ပၢင်သွၼ် ၾိင်ႈငႄႈပုတ်ႉထလႄႈလိၵ်ႈလၢႆးတႆး မိူင်းယၢင်းလႅင်၊ ဢၼ်ၸတ်းႁဵတ်းပူင်သွၼ်မႃး တင်ႈတႄႇ ႁၢင်လိူၼ်မၢတ်ႊၶျ်ပီၼႆႉ ၊ မီးလုၵ်ႈႁဵၼ်းၼပ်ႉႁူဝ်ပၢၵ်ႇၼၼ်ႉ လႆႈလူင်းပၢင်သွၼ်ၵႂႃႇ ယဝ်ႉတူဝ်ႈလီငၢမ်း ၽွင်းႁူဝ်လိူၼ်မေႊၼႆႉ ။

ပၢင်သွၼ် ၾိင်ႈငႄႈပုတ်ႉထလႄႈလိၵ်ႈလၢႆးတႆး ဢၼ်သင်ၶၸဝ်ႈႁပ်ႉႁဵတ်း ၶူးမေႃသွၼ်သေ ပိုတ်ႇသွၼ် ႁဵၼ်းမႃး ၶၢဝ်းတၢင်းလႆႈလိူၼ်ပၢႆ ၊ တင်ႈတႄႇဝၼ်းတီႈ 23/03/2016 မႃးၼၼ်ႉ လႆႈၸတ်းပၢင်လူင်းပၢင်သွၼ် ၵႂႃႇတီႈဝတ်ႉဝၢၼ်ႈမွၼ်သူမ်ႈ ၸႄႈဝဵင်းလွႆၵေႃႇ မိူင်းယၢင်းလႅင်၊ မိူဝ်ႈဝၼ်းတီႈ 07/05/2016 ယဝ်ႉလီငၢမ်း ။ တီႈပၢင်လူင်းပၢင်သွၼ်ၼၼ်ႉ မီးၵၢၼ်တွၼ်ႈပၼ်ရၢင်းဝလ်း (သူး) လုၵ်ႈႁဵၼ်းၶဝ်ၸွမ်း ။


ၵဵဝ်ႇၵပ်းလွင်ႈၼႆႉ ၸဝ်ႈတူၼ်ၶူး ၸဝ်ႈၶူးဢႃတိတ်ႉၸ (ၼွင်ၶဵဝ်) လၢတ်ႈဝႃႈ - “ ၵူႈပီပူၼ်ႉမႃးတႄႉ ႁဝ်းၶႃႈ ဢမ်ႇယိုၼ်းထိုင်လႆႈၵူႈတီႈ ၊ ၸူးဢဝ်တီႈၽႂ်တီႈမၼ်းသေ ႁဵတ်းၵႂႃႇႁင်းၽႂ်မၼ်းၵူၺ်း ၊ မၢင်တီႈၵေႃႈထူၼ်ႈထိုင် ပွၵ်ႈၵမ်း 4 ပွၵ်ႈၵမ်း 5 ယဝ်ႉ ၊ မၢင်တီႈၵေႃႈပႆႇယၢမ်ႈပိုတ်ႇသွၼ်သေပွၵ်ႈ ၊ မၢင်တီႈၼႆႉ ႁဝ်းယင်းဢမ်ႇႁူႉဝႃႈမီးတႆးၵွၼ်ႇ ။ မိူဝ်ႈပူၼ်ႉမႃး 3 ပီၼႆႉ ၸၢႆးမွင်ႇမွင်ႇထူၺ်း ပွၵ်ႉလွႆၶမ်း ဝဵင်းလွႆၵေႃႇ ဢွၼ်ႁူဝ်သေ ၸတ်းႁဵတ်းပဵၼ်ပွႆးပီမႂ်ႇတႆး မႃးလႄႈ ပီႈၼွင်ႉတႆး ၸိူဝ်းတူၵ်းၸူမ်ယူႇၼႂ်းၵႄႈပိူၼ်ႈၸိူဝ်းၼၼ်ႉၵေႃႈ ၸင်ႇလႆႈငွၵ်ႈႁူဝ် ယိုၼ်းမိုဝ်းမႃးၸူးလႄႈ ႁဝ်းၶႃႈၸင်ႇလႆႈႁူႉၸၵ်းၶဝ်မႃးလွႆးလွႆး ”- ဝႃႈၼႆ ။


