ဝၼ်းတီႈ 25/05/2016 ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလႃႈသဵဝ်ႈ ၸတ်းပွႆးလူင်းပၢင်သွၼ် လိၵ်ႈတႆးၶၢဝ်းမႆႈ ပွၵ်ႈၵမ်း 5 မီးႁူဝ်ပဝ်ႈၵေႃလိၵ်ႈလၢႆး ၊ ၽူႈယႂ်ႇၵူၼ်းလူင် ၊ မေႃသွၼ်၊လုၵ်ႈႁဵၼ်းၶဝ်ႈ ႁူမ်ႈၸတ်းႁဵတ်းၵႂႃႇတီႈ ႁိူၼ်းပူႇၵႄႇ လုင်းၸၢႆးသၢင်ႇယုင်း လႄႈ ပႃႈၼၢင်းသႅင်သႃႇ ဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။

Photo By - Sai Hseng Hsorm

လုင်းၸၢႆးဢွင်ႇ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး လၢတ်ႈဝႃႈ - “ ယႃႇၵူၺ်းၸူးဢဝ်တီႈမေႃလိၵ်ႈ တႆးၵူၺ်း မေႃလိၵ်ႈတႆးယဝ်ႉ လီလႆႈသိုပ်ႇႁဵၼ်းထႅင်ႈလိၵ်ႈပိူၼ်ႈၵႂႃႇယူႇ ” ဝႃႈၼႆ ။


မေႃသွၼ်လူင် လုင်းၸၢႆးၸၢမ်ႁွမ် ၵေႃႈလၢတ်ႈဝႃႈ - “ လိၵ်ႈတႆးၼႆႉတႅမ်ႈၸိူင်ႉႁိုဝ်ၵေႃႈလူဢွၵ်ႇသဵင် မိူၼ်ၼၼ် သဵင်လၢတ်ႈလႄႈတူဝ်လိၵ်ႈတိုၼ်းၸပ်းပဵၼ်ႁွႆးလဵဝ်ၵၼ် ၵွပ်ႈၼႆၸိုဝ်ႈဝၢၼ်ႈၸိုဝ်ႈသူၼ် ၸိုဝ်ႈဝဵင်းႁဝ်းတၵ်းထုၵ်ႇလီလႆႈ တႅမ်ႈပႃးလိၵ်ႈတႆးယဝ်ႉ ၊ တီႈပွင်ႇၵေႃႈ ၸင်ႇတေဢမ်ႇၸၢင်ႈပၢႆႈပိူင်ႈ ” - ဝႃႈၼႆ ။


ၽူႈၵွၼ်းႁွင်ႈႁဵၼ်း ၸၢႆးဢၢႆႈသိူဝ် လၢတ်ႈဝႃႈ - “ ႁဝ်းဢမ်ႇမေႃဝႆႉၵႃႈၶၼ်လိၵ်ႈလၢႆးပၢႆပေႇၸဝ်ႈၵဝ်ႇ ဢမ်ႇသူင်ဢမ်ႇဝႆႉၼၵ်းတေႃႇၵၢၼ်ပၢႆးပၺ်ႇၺႃႇ ဢၼ်ပဵၼ်ၶွင်တႆးတႄႉတႄႉလႄႈ ႁူင်းႁဵၼ်းတႆး ဢွင်ႈသွၼ်လိၵ်ႈတႆး၊ ၵေႃႈၸင်ႇလႆႈယၢပ်ႇယဵၼ်းဝႆႉ ” ဝႃႈၼႆ ။


ပၢင်သွၼ်လိၵ်ႈတႆးၶၢဝ်းမႆႈၼႆႉတႄႇမႃးမိူဝ်ႈ ဝၼ်းတီႈ 21/03– 18/05/2016 မီးမေႃသွၼ် 3 ၵေႃႉ ၸၢႆး 1 ၵေႃႉ ယိင်း 2 ၵေႃႉ လုၵ်ႈႁဵၼ်းမီး 73 ၵေႃႉ ၸၢႆး 28 ၵေႃႉ ယိင်း 45 ၵေႃႉ ။