ပၢင်ၾိုၵ်းၽွၼ်ႉမေႃသွၼ်ႁူင်းႁဵၼ်းထမ်မ ဝဵင်းမိူင်းၼၢႆး ၵူၼ်းၶိုၼ်ႈႁဵၼ်းၼပ်ႉပၢၵ်ႇ



ပၢင်ၾိုၵ်းၽွၼ်ႉမေႃသွၼ်တႃႇသွၼ်လိၵ်ႈၼႂ်းႁူင်းႁဵၼ်းထမ်မ ဝဵင်းမိူင်းၼၢႆး ၸုမ်းသင်ၶလႄႈ ၵူၼ်းမိူင်းႁူမ်ႈၵၼ်ၸတ်းႁဵတ်း မီးမေႃသွၼ်ၼႂ်းပိုၼ်ႉတီႈမႃးၶိုၼ်ႈႁဵၼ်းၸမ် 200 ပၢၵ်ႇၵေႃႉ ။ ပိူဝ်ႈႁႂ်ႈႁူႉလွင်ႈၾိင်ႈထုင်ပုတ်ႉထ လႄႈၾိင်ႈထုင်းၸိူဝ်ႉၶိူဝ်းၸဝ်ႈၵဝ်ႇႁိူဝ်ႈႁိူင်း သင်ၶၸဝ်ႈ တူၼ်ၼိုင်ႈလၢတ်ႈ -

Photo By - Sao Siridhamma
ဝၼ်းတီႈ 05-11/05/2016 သင်ၶၸဝ်ႈလႄႈၵူၼ်းမိူင်းၼၢႆးႁူမ်ႈၵၼ် ၸတ်းႁဵတ်းပၢင်ၾိုၵ်းၽွၼ်ႉ မေႃသွၼ်ႁူင်းႁဵၼ်းထမ်မ တီႈဝတ်ႉ (ၵျွင်း) ဝဵတ်ႇၸႃႇရီႇ ဝဵင်းမိူင်းၼၢႆး ၸိုင်ႈတႆးပွတ်းၸၢၼ်း ။ ၼႂ်းပၢင်ၾိုၵ်းၽွၼ်ႉၼႆႉမီးၶူးပူင်သွၼ်မိူၼ်ၼင်ႇ ၸဝ်ႈၶူးသီရိထမ်မ ဝဵင်းတူၼ်ႈတီး ၊ ၸဝ်ႈၶူးပၺ်ၺႃ သႃႇလ ဝဵင်းသီႇပေႃႉ လႄႈၸဝ်ႈၶူးပၺ်ႇၺႃႇသႃႇမိ ဝဵင်းတၢင်ႉယၢၼ်း ဢွၼ်ႁူဝ် သင်ၶၸဝ်ႈ 20 တူၼ်ဢိၵ်ႇမေႃသွၼ်ၼႂ်းပိုၼ်ႉတီႈ ပူင်သွၼ်ပၼ်ၾိင်ႈငႄႈပုတ်ႉထ ၊ ဝွၵ်း ၊ ၸိူင်း ၊ လွင်ႈၵပ်းသၢၼ် တူင်ႇဝူင်းၵူၼ်း ၸဵမ်ၸိူဝ်းၼႆႉ မီးမေႃသွၼ်မႃးၾိုၵ်းၽွၼ်ႉ 147 ၵေႃႉ ။


