ဢိင်ၼိူဝ်သိုၵ်းတႆး RCSS/SSA တင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် တင်ႈတႄႇႁူဝ်လိူၼ်မေႊၼႆႉ မႃးႁၢဝ်ႈႁႅင်းသေ ဝၼ်းတီႈ 6 ပူၼ်ႉမႃးၼႆႉ သိုၵ်းၸုမ်းၼိုင်ႈ ၼုင်ႈၶူဝ်းသိုၵ်း TNLA လၢတ်ႈပႃးၵႂၢမ်းၶၢင် ၽဝ်ပႅတ်ႈဝၢၼ်ႈႁူဝ်ပၢင်ႇ ဢိူင်ႇမိူင်းဝီး မွတ်ႇမူၺ်ႉတင်းဝၢၼ်ႈ ။

ဝၢၼ်ႈႁူဝ်ပၢင်ႇ မိူင်းဝီး ဢၼ်ထုၵ်ႇ ၽဝ်ပႅတ်ႈ မိူဝ်ႈဝၼ်းတီႈ 06/05/2016

တႄႇႁူဝ်လိူၼ်မေႊမႃးၼႆႉ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (TNLA) ပဵၼ်ပၢင်တိုၵ်းၵၼ်မႃးႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ ။ ထိုင်မႃးမိူဝ်ႈဝၼ်းတီႈ 06/05/2016 ယၢမ်းဝၢႆးဝၼ်း 1 မူင်းပၢႆ ၊ မီးၸုမ်းယိပ်းၵွင်ႈၵၢင်ႇၸုမ်းၼိုင်ႈ ၶဝ်ႈမႃးၼႂ်းဝၢၼ်ႈႁူဝ်ပၢင်ႇ (ဢိူင်ႇႁူဝ်ပၢင်ႇ မိူင်းဝီး ၸႄႈဝဵင်းၼမ်ႉၶမ်း) သေ မႃးၽဝ်ပႅတ်ႈလင်ႁိူၼ်းၵူၼ်းဝၢၼ်ႈ 62 လင် - ၵူၼ်းၼႂ်းပိုၼ်ႉတီႈ ဢၼ်ႁူႉႁၼ်ၸွမ်းၵေႃႉၼိုင်ႈလၢတ်ႈ ။


သိုပ်ႇလၢတ်ႈဝႃႈ - ထိုင်မႃးယၢမ်းၵၢင်ၶမ်ႈ လင်ႁိူၼ်းၵူၼ်းဝၢၼ်ႈ ဢၼ်ၵိုတ်းလိူဝ်ဝႆႉလင်ႁိူၼ်း 6 လင် ၊ ၾႆးဢမ်ႇမႆႈၼၼ်ႉၵေႃႈ မႃးၵွႆၽဝ်ထႅင်ႈ ။ ၵူၺ်းၵိုတ်းႁူင်းႁဵၼ်းၸၼ်ႉငဝ်ႈ လႄႈဝတ်ႉ / ၵျွင်းမုၼ်ၸဝ်ႈ လင်လဵဝ်ၵူၺ်း။ လိူဝ်သေၼၼ်ႉ ႁႅမ်ၵိၼ်ၼိူဝ်ႉဝူဝ်း 2 တူဝ်သေဢဝ်ၼိူဝ်ႉမၼ်းၵႂႃႇ၊ ယင်းဢဝ်ပႃးၶူဝ်းၶွင် ၵူၼ်းဝၢၼ်ႈၵူၼ်းသူၼ်ၵႂႃႇပႃးထႅင်ႈ - ဝႃႈၼႆ ။


တင်ႈတႄႇဝၼ်းတီႈ 1-5/05/2016 ၼၼ်ႉ တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းတဢၢင်း (TNLA) ပဵၼ်ပၢင်တိုၵ်းၵၼ်ႁၢဝ်ႈႁႅင်း ။ မိူဝ်ႈဝၼ်းတီႈ 5/5/2016 ၼၼ်ႉ ၾၢႆႇ RCSS/SSA လႆႈထွၼ်ဢွၵ်ႇ တပ်ႉပၢင်သဝ်း ဢၼ်ပၵ်းယူႇတီႈၾၢႆႇဢွၵ်ႇဝၢၼ်ႈႁူဝ်ပၢင်ႇ ။ ပေႃး RCSS/SSA ထွၼ်ဢွၵ်ႇယဝ်ႉၵေႃႈ ထိုင်ဝၼ်းဝၼ်းတီႈ 6 မီးသိုၵ်းၸုမ်းၼိုင်ႈ သႂ်ႇသိူဝ်ႈၶူဝ်းသိုၵ်း TNLA သေ ၶဝ်ႈမႃးၼႂ်းဝၢၼ်ႈႁူဝ်ပၢင်ႇ ၊ မႃးၽဝ်ပႅတ်ႈႁိူၼ်းၵူၼ်းဝၢၼ်ႈ ၊ ၸုမ်းၵူၼ်းၸိူဝ်းၼၼ်ႉ လၢတ်ႈပႃးၵႂၢမ်းၶၢင် - ၼႆယဝ်ႉ ။


