ဢိင်ၼိူဝ် ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းၼမ်ႉၶမ်းၼၼ်ႉ တင်ႈတႄႇႁူဝ်လိူၼ်မေႊၼႆႉမႃး တပ်ႉသိုၵ်းၸိုင်ႈတႆး (RCSS/SSA) တင်း တပ်ႉသိုၵ်းပူတ်းပွႆႇၸိူဝ်ႉၸၢတ်ႈတဢၢင်း (PSLF/TNLA) ၶိုၼ်းပဵၼ်ပၢင်တိုၵ်းၵၼ်မႃး ႁၢဝ်ႈႁႅင်းသေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼပ်ႉႁူဝ်ပၢၵ်ႇႁူဝ်ႁဵင် လႆႈပၢႆႈၽေးသိုၵ်း ။ ၼွၵ်ႈသေၼၼ်ႉ ၵူၼ်းဝၢၼ်ႈၵေႃႈလႆႈလူႉတၢႆ ၊ ႁိူၼ်းယေးၵေႃႈၺႃးၾႆးၽဝ် ၸဵမ်ၸိူဝ်းၼႆႉ ။ ယွၼ်ႉၼၼ် ယူႇတီႈပႃႊတီႊႁူဝ်သိူဝ် (SNLD) တင်းပႃႊတီႊတဢၢင်း (TNP) ဝဵင်းၼမ်ႉၶမ်း လႆႈႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇ မိူဝ်ႈဝၼ်းတီႈ 20/05/2016 ၊ တုၵ်းယွၼ်းႁႂ်ႈတင်းသွင်ၸုမ်း ႁႃတၢင်းဢွၵ်ႇ ၵႄႈလိတ်ႈပၼ်ႁႃႁူမ်ႈၵၼ်ဝႆးဝႆး - ၼႆယဝ်ႉ ။

ဝၢၼ်ႈႁိူၼ်းၵူၼ်း ထုၵ်ႇၾႆးၽဝ် ယွၼ်ႉၽေးပၢင်တိုၵ်း

ႁိူၼ်းယေးၶူဝ်းလဵင်းၵူၼ်းဝၢၼ်ႈ ၼႂ်းၸႄႈဝဵင်းသီႇပေႃႉ ၽွင်းပၢႆႈၽေးသိုၵ်း

ၵဵဝ်ႇၵပ်းလွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတိတ်းတေႃႇတွင်ႈထၢမ် လုင်းၸၢႆးယီႈၽူး ႁူဝ်ပဝ်ႈပႃႊတီႊ ႁူဝ်သိူဝ် ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ဝႆႉၼင်ႇၼႆ ။


ထၢမ် - ငဝ်းလၢႆးၼႂ်းၸႄႈဝဵင်းၼမ်ႉၶမ်း ပဵၼ်ၸိူင်ႉႁိုဝ်ၽွင်ႈၶႃႈ ?။


တွပ်ႇ - ငဝ်းလၢႆးၵဵဝ်ႇလူၺ်ႈၵူၼ်းပၢႆႈၽေးၸိူဝ်းၼႆႉတႄႉ ၶဝ်တိုၵ်ႉၵူဝ်ႁႄဝႆႉယူႇ၊ တႃႇတေၵႂႃႇႁဵတ်းၵၢၼ် ၼႂ်းသူၼ်ႁႆႈသူၼ်ၼႃးၶဝ်ၵေႃႈ ပႆႇႁတ်းၵႂႃႇႁဵတ်း။ မိူဝ်ႈလဵဝ် ၼႂ်းၸႂ်ၶဝ်တိုၵ်ႉပဵၼ်ဝႆႉယူႇၸိူင်ႉၼႆၶႃႈယဝ်ႉ ။


