်လူလၢႆ ၸိူင်ႉၼႆၼႆႉ မၼ်းထုၵ်ႇ လီသုတ်းသဵင်ႈယဝ်ႉ ၊ မၼ်းဢမ်ႇထုၵ်ႇလီမီးယဝ်ႉဝႃႈၼႆ ။


သိုပ်ႇလၢတ်ႈထႅင်ႈဝႃႈ - မိူဝ်ႈၽွင်ႈဝၢၼ်ႈမိူင်းသုၵ်ႉယူႇၸိူင်ႉ ၼႆၵူၼ်းဝၢၼ်ႈ ၵူၼ်းမိူင်းၵႂႃႇလႂ်၊ မႃးလႂ်ၵေႃႈ ႁႂ်ႈၾၢင်ႉ ၊ ႁႂ်ႈဝႆႉသတိၼမ်ၼမ်သေၵမ်း ဝႃႈၼႆ ။


ၵူၼ်းဝၢၼ်ႈၵေႃႉၼိုင်ႈလၢတ်ႈဝႃႈ - ၶႂ်ႈတုၵ်းယွၼ်းၶႅၼ်းတေႃႇပွႆႇ ပၼ်ၶိုၼ်းသေ ၵမ်းဢမ်ႇဝႃႈပဵၼ် ၸုမ်းယိပ်းၵွင်ႈၵၢင်ႇဢၼ်လႂ်ၵေႃႈယဝ်ႉ လုၵ်ႈလၢင်းၼၢင်းမေးၵေႃႈ ဢမ်ႇမီးတီႈပိုင်ႈ ဢိင်ၸႂ်ယႂ်ႇၽႂ် တုၵ်ႉၶယၢပ်ႇၽိုတ်ႇၸႂ်တႃႇယူႇသဝ်းၵႂႃႇမိူဝ်းၼႃႈတႄႉတႄႉ ဝႃႈၼႆ ။


မိူဝ်ႈဝၼ်းတီႈ 05/06/2016 ၸၢႆးယီႈသႅင်မိူင်း ႁေႃၵႃး FF 9723 ဝိၼ်ႊ သႅၼ်ႊတူဝ်ႊယူဝ်ႊတႃႊ တၢင်ႇၵူၼ်း ၵူၼ်းဝဵင်းၼမ်ႉၶမ်း တၢင်ႇၵူၼ်း 6 ၵေႃႉ လုၵ်ႉတီႈဝၢၼ်ႈၼမ်ႉတီး ၸႄႈဝဵင်းၼမ်ႉၶမ်း သေ တေလူင်းၵႂႃႇတၢင်းလႃႈသဵဝ်ႈ ၊ ၵႂႃႇႁၢႆလၢႆပႅတ်ႈ ၼိူဝ်သဵၼ်ႈတၢင်း ၼမ်ႉၶမ်း - ၼမ်ႉၽၵ်းၵႃ ၼႂ်းၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ - ၽွင်းၶဝ်ဢၢင်ႈၵႂႃႇ တၢင်းမိူင်းမၢၼ်ႈ ။


ဢိင်ၼိူဝ်တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း TNLA မူၵ်းယိုဝ်း တပ်ႉသိုၵ်း ၸိုင်ႈတႆး မိူဝ်ႈႁၢင်ပီ 2015 သေ သွင်ၾၢႆႇပဵၼ်ပၼ်ႁႃ ၵၼ်မႃး ၶိူဝ်းယႆး တေႃႇထိုင် ယၢမ်းလဵဝ် ႁဵတ်းႁႂ်ႈၵူၼ်းဝၢၼ်ႈၵူၼ်း မိူင်းလႆႈပၢႆ ၽၢတ်ႇယၢၼ်ႁိူၼ်းယေး တီႈယူႇၼပ်ႉႁဵင်ၵေႃႉ ။