ဝၼ်းတီႈ 6 ၵၢင်ၶမ်ႈၼၼ်ႉ ၸုမ်းသိုၵ်းၸိူဝ်းဢၼ်မႃးၽဝ်ပႅတ်ႈဝၢၼ်ႈႁူဝ်ပၢင်ႇၶဝ် ႁႅမ်တၢႆၵူၼ်းဝၢၼ်ႈၵေႃႉၼိုင်ႈ ၸိုဝ်ႈလုင်းၸၢမ်ႇဢေး ဢႃယု 50 ပၢႆ ။ မၼ်းၸၢႆးၼႆႉ ႁူၼူၵ်ႇ ၊ ပဵၼ်ၵူၼ်းဢႃႉ ။ ၶဝ်ထဵတ်ႈထဵတ်ႈ/ ၸႅတ်ႈၸႅတ်ႈ ထၢမ်ထၢမ် ၊ ၵူၺ်းၵႃႈ လုင်းၸၢမ်ႇဢေး ဢမ်ႇလၢတ်ႈၵႂၢမ်းလႆႈ ။ ၶဝ်ၸီႉၼႄးဝႃႈ မၼ်းႁဵတ်းၵႅင်ႈပဵၼ်ၵူၼ်း ဢမ်ႇတဵမ်ၼႆသေ ပေႃႉထုပ်ႉၶႃႈႁႅမ်တၢႆပႅတ်ႈ - ၼႆယဝ်ႉ ။


ၵဵဝ်ႇၵပ်းလွင်ႈဝၢၼ်ႈႁူဝ်ပၢင်ႇ ထုၵ်ႇၾႆးၽဝ်ၼႆႉ ၾၢႆႇတပ်ႉသိုၵ်း TNLA ဢွၵ်ႇလိၵ်ႈပိုၼ်ၽၢဝ်ႇဝႃႈ- ၾၢႆႇတပ်ႉသိုၵ်း TNLA ၼႆႉ ဢမ်ႇမီးပေႃႇလသီႇ ဢၼ်ႁဵတ်းႁႂ်ႈၵူၼ်းမိူင်းတူၵ်းယၢၵ်ႈတူၵ်းၽၢၼ် ၊ ဢၼ်တီႉၺွပ်းၵူၼ်းမိူင်းဝႆႉၵေႃႈဢမ်ႇမီး ၊ ဢၼ်တေယႃႉၶူဝ်းႁိူၼ်း ၵူၼ်းဝၢၼ်ႈၵူၼ်းသူၼ်ၵေႃႈ ဢမ်ႇမီးပၵ်းပိူင် - ပိုၼ်ၽၢဝ်ႇမိူဝ်ႈဝၼ်းတီႈ 07/05/2016 ၼင်ႇၼႆ ။


ၵဵဝ်ႇၵပ်းလွင်ႈၼႆႉ ဝၼ်းတီႈ 08/05/2016 ၼႆႉ မူႇၸုမ်းၼႂ်းဝဵင်းၼမ်ႉၶမ်း 9 ၸုမ်း တႅမ်ႈလိၵ်ႈတၢင်ႇထိုင် ႁူဝ်ပဝ်ႈ PSLF/TNLA ၽိုၼ်ၼိုင်ႈ ။ ၼႂ်းလိၵ်ႈၼၼ်ႉ သၢၼ်ၶတ်းလွင်ႈဢၼ် မႃးႁဵတ်းႁၢႆႉၸႃႉၼိူဝ်ၵူၼ်းဝၢၼ်ႈ ႁူဝ်ပၢင်ႇ မိူင်းဝီး ၊ မိူဝ်းၼႃႈမႃးၵေႃႈ ယႃႇႁႂ်ႈပဵၼ်ထႅင်ႈၵူၺ်းဢမ်ႇၵႃး ႁႂ်ႈႁပ်ႉပုၼ်ႈၽွၼ်းလွင်ႈဢၼ်လႆႈ ပူၼ်ႉပႅၼ်ၼိူဝ်ၵူၼ်းဝၢၼ်ႈၵူၼ်းမိူင်း - မူႇၸုမ်းၼႂ်းၼမ်ႉၶမ်း 9 ၸုမ်း ဢွၵ်ႇလိၵ်ႈပိုၼ်ၽၢဝ်ႇၼင်ႇၼႆ ။