သိုပ်ႇလၢတ်ႈဝႃႈ - ယွၼ်ႉပိူဝ်ႈႁူႉၸၵ်းၶဝ်မႃးသေ ထိုင်မႃးမိူဝ်ႈႁူဝ်ဝႃႇပူၼ်ႉမႃးၼႆႉ ႁဝ်းၸဝ်ႈၶူးၼႂ်းဝတ်ႉ / ၵျွင်းပုပ်ႉပႃႇရူင်ႇၼႆႉ 2-3 တူၼ် လႆႈဢုပ်ႇၵုမ်ၵၼ်ဝႃႈ - သင်ဝႃႈလႆႈႁူမ်ႈၵၼ်သေ ႁဵတ်းပဵၼ်ပၢင်လဵဝ်ၵၼ် တင်းမူတ်းတႄႉ တေလီယူႇၼႆလႄႈ ၸင်ႇလႆႈၶိုၼ်းဢုပ်ႇတူၺ်းထႅင်ႈ ၸဝ်ႈတူၼ်ၶူးႁဝ်း ဝတ်ႉမွၼ်သူမ်ႈ ။ မၼ်းၸဝ်ႈၵေႃႈဝႃႈလီယူႇၼႆလႄႈ ၸင်ႇလႆႈၶိုၼ်းၵပ်းသိုပ်ႇတူၺ်း ၵေႃလိၵ်ႈလၢႆးၵူႈဝၢၼ်ႈဝၢၼ်ႈၵေႃႈ ၽွမ်ႉၸႂ်ယူႇ ။ ၵွပ်ႈၼၼ် ထိုင်မႃးပီၼႆႉ ႁဝ်းၶႃႈၸင်ႇလႆႈတိုတ်ႉတၢႆး ပိုတ်ႇပၢင်သွၼ်လိၵ်ႈတႆးႁဝ်း တိူဝ်းလိူဝ်မႃးတင်းၼမ်တင်းလၢႆၼႆႉယဝ်ႉ - ဝႃႈၼႆ ။


ဢၼ်ႁဝ်းၶႃႈလႆႈႁူမ်ႈၵၼ်တင်းပတ်းပိုၼ်ႉၼႆႉ ပဵၼ်ပွၵ်ႈၵမ်း 1 လႄႈ တီႈဢမ်ႇပႆႇလႆႈသွၼ်ၵေႃႈ တိုၵ်ႉၵိုတ်းမီး ယူႇထႅင်ႈတင်းၼမ် ၊ မေႃသွၼ်ၵေႃႈပႆႇဢွၵ်ႇလႆႈၼမ်လႄႈ ႁဝ်းၶႃႈလႆႈၵႂႃႇ ၸွၼ်ဢဝ်မေႃသွၼ် ႁဝ်းၶဝ်ၾၢႆႇပွတ်းထုင်ႉပူင်းလႂ် ၊ ပွတ်းယွင်ႁူၺ်ႈလႂ် ၊ ၾၢႆၶုၼ်ႇလႂ်၊ ပၢင်လွင်းလႂ်ၸိူဝ်းၼႆႉ ။ မေႃသွၼ်ႁဝ်း ဢၼ်ဢွၵ်ႇလႆႈၼႂ်းမိူင်းယၢင်းၼႆႉတႄႉ ဢွၵ်ႇလႆႈ19 ၵေႃႉၵူၺ်း ။ ဝူၼ်ႉဝႆႉထႅင်ႈဝႃႈ ပီၼႃႈၼႆႉ တေဢၢၼ်းႁွင်ႉ မေႃသွၼ်သေ တေပိုတ်ႇပၢင်ၾိုၵ်းၽွၼ်ႉယဝ်ႉ ၸင်ႇၵွႆႈၶိုၼ်းပိုတ်ႇ ပၢင်သွၼ်လိၵ်ႈတႆးၵႂႃႇထႅင်ႈၶႃႈ -  ၸဝ်ႈတူၼ်ၶူး ၸဝ်ႈၶူးဢႃတိတ်ႉၸ သိုပ်ႇလၢတ်ႈထႅင်ႈ ၼင်ႇၼႆ ။


ပၢင်သွၼ်ၼႂ်းတူင်ႇဝဵင်းလွႆၵေႃႇၼႆႉ 1. ပွၵ်ႉမင်ႇၵလႃႇ ။  2. ပွၵ်ႉမိူင်းလူင်း ။ 3. ပွၵ်ႉတႆး ။ 4. ပွၵ်ႉၼမ်ႉမေႃႇဝၢၼ် ။ 5. ဝၢၼ်ႈလိၼ်ၽုင်ဢွၼ်ႇ ။ 6. ဝၢၼ်ႈၵုၼ် ။ 7. ဝၢၼ်ႈလေႃးလႃႇလိ ။ 8.ဝၢၼ်ႈလေႃးပိတ ။ 9. ဝၢၼ်ႈလွႆလႅမ်ဢွၼ်ႇ ။ 10. ဝၢၼ်ႈမွၼ်သူမ်ႈ 11. ဝၢၼ်ႈၵဵင်းတုင်ဢွၼ်ႇ ။ 12. ဝၢၼ်ႈပၢင်ႇ ။ 13. ဝၢၼ်ႈလိၼ်ၽုင်လူင် ။ 14. ဝၢၼ်ႈၼႃးၵွႆ ။ 15. ဝၢၼ်ႈၵုၼ်ၼႃး ။ 16.ဝၢၼ်ႈၼႃးသူၼ်ၵူၺ်ႈ ။ 17. ဝၢၼ်ႈတိုဝ်ႉလူင် ။


