ပၢင်သွၼ်လၢႆးတႅမ်ႈလိၵ်ႈၶိုတ်းၸၼ်ႉ တႃႇတႅမ်ႈလိၵ်ႈၵၢၼ်ၶူၼ်ႉၶႂႃႉ လႄႈ ၵၢၼ်တႅမ်ႈလိၵ်ႈၶိုတ်းၸၼ်ႉတၢင်ႇပိူင် ဢၼ်ၻွၵ်ႊတိူဝ်ႊ ၸၢႆးၶမ်းၽွၼ်း ပၼ်ပၢင်သွၼ်ၼၼ်ႉ မီးသင်ၶၸဝ်ႈ လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ ၶဝ်ႈႁဵၼ်းဢဝ်တင်းၼမ် ။

ဝၼ်းတီႈ 5-7/05/2016 (ၶၢဝ်းတၢင်း 3 ဝၼ်း) လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းၵွၵ်ႇ ၊ လႆႈဢွၼ်ၵၼ် ၸတ်းႁဵတ်း ပၢင်သွၼ်လၢႆးတႅမ်ႈလိၵ်ႈၶိုတ်းၸၼ်ႉ တီႈဝဵင်းလူင်မိူင်းၵွၵ်ႇ ၸိုင်ႈထႆး ။ ပၢင်သွၼ်ၼႆႉ မီးလုၵ်ႈႁဵၼ်းသင်ၶၸဝ်ႈၶိုၼ်ႈႁဵၼ်းဢဝ်မွၵ်ႈ 20 တူၼ် ၊ ပဵၼ်လုၵ်ႈႁဵၼ်းသင်ၶၸိူဝ်းတိုၵ်ႉႁဵၼ်းၸၼ်ႉ B.A, M.A, Ph.D ၸိူဝ်းၼႆႉ ။ ပၢင်သွၼ် ယဝ်ႉတူဝ်ႈၵႂႃႇမိူဝ်ႈဝၼ်းတီႈ 07/05/2016 ၶၢဝ်းယၢမ်းႁူဝ်ၶမ်ႈ - ၼႆယဝ်ႉ ။


ပိူဝ်ႈတႃႇပဵၼ်မႃးပၢင်သွၼ်ပွၵ်ႈၼႆႉ ယူႇတီႈၸဝ်ႈၶူး ပၺ်ၺႃၽေႃးၵ ၸၼ်ႉၸွမ်မႁိတူလ်း လႆႈၵပ်းသိုပ်ႇ တိတ်းတေႃႇ ၻွၵ်ႊတိူဝ်ႊၸၢႆးၶမ်းၽွၼ်း ၸၼ်ႉၸွမ်ၵဵင်းမႆႇ မႃးပူင်သွၼ်ပၼ် ။ ၸၢႆးၶမ်းၽွၼ်းၵေႃႈ လႆႈဢဝ်လွင်ႈၵၢၼ်ၶူၼ်ႉၶႂႃႉ ဢၼ်တူဝ်ၵဝ်ႇလႆႈတႅမ်ႈမႃး ဢိၵ်ႇတင်း လွၵ်းလၢႆးဢၼ်လႆႈၸႂ်ႉတိုဝ်းမႃးၸိူဝ်းၼၼ်ႉ မႃးပူင်သွၼ်ပၼ် - ၼႆယဝ်ႉ ။


လွၵ်းလၢႆးဢၼ် Dr. ၸၢႆးၶမ်းၽွၼ်း ပူင်သွၼ်ၼႆႉ ဢဝ်ၶိူင်ႈသွပ်ႊဝႄႊ EndNoteX7 သေ ၸႂ်ႉတိုဝ်း ပူင်သွၼ်ပၼ် ၊ ၵမ်ႈၼမ် ဢၼ်လမ်ႇလွင်ႈသုတ်းၼၼ်ႉ လွၵ်းလၢႆးဢၼ်ဢဝ် EndNoteX7 သေ ႁဵတ်းၵၢၼ် တႅမ်ႈလိၵ်ႈ ၊ ပုၼ်ႈတႃႇၽူႈဢၼ်ႁဵၼ်း M.A, Ph.D ၶဝ် တေၶဝ်ႈတၢင်းတိုဝ်းလႄႈ ပဵၼ်ၵၢၼ်တၢင်းၸွႆႈထႅမ် ။ ၼႂ်းၶၢဝ်းတၢင်း 3 ဝၼ်းၼၼ်ႉ လႆႈပူင်သွၼ်ပၼ် 6 တွၼ်ႈ - ၼႆယဝ်ႉ ။