ပၢင်ၾိုၵ်းၽွၼ်ႉၼႆႉမီးယိူင်းဢၢၼ်းလူင် 5 ၶေႃႈ  -

1. ႁႂ်ႈမေႃၶဝ်ႈဢွၵ်ႇဝတ်ႉဝႃး ႁႂ်ႈမေႃၼပ်ႉယမ်ၽြႃး ၊ တြႃး ၊ သင်ၶၸဝ်ႈ ။ 2. ႁႂ်ႈမီးတၢင်းႁူႉလွင်ႈထမ် မလႄႈႁႂ်ႈမီးတၢင်းယၢမ်ႈလီ ။ 3. ႁႂ်ႈဢဝ်ထမ်မသေပူၵ်းပွင်ၽဝၸဝ်ႈၵဝ်ႇ ။ 4. ႁႂ်ႈမီးလွင်ႈၽွမ်ႉႁူမ်ႈ ။ 5. ႁႂ်ႈမေႃႁၵ်ႉပႅင်းၽႃသႃ သႃသၼႃပုတ်ႉထၸဝ်ႈလႄႈၾိင်ႈငႄႈၾိင်ႈထုင်းပုတ်ႉထၸဝ်ႈ - ၸိူဝ်းၼႆႉ ။


ၸဝ်ႈၶူးသီရိထမ်မ ဝဵင်းတူၼ်ႈတီး လၢတ်ႈဝႃႈ - “ ၵူၼ်းၼုမ်ႇလႄႈၵူၼ်းမိူင်းၵူႈၵေႃႉထုၵ်ႇလီဢဝ် ထမ်မသႂ်ႇၸႂ် ၼင်ႇႁိုဝ်ပေႃးတေယၢၼ်ၵႆလဝ်ႈ ၊ ယႃႈလႄႈလွင်ႈဢမ်ႇလီတင်းလၢႆ ။ ပေႃးဝႃႈႁဝ်းမီး ထမ်မယူႇၼႂ်းၸႂ်ၸိုင်ႁဝ်းတိုၼ်းတေငိူင်ႉဝႄႈလႆႈလွင်ႈတၢင်းဢမ်ႇလီတၢင်းလူင်လႆႈယူႇ ။ ပေႃး ႁဝ်းငိူင်ႉဝႄႈလႆႈယဝ်ႉၸိုင် ႁဝ်းၵေႃႈတေပဵၼ်ၵူၼ်းလီၵႂႃႇၼႂ်းတူင်ႇဝူင်းသေပူၵ်းပွင်တူဝ်ႁဝ်း လႄႈဢိူင်ႇပိုၼ်ႉတီႈႁဝ်းႁႂ်ႈပေႃးၶိုၼ်ႈယႂ်ႇ ” - ဝႃႈၼႆ ။


ပၢင်ၾိုၵ်းၽွၼ်ႉၼႆႉယူႇတီႈ ၸဝ်ႈၶူးသီရိထမ်မ ဝဵင်းတူၼ်ႈတီး ၊ ၸဝ်ႈၶူးပၺ်ၺႃသႃႇလ ဝဵင်းသီႇပေႃႉ ၊ လႄႈၸဝ်ႈၶူးပၺ်ႇၺႃႇသႃႇမိ ဝဵင်းတၢင်ႉယၢၼ်းၸိူဝ်းၼႆႉဢွၼ်ႁူဝ်သင်ၶၸဝ်ႈ 20 တူၼ် လႄႈ ပေႃႈမႄႈပီႈၼွင်ႉၵူၼ်းမိူင်းၼႂ်းပိုၼ်ႉတီႈ ႁူမ်ႈၵၼ်သေၸတ်းႁဵတ်း မႃးလၢႆၸႄႈဝဵင်း မိူၼ်ၼင်ႇ - မိူင်းပွၼ် ၊ ပၢင်လူင် ၊ သီႇပေႃႉ ၊ ၵေးသီး ၊ လၢႆးၶႃႈ ၊ ၼမ်ႉၸၢင် ၊ မိူင်းၵိုင် ၊ ပၢင်ႇဢူး (မေႇမျိူႉ) ၊ မိူင်းပၼ်ႇ ၊ လၢင်းၶိူဝ်း ၊ မိူင်းၼၢႆး ၊ မွၵ်ႇမႂ်ႇ ၊ သီႇသႅင်ႇ ၸဵမ်ၸိူဝ်းၼႆႉ ။





 
© 2012 All Rights Reserved | Asean Celebrity | Fonts @ AtFonts | Free Templates