ပၢင်သွၼ်ၼႂ်းတူင်ႇဝဵင်းတီႇမေႃးသူဝ်ႇ - 1. ဝၢၼ်ႈလထႂႃး ။ 2.ဝၢၼ်ႈလွႆငိုၼ်း ။ 3. ဝၢၼ်ႈၵုင်းသႃႇ ။ 4. ဝၢၼ်ႈၼမ်ႉၸၢမ်ၶမ်း (ၼိူဝ်) ။ 5. ဝၢၼ်ႈၼမ်ႉၸၢမ်ၶမ်း (တႂ်ႈ) ။ ပၢင်သွၼ်ၼႂ်းတူင်ႇဝဵင်းပေႃးလၶႄႉ - 1. ဝၢၼ်ႈမႂ်ႇ ။


ပၢင်သွၼ်ၼႂ်းတူင်ႇဝဵင်းမႄႈၸႄႉ 1. ဝၢၼ်ႈၼမ်ႉပဵင်းလိၼ် ။ 2. ဝၢၼ်ႈၼမ်ႉမၢင်း ။ ပၢင်သွၼ်ၼႂ်းတူင်ႇဝဵင်း ၾၢႆၶုၼ်ႇ (မိူင်းတႆး) ဢၼ်မႃးၶဝ်ႈႁူမ်ႈတွပ်ႇၸွမ်းၼႂ်းမိူင်းယၢင်း 1. မိူင်းပၢႆး (ပွၵ်ႉမဵဝ်ႉမ) ။ 2. ဝၢၼ်ႈၵၢင်ႉၵႅင်း ။ မေႃသွၼ်တၢင်းသဵင်ႈမီး - 53 ၵေႃႉ ၊ လုၵ်ႈႁဵၼ်းတၢင်းသဵင်ႈမီး - 616 ၵေႃႉ ။ လႆႈၽႄၵၼ်တွပ်ႇသွင်တီႈ ၊ တီႈဝတ်ႉပုပ်ႉပႃႇရူင်ႇမႃးတွပ်ႇမီး - 15 ဝၢၼ်ႈ ၊ လုၵ်ႈႁဵၼ်းမီး 371 ၵေႃႉ ။


တီႈဝတ်ႉမွၼ်သူမ်ႈ မႃးတွပ်ႇမီး - 9 ဝၢၼ်ႈ ၊ လုၵ်ႈႁဵၼ်းမီး 215 ၵေႃႉ ။ တီႈဝၢၼ်ႈၼမ်ႉမၢင်း ၸႄႈဝဵင်းမႄႈၸႄႉ တွပ်ႇႁင်းၵူၺ်း ၊ လုၵ်ႈႁဵၼ်းမီး 23 ၵေႃႉ ။ တီႈဝၢၼ်ႈၼမ်ႉပဵင်းလိၼ် ၸႄႈဝဵင်းမႄႈၸႄႉ တွပ်ႇႁင်းၵူၺ်းလုၵ်ႈႁဵၼ်းမီး 7 ၵေႃႉ ။


ပၢင်သွၼ် ၾိင်ႈငႄႈပုတ်ႉထလႄႈလိၵ်ႈလၢႆးတႆးၼႆႉ ပိုတ်ႇသွၼ်မႃးမိူဝ်ႈ 23/03/2016 ၊ တွပ်ႇလိၵ်ႈမိူဝ်ႈ 03/05/2016 ၊ လုၵ်ႈႁဵၼ်းမီးတေႃႇထိုင်ၸၼ်ႉ 3  ၊ သဵၼ်ႈမၢႆလုၵ်ႈႁဵၼ်းၶဝ်ႈတွပ်ႇမီး 616 ၵေႃႉ ၊ ပူၼ်ႉၶၢမ်ႈၸၼ်ႉၵႂႃႇ 483 ၵေႃႉ ၊ ၶမ်ၸၼ်ႉ 113 ၵေႃႉ ၊ ႁၢမ်းႁႅၵ်း 20 ၵေႃႉ ။