ဝၼ်းတီႈ 12/04/2016 ယၢမ်း 20:00 မူင်းပၢႆ ၸၢႆးသႅင် ၵေႃႉပဵၼ်ၵူၼ်းၶပ်ႉရူတ်ႉ / ၵႃး မဝ်းလဝ်ႈလိူဝ် ႁႅင်းသေ လေႃႈတမ်သႂ်ႇ ႁၢၼ်ႉၶၢႆၶၢင်ႇပွင်းလႄႈ ရူတ်ႉၶိူင်ႈလၢႆလၢႆလမ်း တီႈႁူဝ်ၵၢတ်ႇ ပွၵ်ႉ 3 ဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ။

ၸၢႆးၶမ်း ၵူၼ်းပိုၼ်ႉတီႈ ဢၼ်လႆႈႁၼ်တႂ်ႈတႃႈတႄႉ လၢတ်ႈဝႃႈ “ ၼႂ်းရူတ်ႉဢၼ်ၸၢႆးသႅင်ႁေႃႈမႃး ၼၼ်ႉ မီးၵူၼ်းသွင်ၵေႃႉ ၵေႃႈၼိုင်ႈပဵၼ်ၵူၼ်းႁေႃႈရူတ်ႉ ၊ ၵေႃႈၼိုင်ႈပဵၼ်ဢူၺ်းၵေႃႉ ၵူၼ်းၸၢႆး ၼင်ႈႁူဝ်ရူတ်ႉမႃးၸွမ်းၵၼ် ။ သင်တမ်သႂ်ႇသဝ်ၾႆးၾႃႉတႄႉ ဢမ်ႇၸၢင်ႈဝႃႈႁိုဝ် ၸွမ်းယဝ်ႉ ” ဝႃႈၼႆ ။


ၵူၼ်းၶၢႆၶၢင်ႇပွင်း ထုၵ်ႇရူတ်ႉတမ်/ၽႃႇၺႃးတႄႉ လၢတ်ႈဝႃႈ “ ရူတ်ႉ / ၵႃးၼႆႉ လေႃႈလူင်မႃး တီႈမေႃႈၶူဝ်ႈၶၢႆၶၢင်ႇပွင်းၶႃႈၼႆႉၵမ်းသိုဝ်ႈ ၊ ပူင်းၼမ်ႉမၼ်းၶူဝ်ႈၶၢင်ႇပွင်းၶႃႈၼႆႉ ႁႄႈဢွၵ်ႇမူတ်း မေႃႈၶူဝ်ႈၶၢင်ႇပွင်းၶႃႈၼႆႉ လႅဝ်မူတ်း ။ ၵၢတ်းၵႃႈ ၶႃႈဢမ်ႇၵႂႃႇယူႇတင်းၾၢႆႇၶႂႃမိုဝ်းလႃႈ သင်ဢမ်ႇၼၼ် တေထုၵ်ႇရူတ်ႉၽႃႇၺႃး၊ လွင်ႈလုသုမ်းတႄႉ တူၵ်းမႅၼ်ႈငိုၼ်း မွၵ်ႈ 7-8 မိုၼ်ႇ ” ဝႃႈၼႆ ။


ရူတ်ႉၶိူင်ႈၸိူဝ်းဢၼ်ၵိုတ်းဝႆႉၸွမ်းသဵၼ်ႈတၢင်းသေၺႃး ၸၢႆးသႅင် ႁေႃႈရူတ်ႉ ၽႃႇၺႃးမီးရူတ်ႉၶိူင်ႈ 4-5 လမ်း ၊ လုၵွႆၵူႈလမ်းယဝ်ႉ ဝႃႈၼႆ ။


ၼၢင်းဝုၺ်ႇဝုၺ်ႇလုၼ်ႇ ၸဝ်ႈၶွင်လူတ်ႉၶိူင်ႈ ထုၵ်ႇတမ် / ၽႃႇၺႃး လၢတ်ႈဝႃႈ “ ရူတ်ႉၶိူင်ႈၶႃႈ ႁဝ်းတႄႉ ၵိုတ်ႉဝႆႉတီႈႁိမ်းသဵၼ်ႈတၢင်း ဢၼ်ပိူၼ်ႈဢွၼ်ၵၼ်ၵိုတ်းဝႆႉၼၼ်ႉ ႁဵတ်းႁိုဝ်လႄႈသမ်ႉ မႃးတမ် / ၽႃႇရူတ်ႉၶိူင်ႈၶႃႈ ၵေႃႈဢမ်ႇႁူႉ ယွၼ်ႉၶႃႈႁဝ်းသမ်ႉ ၵႂႃႇသွၼ်းၼမ်ႉၵႅၼ်ၵွင်တင်းၼႂ်းသေ ၽိူဝ်ႇဢွၵ်ႇမႃး လႆႈႁၼ်ၸိူင်ႉၼႆႉ ရူတ်ႉၶိူင်ႈၶႃႈ လုၵွႆမူတ်း ယင်းဢမ်ႇၶီႇလႆႈယဝ်ႉ ” ဝႃႈၼႆ ။


ၵဵဝ်ႇၵပ်းလူၺ်ႈပၼ်ႁႃရူတ်ႉတမ် / ၽႃႇၼႆႉသေ ၸဝ်ႈၼႃႈတီႈပလိၵ်ႈမၢၼ်ႈ လႆႈၵုမ်းၶၢင်တူဝ် ၸၢႆးသႅင် ဝၢၼ်ႈၼွင်ၶမ်း တီႈႁူင်းပလိၵ်ႈ ၵဵင်းတုင် တေပိုတ်ႇဢမူ ဢဝ်လိူင်ႈ ၵႂႃႇၼႆယဝ်ႉ ။


ဝၼ်းတီႈ 13 ယၢမ်း 12:00 မူင်းၼၼ်ႉၵေႃႈ ရူတ်ႉၶိူင်ႈလမ်းၼိုင်ႈ ၽႃႇၺႃး ၸၢႆးမူၼ်း တီႈၼိူဝ်သဵၼ်ႈတၢင်း ၵဵင်းတုင် - မိူင်းယၢင်း တီႈၼႃႈဝၢၼ်ႈ ဝၢၼ်ႈၼႃးတႆး ထုၵ်ႇၶႃႁၢၵ်းတင်းၾၢႆႇသၢႆႉလႄႈ ၼႃႈၽၢၵ်ႇတႅၵ်ႇ လႆႈယဵပ်ႉပႅတ်ႇႁွႆး ။ တေႃႈလဵဝ် ၵူၼ်းမၢတ်ႇၸဵပ်း လႆႈသူင်ႇယူတ်းယႃတူဝ် ဝႆႉတီႈႁူင်းယႃၵဵင်းတုင် ၼႆယဝ်ႉ ။