ထၢမ် - မိူဝ်ႈလဵဝ် ၵူၼ်းမိူင်းဢၼ်ၺႃးထူပ်းၺႃးတူတ်ႈတၢမ်ႇသိုၵ်းၼႆႉ မီးလၢႆဝၢၼ်ႈၶႃႈ ?။


တွပ်ႇ - မိူဝ်ႈလဵဝ် ဢၼ်ၺႃးၽေးတႄႉ ပဵၼ်ဝၢၼ်ႈႁူဝ်ပၢင်ႇၶႃႈ ၊ ပဵၼ်ဝၢၼ်ႈတႆးၶႃႈ ။ ၵူၺ်းၵႃႈ ၸဵမ်မိူဝ်ႈပီ 2015 ပူၼ်ႉမႃး ၵူၼ်းဢၼ်ပၢႆႈမီးယူႇတီႈသုၼ် / ပၢင်သဝ်းၵူၼ်းပၢႆႈၽေးၼၼ်ႉ မီးမွၵ်ႈ 900 ၵေႃႉပၢႆ ၊ ပႃးတင်းၸၢဝ်းပလွင်ႈၵေႃႈ မီးယူႇလၢႆဝၢၼ်ႈ ၊ ၵမ်ႈၼမ်လုၵ်ႉမႃးတၢင်းမိူင်းဝူၺ်း ၸိူဝ်းၼၼ်ႉ ။


ထၢမ် - ၵူၼ်းဝၢၼ်ႈၵူၼ်းမိူင်း ဢၼ်ပၢႆႈၽေးၼၼ်ႉ ၵမ်ႈၽွင်ႈၵေႃႈဝႃႈၸုမ်းသိုၵ်း TNLA ၽဝ်ဝၢၼ်ႈၽဝ်ႁိူၼ်း ၊ ၵူၺ်းၵႃႈ TNLA သမ်ႉဝႃႈပဵၼ်ၸုမ်း RCSS ။ လွင်ႈဢၼ်ၼႄးၵၼ်ယူႇၼႆႉ ယူႇတီႈႁူဝ်ပဝ်ႈႁဝ်း ႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - လွင်ႈၼႆႉတႄႉ ယူႇတီႈႁဝ်းၶႃႈၵေႃႈ လႆႈလူင်းပိုၼ်ႉတီႈ ႁၼ်မႃးတႂ်ႈၼႃႈတႂ်ႈတႃယဝ်ႉၶႃႈ ။ ဢၼ်ႁဝ်းၶႃႈ လႆႈတွင်ႈထၢမ်ၵူၼ်းဝၢၼ်ႈတႄႉ ၶဝ်ဝႃႈပဵၼ်ၸုမ်း TNLA ပဵၼ်ၵူၼ်းၽဝ် ဝႃႈၼႆၶႃႈဢေႃႈ ။


ထၢမ် - ပီႈၼွင်ႉပလွင်ႈလႄႈတႆးၼႆႉ ယူႇမႃးၸွမ်းၵၼ်ဢၢၼ်ႇႁူဝ်ပၢၵ်ႇပီသေ မိူဝ်ႈလဵဝ် သမ်ႉၵိူတ်ႇပဵၼ် ပၼ်ႁႃၸိူင်ႉၼႆၼႆႉ ထုၵ်ႇလီဢဝ်လွၵ်းလၢႆးလႂ်ၵႄႈလိတ်ႈပၼ်ႁႃၶႃႈ ?။


