ၸဝ်ႈတူၼ်ၶူး သုပၼ်ႇၺႃႇ  ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ၼွမ်းတမ်ႇလမ်ႇႁူဝ် (ၵၢၼ်ႇတေႃး) ၶွပ်ႈၶူပ်ႇပီလၢႆၼိုင်ႈပွၵ်ႈ တီႈတိူၵ်ႈၵမ်ႇမထၢၼ်း ဝဵင်ႈၸႄႈလၢၼ်ႉ မီးၵူၼ်းထဝ်ႈၽူႈဢႃယုသုင် 75 ပီ ၶိုၼ်ႈၼိူဝ်မႃး ၶဝ်ႈႁူမ်ႈ 100ပၢႆ ။

ဝၼ်းတီႈ 18/04/2016 ယၢမ်းဝၢႆးဝၼ်း တီႈတိူၵ်ႈၵမ်ႇမထၢၼ်း ဝဵင်းၸႄႈလၢၼ်ႉ ၸိုင်ႈတႆး ပွတ်းႁွင်ႇ ၸဝ်ႈတူၼ်ၶူး သုပၼ်ႇၺႃႇ ဢွၼ်ႁူဝ်ၼမ်းၼႃႈ ၸတ်းႁဵတ်းပၢင်ၵၢၼ်ႇတေႃး ၵူၼ်းထဝ်ႈ ၽူႈဢႃယုသုင် ပဵၼ်ပွၵ်ႈၵမ်း 8 ၽူႈဢႃယုသုင် 103 ၵေႃႉ မႃးၶဝ်ႈႁူမ်ႈ ႁပ်ႉ / ယိုၼ် ၵုသူလ် တၢင်းလီ ၼႆယဝ်ႉ ။


ၸၢႆးမၢဝ်းဢွၼ်ႇ ၽူႈပွင်ၵၢၼ်ၶပ်ႉၶိုင် ၶဝ်ႈႁူမ်ႈၼႂ်းပၢင်ၵၢၼ်ႇတေႃးလၢတ်ႈဝႃႈ “ ယူႇတီႈၸဝ်ႈတူၼ်ၶူး သုပၼ်ႇၺႃႇ ဢွၼ်ႁူဝ်ၼမ်းၼႃႈမႃးၵူႈပီ။ ပီၼႆႉ ၵူၼ်းထဝ်ႈၸၢႆး / ယိင်း မီး 103 ၵေႃႉ ၵူၼ်းထဝ်ႈ ဢႃယုသုင်သုတ်း 105 ပီ မီးၵေႃႉၼိုင်ႈ ။ ၶူဝ်းၶွင်ၵၢၼ်ႇတေႃးသမ်ႉ တေမီးၶူဝ်းၸႂ်ႉၶွင်ၵိၼ်လႄႈ ငိုၼ်းတွင်းၸဵမ်ၸိူဝ်းၼႆႉ ” ဝႃႈၼႆ ။


ပၢင်ၵၢၼ်ႇတေႃးၵူၼ်းထဝ်ႈပီ 2016 ၼႆႉ တႄႇဢဝ်ဢႃယု 75 ပီ ၶိုၼ်ႈၼိူဝ် ထဝ်ႈၸၢႆး မီး 33 ၵေႃႉ ၊ ထဝ်ႈယိင်း 70 ၵေႃႉ ႁူမ်ႈၵၼ် တင်းမူတ်း မီး 103 ၵေႃႉ ၊ သင်ၶၸဝ်ႈ 45 တူၼ် ၼႆယဝ်ႉ ။


ၵူၼ်းထဝ်ႈၸိူဝ်းဢႃယုသုင်မႃးၶဝ်ႈႁူမ်ႈသမ်ႉ ဝၢၼ်ႈၸႄႈလၢၼ်ႉ ၊ ဝၢၼ်ႈၼွင်မူဝ် ၊ ဝၢၼ်ႈသၢႆးၶၢဝ် ၊ ဝၢၼ်ႈတိၼ်ဝဵင်း ၊ ဝၢၼ်ႈၽၢႆႇတူင်ႈ ၊ ဝၢၼ်ႈၵွင်းၼႃး ၊ ဝၢၼ်ႈၼွင်သႅင် လႄႈ ႁူမ်ႈပႃးထႅင်ႈလၢႆလၢႆဝၢၼ်ႈ ၼႆယဝ်ႉ ။