ၻွၵ်ႊတိူဝ်ႊ ၸၢႆးၶမ်းၽွၼ်း လၢတ်ႈဝႃႈ - “ လွၵ်းလၢႆးဢၼ်ၼႆႉ ဢဝ်ၸႂ်ႉလႆႈၼႂ်းၵၢၼ်တႅမ်ႈလိၵ်ႈၶိုတ်းၸၼ်ႉ တႃႇသေႇ ။ ႁဵတ်းဝႆႉပွၵ်ႈၼိုင်ႈယဝ်ႉ ၸႂ်ႉလႆႈတေႃႇၸူဝ်ႈ ”- ဝႃႈၼႆ ။


ၶူးပူင်သွၼ် Dr. ၸၢႆးၶမ်းၽွၼ်း ၵေႃႈၵႆႉၵႆႉဝႃႈ -“ တႃႇၽိုၼ်လိၵ်ႈၶူၼ်ႉၶႂႃႉတၢင်ႇ M.A, Ph.D ၵေႃႈလီ ၊ ဢမ်ႇၼၼ် တႅမ်ႈလိၵ်ႈလွင်ႈလဵပ်ႈႁဵၼ်း ၵူႈၸိူဝ်ႉၵူႈပိူင် တႃႇမိူင်းတႆးႁဝ်းၵေႃႈလီ ၊ တႃႇတေတႅမ်ႈမူႇလိၵ်ႈ ၵေႃႈယဝ်ႉ ၊ ပေႃးဝႃႈတေတႅမ်ႈလိၵ်ႈ ႁႂ်ႈမၼ်းၶိုတ်းၸၼ်ႉၶိုၵ်ႉၶႅမ်ႉၼႆၸိုင် ႁဝ်းတိုၼ်းထုၵ်ႇလႆႈႁူႉဝႆႉလွင်ႈ လွၵ်းလၢႆးႁဵတ်းၽိုၼ်ဢိင် လွၵ်းလၢႆးတႅမ်ႈမၼ်းလီလီၵွၼ်ႇ ၸင်ႇတေၶႅမ်ႉ ”- ဝႃႈၼႆ ။


လုၵ်ႈႁဵၼ်းသင်ၶၸဝ်ႈတူၼ်ၼိုင်ႈ လၢတ်ႈဝႃႈ - ဢၼ်ၸဝ်ႈၶဝ် လႆႈႁဵတ်းမႃးၶၢဝ်းတၢင်း 3 ဝၼ်းၼၼ်ႉ လႆႈဝႃႈမီးၽွၼ်းလီတႄႉတႄႉ ။ ယူႇတီႈၶူးၸၢႆးၶမ်းၽွၼ်း ဢဝ်လွၵ်းလၢႆးၼႆႉသေ တႅမ်ႈလိၵ်ႈၶူၼ်ႉၶႂႃႉ တႃႇတၢင်ႇ Ph.D ၽွၼ်းပၢင်ႈမၼ်းတေမႃးၸွႆႈထႅမ် ၵၢၼ်တႅမ်ႈလိၵ်ႈတႃႇတၢင်ႇဢဝ်ၸုမ်ႈ M.A, Ph.D ႁဵတ်းႁႂ်ႈႁဝ်း ငၢႆႈလူမ်ၸႂ်ပိူင်ၼိုင်ႈ ၊ တႃႇၽူႈတႅမ်ႈလိၵ်ႈတႆးႁဝ်း ပေႃးတေၶိုၼ်းၸၼ်ႉၵေႃႈပိူင်ၼိုင်ႈ - ဝႃႈၼႆ ။