တွပ်ႇ - တႃႇတေၵႄႈလိတ်ႈပၼ်ႁႃၼႆႉတႄႉ ၼႂ်းၽိုၼ်လိၵ်ႈဢၼ်ႁဝ်တၢင်ႇယွၼ်းၼၼ်ႉ ၵေႃႈပႃးဝႆႉယဝ်ႉ။ ပိူင်လူင်မၼ်းတႄႉ ယူႇတီႈၸုမ်းသိုၵ်းသွင်ၸုမ်းၶဝ်၊ ၶဝ်ၸဝ်ႈထုၵ်ႇလီမႃးတေႃႇၼႃႈၵၼ်သေ ဢုပ်ႇဢူဝ်းၵၼ်တႅၵ်ႇတႅၵ်ႇလႅင်းလႅင်း ၸင်ႇတေသၢင်ႇထုၵ်ႇသုတ်း၊ ႁဝ်းၶႃႈႁၼ်ထိုင်ၸိူင်ႉၼႆ ၶႃႈယဝ်ႉ ။ မိူဝ်ႈလဵဝ်ၼႆႉတႄႉ ၵူၼ်းလွႆၵေႃႈၵူဝ်တႆး ၊ ၵူၼ်းတႆးၵေႃႈၵူဝ်လွႆ မၼ်းပဵၼ်ဝႆႉၸိူင်ႉၼႆ ယဝ်ႉၶႃႈ ။


ထၢမ် - ငဝ်းလၢႆးဢၼ်ပဵၼ်ယူႇမိူဝ်ႈလဵဝ်ၼႆႉ ၸွင်ႇလီမႆႈၸႂ်ဝႃႈ ပၼ်ႁႃၼႂ်းၵႄႈၵၢင်ၸၢဝ်းတႆးလႄႈလွႆၼႆႉ တေယႂ်ႇၶိုၼ်ႈမႃးၶႃႈႁႃႉ ?။


တွပ်ႇ - လွင်ႈၼႆႉတႄႉ ပေႃးဢမ်ႇၵႄႈလိတ်ႈၼႆ တေယႂ်ႇမႃးၶႃႈဢေႃႈ ၊ လီမႆႈၸႂ်တႄႉတႄႉၶႃႈ ။


ထၢမ် - ယူႇတီႈပႃႊတီႊႁူဝ်သိူဝ်လႄႈ ပႃႊတီႊတဢၢင်းႁူမ်ႈၵၼ်ဢွၵ်ႇလိၵ်ႈၼႆႉ ၶႂ်ႈႁႂ်ႈသိုၵ်းတင်းသွင်ၾၢႆႇ ယွၼ်ႇယၢၼ်းၵၼ်ၸိူင်ႉႁိုဝ် ၊ ၼင်ႇႁိုဝ်ပေႃးတေမီးလွင်ႈဢုပ်ႇဢူဝ်းၵၼ်ၶႃႈ ?။


တွပ်ႇ - လွင်ႈယွၼ်ႇယၢၼ်းၵၼ်ၼႆႉ ၶဝ်ၼင်ႇၵၼ်လူဝ်ႇမီးၼမ်ႉၸႂ်ၶႂ်ႈဢုပ်ႇဢူဝ်းၵၼ်သေ ၵႄႈလိတ်ႈ လွင်ႈပၼ်ႁႃၼႆႉၶႃႈဢေႃႈ။ ပေႃးၶဝ်ၸဝ်ႈမီးၼမ်ႉၸႂ်ၶႂ်ႈဢုပ်ႇဢူဝ်းၵၼ်ၸိူဝ်းၼႆႉ ၸွင်ႇတေၶႅမ်ႉလႅပ်ႈၶႃႈယဝ်ႉ ။


ထၢမ် - ၾၢႆႇ TNLA ဝႃႈ ပၼ်ႁႃဢၼ်ပဵၼ်ယူႇၼႆႉ ယွၼ်ႉပိူဝ်ႈသိုၵ်း RCSS ပူၼ်ႉပႅၼ်ၶဝ်ႈမႃး ၼႂ်းၼႃႈလိၼ်ၶဝ်လႄႈ တၢင်းၽိတ်းမီးတီႈ RCSS တင်းမူတ်း ၊ ၵူၺ်းၵႃႈၾၢႆႇ RCSS သမ်ႉဝႃႈယွၼ်ႉပိူဝ်ႈ TNLA ပႂ်ႉမူၵ်းယိုဝ်းၶဝ်လႄႈ လႆႈပဵၼ်ပၼ်ႁႃၼႆၶႃႈဢေႃႈ ။ လွင်ႈဢၼ်လႆႈပဵၼ်ပၼ်ႁႃ တီႈလိၼ်ၵၼ်ၼႆႉ ယူႇတီႈပႃႊတီႊၵၢၼ်မိူင်းသေ ၶႂ်ႈထတ်းသၢင်ၸိူင်ႉႁိုဝ်ၶႃႈ ?။


တွပ်ႇ - ဢၼ်ၶဝ်သွင်ၾၢႆႇပဵၼ်ပၼ်ႁႃၵၼ်ၼႆႉ ႁဝ်းၶႃႈဢမ်ႇၶႂ်ႈထတ်းသၢင်သင်ၶႃႈ ၊ ၶဝ်သွင်ၾၢႆႇ တေႁူႉၵၼ်ယူႇၶႃႈ ။ ယူႇတီႈပႃႊတီႊၵၢၼ်မိူင်းသေ ၵွပ်ႈၸုမ်းၼၼ်ႉၸုမ်းၼႆႉၼႆၼၼ်ႉ ႁဝ်းၶႃႈဢမ်ႇၶႂ်ႈထတ်းသၢင်ၶႃႈ ။


ထၢမ် - ဢိင်ၼိူဝ်ငဝ်းလၢႆးဢၼ်ပဵၼ်ယူႇယၢမ်းလဵဝ်ၼႆႉသေ ယူႇတီႈႁူဝ်ပဝ်ႈႁူဝ်သိူဝ် ၶႂ်ႈလၢတ်ႈသင်ထႅင်ႈၶႃႈ ?။


တွပ်ႇ - ၶႃႈႁဝ်းၶႂ်ႈလၢတ်ႈတႄႉ မိူၼ်ၼင်ႇဢၼ်ႁဝ်းၶႃႈ တႅမ်ႈၼႂ်းလိၵ်ႈၼၼ်ႉၶႃႈယဝ်ႉ ။ ၵွပ်ႈပိူဝ်ႈၸုမ်းသိုၵ်း သွင်ၸုမ်း လႆႈပဵၼ်ပၢင်တိုၵ်းၵၼ်ၼႆႉ ၵူၼ်းပၢႆႈၽေးၸိူဝ်းၼႆႉ တုၵ်ႉၶၶၢၼ်ၸႂ်ၼႅၼ်ႇယဝ်ႉ ။ လွင်ႈၼႆႉ ၼင်ႇႁိုဝ်တေႁဵတ်းႁႂ်ႈမၼ်းယဵၼ်ၵႂႃႇသေ ႁႂ်ႈၵူၼ်းဝၢၼ်ႈၵူၼ်းမိူင်း လႆႈယူႇၵတ်းၵတ်းယဵၼ်ယဵၼ်ၼၼ်ႉ ၶႂ်ႈႁႂ်ႈတင်းသွင်ၸုမ်းယွၼ်ႇယၢၼ်းပၼ်ၵၼ်သေ ဢုပ်ႇဢူဝ်းၵၼ်ၶႃႈ ။ လွင်ႈႁၵ်ႉတၢင်းႁွမ်မိူၼ်ၼင်ႇ ၵူၼ်းၸၢဝ်းလွႆတင်းတႆး ဢၼ်ႁဝ်းပဵၼ်ပီႈၼွင်ႉၵၼ်မႃးဢွၼ်တၢင်းၼၼ်ႉ ၼင်ႇႁိုဝ်ႁႂ်ႈမၼ်းပဵၼ်မိူၼ်ၵဝ်ႇၼၼ်ႉ ၶႂ်ႈႁႂ်ႈၶဝ်ၶတ်းၸႂ်ၵႂႃႇ ၊ ၶႃႈႁဝ်းၶႂ်ႈသင်ႇၸိူင်ႉၼႆၵူၺ်းၶႃႈ ။